རྒྱ་ནག་དང་འབར་མ་གཉིས་ནི་ཆོས་དད་རང་དབང་ལ་དྲག་གནོན་བྱེད་མཁན་ཚབས་ཆེ་ཤོས་རེད་འདུག

ཞི་ཅིན་ཕིན་རྒྱ་ནག་གཞུང་གི་སྲིད་འཛིན་ལ་བསླེབས་པ་ནས་བཟུང་རྒྱ་ནག་ཁྱོན་ཡོངས་ཀྱི་ཆོས་དད་རང་དབང་གི་གནས་སྟངས་ཇེ་སྡུག་ཏུ་ཕྱིན་ཡོད་པ་མ་ཟད་བོད་བརྒྱུད་ནང་བསྟན་ལ་དམ་དྲག་གི་ཁྲིམས་སྒྲིག་དམ་པོ་བཟོས་ཡོད་པའི་སྙན་ཐོ་བཏོན།

ཁ་སང་ཕྱི་ཚེས་ ༢༠ ཉིན་ཡེ་ཤུ་ཆོས་ཚོགས་ (Aid to the Church in Need International) ཀྱིས། འཛམ་གླིང་གི་རྒྱལ་ཁབ་༢༥ ཡི་ཆོས་དད་རང་དབང་གི་གནས་སྟངས་སྐོར་ལ་ཤོག་གྲངས་ ༨༠༠ ཡོད་པའི་སྙན་ཐོ་ཞིག་བཏོན་པའི་ནང་། འཛམ་གླིང་གི་རྒྱལ་ཁབ་༢༥ ཡི་ཁྲོད་ནས་རྒྱ་ནག་དང་འབར་མ་གཉིས་ནི་ཆོས་དད་རང་དབང་སྡུག་ཤོས་ཡིན་པ་དང་། ཕྱི་ལོ་ ༢༠༡༣ ལོར་ཞི་ཅིན་ཕིན་རྒྱ་ནག་གཞུང་གི་སྲིད་འཛིན་ལ་ཡར་བསླེབས་པ་ནས་བཟུང་རྒྱ་ནག་ཁྱོན་ཡོངས་སུ་ཆོས་དད་རང་དབང་གི་གནས་སྟངས་ཇེ་སྡུག་དུ་ཕྱིན་ཡོད་སྐོར་བཀོད་འདུག

བོད་ནང་གི་གནས་སྟངས་སྐོར་ལ་སྙན་ཐོ་དེའི་ནང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཀྱི་གཙོས་བོད་ཀྱི་བླ་མའི་ཡང་སྲིད་ངོས་འཛིན་བྱེད་ཕྱོགས་ལ་སྟངས་འཛིན་ཡོང་ཐབས་སུ་རྒྱ་ནག་གཞུང་གིས་ཆེད་དུ་ཁྲིམས་བཟོས་ཡོད་པ་དང་། ༧གོང་ས་མཆོག་ལ་དད་མོས་བྱེད་མཁན་གྱི་དགེ་འདུན་པ་དང་བཙུན་མ་རྣམས་དགོན་སྡེ་ཁག་ནས་ཕྱིར་འཕུད་གཏོང་བ་དང་བཙོན་འཇུག་བྱེད་པ། མནར་གཅོད་གཏོང་བ་སོགས་བྱེད་ཀྱི་ཡོད་པ། དེ་བཞིན་ཆོགས་ལུགས་ཀྱི་བྱེད་སྒོ་ཁག་ལ་སྟངས་འཛིན་དང་དམ་དྲག་ཤུགས་ཆེན་བྱས་ཏེ་༧གོང་ས་མཆོག་གི་སྐུ་པར་སྒྲིག་བཤོམ་བྱེད་པ་ནི་ནག་ཉེས་ལ་རྩིས་ཏེ་ཉེས་ཆད་ལྗིད་པོ་གཅོད་པ། ལྷག་པར་དུ་ཕྱི་ལོ་  ༢༠༡༩ ལོར་རྒྱ་ནག་གཞུང་གིས་ཡ་ཆེན་སྒར་གྱི་སྡོད་ཤག་གཏོར་བཤིག་བཏང་སྟེ་གྲྭ་བཙུན་སྟོང་དྲུག་ཙམ་ཕྱིར་འཕུད་བཏང་ཐོག བཙན་དབང་གིས་བླ་རུང་སྒར་ལ་སློབ་གཉེར་བྱེད་མཁན་གསར་བསྡུ་མི་ཆོག་པ་བཟོས་ཡོད་པ་བཀོད་འདུག

ཡང་སྙན་ཐོ་དེའི་ནང་། རྒྱ་ནག་ནང་རིག་གནས་གསར་བརྗེ་ཡི་རྗེས་ནས་ད་ལྟ་ཆོས་ལུགས་དད་མོས་རང་དབང་ལ་དམ་དྲག་ཆེ་ཤོས་བྱེད་པའི་དུས་ཤིག་ཆགས་ཡོད་པ་དང་། ཆོས་དད་རང་དབང་ལ་དམ་དྲག་བྱེད་པ་ནི་རྒྱལ་ཁབ་ཀྱི་སྲིད་ཇུས་གཏན་འབེབ་ཀྱི་དཀྱིལ་སྙིང་དུ་བཟུང་པ་དང་། དྲག་གནོན་བྱེད་པའི་བྱ་འགུལ་ནི་ཚགས་ཇེ་ཚུད་དང་གཞི་རྒྱ་ཆེ་རུ་བཏང་ཡོད་པ། འཕྲུལ་རིག་ནི་ཆོས་དད་རང་དབང་དང་འབྲེལ་བའི་གསང་མྱུལ་བྱ་ཆེད་བཟོ་བསྐྲུན་བྱེད་པ། ཉེ་བའི་ལོ་ཤས་ནས་རྒྱ་ནག་གཞུང་གིས་ཆོས་ལུགས་རང་དབང་དང་འགྲོ་བ་མིའི་ཐོབ་ཐང་ལ་ངོས་འཛིན་བྱེད་ཕྱོགས་ནི་ཁྱོན་ཡོངས་ནས་ཇེ་སྡུག་ཏུ་འགྲོ་བཞིན་ཡོད་པ་མ་ཟད། མིང་དོན་མཚུངས་པའི་ཆབ་སྲིད་ཀྱི་གུ་ཡངས་ཤིག་ཡོང་གི་མེད་པར། དེ་ལས་ལྡོག་དེ་དྲག་གནོན་དང་མནར་གཅོད་མུ་མཐུད་གཏོང་གི་ཡོད་པའི་ཐོག དེང་རབས་ཀྱི་འཕྲུལ་རིག་སྤྱད་དེ་དྲག་གནོན་དང་མནར་གཅོད་སྔར་ལྷག་ཤུགས་ཆེ་རུ་གཏོང་གི་ཡོད་པ་བཀོད་འདུག

དེ་བཞིན་སྙན་ཐོ་དེའི་ནང་། ཕྱི་ལོ་ ༢༠༡༨ ལོར་རྒྱ་ནག་གཞུང་གིས་ཆོས་ལུགས་ཀྱི་ལས་དོན་དང་འབྲེལ་ནས་སྒྲིག་གཞི་ཁག་ཅིག་བཟོས་ཡོད་པའི་ནང་། ཆོས་དད་བྱེད་མཁན་ཚོས་རང་ཁོངས་ཀྱི་ཆོས་སྡེ་ཁག་གི་ནང་དེབ་སྐྱེལ་བྱེད་དགོས་པ་བཟོས་ཏེ། དེའི་དམིགས་ཡུལ་ནི་ཆོས་ལུགས་ཀྱི་ཚོགས་སྡེ་དང་སློབ་གྲྭ། ཆོས་ལུགས་ཀྱི་བྱེད་སྒོ་སྤེལ་ས་ཁག་དང་ལས་དོན་སྒྲུབ་ས་ཁག་ཕྱིའི་དབང་ཤུགས་འོག་མི་འགྲོ་ཆེད་ཡིན་སྐོར་དང་། ཆོས་ལུགས་ཀྱིས་རྒྱལ་ཁབ་ཀྱི་བདེ་འཇགས་ལ་ཉེན་ཁ་མི་སྤྲོད་ཆེད་ཡིན་སྐོར་སོགས་བཀོད་ཡོད་ནའང་། དེ་ནི་ཆོས་ལུགས་ཀྱི་བྱེད་སྒོ་ཁག་ལ་སྟངས་འཛིན་སྔར་ལྷག་ཤུགས་ཆེན་བསླེབས་ཆེད་ཡིན་སྐོར་སྐྱོན་བརྗོད་བྱས་ཡོད་པ་མ་ཟད། ལོ་དེའི་རྒྱ་ནག་གཞུང་གི་ཆོས་ལུགས་ལས་དོན་དང་འབྲེལ་ནས་རྒྱབ་ཤ་དཀར་པོའི་དེབ་བཏོན་པའི་ནང་། སྲིད་གཞུང་གིས་ཆོས་ལུགས་ཀྱི་ཚོགས་སྡེ་ཁག་ལ་མཛུབ་སྟོན་ཡང་ཡང་བྱས་ཏེ་ཆོས་ལུགས་སྤྱི་ཚོགས་རིང་ལུགས་ཅན་དུ་བསྒྱུར་བར་རམ་འདེགས་བྱེད་དགོས་སྐོར་བཀོད་ཡོད་པ་མ་ཟད། ཕྱི་རྒྱལ་གྱི་ཡུལ་མི་ཁག་རྒྱ་ནག་ནང་གི་ཆོས་ལུགས་བྱེད་སྒོ་ཁག་ལ་གཞུང་གི་ཆོག་མཆན་ཐོབ་རྗེས་མཉམ་ཞུགས་བྱས་ན་ལས། དེ་མིན་མཉམ་ཞུགས་བྱས་མི་ཆོག་པའི་སྐོར་བཀོད་ཡོད་པ་ནི་ཆོས་དད་རང་དབང་ལ་རྡོག་རོལ་བཏང་བ་ཞིག་སྐོར་སོགས་ཀྱི་སྐྱོན་བརྗོད་བྱས་འདུག

ཡེ་ཤུ་ཆོས་ཚོགས་ (Aid to the Church in Need International) ནི་ཡེ་ཤུ་བླ་ཆེན་ཕོབ་ཧྥ་རན་སི་སི་ (Pope Francis) ཡི་ཡེ་ཤུ་ཆོས་ལུགས་སྒྲིག་འཛུགས་ (Catholic Church) ཀྱི་རྒྱབ་གཉེར་འོག་ཕྱི་ལོ་ ༡༩༤༧ ལོར་བཙུགས་པ་ཞིག་ཡིན་འདུག་པ་དང་། ཆོས་ཚོགས་དེས་ལོ་གཉིས་རེའི་མཚམས་སུ་འཛམ་གླིང་ཁྱོན་ཡོངས་ཀྱི་ཆོས་དད་རང་དབང་གི་གནས་སྟངས་ཀྱི་སྙན་ཐོ་རེ་འདོན་གྱི་ཡོད་འདུག

གསར་འགོད་པ། ཀླུ་མགོན་ཐར།