གཅར་རྡུང་གཏོང་མཁན་བོད་རིགས་བུ་མོ་གསུམ་ལ་འདྲི་རྩད།

སྤྱི་ཚོགས་དྲ་ལམ་དུ་བོད་རིགས་བུ་མོ་ཆུང་ཆུང་ཞིག་ལ་གཅར་རྡུང་གཏོང་བཞིན་པའི་བརྙན་ཐུང་དང་འབྲེལ་ཏེ་ཉེན་རྟོག་པས་བོད་རིགས་བུ་མོ་གསུམ་བཀག་ཉར་བྱས་ཏེ་འདྲི་རྩད་གཅོད་ཀྱིན་ཡོད་འདུག

ཁ་སང་དེ་རིང་བོད་ཕྱི་ནང་གཉིས་ཀྱི་སྤྱི་ཚོགས་དྲ་ལམ་ཁག་ཏུ། བོད་རིགས་བུ་མོ་ཞིག་གིས་བུ་མོ་གཞན་ཞིག་ལ་གཅར་རྡུང་མང་པོ་གཏོང་བཞིན་ཡོད་པའི་བརྙན་ཐུང་འགའ་བརྒྱུད་སྐུར་བྱས་ཏེ། རྩོམ་པ་པོ་དང་སློབ་གསོ་བ་གཙོ་བོར་གྱུར་བའི་མི་ཧ་ཅང་མང་པོ་ཞིག་གིས་སེམས་ཚོར་ཆེན་པོའི་ཐོག་ནས་གཅར་རྡུང་བྱེད་སའི་བུ་མོ་དེར་གདུང་སེམས་མཉམ་སྐྱེད་དང་སྦྲགས། སློབ་གྲྭ་ཁག་གིས་ངེས་པར་དུ་སློབ་མའི་བདེ་འཇགས་སྲུང་སྐྱོབ་དང་ཀུན་སྤྱོད་ངན་པ་འགོག་ཐབས་དགོས་པའི་སྐོར་གྱི་བསམ་ཚུལ་ཡིག་ངག་གཉིས་ནས་ཧ་ཅང་མང་པོ་སྤེལ་བཞིན་འདུག་ལ། ཁ་སང་ཕྱི་ཚེས་ ༥ ཉིན་མཚོ་ལྷོ་ཁུལ་སློབ་གསོ་ཁང་ནས་ཉེས་རྡུང་དོན་རྐྱེན་དེ་འདི་ལོའི་ཕྱི་ཟླ་ ༣ ཚེས་ ༦ ཉིན་མཚོ་ལྷོ་ཁུལ་ལས་རིགས་ལག་རྩལ་སློབ་གྲྭའི་བུ་མོའི་ཉལ་ཁང་ཞིག་གི་ནང་བྱུང་ཡོད་ཀྱང་། གཅར་རྡུང་བྱེད་སའི་བུ་མོ་དང་ཉལ་ཁང་དེའི་བུ་མོ་ཚོ་འཁོན་ལན་སློག་པར་སྐྲག་སྟེ་གསང་བ་བྱས་རྐྱེན་ད་ལྟ་བར་དུ་རྩད་གཅོད་ཐུབ་མེད་སྐོར་དང་། གཅར་རྡུང་དོན་རྐྱེན་དེ་དང་འབྲེལ་ནས་ཉེན་རྟོག་པས་བོད་རིགས་བུ་མོ་གསུམ་བཀག་ཉར་བྱས་ཏེ་འདྲི་རྩད་བྱེད་བཞིན་ཡོད་སྐོར་བསྒྲགས་འདུག

དྲ་ལམ་དུ་ཁྱབ་བཞིན་པའི་བརྙན་ཐུང་ཁག་གི་ནང་དུ། བུ་མོའི་ཉལ་ཁང་ཞིག་ཏུ་བོད་རིགས་བུ་མོ་ཞིག་གིས་བོད་རིགས་བུ་མོ་ཆུང་བ་ཞིག་གི་སྐེ་བཙུར་བ་དང་། འགྲམ་ལྕག་དང་རྡོག་རྒྱག་གཞུས་ཏེ་གཅར་རྡུང་ཚད་མེད་གཏོང་ཞོར་དུ། བུ་མོ་ཆུང་བ་དེ་དང་འབྲེལ་བའི་རྒྱུ་རྐྱེན་ཞིག་གིས་མོ་སློབ་གྲྭར་འགྲོ་ཐུབ་མེད་སྐོར་སོགས་བརྗོད་ཀྱི་ཡོད་པ་མ་ཟད། གལ་སྲིད་ཉེས་རྡུང་བཏང་བ་དགེ་རྒན་སོགས་ལ་བཤད་ན་རྩ་བའི་བླ་མ་དཔང་དུ་བཙུགས་ནས་གསོད་རྒྱུ་ཡིན་པའི་འཇིགས་སྐུལ་གཏོང་གི་འདུག་ལ། ཉེ་འགྲམ་དུ་ཡོད་པའི་བོད་རིགས་བུ་མོ་རེ་ཟུང་ཞིག་གིས་བར་ཕྱེ་ཐབས་ཙམ་བྱས་པ་མ་གཏོགས་གཞན་རྣམས་གད་མོ་ཤོར་བ་དང་། གཅར་རྡུང་བྱེད་ས་དེར་དམའ་འབེབ་ཀྱིས་ཚིག་ངན་བརྗོད་ཀྱི་འདུག་ལ། གཅར་རྡུང་བྱེད་སའི་བུ་མོ་ཆུང་ཆུང་དེ་ཨ་མ་མེད་པའི་དྭ་ཕྲུག་ཅིག་ཡིན་སྐོར་ཡང་བརྗོད་ཀྱི་འདུག

མཚོ་ལྷོ་ཁུལ་སློབ་གསོ་ཁང་གི་ཡོངས་བསྒྲགས་བྱས་པའི་གནས་ཚུལ་དེའི་ནང་། ཁེ་ཉིན་ཕྱི་ཚེས་ ༤ ཉིན་༢༠༢༠ ལོའི་ཐང་གའི་འཛིན་གྲྭའི་ཁྱིམ་བདག་ཚོགས་པ་ཞེས་པའི་སྐད་འཕྲིན་ཚོགས་པ་ཞིག་གི་ནང་དུ་བརྙན་ཐུང་དེ་བརྒྱུད་སྐུར་བྱས་རྗེས་གཞི་ནས་བོད་ཕྱི་ནང་གཉིས་ཀྱི་སྤྱི་ཚོགས་བརྒྱུད་ལམ་ཁག་ཏུ་ས་ཁྱབ་རྡོ་ཁྱབ་ཏུ་ཕྱིན། འདི་ལོའི་ཕྱི་ཟླ་ ༣ ཚེས་ ༡ ཉིན། བྲག་དཀར་རྫོང་རྩི་གོར་ཐང་གྲོང་རྡལ་ནས་ཡིན་ཞིང་།  གནས་སྐབས་སུ་མཚོ་ལྷོ་ཁུལ་ལས་རིགས་ལག་རྩལ་སློབ་གྲྭར་བསྡད་ཡོད་པའི་བུ་མོ་སྒྲོན་མིང་ཅན་ཞིག་དང་མོའི་གྲོགས་མོ་ཞིག་གིས། མཚོ་ལྷོ་ཁུལ་རིགས་ལག་རྩལ་སློབ་གྲྭའི་ ༢༠༢༠ ལོའི་ཕྱུགས་ལས་སྨན་པའི་འཛིན་གྲྭའི་སློབ་མ་བུ་མོ་ཀླུ་མིང་ཅན་ཞིག་ལ་དོན་དག་ཆུང་ཆུང་ཞིག་གི་ཐོག་ནས་རྩོད་པ་ཤོར་བར་བརྟེན། ཕྱི་ཟླ་ ༣ ཚེས་ ༦ ཉིན་གྱི་དགོང་མོར་བུ་མོ་དེ་གཉིས་ཀྱིས་དཔུང་རོགས་བུ་མོ་གསུམ་འཁྲིད་དེ། ཁུལ་ལས་རིགས་ལག་རྩལ་སློབ་གྲྭའི་ནང་ཀླུ་མིང་ཅན་གྱི་བུ་མོ་དེ་འཚོལ་དུ་ཕྱིན་ནས་མོ་ལ་གཅར་རྡུང་བཏང་ཡོད་པ་དང་། དཔུང་རོགས་བུ་མོ་གཞན་གཉིས་ཀྱིས་སྒྲོན་མིང་ཅན་གྱི་བུ་མོ་དེའི་ཁ་པར་ནང་ནས་གཅར་རྡུང་བཏང་བའི་བརྒྱུད་རིམ་རྣམས་བརྙན་དུ་བླངས་ཡོད་སྐོར་དང་། ཉལ་ཁང་དོ་དམ་པ་དང་འཛིན་བདག་སོགས་ནས་བུ་མོ་དེའི་ངོ་གདོང་སོགས་ལ་རྨ་རྗེས་ཡོད་པ་མཐོང་ནས་སྐད་ཆ་འདྲི་སྐབས། མོ་རང་སྐེས་འཛེགས་ནས་བརྡབས་ཏེ་རྨ་བཟོས་པ་ཡིན་ལུགས་སོགས་བརྗོད་དེ་གསང་བ་བྱས་ཡོད་སྐོར་བསྒྲགས་འདུག

གནད་དོན་དེའི་ཐད་ཁྲིམས་གླེང་དྲ་བའི་བདག་པོ་ཁྲིམས་རྩོད་པ་སྒྲོལ་མ་སྐྱབས་ལགས་ཀྱིས། སློབ་མ་ལོ་ཆུང་སྟེ་ལྷག་པར་དུ་ལོ་བཅུ་དྲུག་དང་བཅུ་བཞི་མན་གྱི་གཞོན་སྐྱེས་རྣམས་ལ་སྤངས་བླངས་ཀྱི་གནས་འབྱེད་པའི་རྩོལ་ནུས་ཞན་པའི་དབང་གིས། ཁོ་ཚོའི་བྱས་ཉེས་ཕལ་ཆེ་བར་ཉེས་ཁྲིམས་ཀྱིས་བདའ་འདེད་མི་བྱེད་པའི་གུ་ཡངས་ཡོད་པར་བརྟེན།  སློབ་མའི་བར་ཐུབ་ཚོད་གཏོང་བའི་བརྙན་ཐུང་དང་པར་སོགས་བརྒྱུད་སྐུར་བྱེད་དུས། ཐུབ་ཚོད་གཏོང་མཁན་དང་ཐེབས་མཁན་སོགས་ཀྱི་མ་འོངས་པའི་ལུས་སེམས་ཀྱི་འཚར་ལོངས་བདེ་ཐང་སླད། ཁོ་ཚོའི་ངོ་གདོང་མི་གསལ་བར་བྱས་ཏེ་བརྒྱུད་སྐུར་བྱ་རྒྱུ་གལ་ཆེན་ཡིན་པ་དང་། ཐེངས་འདིའི་སློབ་མས་སློབ་མར་གཅར་བའི་གནད་དོན་དེ་ནི་སློབ་མ་དང་ཁྱིམ་བདག་ཁོ་ནའི་བྱས་ཉེས་ཤིག་མིན་པར་སློབ་གྲྭ་དང་འབྲེལ་བ་དམ་ཟབ་ཡོད་པ་དང་། ཉེ་སྔོན་རྒྱ་ནག་ནང་སློབ་མས་སློབ་མར་གཅར་བའི་མཇུག་འབྲས་སུ་སློབ་གྲྭ་ལ་ཚ་འདེད་བྱས་ཏེ། སློབ་གྲྭའི་སློབ་གཙོ་གནས་དབྱུང་བཏང་བ་དང་འཛིན་གྲྭའི་འགན་འཁུར་དགེ་རྒན་ལ་སློབ་ཁྲིད་བྱེད་མི་ཆོག་པའི་ཉེས་ཆད་བཏང་ཡོད་སྐོར་བརྗོད་འདུག

དྲ་ལམ་ཁག་ཏུ་དོན་རྐྱེན་དེ་ལ་སེམས་ཚོར་ཆེན་པོས་ཡིག་ངག་གཉིས་ཐོག་ནས་སྐྱོན་བརྗོད་དང་བློ་ཕམ་བྱེད་ཀྱི་འདུག་ལ། མང་ཆེ་བ་ཞིག་གིས་རྒྱ་ནག་ནང་ལོགས་ཀྱི་སློབ་གྲྭ་ཁག་ཏུ་སློབ་མ་དཔུང་ཤུགས་ཅན་ཚོས་ཉམ་ཆུང་སློབ་མ་མང་པོར་གཅར་རྡུང་མནར་གཅོད་གཏོང་བ་དང་། ཐ་ན་རུབ་རྡུང་བྱས་ཏེ་དམར་གསོད་ཀྱི་ཡ་ང་བའི་གནད་དོན་བསྟུད་མར་འབྱུང་བཞིན་ཡོད་ལ། སྙིང་རྗེ་ཡིས་དབུལ་ཞིང་གདུག་རྩུབ་ཀྱིས་ཁེངས་བའི་བསམ་སྤྱོད་ངན་པ་དེ་དག་དངོས་ཤུགས་བརྒྱུད་གསུམ་ནས་བོད་ཡུལ་གྱི་སློབ་གྲྭ་ཁག་ཏུའང་བྱུང་དང་འབྱུང་མུས་ཡིན་ལ། བསམ་སྤྱོད་ཐ་ཤལ་བ་དེ་ཚོར་སློབ་ཕྲུག་གི་ཕ་མ་དང་སྤྱི་ཚོགས། ལྷག་པར་དུ་སློབ་གྲྭ་ཁག་ནས་ངེས་པར་དུ་འགན་ལེན་དགོས་སྐོར་བརྗོད་ཀྱི་འདུག

རྒྱ་ནག་ནང་ལོགས་ཀྱི་སློབ་གྲྭ་ཆུང་འབྲིང་ཁག་ནང་སློབ་མས་སློབ་མར་གཅར་རྡུང་བཏང་བ་དང་རུབ་རྡུང་དམར་གསོད་བཏང་བའི་གནད་དོན་བསྟུད་མར་འབྱུང་གི་ཡོད་པ་དང་། ཕྱི་ལོ་ ༢༠༠༢ ལོར་ཧྲན་ཏུང་ཞིང་ཆེན་གྱི་གཙུག་ལག་སློབ་གྲྭ་ཆེན་མོས་དེའི་སྐོར་ལ་ཞིབ་འཇུག་སྙན་ཐོ་ཞིག་བཏོན་པའི་ནང་། རྒྱ་ནག་གི་སློབ་ཕྲུག་བརྒྱ་ཆ་ ༡༤།༩ ཙམ་ལ་སློབ་གྲྭའི་ནང་བརྙས་བཅོས་ཀྱི་དཀའ་ངལ་འཕྲད་ཀྱི་ཡོད་པའི་ཁྲོད། སློབ་ཕྲུག་ཕལ་ཆེ་བར་ལུས་སེམས་གཉིས་དང་ལྷག་པར་དུ་ཁག་ཅིག་ལ་ཚེ་གང་དྲན་པ་བརྗེད་ཐབས་མེད་པའི་འཇིགས་སྐུལ་སོགས་ཀྱི་དཀའ་ངལ་འཕྲད་ཀྱི་ཡོད་སྐོར་བཀོད་ཡོད་པ་དང་བསྟུན། སློབ་མའི་བདེ་འཇགས་སྲུང་སྐྱོབ་ཐད་ནས་རྒྱ་ནག་ནི་འཛམ་གླིང་གི་རྒྱལ་ཁབ་ཚང་མའི་རྗེས་སུ་ལུས་ཡོད་པ་དང་། དམིགས་བསལ་ལོ་ན་ ༡༤ མན་གྱི་སློབ་མས་ནག་ཉེས་བཟོས་ཚེ། ཕ་མ་དང་མ་ཚབ་ཀྱི་སར་བཏང་སྟེ་སློབ་གསོ་སྤྲོད་ཀྱི་ཡོད་ཅིང་། ལོ་ན་༡༨ ཡན་གྱི་སློབ་མས་ནག་ཉེས་བཟོས་ཚེ་ཉེས་ཆད་ཧ་ཅང་ཡང་པོ་གཅོད་ཀྱི་ཡོད་པའི་རྐྱེན་གྱིས། སློབ་མའི་བདེ་འཇགས་སྲུང་སྐྱོབ་ཐད་ནུས་པ་གང་ཡང་ཐོན་གྱི་མེད་སྐོར་བཀོད་འདུག

གསར་འགོད་པ། སྐལ་བཟང་སྦྱིན་པ།