སྲིད་སྐྱོང་འོས་མི་སྐལ་རྡོར་ལཊ་སུ་ཏོག་དབྱིབས་ནད་རྟགས་ཐོན།

ཕྱི་ལོ་ ༢༠༢༡ ལོའི་སྲིད་སྐྱོང་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་སུ་ཏོག་དབྱིབས་ནད་རྟགས་ཐོན་ནས་ཟུར་བཀག་དུ་བསྡད་འདུགཕྱི་ལོ་ ༢༠༢༡ ལོའི་སྲིད་སྐྱོང་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་སུ་ཏོག་དབྱིབས་ནད་རྟགས་ཐོན་ཏེ་ལྡི་ལིར་སྒེར་ཤག་ཏུ་ཟུར་བཀག་འོག་བསྡད་ཡོད་ཀྱང་། ཁོང་གི་ལུས་ཁམས་བདེ་པོ་ཡིན་པ་དང་ཕྱག་རོགས་རྣམས་ལ་ཏོག་དབྱིབས་འགོས་མེད་འདུག

དེ་རིང་ཕྱི་ཚེས་ ༥ ལོའ་སྲིད་སྐྱོང་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་ཀྱིས། རང་ཉིད་ཀྱི་སྤྱི་ཚོགས་བརྒྱུད་ལམ་ངོ་དེབ་སྟེང་གསལ་བསྒྲགས་ཤིག་སྤེལ་བའི་ནང་། ཕྱི་ཟླ་ ༡༢ ཚེས་ ༤ དགོང་མོར་ང་ལ་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ ༡༩ པའི་ནད་རྟགས་ཐོན་སོང་། སྟབས་ལེགས་པ་ཞིག་ལ་ངའི་ལས་རོགས་ཆ་ཚང་ ནད་རྟགས་མེད་པར་བདེ་ཐང་ཡིན། ཞེས་བརྗོད་འདུག

འདི་གའི་གསར་འགོད་པས་ངོ་དེབ་བརྒྱུད་སྐལ་བཟང་རྡོ་རྗེ་ལགས་ཀྱི་འོས་བསྡུའི་དྲིལ་བསྒྲགས་ཀྱི་ལས་བྱེད་ཅིག་ལ་བཀའ་འདྲི་ཞུས་སྐབས། སྐུ་ངོ་སྐལ་རྡོར་ལགས་སུ་བརྟག་དཔྱད་སྒང་ནས་ནད་རྟགས་ཐོན་པ་མ་གཏོགས་སྐུ་གཟུགས་བདེ་ཐང་ཡིན་པས་ད་ལྟའི་ཆར་སྒེར་གནས་སུ་ཟུར་བཀག་བཞུགས་ཡོད་པ་རེད། ཅེས་བརྗོད་སོང་ལ། ཁ་སང་སྲིད་སྐྱོང་འོས་མི་སྐལ་བཟང་རྡོ་རྗེ་ལགས་ཀྱིས་ལྡི་ལི་བསམ་ཡས་གླིང་བོད་མིའི་གཞིས་སྒར་གྱི་དགོན་པའི་མདུན་དུ་སེར་སྐྱ་མི་མང་རྣམས་ལ་འོས་བསྡུའི་དྲིལ་བསྒྲགས་གནང་ཡོད་པ་དང་། གལ་སྲིད་ཁོང་ལ་ཏོག་དབྱིབས་ཀྱི་ནད་རྟགས་ཐོན་མེད་ཚེ། ལྡི་ལིའི་འོས་བསྡུའི་དྲིལ་བསྒྲགས་ཀྱི་ལས་རིམ་ཚང་མ་ཚར་རྗེས་སྦེང་ལོར་གྲོང་ཁྱེར་དང་ཀོ་ལི་གྷལ་གཞིས་ཆགས་སོགས་ལྷོ་ཕྱོགས་སུ་དྲིལ་བསྒྲགས་སྐོར་སྐྱོད་གནང་འཆར་ཡོད་པ་རེད།

ཡང་ཏོག་དབྱིབས་ནད་རྟགས་ཐོན་པར་བརྟེན། འོས་བསྡུའི་དྲིལ་བསྒྲགས་ཁག་མུ་མཐུད་སྤེལ་རྒྱུ་ཡིན་སྐོར་ལ་གསལ་བསྒྲགས་དེའི་ནང་། ང་རང་ལུས་ཁམས་བདེ་ཐང་ཐོག་ཟུར་བཀག་འདུག་མགོ་བཙུགས་ཡོད། ཡོང་རྒྱུ་བསྡད་པའི་ངའི་ས་གནས་སྐོར་སྐྱོད་ཀྱི་ལས་འགུལ་ཁག་རེ་ཞིག་ཕར་འགྱངས་ཞུ་རྒྱུ་ཡིན་ཡང་། རང་གི་མ་འོངས་ལས་འཆར་དང་དམིགས་ཡུལ་སྐོར་འགྲེལ་བརྗོད་ཞུ་རྒྱུ་དང་མི་མང་གི་དགོངས་འཆར་ལ་ཉན་འཇོག་ཞུ་རྒྱུ་ནི་ཧ་ཅང་གལ་གནད་ཆེ་བར་བརྩི་བཞིན་ཡོད་པས། ངས་མུ་མཐུད་དྲྭ་ལམ་བརྒྱུད་མི་མང་དང་མཇལ་འཛོམས་ཞུ་འཆར་ཡོད། ཅེས་བརྗོད་འདུག

མཇུག་ཏུ་ཁོང་ལ་རྒྱབ་སྐྱོར་གནང་མཁན་ཡོངས་དང་ས་གནས་ཁག་ཏུ་འོས་བསྡུའི་དྲིལ་བསྒྲགས་གོ་སྒྲིག་ཞུ་མཁན། དེ་བཞིན། ཁོང་གི་སྐོར་སྐྱོད་ལ་རེ་སྒུག་བྱེད་བཞིན་པའི་མི་མང་ཡོངས་བཟོད་གསོལ་དང་སྦྲགས་ཐུགས་རྗེ་ཆེ་ཞུས་འདུག

གསར་འགོད་པ། སྐལ་བཟང་སྦྱིན་པ།