༧གོང་ས་མཆོག་ནས་རྒྱ་གར་གྱི་སྲིད་བློན་ཟུར་པ་མན་མོ་ཧན་སིན་མཆོག་ལ་ཏོག་དབྱིབས་ནད་རྟགས་ཐོན་པ་དེ་མྱུར་ཏུ་དྲག་སྐྱེད་ཡོང་བའི་ཐུགས་སྨོན་གསུང་འཕྲིན་སྩལ་གནང་འདུག
རྒྱ་གར་གྱི་སྲིད་བློན་ཟུར་པ་མན་མོ་ཧན་སིན་ (Manmohan Singh) མཆོག་ནས་ཏོག་དབྱིབས་འགོག་ཁབ་རིམ་པ་དེ་གཉིས་བཞེས་ཚར་ཡོད་ནའང་། ཁ་སང་ཕྱི་དྲོར་ཁོང་ལ་གཉན་རིམས་ཕོག་པའི་ནད་རྟགས་ཐོན་ཡོད་པར་བརྟེན། དེ་རིང་ཕྱི་ཚེས་ ༢༠ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་སྲིད་ཟུར་མཆོག་ལ་གདུང་སེམས་མཉམ་བསྐྱེད་དང་མྱུར་ཏུ་དྲག་སྐྱེད་ཡོང་བའི་ཐུགས་སྨོན་གསུང་འཕྲིན་ཞིག་སྩལ་བའི་ནང་། སྐུ་ཉིད་འཕྲལ་དུ་དྲག་སྐྱེད་ཡོང་བར་ངོས་ཀྱིས་སྨོན་ལམ་འདེབས་ཀྱི་ཡོད། ཁྱེད་ཀྱི་མཁྱེན་གསལ་ལྟར་སྐུ་ཉིད་ལ་ངོས་རང་ནས་གུས་བརྩི་ཆེན་པོ་ཡོད་པ་དང་། ཁྱེད་ཉིད་ནི་ངོས་ཀྱི་གྲོགས་པོ་རྙིང་པ་ཞིག་ལ་ངོས་འཛིན་ཞུ་ཡི་ཡོད། ཅེས་གསུངས་འདུག
ཡང་གསུང་འཕྲིན་ནང་། གོ་ལ་ཧྲིལ་བོར་ཏོག་དབྱིབས་གཉན་རིམས་ཀྱིས་ཉེན་ཁ་སྤྲོད་ཀྱི་ཡོད་པ་ལྟར། འཛམ་གླིང་གི་རྒྱལ་ཁབ་ཚང་མའི་ནང་ཏོག་དབྱིབས་གཉན་རིམས་ཀྱི་དཀའ་སྡུག་ཁག་གང་མགྱོགས་མེད་པར་འགྱུར་བར་ངོས་ཀྱིས་རེ་བ་བྱེད་ཀྱི་ཡོད། ཅེས་གསུངས་འདུག
དེ་བཞིན་རྒྱ་གར་གྱི་སྲིད་བློན་མུ་དྷི་མཆོག་ནས་ཁ་སང་ཕྱི་ཚེས་ ༡༩ ཉིན་སྐུ་སྒེར་གྱི་ཊུ་ཝེ་ཊུར་བརྒྱུད། སྲིད་བློན་ཟུར་པ་མན་མོ་ཧན་སིན་ (Manmohan Singh) མཆོག་གི་སྐུ་གཟུགས་བདེ་ཐང་ཡོང་བ་དང་། མྱུར་ཏུ་དྲག་སྐྱེད་ཡོང་བའི་སྨོན་འདུན་ཞུ་ཡི་ཡོད་སྐོར་གསུངས་འདུག
རྒྱ་གར་གྱི་གསར་ཁང་ཁག་གི་ནང་། སྲིད་བློན་ཟུར་པ་མཆོག་ནས་འདི་ལོའི་ཕྱི་ཟླ་ ༣ ཚེས་ ༤ ཉིན་རྒྱ་གར་ནང་བཟོས་པའི་ཀོ་ཝེག་སིན་ (COVAXIN) འགོག་ཁབ་ཐོག་མ་དེ་བཞེས་ཡོད་འདུག་ལ། ཟླ་འདིའི་ཕྱི་ཚེས་ ༣ ཉིན་འགོག་ཁབ་གཉིས་པ་དེ་བཞེས་ཡོད་ཀྱང་། ཁ་སང་ཕྱི་ཚེས་ ༡༩ ཉིན་ཁོང་གི་སྐུ་གཟུགས་ལ་ཚ་བ་རྒྱས་ཏེ་ཕྱི་དྲོའི་ཆུ་ཚོད་ ༥ ཙམ་གྱི་ཐོག་བརྟག་དཔྱད་གནང་སྐབས། གཉན་རིམས་ནད་རྟགས་ཐོན་ཡོད་འདུག
དེ་རིང་ཕྱི་ཚེས་ ༢༠ ཉིན་རྒྱ་གར་གྱི་དུས་བབ་གསར་ཁང་གིས་སྤེལ་བའི་གནས་ཚུལ་ལྟར་ན། ད་ལྟ་ཁོང་རྒྱལ་ས་ལྡི་ལིའི་སྨན་ཁང་གྲགས་ཅན་(AIIMS )དུ་སྨན་བཅོས་གནང་བཞིན་ཡོད་ཅིང་། ཁོང་གི་གནས་སྟངས་ཛ་དྲག་མིན་ལ། ཁོང་ལ་ཏོག་དབྱིབས་གཉན་རིམས་ཀྱི་ནད་རྟགས་ཤུགས་ཆེན་མེད་པར་སྐུ་གཟུགས་ལ་ཚ་བ་རྒྱས་པ་སོགས་ཚུད་པའི་ནད་རྟགས་ཆུང་ངུ་རེ་འགའ་ལས་མེད་ནའང་། ད་ལྟ་དགུང་གྲངས་ ༨༨ ཡིན་པ་དང་། འདས་པའི་ཁོང་གི་ནད་གཞི་ཁག་ཅིག་སྟེ་གཅིན་སྙི་དང་སྙིང་གི་ནད་གཞི་ཡོད་པར་བརྟེན་སྨན་ཁང་དུ་བཞུགས་ཡོད་སྐོར་བཀོད་འདུག
གསར་འགོད་པ། ཀླུ་མགོན་ཐར།
