འཛམ་གླིང་ཡུལ་གྲུ་གང་སར་རྣམ་པ་འདྲ་མིན་ཐོག་ནས་གསུམ་བཅུའི་དུས་དྲན་སྲུང་གཙི་གནང་།

ལོ་རྟག་པར་གསུམ་པའི་ཚེས་བཅུ་ནི་བོད་དོན་ཆེད་གཅེས་པའི་ཚེ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་ཞུ་བའི་བོད་ཀྱི་ལོ་རྒྱུས་ཁྲོད་ཀྱི་ཉིན་མོ་གལ་གནད་ཆེན་པོ་ཞིག་ཆགས་ཡོད་སྟབས། འཛམ་གླིང་ཡུལ་ལུང་གང་སར་གནས་པའི་བཙན་བྱོལ་བོད་མི་ཚོས་བོད་མིའི་རང་དབང་སྒེར་ལངས་ཐེངས་ ༦༢ པ་རྣམ་པ་འདྲ་མིན་ཐོག་ནས་སྲུང་གཙི་ཞུས་ཡོད་པ་ལྟར། རྒྱ་གར་ནང་མོན་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་པས་གོ་སྒྲིག་འོག དགོན་པའི་གྲྭ་བ་དང་བཙུན་མ་རྣམས་ཀྱི་དབུས་པའི་ཧིན་བོད་མཛའ་འབྲེལ་ཚོགས་པ་དང་རྟ་དབང་ཁུལ་གྱི་སེར་སྐྱ་མི་མང་གིས། རྣམ་རྒྱལ་ལྷ་རྩེ་དགོན་ནས་འདུ་འཛོམས་ཐང་ཆེན་བར་བོད་ལ་རང་དབང་དགོས་པ་དང་༧གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག་ཅེས་པའི་འབོད་ཚིག་འོག་བོད་མིའི་རང་དབང་སྒེར་ལངས་ཐེངས་ ༦༢ པ་སྲུང་གཙི་ཞུས་གནང་ཡོད་པ་རེད།

ལོ་ལྟར་གསུམ་བཅུའི་དུས་དྲན་སྐབས་ཨོ་གླིང་གི་རི་སྔོན་པོའི་ས་གནས་སྲིད་གཞུང་གི་སྒོ་འགྲམ་དུ་བོད་ཀྱི་རྒྱལ་དར་བསྒྲེངས་སྲོལ་ཡོད་པ་ལྟར། ཁ་སང་བོད་མི་དང་བོད་དོན་རྒྱབ་སྐྱོར་བ་སོགས་མི་གྲངས་ ༡༠༠ ལྷག་འཛོམས་པའི་ཐོག་ས་གནས་གྲོས་ཚོགས་ཀྱི་མདུན་དུ་བོད་ཀྱི་རྒྱལ་དར་བསྒྲེངས་འཛུགས་བྱས་བ་དང་བསྟུན་གསུམ་བཅུའི་དུས་དྲན་སྲུང་གཙི་ཞུས་གནང་ཡོད་པ་རེད།

ཁ་སང་ཁེ་ན་ཌའི་བོད་རང་བཙན་སློབ་ཕྲུག་ཚོགས་པ་དང་ཨོ་ཊན་རེའོ་བོད་རིགས་སྤྱི་མཐུན་ཚོགས་པ། ས་གནས་བོད་ཀྱི་བུད་མེད་དང་གཞོན་ནུ་ལྷན་ཚོགས། མདོ་ཁམས་ཆུ་བཞི་སྒང་དྲུག་བཅས་ཀྱི་གོ་སྒྲིག་འོག ཞོགས་པར་དྲ་ལམ་ཐད་གཏོང་བརྒྱུད། འདས་པའི་ལོ་ངོ་ ༦༢ རིང་གི་བོད་དོན་འཐབ་རྩོད་དང་གདོང་ལེན། མདུན་སྐྱོད་ཅེས་པའི་བརྗོད་གཞིའི་ཐོག་བགྲོ་གླེང་ཐེངས་གཉིས་རིང་གནང་ཡོད་པ་དང་། བགྲོ་གླེང་ནང་རྒྱལ་སྤྱིའི་བོད་དོན་འབྲེལ་མཐུད་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་དང་ཁེ་ན་ཌའི་བོད་རིགས་ཚོགས་པ་དབུ་འཛུགས་གནང་མཁན་ཐུབ་བསྟན་བསམ་འགྲུབ་ལགས། རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས།  བཀའ་ཟུར་བདེ་སྐྱིད་ཆོས་དབྱིངས་ལགས་དང་བོད་དོན་ལས་འགུལ་ཁང་གི་འགན་འཛིན་ལྷ་སྒྲོན་བཀྲས་མཐོང་ལགས། འཛམ་གླིང་ཡུ་གུར་མཐུན་ཚོགས་ཀྱི་མཉམ་ལས་འགན་འཛིན་ (Mehmet Tohti) བཅས་མཉམ་ཞུགས་གནང་ཡོད་འདུག་ལ། ཉིན་རྒྱབ་ཏུ་བོད་མི་ཚོས་རང་ཉིད་ཀྱི་རླངས་འཁོར་སྟེང་༧གོང་ས་མཆོག་གི་སྐུ་པར་གྱི་གཙོས་བོད་ཀྱི་རྒྱལ་དར་བཏགས་ཏེ། རླངས་འཁོར་སྐོར་སྐྱོད་ཀྱི་ལམ་ནས་གསུམ་བཅུའི་དུས་དྲན་སྲུང་གཙི་ཞུས་གནང་ཡོད་པ་རེད།

འཇར་མན་ནང་བོད་མི་དང་བོད་དོན་རྒྱབ་སྐྱོར་བ་ཁག་ཅིག་གིས་དྲ་ལམ་བརྒྱུད་འཇར་མན་གཞུང་ནས་བོད་དོན་ལ་རྒྱབ་སྐྱོར་གནང་དགོས་པའི་འབོད་སྐུལ་ཞུས་ཏེ་གསུམ་བཅུའི་དུས་དྲན་སྲུང་གཙི་དང་། དབྱིན་ཡུལ་དུ་བོད་རང་བཙན་སློབ་ཕྲུག་ཚོགས་པ་དང་བོད་རིགས་ཚོགས་པ། བོད་དོན་ལས་འགུལ་ཁང་བཅས་ཀྱི་གོ་སྒྲིག་འོག རྒྱ་ནག་གཞུང་ཚབ་ཁང་ལ་བོད་དོན་ཞུ་གཏུགས་དང་། དྲ་ལམ་ཐད་གཏོང་བརྒྱུད་དབྱིན་ཡུལ་གྲོས་ཚོགས་འཐུས་མི་དང་དབྱིན་ཡུལ་སྐུ་ཚབ་དོན་གཅོད། ཆབ་སྲིད་བཙོན་ཟུར་མགོ་ལོག་འཇིགས་མེད་བཅས་ཀྱིས་གསུམ་བཅུའི་དུས་དྲན་དང་འབྲེལ་བའི་བགྲོ་གླེང་གནང་ཞིང་། ཨེ་རན་ལན་ཌི་གཙོས་པའི་དབྱིན་ཡུལ་གྱི་གྲོང་ཁྱེར་དང་ས་གནས་འདྲ་མིན་དུ་གནས་པའི་བོད་རིགས་དང་བོད་དོན་རྒྱབ་སྐྱོར་བ་ཚོས་ཞི་བའི་གོམ་བགྲོད་དང་བོད་ཀྱི་རྒྱལ་དར་བསྒྲེངས་འཛུགས་སོགས་བྱས་ཏེ་དུས་དྲན་སྲུང་གཙི་ཞུས་གནང་འདུག

ཨ་རིའི་ནེའུ་ཡོག་དང་ནེའུ་འཇར་སི་མངའ་ཁུལ་བོད་རིགས་སྤྱི་མཐུན་ཚོགས་པ་དང་། ས་གནས་བོད་ཀྱི་གཞོན་ནུ་ལྷན་ཚོགས། བྱང་ཨ་རི་ས་གནས་དབུས་གཙང་ཆོལ་ཁ་དང་ས་གནས་མདོ་ཁམས་ཆུ་བཞི་སྒང་དྲུག་དང་། ས་གནས་མདོ་སྨད་ཆོལ་ཁ། ཨ་བོད་མཛའ་འབྲེལ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་མཉམ་རུབ་ཀྱིས་གོ་སྒྲིག་འོག མི་མང་སྟོང་ཕྲག་ལྷག་ནས་འཛམ་གླིང་མཉམ་འབྲེལ་རྒྱལ་ཚོགས་དང་རྒྱ་ནག་གཞུང་ཚབ་མདུན་དུ་སྐད་འབོད་དང་ཞི་བའི་གོམ་བགྲོད་གནང་སྟེ་བོད་མིའི་རང་དབང་སྒེར་ལངས་ཉིན་མོ་སྲུང་གཙི་ཞུས་གནང་ཡོད་པ་རེད།

ཡུ་རོབ་རྒྱལ་ཁབ་ཧྥ་རན་སིའི་ནང་ཧྥ་རན་སི་བོད་རིགས་ཚོགས་པས་སྣེ་ཁྲིད་དང་ས་གནས་གཞུང་འབྲེལ་མ་ཡིན་པའི་ཚོགས་པ་ཁག་དྲུག་ཐུན་མོང་གི་གོ་སྒྲིག་འོག ཧྥ་རན་སིའི་རྒྱལ་ས་པེ་རི་སིའི་ནང་གཞུང་གི་རྒྱབ་སྐྱོར་བཀའ་འཁྲོལ་ཐོབ་པའི་འོག ཧྥ་རན་སིའི་གཞུང་འབྲེལ་མི་སྣ་དང་བོད་མི་སྟོང་ཕྲག་ལྷན་འཛོམས་ཐོག་ནས་རྒྱ་ནག་གཞུང་ལ་ངོ་རྒོལ་སྐད་འབོད་དང་། བོད་ནང་གི་དྲག་གནོན་དང་འབྲེལ་བའི་གཏམ་བརྗོད། རྒྱལ་ཞེན་གྱི་གླུ་གཞས་སོགས་རྣམ་པ་འདྲ་མིན་གྱི་ལམ་ནས་བོད་མིའི་རང་དབང་སྒེར་ལངས་སྲུང་གཙི་ཞུས་ཡོད་པ་རེད།

ཨོ་གླིང་གི་མངའ་སྡེ་(NSW) ནང་སིཌ་ཎི་བོད་རིགས་མཐུན་ཚོགས་དང་ནོར་ར་བོད་རིགས་མཐུན་ཚོགས། ནེའུ་ཁང་གསར་བོད་རིགས་མཐུན་ཚོགས། ཨོ་གླིང་བོད་དོན་ལས་འགུལ་ཁང་ (ATC ) བཅས་མཉམ་འབྲེལ་གྱིས། ས་གནས་ཉེན་རྟོག་པའི་ལྟ་རྟོག་འོག ཨོ་གླིང་སིཌ་ཎི་གྲོང་ཁྱེར་གྱི་ (Martine place ) ལྟེ་གནས་ནས་རྒྱ་ནག་གཞུང་ཚབ་བར་ཞི་བའི་གོམ་བགྲོད་གནང་སྟེ། བོད་མིའི་རང་དབང་སྒེར་ལངས་ཐེངས་ ༦༢ པ་སྲུང་གཙི་གནང་ཡོད་པ་དང་དུས་དྲན་མཛད་སྒོའི་ཐོག་བོད་མི་དང་བོད་དོན་རྒྱབ་སྐྱོར་བ་སོགས་མི་གྲངས་ ༣༥༠ ཙམ་འཛོམས་ཡོད་འདུག

ཐའེ་ཝན་དུ་གསུམ་བཅུའི་དུས་དྲན་སྲུང་གཙི་སྔ་སྣུར་གྱིས། ཕྱི་ཚེས་ ༧ ཉིན་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་དང་། བོད་རིགས་ཚོགས་པ་དང་གཞུང་འབྲེལ་མིན་ཚོགས་པ་ཁག་ཅིག་མཉམ་འབྲེལ་ཐོག་ནས། ཁྲག་དང་མིག་ཆུའི་ལོ་ངོ་ ༧༠ དང་བོད་མིས་རང་དབང་སྒེར་ལངས་གནང་སྟེ་ལོ་ངོ་ ༦༢ འཁོར་བའི་དུས་དྲན་ཞེས་པའི་བརྗོད་གཞིའི་འོག རྒྱལ་ས་ཐའེ་པེ་ཡི་ (Liberty Plaza) ནས་རྒྱ་ནག་དངུལ་ཁང་མདུན་བར་ཞི་བའི་གོམ་བགྲོད་གནང་ཡོད་པ་དང་། ཉིན་དེའི་མཚན་མོར་མར་མེ་ཁྲོམ་སྐོར་དང་མཆོད་འབུལ་སྨོན་ལམ་སོགས་ཚོགས་ཏེ་དུས་དྲན་སྲུང་གཙི་གནང་ཡོད་འདུག

དེ་བཞིན་གསུམ་བཅུའི་དུས་དྲན་དང་བསྟུན། རྒྱ་གར་གྱི་སྒྱུ་རྩལ་བ་སའོ་རེ་ཤི་ (Suresh kailaash) ལགས་ཀྱིས་བོད་ཀྱི་སྨན་རྩིས་ཁང་གི་གསོ་རིག་ཐབས་ལམ་ལ་བརྟེན་ནས་རང་ཉིད་ཀྱི་འབྲས་སྐྲན་བཅོས་ཐུབ་པ་བྱུང་བར། ༧གོང་ས་མཆོག་གི་དབུས་བོད་མི་རྣམས་ལ་བཀའ་དྲིན་རྗེས་དྲན་དང་བོད་དོན་རྒྱབ་སྐྱོར་མཚོད་སླད་བོད་བོད་ (Tibet Tibet) ཅེས་པའི་གླུ་གཞས་ཤིག་རྒྱ་གར་གྱི་སྒྱུ་རྩལ་བ་གྲགས་ཅན་ཁག་ཅིག་དང་མཉམ་འབྲེལ་ཐོག་ནས་བླངས་ཡོད་འདུག

གསར་འགོད་པ། སྐལ་བཟང་སྦྱིན་པ།