འཛམ་གླིང་གི་ཕྱུག་བདག་ཆེན་མོ་བྷིལ་གྷེ་ཊི་ (Bill Gates) དང་ཁོང་གི་བཟའ་ཟླ་མེ་ལིན་ཌ་གྷེ་ཊི་ (Melinda Gates) གཉིས་གཉེན་འཐོར་བྱ་རྒྱུ་ཡིན་པ་ཡོངས་བསྒྲགས་བྱས་འདུག
དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། འཛམ་གླིང་གི་གློག་ཀླད་འཕྲུལ་ཆས་བཟོ་སྐྲུན་ཁང་ཆེ་ཤོས་མའེ་ཁོ་རོ་སོབ་ཏི་ (Microsoft) གསར་འཛུགས་གནང་མཁན་ཕྱུག་བདག་ཆེན་མོ་བྷིལ་གྷེ་ཊི་ (Bill Gates) དང་། ཁོང་གི་བཟའ་ཟླ་མེ་ལིན་ཌ་གྷེ་ཊི་ (Melinda Gates) གཉིས་ལོ་ ༢༧ རིང་བཟའ་ཚང་བྱས་ཏེ་ད་ལྟ་གཉེན་འཐོར་བྱ་རྒྱུ་ཡིན་འདུག
ཁ་སང་ཕྱུག་བདག་ཁྱོ་ཤུག་གཉིས་ཀྱིས་རང་གི་ཊུ་ཝི་ཊར་དྲ་ལམ་སྟེང་མཉམ་འབྲེལ་གྱི་གསལ་བསྒྲགས་ཤིག་སྤེལ་བའི་ནང་། འདས་པའི་ལོ་ ༢༧ རིང་ངེད་གཉིས་ཀྱིས་ཕུལ་དུ་བྱུང་བའི་བུ་ཕྲུག་གསུམ་སྐྱེད་སྲིང་བྱས་ཐུབ་ཡོད་པ་མ་ཟད། མི་ཚང་མར་འཕྲོད་བསྟེན་དང་དོན་སྙིང་ལྡན་པའི་མི་ཚེ་ཞིག་ཡོང་ཐབས་སླད་དུ་དམིགས་པའི་ཚོགས་པ་ཞིག་བཙུགས་ཐུབ་པ་བྱུང་ཡོད། ངེད་གཉིས་སྔར་བཞིན་ལས་གཞི་དེར་ཡིད་ཆེས་ཡོད་ལ། མུ་མཐུད་ཚོགས་པ་དེར་མཉམ་ལས་བྱ་རྒྱུ་ཡིན། འོན་ཀྱང་ངེད་གཉིས་ཀྱིས་ཡོང་རྒྱུའི་མི་ཚེ་ནང་བཟང་ཚང་བྱས་ཏེ་ཐུགས་ཕན་གསོ་ཐབས་ཤིག་ཡོད་པ་མཐོང་གི་མི་འདུག་ཅེས་བསྒྲགས་ཡོད་འདུག
སྤྱིར་བྷིལ་གྷེ་ཊི་འདས་ལོར་མའེ་ཁོ་རོ་སོ་ཧྥི་སྤྱི་གཉེར་ཁང་གི་འགན་འཛིན་ལྷན་ཚོགས་ནས་རྩ་དགོངས་ཞུས་ཟིན་པར་བརྟེན། ད་ཐེངས་ཀྱི་གཉེན་སྒྲིག་ཁ་འཐོར་འདིས་སྤྱི་གཉེར་ཁང་དེར་ཤུགས་རྐྱེན་གང་ཡང་སྤྲོད་མི་སྲིད་ཀྱང་། ཁྱོ་ཤུག་གཉིས་ཀྱིས་ཕྱི་ལོ་ ༢༠༠༠ ལོར་སྤྱི་དམངས་འཕྲོད་བསྟེན་དང་། ཤེས་ཡོན། གོ་ལའི་གནམ་གཤིས་འགྱུར་ལྡོག་བཅས་ལ་དམིགས་ཏེ་གསར་འཛུགས་བྱས་པའི་བྷིལ་དང་མེ་ལིན་ཌ་གྷེ་ཊི་ཐེབས་རྩ་ (Bill and Melinda Gates Foundation) ཀྱི་འབྱུང་འགྱུར་གནས་སྟངས་ལ་བློ་འཚབ་བྱེད་ཀྱི་འདུག
ད་ལྟ་རང་ལོ་ ༦༥ ཡིན་པའི་བྷིལ་གྷེ་ཊི་ཡིས་རང་གི་ཆུང་གྲོགས་པོལ་ཨེ་ལན་ (Paul Allen) དང་ལྷན་དུ་ཕྱི་ལོ་ ༡༩༧༥ ལོར་མའེ་ཁོ་རོ་སོབ་ཏི་སྤྱི་གཉེར་ཁང་དེ་བཙུགས་ཡོད་ཅིང་། ད་ལྟ་རང་ལོ་ ༥༦ ཡིན་པའི་མེ་ལིན་ཌ་ཕྱི་ལོ་ ༡༩༨༧ ལོར་བྷིལ་གྱི་སྤྱི་གཉེར་ཁང་དེའི་ཐོན་ཟོག་དོ་དམ་པའི་ལས་གནས་སུ་ཞུགས་རྗེས་ཁོང་གཉིས་དབར་ཐོག་མའི་འབྲེལ་བ་བྱུང་ཞིང་། ངོ་ཤེས་ཏེ་ལོ་ ༧ གྱི་རྗེས་ཏེ། ཕྱི་ལོ་ ༡༩༩༤ ལོར་བྷིལ་དང་མེ་ལིན་ཌ་གཉིས་གཉེན་སྒྲིག་བྱས་ཡོད་པ་རེད།
ཨ་རིའི་ཕོ་བྷི་སི་དུས་དེབ་ཀྱི་ཐོ་གཞུང་ལྟར་ད་ལྟ་འཛམ་གླིང་གི་ཕྱུག་བདག་ཨང་བཞི་པ་ཡིན་པའི་བྷིལ་གྷེ་ཊི་དང་མེ་ལིན་ཌ་གྷེ་ཊི་གཉིས་ཀྱིས་མགོ་བརྩམས་པའི་བྷིལ་དང་མེ་ལིན་ཌ་གྷེ་ཊི་ཐེབས་རྩ་དེས། འདས་པའི་ལོ་གཅིག་ནང་ཏོག་དབྱིབས་གཉན་རིམས་ཀྱི་སྔོན་འགོག་སྨན་ཁབ་བཟོ་སྐྲུན་དང་ཞིབ་འཇུག་བཅས་ཁོ་ནའི་ཆེད་དུ་ཨ་སྒོར་ཐེར་འབུམ་ ༡།༧༥ བཏང་ཡོད་ཅིང་། ཐེབས་རྩ་དེས་ད་བར་ཨ་ཧྥེ་རི་ཁ་ཡི་གཙོས་པའི་རྒྱལ་ཁབ་མི་ཉུང་བའི་དབུལ་སྐྱོར་སོགས་ཀྱི་ལས་གཞི་རྒྱ་ཆེན་པོ་སྤེལ་ཡོད་ལ། ཕྱི་ལོ་༢༠༡༩ བར་ཐེབས་རྩ་དེར་ཁྱོན་ཨ་སྒོར་ཐེར་འབུམ་ ༤༣ ཡོད་འདུག དེ་བཞིན་ཕྱི་ལོ་ ༢༠༡༥ ལོར་མེ་ལིན་ཌ་གྷེ་ཊི་ཡིས་བུད་མེད་དང་ཁྱིམ་ཚང་གོང་འཕེལ་ལ་དམིགས་པའི་སྒེར་གཉེར་མ་འཛུགས་ཚོགས་པ་ Pivotal Ventures ཞེས་པ་ཞིག་གསར་འཛུགས་བྱས་ཡོད་པ་རེད།
གསར་འགོད་པ། པ་སངས་ཚེ་རིང་།
