བོད་དོན་རྒྱབ་སྐྱོར་བ་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སེ་པི་ལོ་སི་མཆོག་ལ་དམངས་གཙོའི་གཟིངས་རྟགས་ཐོབ་པར་༧གོང་ས་མཆོག་ནས་འཚམས་འདྲི་མཛད་པ་དང་སྦྲགས་ལྕམ་སྐུ་མཆོག་སྐུ་ཚེ་རིང་ཞིང་འཕྲོད་བཞེས་ལེགས་པོ་ཡོང་བའི་ཐུགས་སྨོན་མཛད་འདུག
དེ་རིང་ཕྱི་ཚེས་ ༩ ཉིན། ༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སེ་པེ་ལོ་སི་ (Nancy Pelosi) མཆོག་ལ་ཨ་རིའི་རྒྱལ་ཡོངས་དམངས་གཙོ་ལྟེ་གནས་ཁང་གི་དམངས་གཙོའི་གཟེངས་རྟགས་ (Democracy Award) ཐོབ་པར་བརྙན་ཐུང་ཞིག་བརྒྱུད་འཚམས་འདྲི་མཛད་འདུག
འཚམས་འདྲིའི་བརྙན་ཐུང་དེའི་ནང་༧གོང་ས་རྒྱ་བ་རིན་པོ་ཆེ་མཆོག་ནས། ངོས་ཀྱི་བཀུར་ཞིང་བློས་ཐུབ་ཀྱི་ལྕམ་ནན་སེ་པེ་ལོ་སི་ལགས། ངོས་ཀྱིས་ཁྱེད་ཉིད་ཀྱི་བློ་སེམས་བརྟན་པོ་དང་། བོད་མིའི་འཐབ་རྩོད་ལ་རྒྱབ་སྐྱོར་གྱི་བློ་སྤོབས་ཆེ་པར་ཧ་ཅང་བསྔགས་བརྗོད་བྱེད་ཀྱི་ཡོད། ཁྱེད་ཉིད་བོད་ནང་དུ་ཕེབས་ཤིང་རྒྱ་གར་གྱི་དྷ་སར་ཀྱང་ཕེབས་ཡོད་སྟབས། ངོས་ཀྱིས་བསྔགས་བརྗོད་ཆེན་པོ་བྱེད་ཀྱི་ཡོད། ཁྱེད་ཉིད་ལ་ཤ་ཚ་དང་གྲོགས་པའི་སེམས་ཚོར་ཡོད་པ་ཙམ་དུ་མ་ཟད། བདེ་པའི་ཕྱོགས་སུ་བློ་སེམས་བརྟན་པོའི་ངང་ལངས་རྒྱུའི་བློ་སྤོབས་ཧ་ཅང་ཆེན་པོ་ཡོད་པ་རེད། དེ་བས་དེ་རིང་ངོས་ཀྱིས་ལྕམ་ནན་སེ་པེ་ལོ་སི་མཆོག་ལ་རྒྱལ་ཡོངས་དམངས་གཙོ་ལྟེ་གནས་ཁང་གི་དམངས་གཙོའི་གཟེངས་རྟགས་ཐོབ་པར་སྙིང་ནས་འཚམས་འདྲི་ཞུ་འདོད་བྱུང་། ཁྱེད་ཀྱིས་ང་ཚོའི་རིག་གཞུང་གི་ཆེད་དུ་རོགས་རམ་གནང་གི་ཡོད་པ་རེད། སྙིང་ནས་བསྔགས་བརྗོད་བྱེད་ཀྱི་ཡོད། ང་ཚོ་བོད་མི་ཚོར་མཚོན་ན་ཁྱེད་ཀྱི་སྐུ་ཚེ་ནི་ཧ་ཅང་རྩ་ཆེན་དང་གལ་ཆེན་ཞིག་ཡིན་པ་རེད། དེ་བས་ངོས་ཀྱིས་ཁྱེད་ཉིད་སྐུ་ཚེ་རིང་བ་དང་། སྐུའི་འཕྲོད་བཞེས་ཡག་པོ་ཡོང་བའི་སྨོན་ལམ་འདེབས་ཀྱི་ཡོད། ཐུགས་རྗེ་ཆེ། ཞེས་གསུངས་འདུག
ཁ་སང་ཕྱི་ཚེས་ ༨ ཉིན་གྱི་ཨ་རིའི་ཕྱི་དྲོའི་ཆུ་ཚོད་ ༥ ཐོག ཨ་རིའི་རྒྱལ་ཡོངས་དམངས་གཙོ་ལྟེ་གནས་ཁང་གིས་གྲོས་ཚོགས་འོག་མའི་ཚོགས་གཙོ་ལྕམ་ནན་སེ་པེ་ལོ་སི་ (Nancy Pelosi) མཆོག་ལ་དམངས་གཙོའི་གཟེངས་རྟགས་དེ་ཕུལ་ཡོད་པ་དང་། ལྟེ་གནས་ཁང་དེའི་བསྒྲགས་ཡིག་ནང་། བོད་མི་མང་དང་གསར་འགོད་པ། འགྲོ་བ་མིའི་ཐོབ་ཐང་ཁྲིམས་རྩོད་པ་དང་དམངས་གཙོ་དོན་གཉེར་བ་ཚོར་མི་ཚེ་གཅིག་གི་རིང་སྲུང་སྐྱོབ་བྱས་དང་བྱེད་བཞིན་ཡོད་སྐོར་དང་། ལྕམ་མཆོག་བུད་མེད་ཀྱི་ཆབ་སྲིད་མགོ་ཁྲིད་པ་ཞིག་དང་ཁོང་མོས་གོ་ལ་ཡོངས་སུ་དམངས་གཙོ་དང་འགྲོ་བ་མིའི་ཐོབ་ཐང་སྲུ་སྐྱོབ་བྱས་པ་སོགས་ལ་བརྟེན་ནས་དམངས་གཙོའི་གཟེངས་རྟགས་དེ་ཕུལ་བ་ཡིན་སྐོར་བཀོད་འདུག
ལྕམ་ནན་སེ་པེ་ལོ་སི་ (Nancy Pelosi) མཆོག་ཕྱི་ལོ་ ༢༠༡༦ ལོར་བོད་དུ་ཕེབས་ཤིང་ཕྱི་ལོ་ ༢༠༡༧ ལོར་ཨ་རིའི་གྲོས་ཚོགས་འོག་མའི་ཚོགས་མི་ ༧ དང་མཉམ་དུ་བཞུགས་སྒར་དྷ་སར་ཕེབས་ཏེ། ༧གོང་ས་མཆོག་ལ་མཇལ་བཅས་ཞུས་ཡོད་པ་དང་། དྷ་ས་གཙུག་ལག་ཁང་དུ་༧གོང་ས་མཆོག་དབུ་བཞུགས་ཐོག་བོད་མིའི་སྒྲིག་འཛུགས་ཀྱིས་ཨ་རིའི་སྐུ་ཚབ་རྣམ་པར་ཆེ་བསྟོད་མཛད་སྒོ་ཞིག་ཚོགས་པའི་སྟེང་། ཚོགས་གཙོ་ལྕམ་ནན་སེ་པེ་ལོ་སི་མཆིག་གིས། རྒྱ་ནག་གིས་དཔལ་འབྱོར་སྟོབས་ཤུགས་སྤྱད་དེ་བོད་ཀྱི་གྲོགས་པོ་ཚོས་བོད་ལ་རྒྱབ་སྐྱོར་བྱེད་བཞིན་པ་རྩ་མེད་བཟོ་ཐབས་བྱེད་ཀྱིན་ཡོད་ནའང་། རྒྱ་ནག་གི་དཔལ་འབྱོར་སྟོབས་ཤུགས་ལ་མགོ་བོ་སྒུར་ནས་བོད་དང་རྒྱ་ནག་ནང་བྱུང་དང་འབྱུང་བཞིན་པའི་བཙན་གནོན་སྐོར་ལ་སྐད་ཆ་མ་བཤད་པར་ནམ་ཡང་སྡོད་ཀྱི་མིན་སྐོར་དང་མིང་དོན་མཚུངས་པའི་རང་སྲིད་རང་སྐྱོང་ལ་རྒྱབ་སྐྱོར་ཡོད་སྐོར་གསུངས་ཡོད་པ་སོགས་ཁོང་མོ་ནི་ཨ་རིའི་བོད་ཀྱི་གྲོགས་པོ་དང་བོད་དོན་རྒྱབ་སྐྱོར་བ་གལ་ཆེན་ཞིག་ཡིན་པ་རེད།
གསར་འགོད་པ། ཀླུ་མགོན་ཐར།
