མཧཱ་གུ་རུའི་འབུམ་ཚོགས་དབུ་འཛུགས་གནང་།

 དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ་༸རྒྱལ་བ་རིན་པོ་ཆེ་མཆོག་གི་སྐུ་ཕྱྭ་དང་བསྟན་སྲིད་ཞབས་རིམ་ཆེད་ཉིན་གྲངས་གསུམ་རིང་གི་མཧྰགུ་རུའི་འབུམ་ཚོགས་དབུ་འཛུགས་གནང་འདུག

འབུམ་ཚོགས་དེ་ནི་ལོ་ལྟར་དབུས་བོད་མིའི་སྒྲིག་འཛུགས་དང་ཆོས་རིག་ལས་ཁུངས་གཉིས་ཀྱིས་གཙོ་བོ་ཐུགས་འགན་བཞེས་པའི་ཐོག་ནས་འཚོག་གི་ཡོད་པ་དང་། འདི་ལོའི་མཧྰགུ་རུའི་འབུམ་ཚོགས་ཀྱི་མཛད་སྒོར་རྣམ་རྒྱལ་གྲྭ་ཚང་གི་སློབ་དཔོན་བློ་བཟང་བསྟན་དར་མཆོག་གིས་དབུས་པའི་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བཀའ་དྲུང་སྦྲ་གཉིས་ཚེ་རྒྱལ་ལགས། ཆོས་རིག་ལས་ཁུངས་ཀྱི་དྲུང་འཕར་བདུད་འདུལ་རྡོ་རྗེ་ལགས། དེ་བཞིན་རྣམ་རྒྱལ་གྲྭ་ཚང་གི་དགེ་འདུན་པ་རྣམ་པ་བཅས་ཕེབས་ཡོད་འདུག

ཕྱི་ལོ་ ༢༠༡༩ ལོའི་ལོ་མཇུག་ནས་བཟུང་རྒྱ་ནག་ཝུའུ་ཧན་ནས་འཛམ་གླིང་གང་སར་ཏོག་དབྱིབས་གཉན་རིམས་རྒྱ་ཁྱབ་ཏུ་འགྲོ་བའི་མགོ་བཙུགས་ཡོད་པ་དང་། ཕྱི་ལོ་ ༢༠༢༠ ལོའི་ལོ་མགོ་ནས་བཟུང་རྒྱ་གར་རྒྱལ་ཡོངས་སུ་འདུ་འཛོམས་དང་འགྲོ་འོང་བཀག་སྡོམ་བྱས་ཏེ་ད་ལྟ་གཞི་ནས་ནད་རླབས་གཉིས་པ་ཡལ་འགྲོ་བཞིན་ཡོད་ཀྱང་། ལོ་འཆར་ཅན་ལྟར་འདི་ལོའི་འབུམ་ཚོགས་སྐབས་མི་མང་འདུ་འཛོམས་རིགས་གནང་གི་མེད་པ་རེད།