དྷ་ས་ཁུལ་དུ་དྲག་ཆར་འབབ་བཞིན་ཡོད་པས་ཡིད་གཟབ་དགོས་པའི་ཉེན་བརྡ་བཏང་།

ཉིན་གྲངས་ལྔ་ཙམ་རིང་བསྟུད་མར་དྷ་ས་ཁུལ་དུ་ཆར་པ་འབབ་རྒྱུ་ཡིན་པས་ཆུ་ལོག་དང་ས་རུད་འབྱུང་ཉེན་ཡོད་པའི་ཉེན་བརྡ་བཏང་།

ཁ་སང་མཚན་གུང་ནས་དྷ་རམ་ས་ལ་ཁུལ་དུ་དྲག་ཆར་ཡུན་རིང་འབབ་བཞིན་ཡོད་པའི་རྐྱེན་གྱིས། དེ་རིང་སྔ་དྲོར་བྷག་སུའི་ཁྲོམ་གཞུང་སོགས་སུ་ཆུ་ལོག་རྒྱུག་ནས་རླངས་འཁོར་སོགས་ཆུས་དེད་པ་དང་། ཉེ་ཁུལ་གྱི་རྒྱུག་ཆུ་རྣམས་རྒྱས་ཏེ་གཞུང་ལམ་འགག་པ་སོགས་ཀྱི་ཆུ་ལོག་གནོད་སྐྱོན་གང་ཙམ་ཡོང་གི་ཡོད་ཀྱང་། སྟབས་ལེགས་པ་ཞིག་ལ་ད་ལྟའི་ཆར་མི་ལ་ཤི་རྨས་བྱུང་བའི་གནས་ཚུལ་ཐོན་མི་འདུག

དྷ་སའི་དྲག་ཆར་གྱི་ཛ་དྲག་གནས་སྟངས་དང་བསྟུན་ས་གནས་ཀངྒ་ར་གྲོང་སྡེ་ལས་ཁུངས་ནས་ཛ་དྲག་ཉེན་བརྡའི་བཀོད་ཁྱབ་ཅིག་བཏང་བའི་ནང་། དེ་རིང་དང་སང་ཉིན་བཅས་ཉིན་གཉིས་རིང་ཀངྒ་ར་ཁུལ་དུ་དྲག་ཆར་ཤུགས་ཆེན་འབབ་རྒྱུ་ཡིན་པ་དང་། དེའི་རྗེས་ཉིན་གྲངས་གསུམ་རིང་ཆར་པ་རན་འཚམ་འབབ་རྒྱུ་ཡིན་སྟབས། འབྱུང་འགྱུར་ཉིན་གྲངས་ལྔའི་རིང་རྫོང་ཁོངས་ཀྱི་སྡེ་ཚན་འགན་འཛིན་ཚང་མས་དོ་དོ་ནན་ཏན་བྱ་དགོས་པ་མ་ཟད། སྒེར་གྱི་ལག་ཐོགས་ཁ་པར་རྣམས་སྒོ་ཕྱེས་ནས་འཇོག་དགོས་པ། ད་ལྟའི་ཆར་མི་སྲོག་སྐྱོབ་རྒྱུ་དེ་ཨང་དང་པོར་བརྩི་དགོས་ཤིང་། མི་མང་ངོས་ནས་ཀྱང་ཛ་དྲག་བྱུང་ན་ལས་རང་ཁྱིམ་ནས་ཕྱིར་མི་ཐོན་རྒྱུའི་ལམ་སྟོན་གནམ་འདུག

དེ་རིང་ཞོགས་པར་སྤྱི་ཚོགས་དྲ་ལམ་ཁག་ཏུ་དྷ་སར་དྲག་ཆར་ཤུགས་ཆེར་འབབ་བཞིན་པའི་བརྙན་པར་འགྲེམ་སྤེལ་བྱེད་བཞིན་པའི་ནང་། བཞུགས་སྒར་དྷ་སའི་མེག་གྷན་ཁྲོམ་གཞུང་ནས་སྤྱི་ལེ་ ༣ ཙམ་གྱི་སར་ཡོད་པའི་བྷག་སུ་ཁུལ་དུ་དྲག་ཆར་འབབ་ཤུགས་ཆེ་བའི་རྐྱེན་གྱིས། རྒྱ་ལམ་ཟུར་གྱི་ས་གནས་ཡུལ་མིའི་གླ་འཁོར་དང་ཡུལ་སྐོར་སྤྲོ་འཆམ་པའི་རླངས་འཁོར་ཆེ་གྲས་ཤིག་བཅས་ཁྱོན་རླངས་འཁོར་བཞི་ཙམ་གཅིག་རྗེས་གཉིས་མཐུད་ཀྱིས་ཆུས་དེད་ནས་སྐྱོན་ཆག་ཆེན་པོ་བྱུང་འདུག་ལ། དེ་བཞིན་བོད་མི་གནས་སྡོད་བྱ་ས་ཨ་མདོ་གྲོང་གསེབ་ཀྱི་ཡུར་བུའི་ཆུ་རྣམས་རྒྱས་པ་མ་ཟད་ས་རུད་བརྒྱབ་པའི་གནས་ཚུལ་ཡང་ཐོན་འདུག

དེ་རིང་བཞུགས་སྒར་དྷ་ས་ཙམ་དུ་མ་ཟད། ཧི་མ་ཅལ་མངའ་སྡེའི་ས་ཁུལ་མི་ཉུང་བ་དང་། ཁྱིམ་མཚེས་ཨུ་ཊ་ར་ཁན་ཌི་མངའ་སྡེའི་ས་ཁུལ་མང་པོའི་ནང་དྲག་ཆར་འབབ་བཞིན་ཡོད་པའི་རྐྱེན་གྱིས་ཆུ་ལོག་དང་ས་རུད་བྱུང་རྗེས་གཞུང་ལམ་འགག་པ་སོགས་ཀྱི་གནས་ཚུལ་ཐོན་བཞིན་འདུག་ལ། དེ་རིང་ཧི་མ་ཅལ་མངའ་སྡེའི་རྒྱལ་ས་སིམ་ལར་རྟེན་གཞི་བྱས་པའི་གཞུང་གི་གནམ་གཤིས་བརྟག་དཔྱད་ཁང་གིས་ཀྱང་། དྲག་ཆར་གྱི་རྐྱེན་པས་ཤིང་སྡོང་འགྱེལ་བ་སོགས་འབྱུང་སྲིད་པ་དང་། མང་ཚོགས་སུ་གང་རྒྱུག་ཆུའི་འགྲམ་དུ་བསྐྱོད་མི་ཉན་པའི་ཉེན་བརྡ་བཏང་ཡོད་འདུག

དེང་སྐབས་རྒྱ་གར་གྱི་བྱང་ཕྱོགས་ཁུལ་དུ་ཆར་དུས་མགོ་བརྩམས་པ་དང་བསྟུན། ས་ཁུལ་མང་པོའི་ནང་ས་རུད་དང་ཆུ་ལོག་བརྒྱབ་པའི་གནས་ཚུལ་བསྟུད་མར་ཐོན་བཞིན་པ་ལྟར། དེ་རིང་རྒྱ་གར་དང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཞིག་ཐོན་བཞིན་པ་ལྟར་ན། འདས་པའི་ཉིན་གྲངས་གཅིག་ནང་རྒྱ་གར་གྱི་ནུབ་ཕྱོགས་མངའ་སྡེ་རཱ ཇི་སི་ཐན་(Rajasthan) ནང་ཐོག་བརྒྱབ་པའི་རྐྱེན་གྱིས་ཉུང་མཐར་མི་གྲངས་ ༣༨ རྐྱེན་འདས་ཕྱིན་འདུག་ཅིང་། དེའི་ཁྲོད་ནས་མི་གྲངས་ ༡༡ ནི། མངའ་སྡེ་དེའི་བྱང་ཕྱོགས་གྲོང་ཁྱེར་ཇེ་པུར་གྱི་ཡུལ་སྐོར་སྤྲོ་འཆམ་པ་མང་པོ་འཁོར་སའི་ཨ་མེར་ (Amer Fort) ཞེས་པའི་གནའ་ཤུལ་མཁར་རྙིང་གི་རྩིག་གྱང་སྟེང་འཛེགས་སྐབས་ཐོག་བརྒྱབ་སྟེ་རྐྱེན་འདས་སུ་ཕྱིན་ཡོད་འདུག

སྤྱིར་རྒྱ་གར་ནང་ཐོག་བརྒྱབ་པའི་རྐྱེན་གྱིས་ལོ་ལྟར་ཆ་སྙོམས་ཀྱིས་མི་གྲངས་ ༢༠༠༠ ལྷག་རྐྱེན་འདས་སུ་འགྲོ་ཡི་ཡོད་སྟབས། ཐོག་རྒྱག་བཞིིན་པའི་སྐབས་ཁང་པའམ་ཡང་ན་རླངས་འཁོར་སོགས་ནང་འཛུལ་དགོས་བ་དང་། གཞན་འཛུལ་སའམ་གབ་ས་མེད་པའི་གནས་སྟངས་འོག་ལྷག་ཚེ། རང་གི་རྐང་ལག་སོགས་བརྐུམས་ཏེ་རང་ཉིད་ཀྱི་གཟུགས་བོངས་གང་ཐུབ་ཀྱིས་ཆུང་དུ་གཏོང་ཐབས་ལ་འབད་དགོས་པ། གཞན་ཡང་ཐོག་རྒྱག་སྐབས་གུང་ཡངས་ས་དང་ས་སྟོང་། ལྷག་པར་དུ་ལ་ངོགས་སྟོང་པ་རིགས་ལ་གཡོལ་དགོས་ཤིང་། ཤིང་སྡོང་རིང་པོ་དང་། ཁེར་སྐྱེས་ཤིང་སྡོང་འོག་ཏུ་ནམ་ཡང་སྡོད་རྒྱུ་མེད་པ་རེད་འདུག

གསར་འགོད་པ། པ་སངས་ཚེ་རིང་།