བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲ་ཚོགས་ཆུང་སྐབས་བཅུ་པའི་གྲུབ་དོན་སྙན་ཐོའི་ནང་རྩིས་ལོའི་ནང་བོད་མིའི་སྒྲིག་འཛུགས་ཀྱི་སྔོན་རྩིས་བཀའ་འཁྲོལ་ལས་བརྒལ་བའི་སྐྱོན་གནད་གྲངས་ ༢༥༢ བྱུང་ཡོད་སྐོར་བཀོད་འདུག
དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་མཐའ་མ་མཇུག་བསྡོམས་ཀྱི་གསུང་བཤད་སྐབས་ཚོགས་གཙོ་མཆོག་གིས། སྤྱིར་གྲོས་ཚོགས་ཀྱིས་མི་མང་སྣེ་འཁྲིད་དགོས་ཀྱང་། ད་ལན་སྤྱི་ཚོགས་དྲ་ལམ་གྱིས་གྲོས་ཚོགས་སྣེ་ཁྲིད་པ་ལྟ་བུའི་མགོ་མཇུག་ལྡོག་པའི་མཐོང་སྣང་བྱུང་བ་དང་། ལྷག་པར་དུ་སྤྱི་ཚོགས་ནང་འཁྲུག་རྐྱེན་བཟོ་མཁན་གྱི་རྗེས་སུ་འབྲངས་བའི་ཐོག་ནས་གྲོས་ཚོགས་ནང་གནས་ཚུལ་མང་པོ་སླེབས་ཀྱི་ཡོད་སྟབས། མ་འོངས་པར་གྲོས་ཚོགས་འཐུས་མི་རང་གིས་རྣམ་དཔྱོད་བེད་སྤྱོད་གཏོང་པ་ལས་དེ་དག་མེད་ན་ཡག་པོ་ཡོད་སྐོར་དང་། ད་ལྟའི་འཆར་གཞི་ལ་གྲོས་ཚོགས་འདིའི་ཚོགས་དུས་མཐའ་མ་དེ་འདི་ལོའི་ཕྱི་ཟླ་ ༥ པའི་ནང་ཚོགས་འཆར་ཡོད་སྟབས། སྤྱི་འཐུས་རྣམས་དེ་དུས་ཚོགས་བཅར་ཡོང་བའི་རེ་སྐུལ་གནང་སོང་།
དེ་རིང་ལས་ཉིན་ ༡༢ པའི་ཐོག།མང་ཚོགས་རྩིས་ཁྲ་ཚོགས་ཆུང་སྐབས་བཅུ་པའི་གྲུབ་དོན་སྙན་ཐོ་ཆ་ཚང་སྙན་སྒྲོན་ཞུས་པའི་རྒྱབ་གཉེར་ནང་། སྔོན་རྩིས་བཀའ་འཁྲོལ་ལས་བརྒལ་བ་ནི། དཔལ་འབྱོར་གྱི་སྒྲིག་གཞི་དང་འགལ་ཚབས་ཆེ་ཤོས་དེ་ཡིན་ལ། སྐབས་འདིར་སྔོན་རྩིས་བཀའ་འཁྲོལ་ལས་བརྒལ་བའི་སྐྱོན་གནད་གྲངས་ ༢༥༢ བྱུང་འདུག་པ་དེར་ངེས་པར་དུ་འབྲེལ་ཡོད་ནས་ཐུགས་གཟབ་གནང་དགོས་པ་སྐོར་བཀོད་འདུག་ལ། འདི་ལོར་མང་ཚོགས་རྩིས་ཁྲའི་ཚོགས་ཆུང་ངོས་ནས་རྒྱབ་གཉེར་དོན་ཚན་ ༦ གནང་བའི་ནང་། ཚོགས་སྡེ་ཁག་ ༡༦ གིས་བོད་མིའི་སྒྲིག་འཛུགས་ལ་གཙང་ཁེ་དང་རོགས་དངུལ་གྱི་བརྒྱ་ཆ་ཁྱོན་ཧིན་སྒོར་ ༤༩,༣༣༣,༦༩༡་༩༣ ཕུལ་མེད་པ་དང་། ཚོགས་སྡེ་ཁག་ནང་ནས་དྷ་ས་བོད་ཁྱིམ་སྤྱི་ཁྱབ་ཡིག་ཚང་ནས་འབུལ་བསྡུད་སྒོར་ ༢༣,༩༤༧,༥༩༩་༦༡ དང༌། བོད་ཀྱི་སྨན་རྩིས་ཁང་ནས་འབུལ་བསྡད་སྒོར་ ༡༠,༡༨༥,༢༦༣་༡༥། བལ་ཡུལ་འཇོ་ཁེལ་གངས་ཅན་བདེ་རྩ་ནས་འབུལ་བསྡད་སྒོར་ ༦,༧༢༣,༤༩༡་༧༡། བལ་ཡུལ་སྤོག་ར་བཀྲ་ཤིས་དཔལ་འཁྱིལ་མཉམ་འབྲེལ་ནས་འབུལ་བསྡད་སྒོར་ ༦,༤༡༩,༠༡༡་༩༥ བཅས་ཡིན་ཞིང་། སྡེ་ཚན་ཁག་བཞིའི་འབུལ་བསྡད་དེ་སྤྱི་ཡོངས་ཀྱི་བསྡུ་དངུལ་འབུལ་བསྡད་ཀྱི་བརྒྱ་ཆ་ ༩༥ ལྷག་ཟིན་གྱི་ཡོད་སྐོར་དང་། བསྡུ་དངུལ་ཕུལ་མེད་པའི་ཚོགས་སྡེ་དེ་དག་གིས་སྙན་ཐོ་འདི་འབྱོར་འཕྲལ་ཀ་ཀོར་གང་ཡང་མེད་པར་དཔལ་འབྱོར་ལས་ཁུངས་ལ་བསྡུ་དངུལ་འབུལ་ཐུབ་པ་དགོས་སྐོར་བཀོད་འདུག་ལ། དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་འབྲེལ་ཡོད་ཚོགས་སྡེ་ཁག་གིས་ད་ལན་གྱི་གྲོས་ཚོགས་ཀྱི་ལས་རིམ་བརྒྱུད་ཤེས་རྟོགས་བྱུང་ཡོད་ངེས་དང་། འཛིན་སྐྱོང་ངོས་ནས་ཡིག་ཐོག་ནས་བརྡ་ཐོ་ཞིག་ཀྱང་འབུལ་རྒྱུ་ཡིན་སྐོར་གསུངས་སོང་།
སྙན་ཐོའི་ཐོག་བགྲོ་གླེང་གནང་སྐབས། སྤྱི་འཐུས་མི་ཉུང་བ་ཞིག་གིས་བྷེང་ལོར་དུ་རྟེན་གཞི་བྱས་པའི་བོད་ཁྲུག་ཁྱིམ་སྡེའི་ཁྱབ་ཁོངས་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ས་ཆ་སྤུས་གཟིགས་དང་ཨར་ལས་འཛུགས་སྐྲུན་སོགས་དང་འབྲེལ་བའི་ཧིན་སྒོར་ས་ཡ་ ༧༨ ལྷག་གི་རྩིས་ཉོག་དེ་ད་བར་སེལ་ཐུབ་མེད་པ་གང་ཡིན་དང་། འབྱུང་འགྱུར་གྲོས་ཚོགས་སྐབས་ ༡༧ པའི་ངོས་ནས་རྩིས་ཉོག་དེ་སེལ་ཐབས་ཆེད་ཞིབ་འཇུག་ཚོགས་ཆུང་བཙུགས་པ་སོགས་བརྒྱུད་ནས་སེལ་ཐབས་དགོས་སྐོར་སོགས་ཀྱི་དགོངས་ཚུལ་གསུངས་སོང་།
སྙན་ཐོའི་རྒྱབ་གཉེར་ནང་། སྔོན་རྩིས་བཀའ་འཁྲོལ་ལས་བརྒལ་བ་ནི། དཔལ་འབྱོར་གྱི་སྒྲིག་གཞི་དང་འགལ་ཚབས་ཆེ་ཤོས་དེ་ཡིན་ལ། སྐབས་འདིར་སྔོན་རྩིས་བཀའ་འཁྲོལ་ལས་བརྒལ་བའི་སྐྱོན་གནད་གྲངས་ ༢༥༢ བྱུང་འདུག་པས། འབྲེལ་ཡོད་དབང་ལྡན་འགན་འཛིན་དང་། འགན་འཁྲིའི་ལས་བྱེད་རྣམས་ཀྱིས་བཙན་བྱོལ་བོད་མིའི་གཞུང་དངུལ་འདུ་འགོད་དང་། ལོ་འཁོར་སྔོན་རྩིས། དངུལ་རྩིས་སྟངས་འཛིན་བཅས་ཀྱི་སྒྲིག་གཞིའི་དོན་ཚན་ ༥ པའི་ནང་གསེས་ཁག་ལ་ཐུགས་གནང་ཆེ་བཞེས་ཀྱིས། འབྱུང་འགྱུར་འདི་རིགས་མི་ཡོང་བ་དམ་དོན་ངེས་པར་གནང་དགོས། ཞེས་བཀོད་འདུག
གསར་འགོད་པ། པ་སངས་ཚེ་རིང་།
