སྟོབས་ཆེན་རྒྱལ་ཁབ་བདུན་མཉམ་འབྲེལ་གྱིས་རྒྱ་ནག་དང་འབར་མའི་ཐོག་ཐག་གཅོད་ལེན་དགོས།

ཁ་སང་ཕྱི་ཚེས་ ༨ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གི་གནས་ཚུལ་ལྟར་ན། ལྟ་ཞིབ་ཁང་དེས་འཚོག་ལ་ཉེ་བའི་སྟོབས་ཆེན་རྒྱལ་ཁབ་བདུན་གྱི་ཚོགས་ཆེན་དང་བསྟུན་རྒྱལ་ཁབ་བདུན་ལ་ཡོངས་ཁྱབ་བསྒྲགས་ཡིག་བྲིས་ཏེ། རྒྱ་ནག་དང་འབར་མ་དམག་གཞུང་སོགས་ཀྱིས་འགྲོ་བ་མིའི་ཐོབ་ཐང་རྡོག་རོལ་དུ་གཏོང་བཞིན་པའི་ཐད། ཚོགས་ཆེན་ཐོག་སྟོབས་ཆེན་རྒྱལ་ཁབ་བདུན་མཉམ་འབྲེལ་བྱས་ཏེ་གནད་ལ་འཁེལ་ཞིག་སེམས་ཐག་ཆོད་པོའི་ཐག་གཅོད་ཞིག་ལེན་དགོས་པ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་པར་ཆོད་སེམས་བརྟན་པོ་ཡོད་པ་མངོན་གསལ་བཟོ་དགོས་པ་མ་ཟད། རྒྱལ་སྤྱིའི་འགྲོ་བ་མིའི་ཐོབ་ཐང་གནས་སྟངས་ཇེ་བཟང་དུ་གཏང་རྒྱུའི་ཁས་ལེན་བྱས་པ་ལག་བསྟར་བྱེད་དགོས་སྐོར་ཞུ་སྐུལ་བྱས་ཡོད་འདུག

རྒྱ་ནག་དང་འབྲེལ་ཡོངས་ཁྱབ་བསྒྲགས་གཏམ་དེའི་ནང་། རྒྱ་ནག་གཞུང་གིས་འགྲོ་བ་མིའི་ཐོབ་ཐང་འཐབ་རྩོད་པ་དང་ཁྲིམས་རྩོད་པ་སོགས་གང་བྱུང་འཛིན་བཟུང་བྱེད་ཀྱི་ཡོད་པ་དང་། སྤྱི་ཚོགས་དྲ་ལམ་དང་དྲ་རྒྱ་དམ་དྲག་བྱེད་ཀྱི་ཡོད་པ། དེ་བཞིན་མི་མང་ཁྲོད་ཉུལ་ཞིབ་དྲ་མིག་འཕྲུལ་རིགས་འབོར་ཆེན་འགྲེམས་འཇོག་བྱས་ཡོད་པ་མ་ཟད། ཡུ་གུར་མི་རིགས་ཚུད་པའི་ཤར་ཏུར་ཀི་སི་ཐན་གྱི་གྲངས་ཉུང་མི་རིགས་རྣམས་ལ་དྲག་གནོན་བྱེད་ཀྱི་ཡོད་པ་དང་། ཁུལ་དེར་རྒྱ་ཆེ་བའི་ཐོག་ནས་འགྲོ་བ་མིའི་ཐོབ་ཐང་རྡོག་རོལ་དུ་གཏོང་བཞིན་ཡོད་སྐོར་དང་། རྒྱ་ནག་སྐམ་ས་ཚུད་པའི་ཧོང་ཀོང་སོགས་ཀྱི་ནང་རྒྱ་ནག་གཞུང་གིས་དྲག་གནོན་ཤུགས་ཆེ་རུ་འགྲོ་བཞིན་ཡོད་སྐོར་བཀོད་འདུག

ཡང་རྒྱ་ནག་ནང་འགྲོ་བ་མིའི་ཐོབ་ཐང་རྡོག་རོལ་དུ་གཏོང་བཞིན་པའི་གནད་དོན་དང་འབྲེལ་སྟོབས་ཆེན་རྒྱལ་ཁབ་བདུན་ལ་དགོས་འདུན་དོན་ཚན་བཞི་བཏོན་ཡོད་པའི་ནང་། རྒྱ་ནག་གཞུང་གི་ཐེ་བྱུས་གང་ཡང་མེད་པའི་ཐོག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་ཤར་ཏུ་ཀི་སུ་ཐན་ནང་འགྲོ་བ་མིའི་ཐོབ་ཐང་གི་གནད་དོན་རྟོག་ཞིབ་བྱེད་པར་གཏོང་པར་སྟོབས་ཆེན་རྒྱལ་ཁབ་བདུན་གྱིས་སྐུལ་འདེབས་གཏོང་དགོས་པ་དང་། ཤར་ཏུར་ཀི་སུ་ཐན་གྱི་དམར་ཤོག་དྲུང་ཆེ་ཁྲིན་ཆན་གོ་ (Chen Quanguo) དང་སྤྲིན་བལ་བཟོ་ལས་ཁང་ (Xinjiang Production and Construction Corps) བཅས་གཉིས་ལ་ཉེ་ལམ་ཨ་རིས་ཆད་འགེལ་བྱས་ཡོད་པ་བཞིན་སྟོབས་ཆེན་རྒྱལ་ཁབ་བདུན་ཚང་མས་ཆད་འགེལ་བྱེད་དགོས་པ། ཤར་ཏུར་ཀི་སུ་ཐན་ནང་འགྲོ་བ་མིའི་ཐོབ་ཐང་རྡོག་རོལ་དུ་གཏོང་མཁན་རྣམས་ལ་དུས་ནས་དུས་སུ་ཆད་འགེལ་བྱེད་དགོས་པ་མ་ཟད། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་བོད་སོགས་ཚུད་པའི་རྒྱ་ནག་ཁྱོན་ཡོངས་སུ་འགྲོ་བ་མིའི་ཐོབ་ཐང་རྡོག་རོལ་དུ་གཏོང་བཞིན་པའི་གནད་དོན་དང་འབྲེལ་ངེས་པར་དུ་རྟོག་ཞིབ་དང་སྙན་ཐོ་འདོན་ཐུབ་པར་སྟོབས་ཆེན་རྒྱལ་ཁབ་ཁག་གིས་རྒྱབ་སྐྱོར་བྱེད་དགོས་སྐོར་གྱི་དགོས་འདུན་བཏོན་འདུག

ད་ལྟའི་འབར་མའི་གནད་དོན་དང་འབྲེལ་ནས་ཡོངས་ཁྱབ་བསྒྲགས་གཏམ་དེའི་ནང་། འདི་ལོའི་ཕྱི་ཟླ་ ༢ ནས་བཟུང་འབར་མའི་དམག་གཞུང་གིས་མི་མང་བརྒྱ་ཕྲག་འགའ་བསད་ཡོད་པ་དང་། སྟོང་ཕྲག་འགའ་འཛིན་བཟུང་བྱས་ཡོད་པ་མ་ཟད། གསར་ཁང་ཁག་ལ་དམ་དྲག་བྱས་ཏེ་སྟོབས་ཆེན་རྒྱལ་ཁབ་ཁག་གི་གསར་འགོད་པ་ཚུད་པའི་ས་གནས་གསར་འགོད་པ་ ༧༠ ལྷག་འཛིན་བཟུང་བྱས་ཡོད་པ་དང་། མི་གྲངས་ཁྲི་ ༦ ལྷག་རང་ཁྱིམ་ནས་གནས་ཡོལ་དུ་འགྲོ་དགོས་བྱུང་ཡོད་པ། འབར་མིའི་ནང་དཔལ་འབྱོར་ཉེན་ཁའི་ནང་ལྷུང་ཡོད་པ་དང་ཟས་རིགས་འདང་ངེས་མེད་པའི་གནས་སྟངས་ཆགས་ཡོད་པ་དང་། དམག་གཞུང་གིས་གང་བྱུང་འགྲོ་བ་མིའི་ཐོབ་ཐང་ཁག་ལ་རྡོག་རོལ་གཏོང་བཞིན་པའི་ཡོད་པ་དང་། མི་མང་གི་མགོ་ཁྲིད་དང་ལས་འགུལ་གྱི་སྣེ་ཁྲིད་པ་སོགས་ཀྱིས་རྒྱལ་སྤྱིའི་ཚོགས་སྡེ་ཁག་ལ་འབོད་སྐུལ་ཞུས་ཏེ། འབར་མའི་དམག་སྡེ་དང་འབྲེལ་བའི་ཚོགས་སྒེར་ཁག་ལ་ཆད་འགེལ་བྱེད་དགོས་པའི་ཞུ་འབོད་བྱེད་ཀྱི་ཡོད་སྐོར་དང་། སྟོབས་ཆེན་རྒྱལ་ཁབ་བདུན་གྱིས་དམག་དོན་དང་འབྲེལ་ནས་ལངས་ཕྱོགས་གཅིག་བཟུང་དགོས་པ་དང་། རྒྱལ་ཚོགས་ཀྱི་སྡེ་ཁག་བརྒྱུད་འབར་མའི་གནས་སྟངས་ལ་རྟོག་ཞིབ་བྱེད་པར་རྒྱབ་སྐྱོར་བྱེད་དགོས་པ་དང་། འབར་མིའི་དམག་གཞུང་གིས་འབར་མིའི་དམངས་གཙོ་བསྐྱར་གསོ་བྱེད་པར་རྒྱལ་ཚོགས་དང་ཕྱིའི་རྒྱལ་ཁབ་གཞན་ལ་མཉམ་འབྲེལ་བྱེད་འདོད་མེད་པ་ནི་འབར་མིའི་དཔལ་འབྱོར་ཉམས་རྒུད་དུ་འགྲོ་བ་དང་རྒྱལ་སྤྱི་སྡིངས་ཆའི་ཐོག་ཁེ་ཕན་མེད་པ་སྟོབས་ཆེན་རྒྱལ་ཁབ་ཁག་གིས་གསལ་བཟོ་བྱེད་དགོས་པ་བཀོད་འདུག

ཡང་འགྲོ་བ་མིའི་ཐོབ་ཐང་ལྟ་ཞིབ་ཁང་གི་ཡོངས་ཁྱབ་བསྒྲགས་ཡིག་དེའི་ནང་། འཛམ་གླིང་གི་སྟོབས་ཆེན་རྒྱལ་ཁབ་བདུན་གྱིས་ཐེངས་འདིའི་ཚོགས་ཆེན་བརྒྱུད་འཛམ་གླིང་གི་ཚ་དྲོད་འཕེལ་བཞིན་པ་དང་འབྲེལ་འཕྲལ་དུ་རྡོ་སོལ་དང་། ས་སྣུམ་སོགས་ཚ་དྲོད་འཕེལ་བར་བྱེད་པའི་ལས་གཞི་ཁག་ལ་གཞུང་འབྲེལ་གྱི་རོགས་དངུལ་གསར་པ་སྤྲོད་མཚམས་འཇོག་དགོས་སྐོར་དང་། ཏོག་དབྱིབས་གཉན་རིམས་དང་འབྲེལ་འགོག་ཁབ་བཟོ་བསྐྲུན་རྒྱ་བསྐྱེད་བྱེད་དགོས་པ་དང་། གཉན་རིམས་ཀྱི་དུས་སྐབས་སུ་འཚོ་བར་དཀའ་ཁག་ཡོད་པའི་མི་མང་ལ་འཕྲལ་དུ་རོགས་དངུལ་གཏོང་དགོས་པ། ད་ལྟའི་ཨི་ཛི་རལ་ (Israel) དང་པ་ལི་སི་ཐན་ (Palestin) གཉིས་ཀྱི་དབར་དམག་འཛིང་བྱུང་ཡོད་པ་དང་འབྲེལ་ཨི་ཛི་རལ་གཞུང་ལ་ཡུལ་དངོས་སུ་འགྲོ་བ་མིའི་ཐོབ་ཐང་རྟོག་ཞིབ་ཚན་པ་གཏོང་བར་ནན་སྐུལ་བྱེད་དགོས་པ་དང་། ཨི་ཛི་རལ་གཞུང་གིས་འཛིན་སྐྱོང་བྱེད་པའི་ས་ཁུལ་གྱི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་ཁག་ཐེག་བྱེད་དགོས་པའི་ཞུ་སྐུལ་བྱེད་དགོས་སྐོར་དང་། ར་ཤི་ཡ་གཞུང་གིས་འགྲོ་བ་མིའི་ཐོབ་ཐང་འཐབ་རྩོད་པ་དང་། ཁྲིམས་རྩོད་པ་སོགས་ལ་དམ་དྲག་དང་སྨྲ་བརྗོད་རང་དབང་དང་འདུ་འཛོམས་རང་དབང་སོགས་ལ་དམ་དྲག་བྱེད་བཞིན་པའི་ཐད་སྐྱོན་བརྗོད་བྱེད་དགོས་པ་སོགས་བཀོད་འདུག

འདི་ལོའི་རྒྱལ་ཁབ་བདུན་གྱི་ཚོགས་ཆེན་ནི་ཟླ་འདིའི་ཕྱི་ཚེས་ ༡༡ ནས་ཉིན་གསུམ་རིང་ཏོག་དབྱིབས་གཉན་རིམས་ཀྱི་གནས་སྟངས་ཛ་དྲག་ཡིན་མིན་ལ་མ་བལྟས་པར་དབྱིན་ཡུལ་གྱི་ཀར་བྷིས་མཚོ་ཁུལ་ (Carbis Bay) དུ་འཚོགས་འཆར་ཡོད་པ་དང་། ཚོགས་པ་དེའི་ཁོངས་སུ་ཧྥ་རན་སི་དང་འཇར་མན། ཨ་རི། དབྱིན་ཇི། ཁེ་ན་ཌ། ཨེ་ཊ་ལེ། ཉི་ཧོང་བཅས་འཛམ་གླིང་གི་སྟོབས་ཆེན་རྒྱལ་ཁབ་བདུན་ཡོད་པ་དང་། ཐེངས་འདིའི་ཚོགས་ཆེན་ཐོག་རྒྱ་གར་དང་ཨོ་གླིང་། ལྷོ་ཀོ་རི་ཡ། ཡུ་རོབ་མཐུན་ཚོགས་བཅས་ཟུར་ཉན་དུ་ཞུགས་ཀྱི་ཡོད་འདུག