ཨ་རིའི་ནང་གི་བོད་རང་བཙན་གོམ་བགྲོད་མཇུག་བསྒྲིལ།

ཁ་སང་ཨ་རིའི་གྲོས་ཚོགས་ཁང་གི་མདུན་ཐང་དུ་བོད་མི་དྲུག་གི་རང་བཙན་གོམ་བགྲོད་མཇུག་བསྒྲིལ་གནང་ཡོད་འདུག

རྒྱ་ནག་གཞུང་གིས་བཙན་དབང་གི་ཐོག་ནས་གྲོས་མཐུན་དོན་ཚན་ ༡༧ ཟེར་བ་བཞག་ནས་ལོ་ངོ་ ༧༠ བའི་ཉིན་མོ་དང་བསྟུན་མགོ་འཛུགས་བྱས་པའི་ཨ་རིའི་ནང་གི་བོད་རང་བཙན་གོམ་བགྲོད་དེ་ཉིད། ཁ་སང་ཨ་རིའི་གྲོས་ཚོགས་ཁང་གི་མདུན་ཐང་དུ་མཇུག་བསྒྲིལ་གནང་ཡོད་འདུག་ལ། རང་བཙན་གོམ་བགྲོད་ཀྱི་མཇུག་བསྡོམས་མཛད་སྒོའི་སྟེང་། ཨ་རིའི་གྲོས་ཚོགས་འོག་མའི་འཐུས་མི་དང་བོད་དོན་རྒྱབ་སྐྱོར་བ་སྐུ་ཞབས་ཁི་རིས་སི་མི་ཐི་ (Chris Smith) ལགས་ཀྱིས་རང་གི་སྐུ་ཚབ་ལས་བྱེད་ཅིག་ཆེད་གཏོང་གནང་སྟེ་སྐུ་ཚབ་དེས། ཨ་རིའི་ཆབ་སྲིད་ཚོགས་པ་གཉིས་ཀས་བོད་དོན་དང་བོད་མིའི་གནད་དོན་ལ་ཤ་ཚ་དང་རྒྱབ་སྐྱོར་ཤུགས་ཆེན་པོ་བྱེད་ཀྱི་ཡོད་པ་དང་། ད་ལྟ་འཛམ་གླིང་གིས་དོ་སྣང་བྱ་ས་གཙོ་བོ་དེ་རྒྱ་ནག་གཞུང་གིས་ཤིན་ཅང་(ཤར་ཊུར་ཀི་སི་ཐན་)ཁུལ་དུ་དྲག་གནོན་བྱེད་བཞིན་པའི་གནས་སྟངས་དེ་ཡིན་ནའང་། ཤིན་ཅང་གི་སྔོན་ལ་བོད་ནང་དྲག་གནོན་བྱས་པ་དང་། དེ་བཞིན་ད་ལྟ་ང་ཚོས་རྩ་རླུང་སྒོམ་གྲུབ་པར་དྲག་གནོན་བྱེད་པའི་སྐོར་བཤད་ཀྱི་ཡོད་ནའང། དེ་སྔོན་ལ་རྒྱ་ནག་གཞུང་གིས་བོད་བརྒྱུད་ནང་བསྟན་ལ་དྲག་གནོན་བྱས་ཡོད་སྐོར་དང་། ཨ་རིའི་ངོས་ནས་བོད་མིའི་དཀའ་སྡུག་དང་འཐབ་རྩོད་ལ་གདུང་སེམས་མཉམ་སྐྱེས་ཞུ་ཡི་ཡོད་སྐོར་གསུངས་ཡོད་འདུག

གཞན་ཡང་། མཛད་སྒོའི་སྟེང་གོམ་བགྲོད་ལས་འགུལ་བ་དང་བོད་རང་བཙན་འཐབ་རྩོད་པ་དོན་གྲུབ་ལྷ་དར་ལགས་ཀྱིས། ང་ཚོས་རང་དབང་རང་བཙན་སླར་གསོ་དེ་དགོས་འདུན་གྱི་གཙོ་བོར་བཞག་དགོས་པའི་རྒྱུ་མཚན་ནི། དགྲ་བོ་རྒྱ་ནག་གིས་ཕྱི་ཟླ་ ༥ ཚེས་ ༢༣ ལ་བོད་དེ་ཞི་བས་བཅིངས་གྲོལ་བཏང་ཡིན་ཟེར་ནས་ཧམ་པ་དང་སྐྱག་རྫུན་བཤད་ནས་ལོ་ངོ་ ༧༠ འཁོར་བ་སྲུང་གཙི་བྱེད་ཀྱི་ཡོད་པ་རེད། དངོས་ཡོད་གནས་ཚུལ་དེ་ལོ་ ༧༠ དང་ ༦༠ ཡི་ནང་ལ་དགྲ་བོ་རྒྱ་ནག་གི་བཙན་འཛུལ་མནར་གཅོད་ཀྱི་འོག་བོད་ལ་ཁྲག་དང་མིག་ཆུའི་ལོ་རྒྱུས་མ་གཏོགས་གང་ཡང་རག་མེད། དེ་ལྟར་ཡིན་པའི་རྒྱུ་མཚན་གྱིས། དགྲ་བོ་རྒྱ་ནག་གིས་བོད་བཅིངས་གྲོལ་བཏང་ཡིན་ཟེར་བ་དེ་ཡོངས་སུ་སྐྱག་རྫུན་ཡིན་པ་ར་འཕྲོད་བྱ་རྒྱུའི་ཆེད་དུ་ང་ཚོས་གོམ་བགྲོད་ལས་འགུལ་འདི་སྤེལ་བ་རེད། ཅེས་བརྗོད་ཡོད་འདུག

འདི་གའི་གསར་འགོད་པས་རང་བཙན་གྲོམ་བགྲོད་པ་བསྟན་འཛིན་དབང་འདུས་རང་བཙན་ལགས་སུ་སྤྱི་ཡོངས་ནས་གོམ་བགྲོད་ལས་འགུལ་བཀའ་འདྲི་ཞུས་པར་ཁོང་གིས། སྤྱི་ཡོངས་ནས་ད་ལན་གྱི་རང་བཙན་གོམ་བགྲོད་ལས་འགུལ་དེ་ཧ་ཅང་ལེགས་པོ་བྱུང་ཡོད་པ་དང་། ད་ལན་གྱི་ཉིན་གྲངས་ ༡༠ ཡི་གོམ་བགྲོད་ལས་འགུལ་དེ་རྒྱུན་རིང་པོ་ནས་གྲ་སྒྲིག་བྱས་ཡོད་སྟབས། སྔར་གྱི་ཕྱི་ལོ་ ༡༠༡༩ ལོའི་གོམ་བགྲོད་དང་བསྡུར་ནས་གང་ལ་གང་འཚམ་གྱིས་ལེགས་པ་དང་གྲ་རྒྱས་པ་བྱུང་སོང་། གང་ཡིན་ཟེར་ན། ང་ཚོས་ལམ་བར་དུ་ཡི་གེ་འགྲེམས་པ་དང་གོམ་བགྲོད་བྱེད་སྐབས་མི་མང་ངོས་ནས་རྣམ་འགྱུར་སྟོན་སྟངས་དང་ཡ་ལན་བྱེད་སྟངས་སྔོན་མ་ལས་ཡག་པ་འདུག དེ་གཙོ་བོ་ཨ་རིའི་སྲིད་གཞུང་གོང་མས་འཛམ་གླིང་ནང་རྒྱ་ནག་གི་ནག་ཉེས་མང་པོ་ཐེར་འདོན་བྱས་པའི་རྐྱེན་གྱིས་ཡིན་པའི་ཚོར་བ་འདུག ཡང་གཅིག་ནས་ང་ཚོའི་དགོས་འདུན་བདུན་ནང་དགྲ་བོ་རྒྱ་ནག་གི་རྒྱ་ནད་སྐོར་དང་ཨ་རིའི་ནང་དྲ་རྒྱ་བརྒྱུད་སིམ་འཛུལ་བྱེད་བཞིན་པའི་སྐོར་བཀོད་ཡོད་པས་རེད། ཅེས་འགྲེལ་བརྗོད་གནང་བྱུང།

གཞན་ཡང་། བསྟན་འཛིན་དབང་འདུས་ལགས་ཀྱིས་འགྲེལ་བརྗོད་གནང་བ་ལྟར་ན། སྤྱིར་ཁ་སང་གི་མཇུག་བསྡོམས་མཛད་སྒོའི་སྟེང་ཨ་རིའི་གྲོས་ཚོགས་ནང་བོད་རང་བཙན་གྱི་གྲོས་འཆར་འདོན་གནང་མཁན་བོད་དོན་རྒྱབ་སྐྱོར་བ་སྐུ་ཞབས་སི་ཁོ་ཊི་པེ་རི་ (Scott Perry) ལགས་བཅར་གཏན་འཁེལ་ཡོད་ནའང་། ལས་བྲེལ་གྱི་དབང་གིས་བཅར་ཐུབ་མེད་ཅིང་། ཁོང་གི་ལས་ཁུངས་ངོས་ནས་རང་བཙན་གོམ་བགྲོད་ལས་འགུལ་ཆེད་གཞུང་འབྲེལ་ཡི་གེ་ཞིག་གནང་རྒྱུ་ཡིན་སྐོར་བརྗོད་ཡོད་འདུག

རྒྱ་ནག་གཞུང་གིས་བོད་བཅིངས་གྲོལ་བཏང་ནས་ལོ་ངོ་ ༧༠ འཁོར་བའི་དུས་དྲན་སྲུང་གཙི་ཟེར་བར་ངོ་རྒོལ་དང་། རྒྱ་ནག་གཞུང་གིས་བཙན་དབང་གི་ཐོག་ནས་གྲོས་མཐུན་དོན་ཚན་བཅུ་བདུན་ཟེར་བ་བཞག་པར་ངོ་རྒོལ་ཆེད། ཟླ་སྔོན་མའི་ཕྱི་ཚེས་ ༢༣ ཉིན་ཨ་རིའི་གྲོང་ཁྱེར་ཧྥི་ལ་ཌལ་ཧྥི་ཡ་ནས་མགོ་འཛུགས་གནང་བའི་གོམ་བགྲོད་ལས་འགུལ་འདིའི་ནང་ཁྱོན་བུད་མེད་གཅིག་ཚུད་པའི་བོད་མི་གྲངས་ ༦ མཉམ་ཞུགས་གནང་ཡོད་ཅིང་།  རང་བཙན་གོམ་བགྲོད་ཐེངས་གཉིས་པ་འདི་བརྒྱུད་ཨ་རིའི་གཞུང་མང་གཉིས་ནས་བོད་རང་བཙན་འཐབ་རྩོད་ལ་རྒྱབ་སྐྱོར་གནང་དགོས་པ་སོགས་དགོས་འདུན་དོན་ཚན་ ༧ བཏོན་གནང་ཡོད་འདུག

གསར་འགོད་པ། པ་སངས་ཚེ་རིང་།