ཁ་སང་རྒྱ་གར་གྱི་བརྒྱུད་ལམ་ཁག་གནས་ཚུལ་ཐོན་པ་ལྟར་ན། ཕྱི་ལོ་ ༢༠༡༤ ལོ་ནས་མགོ་འཛུགས་བྱས་ཤིང་ལམ་ཐག་ལ་སྤྱི་ལེ་ ༤༣༤ ལྷག་ཡོད་པའི་ལྷ་ས་དང་དེའི་ཤར་རྒྱུད་ཉིང་ཁྲི་བར་གྱི་མེ་འཁོར་ལྕགས་ལམ་འཛུགས་བསྐྲུན་ལེགས་འགྲུབ་བྱུང་ཡོད་པ་དང་། འདི་ལོའི་ཕྱི་ཟླ་ ༦ ཚེས་ ༣༠ ཉིན་ནས་དངོས་སུ་མེ་འཁོར་ཤར་གཏོང་བྱ་རྒྱུ་ཡིན་སྐོར་བསྒྲགས་འདུག
རྒྱ་གར་ཧིན་རྡུ་སི་ཐན་གྱི་གནས་ཚུལ་ནང་། ལྷ་ས་ནས་ཉིང་ཁྲི་བར་གྱི་མེ་འཁོར་ལྕགས་ལམ་དེ་ནི་རྒྱ་གར་གྱི་མངའ་སྡེ་ཨ་རུ་ན་ཅལ་དང་ས་འབྲེལ་ཆགས་ཀྱི་ཡོད་སྟབས། ས་མཚམས་སྲིད་ཇུས་དང་རྒྱ་དཀར་ནག་གི་མཐའ་མཚམས་སྲུང་སྐྱོབ་ཐོག་ནས་རྒྱ་གར་གཞུང་ལ་སེམས་ཁྲལ་བྱེད་ཡུལ་ཞིག་ཆགས་ཡོད་པ་དང་། ཟླ་སྔོན་མའི་ནང་རྒྱ་ནག་གི་སྲིད་འཛིན་ཞི་ཅིན་ཕིན་གྱིས། སི་ཁྲོན་ནས་ཆབ་མདོ་དང་ལྷ་ས། དེ་བཞིན་ལྷ་ས་ནས་ཉིང་ཁྲི་བར་མེ་འཁོར་ལྕགས་ལམ་འཛུགས་སྐྲུན་གྱི་ལས་གཞི་ཡིས། རྒྱལ་མཚམས་མཐའ་སྲུང་བརྟན་བརླིང་ཡོང་བར་འགོག་རྩའི་ནུས་པ་ཐོན་པའི་གཏམ་བཤད་སྤེལ་ཡོད་སྐོར་བརྗོད་འདུག
རྒྱ་ནག་ཕྱོགས་ཀྱི་གནས་ཚུལ་ལྟར་ན། ཁྲོན་བོད་ལྕགས་ལམ་དེ་སི་ཁྲོན་ཞིང་ཆེན་ཁྲི་ཏུ་གྲོང་ཁྱེར་ (Chengchu) ནས་ཐོན་ཏེ་གཡག་རྔ་དང་ཆབ་མདོ་བརྒྱུད་ལྷ་སར་འབྱོར་ཞིང་། མེ་འཁོར་ལྕགས་ལམ་དེས་ཆབ་མདོ་དང་ལྷ་ས་བར་གྱི་ལམ་ཐག་ཆུ་ཚོད་ ༤༨ ནས་ ༡༣ བར་ཇེ་ཐུང་དུ་བཏང་ཡོད་སྐོར་བརྗོད་འདུག
བོད་ཁུལ་དུ་མེ་འཁོར་ལྕགས་ལམ་འཛུགས་སྐྲུན་ཚན་པས། ལྷ་ས་དང་ཉིང་ཁྲི་བར་མེ་འཁོར་ལྕགས་ལམ་འཛུགས་སྐྲུན་གྱི་ལས་གཞིའི་ཁྲོད། འགྲོ་གྲོན་རྒྱ་སྒོར་ཐེར་འབུམ་ ༣༡ ལྷག་དང་། ཕུག་ལམ་ ༤༧ དང་ཟམ་པ་ ༡༢༠ ། དེ་བཞིན་དུས་ཡུན་ཆུ་ཚོད་གཅིག་རིང་ས་ཁྱོན་སྤྱི་ལེ་ ༡༦༠ བརྒལ་ཐུབ་ཀྱི་ཡོད་པ་དང་། ལྕགས་ལམ་བརྒྱ་ཆ་ ༩༠ ཡན་དེ་རྒྱ་མཚོའི་ངོས་ལས་ས་བབ་མཐོ་ཚད་སྨི་ ༣༠༠༠ ཡན་གྱི་ས་ཁུལ་ཡིན་པས། ས་མཐོའི་གྲང་ངར་ཆེ་ཞིང་སྐྱེ་ཁམས་ཞན་པའི་རང་བྱུང་ཁོར་ཡུག་དང་། འགྱུར་ལྡོག་ཆེ་བའི་བྱེ་རླུང་དང་འཁྱགས་རོམ། བྲག་རྡོ། དེ་བཞིན་ས་མཐོའི་དབྱིབས་འགྱུར་བྲག་རྡོ་མཉེན་པོ་སོགས་རྙོག་འཛིང་ཆེ་བའི་ས་གཤིས་ཁོར་ཡུག་ཏུ་ཡོད་པས་འཛུགས་སྐྲུན་གྱི་ལས་གཞིར་དཀའ་ངལ་ཧ་ཅང་ཆེན་པོ་བྱུང་ཡོད་སྐོར་སོགས་བརྗོད་འདུག
བསྟན་འཛིན་ཕུར་བུ།
