ཁྲིམས་ཞིབ་པ་རྣམས་འཕོ་འགྱུར་བཏང་བ་དེ་ཁྲིམས་ལུགས་དབང་འཛིན་རྨང་ནས་བསྒྱེལ་བ་ཞིག་རེད་ཅེས་གསལ་བསྒྲགས་གནང་།

ཆེས་མཐོའི་ཁྲིམས་ཞིབ་པ་རྣམ་པ་གསུམ་གྱིས་སྤྱི་འཐུས་ལྷན་ཚོགས་ནས་བྱ་རིམ་གང་ཡང་མེད་པར་ཁྲིམས་ཞིབ་པ་རྣམས་འཕོ་འགྱུར་བཏང་བ་དེ་ཉེན་ཁ་ཆེན་པོ་རེད་ཅེས་གསལ་བཤད་བསྒྲགས་གཏམ་ཞིག་སྤེལ་ཏེ་དེ་རིང་ཕྱི་དྲོ་ནས་ཁྲིམས་ཞིབ་པའི་ལས་གནས་ནས་བཤོལ་སོང་།

དེ་རིང་ཕྱི་ཚེས་ ༢༦ ཉིན་གྱི་ཉིན་རྒྱབ་ཆུ་ཚོད་ ༣།༣༠ སྟེང་། ཆེས་མཐོའི་ཁྲིམས་ཞིབ་ཁང་གི་ཚོགས་ཁང་དུ་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་དང་། ཁྲིམས་ཞིབ་པ་གཞན་ཀརྨ་དགྲ་འདུལ་ལགས་དང་བསྟན་འཛིན་ལུང་རྟོགས་ལགས་བཅས་ལྷན་འཛོམས་ཐོག ཁ་སང་ཕྱི་ཚེས་ ༢༥ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་ཁྲིམས་ཞིབ་པ་གསུམ་འཕོ་འགྱུར་བཏང་བ་དང་འབྲེལ་བའི་གསལ་བཤད་ཀྱི་གསར་འགོད་གསལ་བསྒྲགས་ཤིག་སྤེལ་ཏེ། ང་ཚོར་བཅའ་ཁྲིམས་ལ་བྱ་ར་བྱེད་པའི་གོ་སྐབས་བྱུང་བར་སྤོབས་པ་ཡོད་པ་དང་། བཅའ་ཁྲིམས་དང་གནོད་འགལ་བྱས་པའི་གནོངས་སྐྱོན་གཏན་ནས་མེད་ལ། ད་ལན་བོད་མི་མང་སྤྱི་འཐུས་ཀྱིས་གྲོས་འཆར་ཞིག་འཁུར་ནས་བྱ་རིམ་གང་ཡང་མེད་པའི་ཐོག་ནས་ཁྲིམས་ཞིབ་པ་རྣམས་འཕོ་འགྱུར་བཏང་བ་དེ་མ་འོངས་པར་ཉེན་ཁ་ཆེན་པོ་ཡིན་སྐོར་དང་། དེ་དག་བཅའ་ཁྲིམས་ནང་མེད་སྟབས་གསར་དུ་བཟོ་དགོས་གལ་ཆེན་པོ་ཡིན་པ་ལས། བྱེད་ཐབས་དེ་ཁྲིམས་ཀྱི་དབང་བསྒྱུར་ཞིག་མིན་ལ། རྒྱ་ཆེའི་མང་ཚོགས་ཀྱིས་དམངས་གཙོའི་ལམ་ལུགས་ལ་ཡིད་ཆེས་དང་། ཁྲིམས་ཀྱི་དབང་བསྒྱུར་ལ་འདུན་མོས་མ་ལྷོད་པར། སྤྱི་ཚོགས་ནང་ཟིང་སློང་མི་ཡོང་བའི་འགན་ཁུར་བཞེས་ཐུབ་པ་ཡིན་ན། འཕྲལ་རྐྱེན་གེགས་བར་འདིའི་རིགས་ལས་སྒྲོལ་བའི་ཐབས་ལམ་གང་མགྱོགས་རྙེད་ངེས་ཡིན་སྐོར་གསུངས་སོང་།

ཁྲིམས་ཞིབ་པ་ཆེ་བ་དྭགས་པོ་བསོད་ནམས་བསོད་ནོར་བུ་མཆོག་གིས་གསར་འགོད་པའི་དྲི་བར་ལན་འདེབས་གནང་སྐབས། གྲོས་ཚོགས་དང་ཆེས་མཐོའི་ཁྲིམས་ཞིབ་ཁང་ནས་སོ་སོའི་གནང་ཕྱོགས་དེ་འགྲིག་གི་ཡོད་པ་བཤད་ཀྱི་ཡོད་ཀྱང་། མང་ཚོགས་ངོས་ནས་ཆེས་མཐོའི་ཁྲིམས་ཞིབ་ཁང་གི་བཅད་ཁྲ་དང་བོད་མི་མང་སྤྱི་འཐུས་ལྷན་ཚོགས་ཀྱི་གསལ་བསྒྲགས། དེ་བཞིན་གྲོས་འཆར་བཅས་ལ་བལྟས་ནས་གཤིབ་བསྡུར་བྱས་ཚེ། སུས་ཁྲིམས་འགལ་བྱས་ཡོད་མེད་ཤེས་རྟོགས་ཐུབ་རྒྱུ་ཡིན་པ་དང་། གལ་ཏེ་གྲོས་ཚོགས་ངོས་ནས་ཁྲིམས་ཞིབ་ཁང་གི་ཁྲིམས་ཀྱིས་ངོས་བཞེས་ཞེས་པ་དེ་ཞྭ་དཔེ་ལྷམ་འགེབས་ཡིན་པར་བཤད་ཀྱི་ཡོད་ན། བཙན་བྱོལ་བོད་མིའི་སྒྲིག་འཛུགས་ཀྱི་བཅའ་ཁྲིམས་དང་ཁྲིམས་སྒྲིག་ཕལ་ཆེ་བ་རྒྱ་གར་གྱི་ཁྲིམས་ནས་བླངས་པ་ཡིན་སྟབས། ཁྲིམས་སྒྲིག་གཞན་རྣམས་ཀྱང་དེ་ལྟར་འགྱུར་ཉེན་ཡོད་པ་དང་། སྤྱིར་གྲོས་ཚོགས་ཀྱི་བྱེད་སྟངས་བྱེད་ལུགས་དེར་འགྲིག་མཐུན་བྱུང་མེད་ནའང་། ཁྲིམས་ཞིབ་པ་གསུམ་ཀ་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་རྙིང་པ་ཡིན་སྟབས། བཅའ་ཁྲིམས་དང་གྲོས་ཚོགས་ཀྱི་གྲོས་འཆར་ལ་བརྩི་བཀུར་དང་ལེན་བྱ་རྒྱུ་ཡིན་སྐོར་འགྲེལ་བརྗོད་གནང་སོང་།

ཡང་ཁོང་གིས་རྒྱ་གར་ལ་མཚོན་ན་ཁྲིམས་ཞིབ་པ་ཆེ་བ་དང་སྲིད་འཛིན་ལྟ་བུ་ཞིག་ཕྱིར་ཕུད་གཏོང་བར། འབྲེལ་ཡོད་ཁྲིམས་ཞིབ་པ་དེས་ཚབས་ཆེའི་ངན་སྤྱོད་དམ། ལས་འགན་མ་ཐེག་པ་གཉིས་བཅས་གཞི་རྩར་བཟུང་ནས་བྱ་རིམ་མང་པོ་བརྒྱུད་དེ་འཕོ་འགྱུར་གཏོང་དགོས་པ་དང་། ཉེ་ཆར་ཨ་རིའི་སྲིད་འཛིན་ཊོམ་ཕུ་ལའང་བརྒྱུད་རིམ་མང་པོ་བརྒྱུད་ཡོད་ཀྱང་། ད་ལན་བོད་མི་མང་སྤྱི་འཐུས་ཀྱིས་གྲོས་འཆར་ཞིག་འཁུར་ནས་བྱ་རིམ་གང་ཡང་མེད་པའི་ཐོག་འཕོ་འགྱུར་བཏང་བ་དེ་མ་འོངས་པར་ཉེན་ཁ་ཆེན་པོ་ཡིན་སྐོར་དང་། དེ་དག་བཅའ་ཁྲིམས་ནང་མེད་སྟབས་གསར་དུ་བཟོ་དགོས་གལ་ཆེན་པོ་ཡིན་པ་ལས། བྱེད་ཐབས་དེ་ཁྲིམས་ཀྱི་དབང་བསྒྱུར་ཞིག་མིན་པ་དང་། འབྱུང་འགྱུར་བྱེད་སྟངས་དེ་དག་གིས་དམངས་གཙོ་དང་ལྗིད་མཉམ་སྟངས་འཛིན་སོགས་མེད་པར་ཆགས་པ་མ་ཟད། གྲོས་ཚོགས་དབང་ཆ་ཆེན་པོ་ཆགས་ཏེ། གཞན་ཚོས་འཕོ་འགྱུར་འགྲོ་བར་ཞེད་སྣང་སྐྱེ་རྒྱུའི་གནས་སྟངས་ལ་འགྱུར་སྲིད་སྐོར་འགྲེལ་བརྗོད་གནང་སོང་།

ཡིག་ཐོག་གསལ་བཤད་ནང་། ཁྲིམས་ཞིབ་པ་ཆེ་བ་དང༌ཁྲིམས་ཞིབ་པ་གཞན་གཉིས་འཕོ་འགྱུར་གཏོང་རྒྱུའི་སྐུ་དབང་བོད་མི་མང་སྤྱི་འཐུས་ལྷན་ཚོགས་ལ་ཡོད་པ་སྨོས་མེད་ཡིན་ནའང༌། བཙན་བྱོལ་བོད་མིའི་བཅའ་ཁྲིམས་དང་། སྒྲིག་གཞི་ཁག་ནང་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་འཕོ་འགྱུར་གཏོང་བའི་གཞི་རྩར་ཚབས་ཆེའི་ངན་སྤྱོད་དམ། ལས་འགན་མ་ཐེག་པ་ (ground of proved misbehavior or incapacity) ཇི་ཡིན་དང་། ལག་བསྟར་བྱ་རིམ་གང་ཡང་མེད་བཞིན་དུ། སྤྱི་འཐུས་ལྷན་ཚོགས་ཀྱི་གྲོས་ཆོད་དེའི་ནང་བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༣ (༤) གཞིར་བཟུང་སྟེ་འཕོ་འགྱུར་བཏང་བ་ཡིན་ལུགས་བཀོད་པ་ནི། ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་ཀྱི་ཡུན་ཚད་སྐོར་ལ་ཡིན་པ་ལས། འཕོ་འགྱུར་གཏོང་རྒྱུའི་བྱ་རིམ་ཞིག་མིན་ལ། ཁྲིམས་ཡིག་གི་གཞི་རྩ་མེད་པར་འཕོ་འགྱུར་གྱི་བྱ་རིམ་ལག་བསྟར་བྱས་པ་ནི་ཁྲིམས་འགལ་ཡིན་པས་མ་ཚད། མ་འོངས་པར་བོད་མིའི་སྒྲིག་འཛུགས་འཐོར་ཞིག་ཏུ་འགྲོ་རྒྱུའི་ཉེན་ཁ་ཚབས་ཆེན་ཞིག་བྱེད་སྟངས་འདི་རིགས་ནང་སྦས་ཡོད། ཅེས་བཀོད་འདུག

ཡང་བསྒྲགས་ཡིག་ནང་། བཅའ་ཁྲིམས་དོན་ཚན་ ༥༨ པའི་དགོངས་དོན་ལྟར། སྤྱི་འཐུས་ལྷན་ཚོགས་ཀྱི་ཐག་གཅོད་བྱེད་ཕྱོགས་ལྷན་ཚོགས་ཀྱི་སྒྲིག་གཞི་དང་མཐུན་མིན་ལ་བསྙད་དེ་ཁྲིམས་ཞིབ་ཁང་ནས་རྩད་གཅོད་ཆོག་གི་མེད་ནའང་། སྤྱི་འཐུས་རྒྱུན་ལས་ལྷན་ཚོགས་ཀྱི་གྲོས་ཆོད་གྲོས་འཆར་དེ་འདོན་ཕྱོགས་དང་། ཁྱེར་སྟངས། ཆ་རྐྱེན། བགྲོ་གླེང༌། འོས་བསྡུ་བྱེད་སྟངས་བཅས་པ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང༌། ལས་དོན་བྱེད་ཕྱོགས་ཀྱི་སྒྲིག་གཞི་ལེའུ་ ༡༢ དང་ ༡༣ དང་མཐུན་པའི་ཐག་གཅོད་ཅིག་མིན་སྐོར། དེ་བཞིན་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་ཏུ་གསལ་བའི་ཁྲིམས་ཀྱིས་ངོས་བཞེས་ལ་ཁྲིམས་ལུགས་ཀྱི་རྒྱུན་ཤེས་མི་ལྡན་པའི་སྒོ་ནས་འགྲེལ་ལོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་ ༥༡ པར་ལྟོས་མེད་བྱས་ཏེ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་དུས་གཅིག་ཏུ་འཕོ་འགྱུར་གཏོང་རྒྱུའི་གྲོས་ཆོད་གྲོས་འཆར་ལ་གསང་བའི་འོས་བསྡུ་བྱེད་དུ་བཅུག་པ་བཅས་ནི་ཁྲིམས་མེད་ལུགས་མེད་ཀྱི་བྱེད་སྟངས་ཤིག་ཆགས་ཡོད་སྐོར་བཀོད་འདུག

ཡང་བསྒྲགས་གཏམ་གྱི་མཇུག་ཤོག་ནང་། སྤྱི་འཐུས་ཚོགས་གཙོ་ཡིས་གྲོས་ཚོགས་ཀྱི་བྱ་རིམ་ཚུལ་མིན་སྤྱད་པ་དང༌། སྤྱི་འཐུས་རྣམས་ལོག་འཁྲིད་བྱས་མཐར། ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་འཕོ་འགྱུར་གྱི་གྲོས་ཆོད་འཇོག་ཏུ་བཅུག་པ་ནི། བོད་མིའི་སྒྲིག་འཛུགས་ཀྱི་དམངས་གཙོ་ཀ་བ་གསུམ་གྱི་ཡ་གྱལ་ཁྲིམས་ལུགས་དབང་འཛིན་རྨང་ནས་བསྒྱེལ་བ་ཞིག་ཡིན་སྐོར་དང་། རྒྱ་ཆེའི་མང་ཚོགས་ཀྱིས་དམངས་གཙོའི་ལམ་ལུགས་ལ་ཡིད་ཆེས་དང་། ཁྲིམས་ཀྱི་དབང་བསྒྱུར་ལ་འདུན་མོས་མ་ལྷོད་པར། སྤྱི་ཚོགས་ནང་ཟིང་སློང་མི་ཡོང་བའི་འགན་ཁུར་བཞེས་ཐུབ་པ་ཡིན་ན། འཕྲལ་རྐྱེན་གེགས་བར་འདིའི་རིགས་ལས་སྒྲོལ་བའི་ཐབས་ལམ་གང་མགྱོགས་རྙེད་ངེས་ཡིན་སྐོར་གསུངས་འདུག

གསར་འགོད་པ། པ་སངས་ཚེ་རིང་། ཀླུ་མགོན་ཐར།