ཏོག་དབྱིབས་གཉན་སྲིན་ལ་ཚན་རིག་ཁང་གིས་བཅོས་སྒྲིག་བྱས་ཡོད་པའི་སྙན་ཐོ་བཏོན།

རྒྱ་ནག་གི་ཚན་རིག་པས་ཕ་ཝང་ནས་ཏོག་དབྱིབས་གཉན་སྲིན་ཞིག་བླངས་ཏེ་བཅོས་སྒྲིག་བྱས་རྐྱེན་སྔར་བས་ཉེན་ཚབས་ཆེ་བ་ཞིག་བྱུང་ཡོད་པའི་སྙན་ཐོ་བཏོན།

ཉེ་བའི་ཆར་རྒྱལ་སྤྱིའི་སྟེང་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་གཅོད་དགོས་པའི་གླེང་སློང་བྱེད་བཞིན་པའི་སྐབས་འདིར། མཉམ་འབྲེལ་གྱི་ཞིབ་འཇུག་སྙན་ཐོ་གསར་པ་ཞིག་གི་གྲུབ་དོན་ལྟར་ན། ཏོག་དབྱིབས་གཉན་སྲིན་དེ་རང་བྱུང་ཞིག་མིན་པར། ཏོག་དབྱིབས་གཉན་རིམས་ཐོག་མར་མཆེད་སའི་རྒྱ་ནག་གི་གྲོང་ཁྱེར་ཝུ་ཧན་དུ་རྟེན་གཞི་བྱས་པའི་ཝུ་ཧན་ནད་འབུ་ཚན་རིག་བརྟག་དཔྱད་ཁང་ནས་(The Wuhan Institute of Virology)་བཟོས་པ་ཞིག་ཡིན་སྐོར་བརྗོད་ཡོད་འདུག

དབྱིན་ཇིའི་སྐྲན་ནད་རིག་པའི་སློབ་དཔོན་ཨེན་གྷ་སི་ཌལ་གྷི་ལེ་ཤི་(Angus Dalgleish)དང་། ནོར་ཝེའི་ཚན་རིག་པ་བྷིར་གྷར་སོ་རན་སན་(Birger Sorensen) གཉིས་ཀྱིས་མཉམ་འབྲེས་ཐོག་བྲིས་པའི་ཤོག་ངོས་ ༢༢ ཅན་གྱི་ཞིབ་འཇུག་སྙན་ཐོ་དེའི་ནང་། ཚན་རིག་པས་འདས་ལོར་ཏོག་དབྱིབས་གཉན་སྲིན་གྱི་དཔེ་གཞི་ལ་རྟོག་ཞིབ་བྱེད་སྐབས། གཉན་སྲིན་སྟེང་མཛུབ་རིས་མི་གཅིག་པ་ཞིག་ཡོད་པ་ཤེས་རྟོགས་བྱུང་ཡོད་པ་དང་། གནས་ཚུལ་དེ་ནི་གཉན་སྲིན་ཞིག་བརྟག་དཔྱད་ཁང་ནང་བསྒྱུར་སྒྲིག་བྱས་ན་མ་གཏོགས་མངོན་གྱི་མེད་པར་བརྟེན། ད་ལན་གྱི་ཏོག་དབྱིབས་གཉན་སྲིན་དེ་རང་བྱུང་ཞིག་མིན་པར། མིས་ཆེད་དུ་བཟོས་པ་ཞིག་ཡིན་པའི་སྡོམ་ཚིག་བརྒྱབ་འདུག དེ་ཡང་རྒྱ་ནག་གི་ཚན་རིག་པས་ཞིབ་འཇུག་ལས་གཞི་ཞིག་གི་ཆེད་དུ། ཕ་ཝང་ནས་ཏོག་དབྱིབས་གཉན་སྲིན་ཞིག་བླངས་ཏེ་བཅོས་སྒྲིག་བྱས་རྐྱེན་སྔར་བས་ཉེན་ཚབས་ཆེ་བའི་ཏོག་དབྱིབས་གཉན་སྲིན་ཞིག་བཟོ་སྐྲུན་བྱས་ཡོད་པ་དང་། ཕྱིས་སུ་རང་གི་བྱས་ཉེས་འགེབ་སྲུང་གི་ཆེད་དུ་རྒྱ་ནག་གི་ཚན་རིག་པ་རྣམས་ཀྱིས་གཉན་སྲིན་ལ་བསྐྱར་བཅོས་ཏེ་རང་བྱུང་ནས་ཐོན་པ་ལྟ་བུ་བཟོས་ཡོད་སྐོར་བཀོད་འདུག

དབྱིན་ཡུལ་གྱི་ཌེ་ལི་མེལ་གསར་ཁང་(DialyMail.com)གིས་ཆེས་ཐོག་མར་ཤེས་རྟོགས་བྱུང་བའི་ཞིབ་འཇུག་སྙན་ཐོ་འདི་ད་ལྟ་དངོས་སུ་འདོན་སྤེལ་བྱས་མེད་ནའང་། མི་རིང་བར་ཚན་རིག་དུས་དེབ་ཅིག་ནང་འདོན་འཆར་ཡོད་ཅིང་། ཞིག་འཇུག་སྙན་ཐོའི་ནང་ཚན་རིག་པ་རྣམ་གཉིས་ཀྱིས། རྒྱ་ནག་གཞུང་གིས་གནས་ཚུལ་འདི་དག་འགེབ་སྲུང་བྱ་བའི་ཆེད་དུ། བརྟག་དཔྱད་ཁང་ནང་གི་གནས་ཚུལ་རྣམས་རྩ་མེད་བཏང་ཡོད་པ་མ་ཟད། གནས་ཚུལ་དེ་དག་ཕྱི་ལ་བཤད་མཁན་གྱི་རྒྱའི་ཚན་རིག་པ་རྣམས་ལ་གནོན་ཤུགས་སོགས་སྤྲད་དེ་གར་སོང་ཆ་མེད་དུ་བཏང་ཡོད་སྐོར་ཡང་བརྗོད་འདུག

སྤྱིར་སྐུ་ཞབས་ཌལ་གྷི་ལེ་ཤི་དང་སོ་རན་སན་རྣམ་གཉིས་ཀྱིས་རང་གི་གྲུབ་དོན་རྣམས་འདས་ལོར་ཚན་རིག་གི་དུས་དེབ་ཁག་ནང་འདོན་ཐབས་བྱས་ཡོད་ཀྱང་། སྐབས་དེར་ཕལ་ཆེ་བས་ཏོག་དབྱིབས་གཉན་སྲིན་དེ་ཕ་ཝང་ངམ་སེམས་ཅན་གཞན་ནས་མི་ལ་འགོས་ཡོད་ཤག་བྱེད་ཀྱི་ཡོད་སྟབས་དུས་དེབ་ནང་འདོན་རྒྱུར་ངོས་ལེན་བྱས་མི་འདུག འོན་ཀྱང་ཉེ་བའི་ཆར་འཛམ་གླིང་གི་མགོ་འཁྲིད་དང་ཚན་རིག་པའི་ཁྲོད་དུ། ཏོག་དབྱིབས་གཉན་སྲིན་དེ་ཚན་རིག་བརྟག་དཔྱད་ཁང་ནས་ཤོར་བའམ། ཡང་ན་མིས་ཆེད་དུ་བཟོས་པ་ཞིག་ཡིན་པའི་སྐོར་ནས་གླེང་སློང་ཤུགས་ཆེ་རུ་ཕྱིན་ཡོད་ཅིང་། བདུན་ཕྲག་སྔོན་མར་ཨ་རིའི་སྲིད་འཛིན་བྷའེ་ཌིན་མཆོག་གི་ཏོག་དབྱིབས་གཉན་སྲིན་གྱི་འབྱུང་ཁུངས་བསྐྱར་དུ་རྟོག་ཞིབ་བྱེད་དགོས་པའི་བཀའ་རྒྱ་བཏང་ཡོད་པ་རེད།

འདས་ལོའི་ཕྱི་ཟླ་ ༢ པའི་ནང་ཀང་ཀྲུའུ་ (Guangzhou) རུ་ཡོད་པའི་ལྷོ་རྒྱ་ནག་འཕྲུལ་རིག་གཙུག་ལག་སློབ་གྲྭ་ཆེན་མོའི་ (South China University of Technology) ཚན་རིག་པ་པོ་ཏའོ་ཤའོ་ (Botao Xiao) ཡིས་ཞིབ་འཇུག་གྲུབ་དོན་ཞིག་སྤེལ་བའི་ནང་། ཏོག་དབྱིབས་གཉན་སྲིན་དེ་ཝུ་ཧན་གྱི་བརྟག་དཔྱད་ཁང་ནས་བྱུང་བ་ཞིག་ཡིན་སྲིད་སྐོར་བརྗོད་ཡོད། འོན་ཀྱང་རྒྱ་ནག་གཞུང་གིས་དེ་ལྟར་བྱུང་མེད་སྐོར་བརྗོད་པར་བརྟེན། ཚན་རིག་པ་དེས་རང་གི་ཞིབ་འཇུག་རྩོམ་ཡིག་དེ་ཕྱིར་འཐེན་བྱེད་དགོས་བྱུང་བ་རེད། གཞན་ཡང་། འདས་ལོར་ཨ་རིའི་སྲིད་འཛིན་ཟུར་པ་ཊོམ་ཕུ་མཆོག་གིས་གཙོས་ནུབ་གླིང་གི་མགོ་འཁྲིད་མི་ཉུང་བས་རྒྱ་ནག་གི་གྲོང་ཁྱེར་ཝུ་ཧན་གྱི་བརྟག་དཔྱད་ཁང་ལ་ཞིབ་འཇུག་བྱེད་དགོས་པའི་དགོས་འདུན་ཤུགས་ཆེན་པོ་བཏོན་ཡོད་ནའང་། འདི་ལོའི་ཕྱི་ཟླ་ ༣ པའི་ནང་འཛམ་གླིང་འཕྲོད་བསྟེན་སྒྲིག་འཛུགས་ཀྱིས་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་གཅོད་ཀྱི་ཞིབ་འཇུག་གྲུབ་དོན་བཏོན་པའི་ནང་། ཏོག་དབྱིབས་གཉན་སྲིན་དེ་བརྟག་དཔྱད་ཁང་ནས་ཐོན་པ་ཞིག་ཡིན་མི་སྲིད་པའི་སྐོར་བཀོད་ཡོད། འོན་ཀྱང་འཕྲོད་བསྟེན་སྒྲིག་འཛུགས་ཀྱི་གྲུབ་དོན་དེར་ཚན་རིག་པ་དང་རྒྱལ་སྤྱིའི་མགོ་འཁྲིད་མང་པོས་སྐྱོན་བརྗོད་བྱས་ཡོད་པ་རེད།

གསར་འགོད་པ། པ་སངས་ཚེ་རིང་།