བལ་ཡུལ་གྱི་བོད་མི་ཚོང་པ་ཞིག་ལ་གཟི་སོགས་དངུལ་དངོས་འབོར་ཆེན་འཕྲོག་བཅོམ་བྱས།

བོད་རིགས་ཚོང་པ་བསྟན་འཛིན་ཞེས་པ་ཞིག་ལ་གཟི་སོགས་དངུལ་དངོས་ཁྱོན་ཨ་སྒོར་འབུམ་བཞི་ཡས་མས་ཤིག་འཕྲོག་བཅོམ་བྱས་པའི་གྱོད་དོན་དང་འབྲེལ་ཏེ་བལ་ཡུལ་གཞུང་གིས་དོགས་ཡོད་ཉེས་ཅན་ ༩ འཛིན་བཟུང་བྱས་ནས་འདྲི་ཞིབ་བྱེད་བཞིན་ཡོད་འདུག

ཉེ་སྔོན་བལ་ཡུལ་གྱི་གསར་འགྱུར་བརྒྱུད་ལམ་དུ། བོད་རིགས་ཚོང་པ་ཉི་ཧོང་བསྟན་འཛིན་(དོ་བདག་གི་རེ་སྐུལ་ལྟར་མིང་ཆ་ཚང་བཀོད་མེད)ཞེས་པ་ཞིག་ལ་གཟི་དང་དངུལ་སྨར་འབོར་ཆེན་འཕྲོག་བཅོམ་བྱས་པའི་གྱོད་དོན་ཞིག་ལ་རྩད་གཅོད་བྱེད་བཞིན་ཡོད་པའི་གནས་ཚུལ་ཐོན་ཡོད་པ་ལྟར། འདི་གའི་གསར་འགོད་པས་ཚོང་པ་བསྟན་འཛིན་ལགས་སུ་འབྲེལ་བ་བྱས་ཏེ་གྱོད་དོན་དེའི་སྐོར་དྲིས་པར་ཁོང་གིས། ཉིན་དེའི་མཚན་གུང་ཆུ་ཚོད་ ༡ ཙམ་སྟེ་ཆར་པ་འབབ་བཞིན་པའི་སྐབས་ཤིག་ལ། གློ་བུར་དུ་ཇག་པ་མི་ ༡༦ ཙམ་གྱིས་ངའི་ཁང་པའི་སྒོ་གཏོར་ཏེ་ནང་དུ་འཛུལ་བྱུང་། སྐབས་དེར་ཁྱིམ་དུ་ང་ཚོ་ནང་མི་བཞི་མ་གཏོགས་མེད།  ཇག་པས་ལོ་ན་ ༡༡ དང་ ༡༢ ཙམ་ཡིན་པའི་ངའི་བུ་ཆུང་གཉིས་དང་། བཟའ་ཟླ་ཐག་པས་བསྡམས་པ་དང་སྐེ་ལ་གྲི་སོགས་བཞག་སྟེ་འཇིགས་སྐུལ་བྱས་པ་མ་ཟད། ངའི་ལུས་དང་མགོར་གྲིས་ཐེངས་གསུམ་བཞི་བཙུགས་བྱུང་། ཞེས་དང་། མཚན་མོ་དེར་ཁྱིམ་མི་ཚང་མ་སྲོག་ཉེན་དུ་འཕྲད་རྗེས། ཁོ་རང་ཁང་པ་ཐོག་རྩེག་གཉིས་ཀྱི་སྟེང་ནས་མར་མཆོངས་ཏེ་རྐང་ལག་ཆག་པ་སོགས་མ་ཤི་ཙམ་གྱིས་ཐར་ཐུབ་ཡོད་པ་དང་། བཟའ་ཟླ་དང་བུ་གཉིས་ལ་གནོད་སྐྱོན་བྱུང་མེད་ཀྱང་། ཁྱིམ་དུ་ཡོད་པའི་གཟི་གསུམ་དང་དབྱིན་སྒོར་ ༧༠༠། ཧོང་ཀོང་གི་སྒོར་མོ་ ༢༠༠༠། རྒྱ་སྒོར་ཁྲི་ ༨ ། བལ་སྒོར་འབུམ་ ༦ ། ད་དུང་ཁྱིམ་དུ་ཡོད་པའི་རྒྱུ་དངོས་ཁྱོན་བསྡོམས་ཨ་སྒོར་འབུམ་བཞི་ཡས་མས་ཀྱི་རྒྱུ་དངོས་འཕྲོག་བཅོམ་བྱས་ཡོད་སྐོར་བརྗོད་བྱུང་།

བལ་ཡུལ་གྱི་ཁ་བྷར་(Khabar) གསར་ཁང་གིས་སྤེལ་བའི་དེ་འབྲེལ་གནས་ཚུལ་ནང་། དོགས་ཡོད་ཉེས་ཅན་དེ་དག་ནི་བསོད་ནམས་རྟ་མང་དང་རྡོ་རྗེ་རྟ་མང་། ཌན་ནེ་ཤི་ཁར་གེ(Dinesh Karki)། ཨན་ཉི་མ་ཤར་པ(Angnima Sherpa)། ཀེ་ར་ཇི་རྟ་མང་(Ekraj Tamang)། ཨིན་དྷི་ར་ཇེ་ཊི་རྟ་མང་(Indrajit Tamang)། སའེ་ཡང་ཊན་(Syangtan)དང་ཇེ་ནཱ་ལ་མ་(Jina Lama)བཅས་ཡིན་པ་དང་། འཕྲོག་བཅོམ་དོན་རྐྱེན་རྒྱབ་ཀྱི་ཉེས་ཅན་གཏེ་བོ་ནི་བུད་མེད་ཇེ་ནཱ་བླ་མ་(Jina Lama)ཞེས་པ་ཞིག་ཡིན་པའི་དོགས་གཞིའི་འོག ཉེ་སྔོན་བལ་ཡུལ་དང་ཉི་ཧོང་། རྒྱ་གར་བཅས་ཀྱི་ཉེན་རྟོག་པ་མཉམ་འབྲེལ་ཐོག་ནས་རྒྱལ་སྤྱིའི་ཉེན་རྟོག་སྒྲིག་འཛུགས་བརྒྱུད་རྒྱལ་ས་ལྡི་ལིའི་མན་ཇི་ན་ཀ་ཊི་ལ་ནས་འཛིན་བཟུང་བྱས་ཡོད་པ་དང་། ད་ལྟ་ད་དུང་བལ་ཡུལ་ཉེན་རྟོག་པས་བྲོས་བྱོལ་དུ་ཕྱིན་པའི་མི་ཁག་ཅིག་རྩད་གཅོད་གཏོང་གི་ཡོད་པ་མ་ཟད། ཇེ་ནཱ་ལ་མ་ལ་བསྟན་འཛིན་གྱི་རྒྱབ་ལྗོངས་གནས་ཚུལ་མཁོ་སྤྲོད་བྱེད་མཁན་མི་གཞན་ཞིག་ཡོད་པའི་དོགས་གཞི་ཡོད་སྐོར་བཀོད་འདུག

བསྟན་འཛིན་ལགས་ནི་བལ་ཡུལ་དང་ཉི་ཧོང་གཙོས་པའི་རྒྱལ་ཁབ་མང་པོའི་ནང་བྱུ་རུ་དང་གཟི་སོགས་ཀྱིས་ཚོང་རྒྱག་མཁན་བོད་རིགས་ཚོང་པ་ཞིག་ཡིན་པ་དང་། ཁོང་ལ་ཉི་ཧོང་ནང་བྱུ་རུའི་བཟོ་གྲྭ་དང་། ཧི་མ་ལ་ཡའི་འགྲེམས་སྟོན་ཁང་ཞིག་ཡོད་པ་དང་། དེ་བཞིན། ཁོང་གིས་བལ་ཡུལ་ནང་ཧི་མ་ལ་ཡའི་རི་རྒྱུད་ཀྱི་ཁོར་ཡུག་སྲུང་སྐྱོབ་ཀྱི་ལས་དོན་སོགས་གཉེར་ཡོད་པ་མ་ཟད། ཁོ་རང་གླུ་གཞས་སྒྱུ་རྩལ་ལ་དགའ་མོས་ཡོད་མཁན་ཞིག་ཡིན་སྟབས། དེ་སྔོན་ལ་དྭགས་ཀྱི་དུས་འཁོར་དབང་ཆེན་དང་རྡོར་གདན་གྱི་དུས་འཁོར་དབང་ཆེན་སྐབས་སུ་བཀྲ་ཤིས་བདེ་ལེགས་གླུ་གཞས་དགོང་ཚོགས་ཞེས་པ་དེའི་སྦྱིན་བདག་གནང་མྱོང་ཡོད་འདུག

གསར་འགོད་པ། སྐལ་བཟང་སྦྱིན་པ།