༧གོང་ས་མཆོག་ལ་ནོར་སྦེལ་གཟེངས་རྟཊ་འབུལ་བཞེས་ཀྱི་དགོས་དམིགས་འགྲུབ་སླད་བོད་མི་ཡོངས་ནས་སྤྱོད་པ་འཚེ་བ་མེད་ཅིང་གཞན་ཕན་དང་བྱམས་པ། སྙིང་རྗེ་སོགས་རྨང་གཞིར་ལྡན་པའི་༧སྐུའི་ཐུགས་བསྐྱེད་དམ་བཅའ་བཞིར་སློབ་སྦྱོང་དང་ལག་ལེན་དུ་ཡོང་བར་འབད་བརྩོན་གནང་བའི་འབོད་སྐུལ་ཞུས་སོང་།
དེ་རིང་སྔ་དྲོ་ཆུ་ཚོད་ ༡༠།༣༠ སྟེང་། བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། བཀའ་ཤག་ནས་ཕྱི་ལོ་ ༡༩༨༩ ལོར་༧གོང་ས་རྒྱལ་བ་རིན་པོ་ཆེ་མཆོག་ལ་ནོར་སྦེལ་ཞི་བདེ་གཟེངས་རྟགས་འབུལ་བཞེས་མཛད་ནས་ལོ་ངོ་ཧྲིལ་བོ་ ༣༡ འཁོར་བ་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་བཅས་དུས་དྲན་གཉིས་སྲུང་གཙིའི་མཛད་སྒོ་ཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་ཇའེ་ཊི་གོ་མར་ནེ་རཱ་ཡ་ ( Shri Ajit Kumar Nehria) མཆོག་དང་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤྲེལ་པོ་དབུས་པའི་བོད་མི་མང་སྤྱི་འཐུས་ཁག་ཅིག་དང་། བོད་མིའི་སྒྲིག་འཛུགས་ཀྱི་སྲི་ཚབ་ཆོས་རིག་བཀའ་བློན་ཀརྨ་དགེ་ལེགས་མཆོག་གི་དབུས་པའི་བཀའ་བློན་ཁག་ཅིག་དང་ལྷན་ཁང་ཁག་གི་དྲུང་ཆེ་རྣམ་པ་དང་སྲི་ཞུའི་ལས་བྱེད་པ་བཅས་ཁྱོན་མི་གྲངས་ ༥༠ ལས་མ་བརྒལ་བ་འཛོམས་འདུག་ལ། མཛད་རིམ་གྱི་ཐོག་མར་འཕྲོད་བསྟེན་ལས་ཁུངས་ནས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་ཞུས་ཏེ། ཞབས་ལོ་ ༢༥ ལོན་པའི་སྲི་ཞུའི་ལས་བྱེད་ ༥ ལ་གཟེངས་བསྟོད་ཕྱག་འཁྱེར་དང་། བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ལོ་ནི་༧གོང་ས་མཆོག་གི་བཀའ་དྲིན་རྗེས་དྲན་གྱི་ལོར་བརྩི་ཡི་ཡོད་པ་ལྟར། ཆོས་རིག་ལས་ཁུངས་ནས་༧གོང་ས་མཆོག་གིས་ཆོས་ཚོགས་ཐེངས་ ༡ ནས་ ༡༤ བར་བསྩལ་བའི་བཀའ་སློབ་ལམ་སྟོན་གྱི་ཕྱག་དེབ་གཅིག་དང་བོད་ཀྱི་ཆོས་བརྒྱུད་ཁག་གི་གཞུང་ཆེན་རིས་མེད་བགྲོ་གླེང་སྐབས་བཞིའི་རིང་གི་ཕྱག་དེབ་ ༤ བཅས་ཁྱོན་དེབ་ ༥ དང་། དེ་བཞིན། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་༧རྒྱལ་བའི་བཀའ་དྲིན་རྗེས་དྲན་མཚོན་པའི་ཕྱག་དེབ་ ༢ བཅས་དབུ་འབྱེད་གནང་སོང་།
བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཚོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོག་སྦྱངས་གནང་སྐབས། ༧གོང་ས་རྒྱལ་བ་རིན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་སྐབས་གཟེངས་རྟགས་ཚོགས་ཆུང་གིས། “༸གོང་ས་མཆོག་ནས་བོད་ཀྱི་དཀའ་རྙོག་སེལ་ཐབས་ཀྱི་འབད་བརྩོན་གནང་སྐབས་དྲག་སྤྱོད་དམ་འཚེ་བ་ཅན་གྱི་བྱ་བར་མཐའ་གཅིག་ཏུ་འགོག་རྒོལ་གནང་གི་ཡོད་པ་དང་། ༸གོང་ས་མཆོག་གིས་བཟོད་པ་དང་གུས་བརྩི་བཅས་གཞིར་བཞག་ཐོག་ནས་བོད་མི་རིགས་ཀྱི་རྒྱལ་རབས་ལོ་རྒྱུས་དང་རིག་གཞུང་བཟང་པོ་དག་མི་ཉམས་གཅེས་སྲུང་སླད་བོད་ཀྱི་དཀའ་རྙོག་སེལ་ཐབས་འཚེ་མེད་ཞི་བའི་ཐབས་ལམ་གྱི་སྒོ་ནས་འབད་བརྩོན་མཛད་གནང་གི་ཡོད་པ་མ་ཟད། ༸གོང་ས་མཆོག་གིས་འགྲོ་བ་རིགས་དྲུག་སེམས་ཅན་ཐམས་ཅད་ལ་གུས་བརྩི་ཧ་ཅང་ཆེན་པོ་དང་འགྲོ་བ་མིའི་རིགས་དང་ཁོར་ཡུག་བཅས་སྤྱི་ཡོངས་ལ་འགན་ཁུར་བཞེས་གནང་གིས་འཚེ་མེད་ཞི་བའི་ལྟ་གྲུབ་ཉམས་ལེན་མཛད་བཞིན་ཡོད་པ།” བཅས་ནན་ཏན་གྱིས་བརྗོད་གནང་ཡོད། དེ་བཞིན། ༧གོང་ས་མཆོག་གིས་གཟེངས་རྟགས་དགྱེས་བཞེས་མཛད་སྐབས། “གཟེངས་བསྟོད་འདིས་ངོས་ནས་སངས་རྒྱས་བཅོམ་ལྡན་འདས་དང་། འཕགས་བོད་སྐྱེས་ཆེན་དམ་པ་རྣམས་ཀྱི་བསླབ་བྱ་གཞན་ཕན་དང་། བྱམས་པ། སྙིང་རྗེ། འཚེ་བ་མེད་པ་བཅས་ཀྱི་སྙིང་པོར་ཉམས་ལེན་ཅི་ཐུབ་བྱེད་བཞིན་པ་འདི་ངོས་འཛིན་གནང་བ་ཞིག་ཡིན་པར་ཡིད་ཆེས་ཡོད། ངོས་ནས་འཛམ་གླིང་གི་ས་ཕྱོགས་གང་སར་མནར་གཅོད་འོག་ཚུད་པའི་སྐྱེ་བོ་སྤྱི་དང་། འཛམ་གླིང་ཞི་བདེ་དང་། རང་དབང་གི་དོན་དུ་འབད་བརྩོན་བྱེད་བཞིན་པའི་སྐྱེ་བོ་ཡོངས་ཀྱི་ཚབ་ཞུས་ཏེ་བཀའ་དྲིན་ཚད་མེད་དྲན་པའི་སྒོ་ནས་གཟེངས་བསྟོད་འདི་བཞིན་དང་ལེན་ཞུ་གི་ཡོད། འཚེ་མེད་ཞི་བའི་ལག་ལེན་བརྒྱུད་འགྱུར་བ་གཏོང་རྒྱུའི་ལམ་སྲོལ་དེང་དུས་ཡོད་པ་འདི་ཉིད་གསར་གཏོད་གནང་མཁན་བདག་ཉིད་ཆེན་པོ་གྷན་རྡི་ལ་གུས་བཏུད་ཆེད་གཟེངས་བསྟོད་འདི་དང་ལེན་ཞུ་རྒྱུ་ཡིན། ལྷག་པར་དུ་དཀའ་སྡུག་ཚད་མེད་མྱངས་དང་མྱོང་བཞིན་པའི་སྙིང་སྟོབས་ཅན་གྱི་ངོས་ཀྱི་ཡུལ་མི་བོད་མི་ཕོ་མོ་ས་ཡ་དྲུག་པོའི་ཚབ་ཞུས་ཏེ་གཟེངས་བསྟོད་ཞུ་གི་ཡོད་པ་ནི་སྨོས་ཅི་དགོས། དེ་བཞིན་གཟེངས་བསྟོད་འདིས་བདེན་པ་དང་། སྙིང་སྟོབས། སེམས་ཤུགས་བཅས་ལག་ཆར་བཟུང་སྟེ་བོད་ཡུལ་བཅིངས་བཀྲོལ་གཏོང་ཐུབ་རྒྱུའི་ང་ཚོའི་ཡིད་ཆེས་ཡང་བསྐྱར་སྲ་བརྟན་དུ་ཕྱིན་ཡོད།” ཅེས་བཀའ་སློབ་བསྩལ་གནང་ཡོད་སྟབས། བོད་མི་རྩམ་ཟན་ཡོངས་ནས་ང་ཚོའི་༧གོང་ས་རྒྱལ་བ་རིན་པོ་ཆེ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་ཀྱི་དགོས་དམིགས་འགྲུབ་པའི་བྱ་བར་ང་ཚོས་རྟག་ཏུ་འཚེ་བ་མེད་ཅིང་གཞན་ཕན་དང་། བྱམས་པ། སྙིང་རྗེ་སོགས་རྨང་གཞིར་ལྡན་པའི་༸རྒྱལ་བའི་ཐུགས་བསྐྱེད་དམ་བཅའ་བཞིར་སློབ་སྦྱོང་བྱ་རྒྱུ་དང་དེ་དག་ལག་ལེན་དུ་བསྟར་ཐུབ་པ་བྱ་རྒྱུ་ནི་༸རྒྱལ་བའི་བཀའ་དྲིན་རྗེས་དྲན་ངོ་མ་དེ་ཆགས་ངེས་ལ་སོང་། བོད་མི་ཚང་མས་དེ་དེ་བཞིན་གྱིས་དགོངས་པར་འཇགས་གནང་ཡོང་བའི་འབོད་བསྐུལ་ཞུ་རྒྱུ་ཡིན།
ཕྱི་ལོ་ ༢༠༠༨ ཟླ་ ༣ ཚེས་ ༡༠ ཉིན་ནས་མགོ་འཛུགས་ཀྱིས་རིམ་པས་ཆོལ་གསུམ་ས་ཁུལ་ཕལ་མོ་ཆེར་བོད་མི་བརྒྱ་སྟོང་ཁྲི་ཚོ་མང་པོས་ཆེས་གཞི་རྒྱ་ཆེ་བའི་ཡར་ལངས་ཞི་རྒོལ་གནང་ཡོད། ལྷག་པར་ཕྱི་ལོ་ ༢༠༠༩ ནས་བཟུང་སྟེ་ད་བར་བོད་ནང་ཁོ་ནར་སེར་སྐྱ་དཔའ་བོ་དཔའ་མོ་གྲངས་ ༡༥༤ ཡིས་རང་ཉིད་ཀྱི་གཅེས་པའི་ལུས་སྲོག་ཚུན་ཆད་མེར་བསྲེགས་གནང་སྟེ་རྒྱ་ནག་གཞུང་གིས་བོད་ཐོག་འཛིན་པའི་མཁྲེགས་འཛིན་གྱི་སྲིད་བྱུས་ལ་འཚེ་མེད་ཞི་བའི་ངོ་རྒོལ་གནང་ཡོད་པའི་ལོ་རྒྱུས་མཇལ་རྒྱུ་ཡོད་པ། ཡང་འདི་ལོའི་ཕྱི་ཟླ་ ༦ པའི་ནང་བོད་ཀན་ལྷོ་ཁུལ་བསང་ཆུ་རྫོང་མི་དམངས་ཁྲིམས་ཁང་ཟེར་བས་བོད་མི་བཅུ་ལ་ཁྲིམས་བཤེར་བྱས་ཏེ་དངུལ་བཙན་འཕྲོག་བྱས་པ་དང་། བཙན་དབང་གིས་ཚོང་རྒྱག་བཅུག་པའི་ཉེས་འཛུགས་འོག་ལོ་ ༩ ནས་ ༡༤ བར་གྱི་བཙོན་འཇུག་ཁྲིམས་ཐག་བཅད་པ། དེ་བཞིན་འབྲི་རུ་རྫོང་ཆགས་རྩེ་ཡུལ་ཚོ་དབུས་ལུང་གྲོང་ནས་ཡིན་པའི་ལོ་ན་ ༣༩ ལ་སོན་པའི་བསྟན་འཛིན་ཐར་པ་ལགས་དང་ཁོང་གི་ཞང་པོའི་བུ་མོ་རང་ལོ་ ༣༦ ལ་སོན་པའི་ལྷ་མོ་ལགས་རྣམ་གཉིས་རྒྱ་ནག་གཞུང་གིས་མ་ཉེས་ཁག་གཡོགས་ཀྱིས་འཛིན་བཟུང་བཙོན་འཇུག་བྱས་པ་མ་ཟད། ལྷ་མོ་ལགས་འདྲི་རྩད་རྡུང་རྡེག་འོག་འདས་གྲོངས་སུ་གྱུར་བ་སོགས་ལས་གསལ་རྟོགས་ཐུབ་རྒྱུ་མ་ཟད། ཉེ་བའི་ཆར་བོད་དང་ཤར་ཏུར་ཀི་སི་ཐན་སྐོར་ཉམས་ཞིབ་གནང་མཁན་ཨེ་ཌི་རི་ཨན་ཛན་ཛི་ (Adrian Zenz) ལགས་ཀྱིས་བོད་ནང་རྒྱ་ནག་གཞུང་གིས་བོད་མི་འབུམ་ལྔ་ལྷག་ངལ་རྩོལ་བསྒྱུར་བཀོད་ཁང་དུ་བཅུག་ཡོད་པའི་སྐོར་ཉམས་ཞིབ་གནང་སྟེ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པའི་སྙན་ཐོ་བཏོན་ཡོད་ནའང་། ཉེ་སྔོན་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐེངས་ ༧༥ འཚོགས་བཞིན་པ་དང་བསྟུན། ཕྱི་ལོ་ ༢༠༢༠ ཟླ་ ༡༠ ཚེས་ ༡༣ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིའི་ཁོངས་སུ་ཞབས་སྟེགས་བཞིའི་ཆེད་དུ་འོས་ཤོག་བླུགས་ཡོད་པའི་ཁྲོད་ནས་ཨེ་ཤི་ཡ་དང་ཞི་བདེ་རྒྱ་མཚོ་མངའ་ཁུལ་གྱི་འགྲོ་བ་མིའི་ཐོབ་ཐང་ཐོག་དམ་དྲག་ཆེས་ཤུགས་ཆེ་ཤོས་བྱེད་མཁན་རྒྱལ་ཁབ་བཞི་བདམས་ཐོན་བྱུང་ཁོངས་སུ་རྒྱ་ནག་ཀྱང་ཚུད་པར་བློ་ཕམ་ཆེན་པོ་བྱུང་། རྒྱ་ནག་གཞུང་གི་བཙན་གནོན་འོག་དཀའ་སྡུག་མྱོང་བཞིན་པའི་བོད་མི་དང་། སོག་པོ། ཡུ་གུར་བ། ཧོང་ཀོང་བ་སོགས་ཀྱི་འགྲོ་བ་མིའི་གཞི་རྩའི་ཐོབ་ཐང་སྲུང་སྐྱོབ་བྱེད་རྒྱུའི་འོས་འགན་རྒྱ་ནག་ལ་འོས་ཤོག་བླུགས་མཁན་གྱི་རྒྱལ་ཁབ་ཚོར་ཡང་ཡོད་པ་ཤེས་རྟོགས་དགོས་གལ་ཞེས་གསལ་པོར་ཞུ་འདོད་བྱུང་། རྒྱ་ནག་གཞུང་ནས་ཀྱང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིར་ཞུགས་རྗེས་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་རྒྱལ་སྤྱིའི་རྩ་འཛིན་ཡིག་ཆ་གཞིར་བཟུང་ལག་བསྟར་བྱ་རྒྱུ་དང་། བོད་ཀྱིས་གཙོས་རྒྱ་ནག་ནང་གི་གྲངས་ཉུང་མི་རིགས་ཀྱི་ཐོབ་ཐང་སྲུང་སྐྱོབ་བྱ་རྒྱུ་བཅས་ཁས་ལེན་བྱས་པ་ནང་བཞིན་ཁ་དན་ཚིག་ལ་གནས་ཐབས་ཀྱི་ལག་བསྟར་བྱ་དགོས་པ་མ་ཟད། རྒྱལ་སྤྱིའི་ངོས་ནས་ཀྱང་རྒྱ་ནག་ཐོག་རྟོག་ཞིབ་ནན་པོ་གནང་དགོས་པའི་བསྐུལ་མ་ཞུ་རྒྱུ་ཡིན།
དེ་ནས་འདི་ལོའི་ནོ་སྦེལ་ཞི་བདེའི་གཟེངས་རྟགས་དེ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡན་ལག་འཛམ་གླིང་བཟའ་ཆས་ལས་གཞིའི་ཚོགས་པར་ (World Food Programme) འབུལ་གཏན་འཁེལ་བར་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་འཚམས་འདྲི་བསྔགས་བརྗོད་ཞུས་པ་དང་འབྲེལ། འཛམ་གླིང་བཟའ་ཆས་ལས་གཞི་ཚོགས་པ་བརྒྱུད་ནས་འཛམ་གླིང་ནང་རང་བྱུང་དང་དམག་འཁྲུག་བཅས་ཀྱི་རྐྱེན་པས་འགྲོ་བ་མིའི་བཀྲེས་ལྟོགས་ཀྱི་དཀའ་ངལ་མཐའ་དག་སེལ་ཏེ་བདེ་སྐྱིད་ལྡན་པའི་སྤྱི་ཚོགས་ཤིག་སྐྲུན་ཐུབ་རྒྱུར་མུ་མཐུད་འབད་བརྩོན་ཡོང་བའི་རེ་བ་དང་སྨོན་འདུན་ཞུ་ཡི་ཡོད་པ་དང་། དེ་བཞིན་ཨ་རིའི་སྲིད་འཛིན་གཞོན་པ་ཟུར་པ་སྐུ་ཞབས་ཇཱོ་བྷའེ་ཌན་ (Joe Biden) མཆོག་དང་། གྲོས་ཚོགས་འཐུས་མི་ལྕམ་སྐུ་ཀ་མ་ལཱ་ཧན་རི་སི (Kamala Harris) མཆོག་རྣམ་གཉིས་ཨ་རིའི་སྲིད་འཛིན་དང་སྲིད་འཛིན་གཞོན་པ་སོ་སོར་བདམས་ཐོན་བྱུང་སྟེ། རིང་མིན་ལས་འཁུར་མགོ་འཛུགས་གནང་གཏན་འཁེལ་བར་འཚམས་འདྲི་དང་སྦྲགས་གཞུང་འཛིན་གསར་པའི་སྐབས་བོད་དོན་བདེན་མཐའ་གསལ་བར་རྒྱབ་སྐྱོར་ཞལ་བཞེས་ཡོད་པ་བཞིན་བོད་མི་རྣམས་ནས་ཀྱང་རེ་འདུན་ཤུགས་ཆེ་ཞུ་བཞིན་ཡོད་སྐོར་སོགས་བཀོད་འདུག
དེ་རྗེས་བོད་མིའི་སྒྲིག་འཛུགས་ཀྱི་སྲིད་ཚབ་ཀརྨ་དགེ་ལེགས་མཆོག་གིས་༧གོང་ས་མཆོག་ལ་ནོར་སྦེལ་ཞི་བདེ་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༡ འཁོར་བར་གཞིས་བྱེས་བོད་མི་ཡོངས་དང་། བོད་དང་བོད་མིའི་དྲང་བདེན་འཐབ་རྩོད་ལ་གདུང་སེམས་མཉམ་བསྐྱེད་དང་རྒྱབ་སྐྱོར་གནང་མཁན་གྱི་གཞུང་དང་གྲོས་ཚོགས། ཚོགས་སྒེར་བཅས་ལ་འཚམས་འདྲི་གནང་བ་དང་སྦྲགས། བཀའ་ཤག་གི་གསུང་བཤད་སྒྲོག་སྦྱངས་གནང་སོང་བ་དང་། གསུང་བཤད་ནང་། ༧གོང་ས་རྒྱལ་བ་རིན་པོ་ཆེ་མཆོག་གིས་འདས་པའི་མི་ལོ་ ༦༡ རིང་འཛམ་གླིང་ཞི་བདེ་དང་སྐྱེ་འགྲོ་སྤྱི་ལ་བདེ་སྐྱིད་བསྐྲུན་ཆེད་འཇིག་རྟེན་ཀུན་ཁྱབ་ཀྱི་འགན་ཁུར་དང༌། ཆོས་དད་ཡོད་མེད་ཀུན་གྱིས་ཉམས་ལེན་བྱེད་ཐུབ་པའི་བྱམས་པ་དང༌། སྙིང་རྗེ། བཟོད་བསྲན། གཞན་ཕན་སོགས་འགྲོ་བ་མིའི་བཟང་སྤྱོད་གོང་སྤེལ་མཛད་དང་མཛད་བཞིན་པ་ལ་བརྟེན་ནས༌། ད་ཆ་འཛམ་གླིང་ནང་འཚེ་བ་མེད་པ་དང་བྱམས་བརྩེ་ཞེས་ཐོས་མ་ཐག་༧གོང་ས་མཆོག་གི་ཞལ་རིས་ཡིད་ལ་ལྷམ་མེར་འཆར་ བ་ཞིག་ཆགས་ཡོད་ཅིང་། ྋགོང་ས་མཆོག་གི་མཛད་འཕྲིན་དེ་དག་ལ་བརྟེན་ནས་བོད་ཀྱི་བདེན་དོན་ལ་རྒྱལ་སྤྱིའི་ངོས་འཛིན་དང་རྒྱབ་སྐྱོར་ཡོད་པ་ཞིག་ཆགས་ཡོད། དེ་བཞིན་༧མགོན་པོ་མཆོག་གིས་འཛམ་གླིང་ནང་གི་ཆོས་ལུགས་ཕལ་ཆེ་བའི་ལྟ་གྲུབ་ཐད་ལ་ཁྱད་པར་ཡོད་ཀྱང་གཞི་རྩའི་བསླབ་བྱ་བྱམས་པ་དང་བརྩེ་བ་སོགས་ཀྱི་སྒོ་ནས་གཞན་ལ་ཕན་བདེ་སྒྲུབ་མཁན་གཅིག་མཚུངས་ཡིན་པའི་ཆ་ནས་ཆོས་ལུགས་ནང་ཁུལ་མཐུན་འབྲེལ་བྱེད་དགོས་པའི་ལམ་སྟོན་མཛད་པ་དང་སྦྲགས། ཆོས་ལུགས་གཞན་ལ་ཞལ་ཞེ་གཉིས་མེད་ཀྱིས་གུས་བཀུར་མཛད་བཞིན་ཡོད། དེ་ལ་བརྟེན་ནས་ད་ཆ་ཆོས་ལུགས་གཞན་གྱི་དབུ་འཁྲིད་ཚོས་ཀྱང་རྗེས་སུ་ཡི་རངས་དང་བསྔགས་བརྗོད་ཞུ་བཞིན་ཡོད་པ་སོགས་ཆོས་ལུགས་ཕན་ཚུན་མཐུན་འབྲེལ་གོང་སྤེལ་ཐོག་ཕན་ཐོགས་ཆེན་པོ་བྱུང་ཡོད། གཞན་ཡང་༧མགོན་པོ་མཆོག་གིས་རྒྱ་གར་གྱི་གནའ་བོའི་རིག་གཞུང་དང་ལྟ་གྲུབ་རྣམས་སླར་གསོ་དགོས་གལ་ཆེ་གཟིགས་ཀྱིས་རྒྱ་གར་གྱི་སྤྱི་ཚོགས་དང་མི་རབས་གཞོན་པ་རྣམས་ལ་གནའ་བོའི་གཞུང་ལུགས་དང་ལྟ་གྲུབ་དེ་དག་ལ་སློབ་སྦྱོང་དང་ཉམས་ལེན་དགོས་པའི་ལམ་སྟོན་རྒྱ་ཆེ་མཛད་བཞིན་ཡོད།
གཞན་ཡང་དེ་རིང་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་པ་འབྲེལ་བཀའ་ཤག་གི་གསུང་བཤད་ནང་།
དེ་རིང་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོའང་ཡིན་པ་བཞིན། འཛམ་གླིང་ཡུལ་གྲུ་ཕལ་མོ་ཆེར་སྨྲ་བརྗོད་དང་ཆོས་དད་རང་དབང་སོགས་འགྲོ་བ་མིའི་གཞི་རྩའི་ཐོབ་ཐང་རྣམས་ལོངས་སུ་སྤྱོད་བཞིན་ཡོད་ནའང་། བོད་ནང་བོད་མི་ཚོས་བོད་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་། སྐད་ཡིག ཁོར་ཡུག་སོགས་ཀྱི་ཐོག་ལ་ཉམས་པ་སླར་གསོ་མི་ཉམས་རྒྱུན་འཛིན་གྱི་ལས་དོན་སྤེལ་བ་དང་མངོན་འདོད་བཏོན་པ་ཙམ་གྱིས་རྡུང་རྡེག་དང་བཙོན་འཇུག་སོགས་བྱེད་བཞིན་ཡོད། བྱེད་བབ་དེ་དག་ནི་འགྲོ་བ་མིའི་ཐོབ་ཐང་བརྡལ་བཤིག་བཏང་བ་ཞིག་ཡིན་པ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་། མི་རིགས་ས་ཁུལ་རང་སྐྱོང་གི་བཅའ་ཁྲིམས་དང་འགལ་བ་ཞིག་ཆགས་ཡོད། རྒྱ་ནག་གཞུང་གིས་ད་བར་དུ་བོད་མིའི་མངོན་འདོད་སྟོན་པའི་ཞི་རྒོལ་དེ་དག་ཐད་ལ་དམ་བསྒྲགས་ཇེ་ཆེར་བཏང་བ་ལ་བརྟེན་ནས་གནས་ཚུལ་མང་པོ་ཤེས་རྟོགས་དཀའ་ནའང་ཉེ་ཆར་གནས་ཚུལ་ཐོན་གསལ་ལྟར། ཕྱི་ལོ་ ༢༠༡༩་ཟླ་ ༣ ནང་འབྲི་རུ་རྫོང་གི་གླུ་པ་ལྷུན་གྲུབ་གྲགས་པ་ལགས་ཀྱིས། ཞཱ་མོ་ནག་པོ་ཞེས་གླུ་གཞས་ནང་བོད་མིར་དམྱལ་བ་མི་ཡུལ་དུ་འཕོས་པ་ལྟ་བུའི་སྡུག་བསྔལ་ཆེ་ཞིང་། སོ་སོའི་སྐད་ཡིག་བཀོལ་སྤྱོད་ཀྱི་རང་དབང་བྲལ་ནས་བོད་སྐད་བརྗེད་ཉེན་བཅས་ཀྱི་གནད་དོན་བརྗོད་པ་ལ་ལོ་དྲུག་གི་དུས་བཀག་བཙོན་འཇུག་ཁྲིམས་ཆད་ཕོག་ཡོད།. ཡང་ཉེ་ཆར་གནས་ཚུལ་འབྱོར་གསལ་ལྟར། རྔ་བ་རྫོང་དཀར་ཤུལ་སྡེ་པ་ནས་ཡིན་པའི་གྲྭ་རིན་ཆེན་ཚུལ་ཁྲིམས་ལགས་ཉེན་རྟོག་པས་བོད་དོན་ཆབ་སྲིད་ལ་འབྲེལ་བ་ཡོད་པར་བསྙད་ནས་འཛིན་བཟུང་བྱས་ཡོད། དེ་བཞིན་ཉིན་ཤས་སྔོན་ལ་རེབ་ཀོང་ནས་ཡིན་པའི་བོད་ནང་གི་སྙན་ངག་པ་གྲགས་ཅན་རོང་པོ་དགེ་འདུན་ལྷུན་གྲུབ་ལགས་རྒྱ་ནག་གཞུང་གིས་རྒྱུ་མཚན་གང་ཡིན་མ་བཤད་པར་གློ་བུར་དུ་ འཛིན་བཟུང་བྱས་ཡོད་ཅིང་། ད་ལྟའི་ཆར་ཁོང་གི་སྐད་འཕྲིན་རྒྱབ་ལྗོངས་ཀྱི་གནས་ཚུལ་ཚང་མ་ལྟ་ཀློག་མ་ཐུབ་པ་ཞིག་ཆགས་ཡོད། གོང་གི་གནས་ཚུལ་དེ་དག་གི་ཐོག་ནས་བོད་ལ་རང་དབང་ཇི་ཙམ་ཡོད་མེད་ཀུན་གྱིས་མཁྱེན་ཐུབ། ཅེས་འཁོད་འདུག
མཇུག་ཏུ་སྐུ་མགྲོན་གཙོ་བོ་ཨ་ཇའེ་ཊི་གོ་མར་ནེ་རཱ་ཡ་ ( Shri Ajit Kumar Nehria) མཆོག་གིས། དེ་རིང་༧གོང་ས་མཆོག་གི་ནོར་སྦེལ་ཞི་བདེ་གཟེངས་རྟགས་འབུལ་བཞེས་མཛད་ནས་ལོ་ ༣༡ འཁོར་བའི་ཉིན་མོ་རེད། ༧གོང་ས་མཆོག་ལ་ནོར་སྦེལ་ཞི་བདེ་གཟེངས་རྟགས་ཕུལ་བ་དེ་བོད་མི་ཙམ་དུ་མ་ཟད། འཛམ་གླིང་ཡོངས་ཀྱི་གཟི་བརྗིད་ཅིག་རེད། ངས་བསམ་ཚུལ་ལ་ཞི་བདེའི་ཕོ་ཉ་ཞིག་ལ་ནོར་སྦེལ་ཞི་བདེ་གཟེངས་རྟགས་ཕུལ་བ་དེ་ནོར་སྦེལ་ཞི་བདེ་གཟེངས་རྟགས་རང་གི་སྤོབས་པ་ཞིག་ཆགས་ཡོད་ལ། ད་སྔ་བར་ནོར་སྦེལ་ཞི་བདེ་གཟེངས་རྟགས་དེ་༧གོང་ས་མཆོག་ལྟ་བུའི་མི་སྣ་ཁྱད་པར་ཅན་ཞིག་ལ་ཕུལ་ཐུབ་མེད། དེ་རིང་ནི་ཧིན་བོད་མཛའ་འབྲེལ་ཚོགས་པ་གསར་འཛུགས་གནང་སྟེ་ལོ་ངོ་ ༢༥ འཁོར་བའི་ཉིན་མོ་ཡིན་པ་དང་། ཧིན་བོད་མཛའ་འབྲེལ་ཚོགས་པ་༧གོང་ས་མཆོག་ལ་ནོར་སྦེལ་ཞི་བདེ་གཟེངས་རྟགས་ཕུལ་བའི་མཛད་སྒོར་དགའ་བསུ་དང་འབྲེལ་ནས་བཙུགས་པ་ཞིག་ཡིན། སྤྱིར་དེ་རིང་གི་ཉིན་མོ་འདིར་ཧིན་བོད་མཛའ་འབྲེལ་ཚོགས་པས་༧གོང་ས་མཆོག་ལ་ནོར་སྦེལ་ཞི་བདེ་གཟེངས་རྟགས་ཕུལ་བའི་ཉིན་མོ་སྲུང་གཙིའི་སླད་ཧི་མ་ལ་ཡའི་དུས་སྟོན་ཞེས་པ་ཞིག་ལོ་རྟག་པར་ཚོགས་ཀྱི་ཡོད་ཀྱང་། འདི་ལོར་ས་གནས་གཞུང་གི་བཀའ་ཁྱབ་འོག་ཏོག་དབྱིབས་གཉན་རིམས་སྔོན་འགོག་གི་རྐྱེན་པས་ཧི་མ་ལ་ཡའི་དུས་སྟོན་དེ་ཚོགས་ཐུབ་མ་སོང་། ༧གོང་ས་མཆོག་རྒྱ་གར་དང་དམིགས་བསལ་ཧི་མ་ཅལ་དྷ་རམ་ས་ལར་བཞུགས་རྒྱུ་བྱུང་བ་ནི་རྒྱ་གར་དང་ས་གནས་མི་མང་ཡོངས་ཀྱི་བསོད་ནམས་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད། ཅེས་དང་། ཧིན་བོད་མཛའ་འབྲེལ་ཚོགས་པས་ད་བར་བོད་ཀྱི་འཐབ་རྩོད་ཆེད་ལས་དོན་ཧུར་ཐག་འབད་བརྩོན་དང་དྲིལ་བསྒྲགས་བྱས་ཡོད་པ་དང་། མ་འོངས་པར་མུ་མཐུད་བོད་ཀྱི་འཐབ་རྩོད་སླད་འབད་བརྩོན་གང་ཐུབ་ཞུ་རྒྱུ་ཡིན་སྐོར་གསུངས་སོང་།
གསར་འགོད་པ། སྐལ་བཟང་སྦྱིན་པ།
ཀ་སྟག་སྤྲུལ་སྐུའི་མག་པས་བཏོན་པའི་གནས་ཚུལ་འདི་གར་བཏོན་མི་འདུག་ཅི་ཡིན།
བོད་ཀྱི་བང་ཆེན་ཚགས་པར་ནང་བཏོན་འདུག།