རྒྱ་ནག་ཧུ་པེ་ཞིང་ཆེན་ནད་རིགས་སྟངས་འཛིན་དང་སྔོན་འགོག་ཁང་གི་གསང་བའི་ཡིག་ཆ་ཕྱིར་གྱར་བའི་ནང་དུ་རྒྱ་ནག་གཞུང་གིས་ཏོག་དབྱིབས་ནད་པ་དང་འདས་པོའི་གྲངས་འབོར་རྫུན་མ་བཟོས་ཡོད་པ་མ་ཟད་ཏོག་དབྱིབས་ནད་རྟགས་ངོས་མ་ཟིན་པར་ནད་པ་མང་པོ་འདས་གྲོངས་སུ་གྱུར་ཡོད་པའི་གནས་ཚུལ་ཐོན།
དེ་རིང་ཨ་རིའི་སི་ཨེན་ཨེན་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ཆར་གསར་ཁང་དེར་ཏོག་དབྱིབས་གཉན་རིམས་ཐོག་མར་མཆེད་སའི་རྒྱ་ནག་གི་ཧུ་པེ་ཞིང་ཆེན་གྱི་ནད་རིགས་སྟངས་འཛིན་དང་སྔོག་འགོག་ཁང་ (Hubie Provincial Centre for Disease Control and Prevention) གི་ནང་ཁུལ་གྱི་གསང་བའི་ཡིག་ཆ་ཞིག་ལག་སོན་བྱུང་ཡོད་པ་དང་། ཡིག་ཆ་དེ་དག་རྒྱ་ནག་གི་འཕྲོད་བསྟེན་ཚན་པའི་ནང་ལས་ཀ་བྱེད་མཁན་ཞིག་གིས་སྤྲད་ཅིང་། རྒྱ་ནག་གི་ནང་ཁུལ་གྱི་ཡིག་ཆ་ལ་རྒྱུས་མངའ་ཡོད་མཁན་དང་གཞན་ཆེད་མཁས་མི་སྣ ༦ གིས་ཞིབ་འཇུག་བྱས་པ་བརྒྱུད་ཡིག་ཆ་རྣམས་དངོས་བདེན་ཡིན་སྐོར་བརྗོད་འདུག
འདས་ལོའི་ཕྱི་ཟླ་ ༡༠ ནས་འདི་ལོའི་ཕྱི་ཟླ་ ༤ པའི་བར་གྱི་གནས་ཚུལ་ཕྱོགས་བསྡུས་བྱས་པའི་གསང་བའི་ཡིག་ཆ་དེར་ཁྱོན་ཤོག་གྲངས་ ༡༡༧ ལྷག་ཡོད་པ་དང་། དེའི་ནང་དུ་ཕྱི་ལོ་ ༢༠༢༠ ལོའི་ཕྱི་ཟླ་ ༢ ཚེས་ ༡༠ དང་། ཕྱི་ཟླ་ ༣ ཚེས་ ༧ བཅས་ཉིན་གཉིས་ཀྱི་ཏོག་དབྱིབས་གཉན་རིམས་ཀྱི་གྲངས་ཐོ་གསལ་བ་ཡོད་པ་དང་། དེ་ཡང་ཕྱི་ཟླ་ ༡༠ ཚེས་ ༡༠ ཉིན་རྒྱ་ནག་གཞུང་གིས་རྒྱལ་ཡོངས་ནང་ཏོག་དབྱིབས་གཉས་རིམས་འགོས་པའི་ནད་པ་གསར་པ་ ༢༤༧༨ ཐོན་ཡོད་སྐོར་བསྒྲགས་ཡོད་ཀྱང་། ནང་ཁུལ་གྱི་གསང་བའི་ཡིག་ཆ་དེའི་ནང་ཏོག་དབྱིབས་ནད་པ་གསར་པ་ ༥༩༡༨ ཐོན་ཡོད་སྐོར་བཀོད་ཡོད་འདུག དེ་བཞིན་རྒྱ་ནག་གི་གཞུང་འབྲེལ་གྲངས་ཐོ་ལྟར་ན། ཕྱི་ཟླ་ ༣ ཚེས་ ༧ ཉིན་ཏོག་དབྱིབས་ནད་པ་གསར་པ་ ༨༣ ལས་ཐོན་མེད་ནའང་། ནང་ཁུལ་གྱི་ཡིག་ཆ་དེའི་ནང་ཁྱོན་ནད་པ་གསར་པ་ ༡༡༥ བྱུང་ཡོད་འདུག
གཞན་ཡང་གསང་བའི་ཡིག་ཆ་དེའི་ནང་ཕྱི་ཟླ་ ༣ ཚེས་ ༧ ཉིན་བར་གཉན་རིམས་ཀྱི་རྐྱེན་པས་རྒྱ་ནག་ནང་ཁྱོན་མི་གྲངས་ ༣༤༥༦ ལྷག་རྐྱེན་འདས་སོང་ཡོད་ཚུལ་བཀོད་ཡོད་ཀྱང་། རྒྱ་ནག་གཞུང་གིས་ཉིན་དེའི་བར་ཁྱོན་མི་གྲངས་ ༢༩༨༦ ལས་རྐྱེན་འདས་སོང་མེད་སྐོར་བསྒྲགས་ཡོད་འདུག གསང་བའི་ཡིག་ཆ་དེར་ཞིབ་འཇུག་བྱེད་མཁན་གྱི་ཆེད་མཁས་མི་སྣས་རྒྱ་ནག་གཞུང་གིས་དངོས་ཡོད་དང་མི་འཚམ་པའི་གྲངས་ཐོ་ཁྱབ་བསྒྲགས་བྱས་དོན་ནི། གཉན་རིམས་ཀྱི་ཚབས་ཆེའི་རང་བཞིན་ཆུང་དུ་གཏོང་ཆེད་དང་། ཕྱོགས་གཞན་ནས་རྒྱ་ནག་གིས་གཉན་རིམས་ཀྱི་གྲངས་ཐོ་སྒྲིག་སྟངས་དེ་ཚད་ལྡན་ཞིག་མིན་པའི་རྐྱེན་གྱིས་ཡིན་སྐོར་བརྗོད་ཡོད་འདུག
དེ་བཞིན་གསང་བའི་ཡིག་ཆ་དེའི་ནང་། འདི་ལོའི་ཕྱི་ཟླ་ ༡ ཚེས་ ༡༠ ཉིན་གཉན་རིམས་བརྟག་དཔྱད་ཚན་པར་ཞིབ་འཇུག་བྱས་པའི་ཁྲོད། སྐབས་དེར་རྒྱ་ནག་གིས་ཕྱི་ལོ་ ༢༠༠༤ ལོར་འགོས་ཁྱབ་བྱུང་བའི་སཱར་གཉན་རིམས་ཀྱི་བརྟག་དཔྱད་འཕྲུལ་ཆས་དེ་ཉིད་ཏོག་དབྱིབས་གཉན་རིམས་བརྟག་དཔྱད་ཆེད་བཀོལ་སྤྱོད་བྱས་ཡོད་ཀྱང་། སྐབས་མང་པོར་འཕྲུལ་ཆས་དེས་ནད་པར་གཉན་རིམས་ཡོད་ནའང་མེད་པའི་གྲུབ་འབྲས་བཏོན་ཡོད་པ་སོགས་གཉན་རིམས་ཀྱི་ཐོག་མའི་ཟླ་བའི་སྐབས་ནས་ནད་པར་བརྟག་དཔྱད་དང་། ནད་ངོས་བཟུང་ནས་སྨན་བཅོས་བྱེད་རྒྱུ་བཅས་ལ་འགོར་འགྱངས་ཕྱིན་ཡོད་སྐོར་དང་། སྤྱི་ཡོངས་ནས་ཧུ་པེ་ཞིང་ཆེན་གྱི་ནད་རིགས་སྟངས་འཛིན་དང་སྔོག་འགོག་ཁང་དེར་འཕྲོད་བསྟེན་མི་སྣ་དང་འཕྲོད་བསྟེན་ཡོ་ཆས་སོགས་ཀྱི་ཐོག་ནས་འདང་ངེས་ཤིག་མེད་པ་མ་ཟད། གཉན་རིམས་མཆེད་སྐབས་མང་ཚོགས་ལ་དགོས་ངེས་ཀྱི་གནས་ཚུལ་མཁོ་སྤྲོད་དང་། འཛིན་སྐྱོང་ལ་སྔོན་འགོག་ཀྱི་ཐབས་བྱུས་མཁོ་འདོན་སོགས་ཀྱི་བྱ་གཞག་གནད་འགག་རྣམས་བསྒྲུབས་ཐུབ་མེད་སྐོར་བཀོད་ཡོད་འདུག
འདས་ལོའི་ཕྱི་ཟླ་ ༡༢ ཚེས་ ༡ ཉིན་ཧུ་པེ་ཞིང་ཆེན་གྱི་ཝུ་ཧན་གྲོང་ཁྱེར་ནས་ཏོག་དབྱིབས་ནད་པ་ཐོག་མ་དེ་ཐོན་ཡོད་པ་དང་། ཕྱི་ཟླ་དང་པོའི་ཟླ་མཇུག་ཙམ་ནས་རྒྱ་ནག་གཞུང་གིས་ནད་ཡམས་འགོག་ཐབས་ཆེད་རྒྱལ་ཡོངས་སྒོ་རྒྱ་བསྡམས་པ་མ་ཟད། ཐོག་མའི་དུས་སྐབས་སུ་ས་གནས་ཀྱི་མགོ་འཁྲིད་ཚོས་སྨན་ལི་ཝིན་ཉིང་ (Li Wenliang) གིས་མཚོན་པའི་འཕྲོད་བསྟེན་མི་སྣར་འཇིགས་སྐུལ་སྟངས་འཛིན་བྱས་ཡོད་པ་ལྟར། གསང་བའི་ཡིག་ཆ་དེའི་ནང་ཕྱི་ཟླ་ ༢ ཚེས ༡༠ བར་ཏོག་དབྱིབས་གཉན་རིམས་ཀྱི་རྐྱེན་པས་སྨན་བཅོས་འཕྲོད་ལས་པ་ ༦ རྐྱེན་འདས་སུ་སོང་བའི་གནས་ཚུལ་བཀོད་ཡོད་ཀྱང་། རྒྱ་ནག་གཞུང་གིས་སྐབས་དེར་གནས་ཚུལ་དེ་ཕྱིར་བསྒྲགས་བྱས་མེད་པ་རེད།
འདི་ལོའི་ཕྱི་ཟླ་ ༢ པ་ཙམ་ནས་ཏོག་དབྱིབས་གཉན་རིམས་འདི་རྒྱ་ནག་ནས་ཡུ་རོབ་དང་། དེ་ནས་ཨ་རི་བཅས་ལ་ཤུགས་ཆེར་འགོས་ཁྱབ་ཕྱིན་ཏེ། ད་བར་འཛམ་གླིང་ཁྱོན་ཡོངས་ནང་མི་གྲངས་ས་ཡ་ ༦༣ ལྷག་ནད་མནར་དང་། མི་གྲངས་ས་ཡ་ ༡།༤༧ ལྷག་རྐྱེན་འདས་ཕྱིན་ཡོད་ཅིང་། གཉན་རིམས་འགོས་ཁྱབ་ཤུགས་ཆེར་འགྲོ་བཞིན་པའི་སྐབས་དེར་ཨ་རི་གཙོས་པའི་རྒྱལ་ཁབ་མང་པོས། རྒྱ་ནག་གཞུང་གིས་གཉན་རིམས་ཀྱི་གནས་ཚུལ་སྦས་གསང་བྱས་པ་དང་། ཐོག་མའི་དུས་སྐབས་ནས་རྒྱལ་སྤྱིའི་འཕྲོད་བསྟེན་ལྷན་ཚོགས་ལ་དུས་ལྟར་ཉེན་བརྡ་བཏང་མེད་པ་སོགས་ཀྱི་སྐྱོན་བརྗོད་ཤུགས་ཆེར་བྱས་ཡོད་ལ། བར་སྐབས་ཤིག་ནས་ཨ་རི་ཙམ་དུ་མ་ཟད། དུས་རྒྱུན་ཚོང་འབྲེལ་གྱི་རྐྱེན་པས་རྒྱ་ནག་ལ་བསྟུན་མཁས་བྱེད་མཁན་གྱི་ཡུ་རོབ་མཐུན་ཚོགས་དང་ཨོ་གླིང་གིས་ཀྱང་རྒྱ་ནག་ལ་སྐྱོན་བརྗོད་ཆེན་པོ་བྱས་པར་བརྟེན། ད་ལྟ་ཨོ་གླིང་དང་རྒྱ་ནག་གི་འབྲེལ་ལམ་དེ་ཆེས་ཛ་དྲག་ཏུ་གྱུར་ཏེ་ཚོང་དམག་གི་གནས་སྟངས་ནང་ལྷུང་ཡོད་པ་རེད།
གསར་འགོད་པ། པ་སངས་ཚེ་རིང་།
