སྲིད་སྐྱོང་སྤེན་པ་ཚེ་རིང་མཆོག་ལ་དྭགས་བྱང་ཐང་གི་འབྲོག་ཁུལ་དུ་ཕེབས།

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ལ་དྭགས་ཁུལ་དུ་གཞུང་འབྲེལ་གཟིགས་སྐོར་གནང་བཞིན་ཡོད་པ་ལྟར་དེ་རིང་སྲིད་སྐྱོང་མཆོག་ལ་དྭགས་བྱང་ཐང་ཁུལ་གྱི་ཧན་ལེ་དང་། མ་ཁྱུ། སུམ་མདོ་སོགས་ཀྱི་བོད་རིགས་འབྲོག་པའི་གནས་སྟངས་ལ་གཟིགས་ཞིབ་གནང་བར་ཕེབས་ཡོད་འདུག

ཁ་སང་སྲིད་སྐྱོང་མཆོག་གི་སྐོར་སྐྱོད་ཀྱི་ཉིན་བདུན་པ་དེར་རྒྱ་གར་གྲོས་ཚོགས་ཀྱི་འཐུས་མི་ཟུར་པ་དང་ལ་དྭགས་ནང་པ་ཚོགས་པའི་ཚོགས་གཙོ་ཐུབ་བསྟན་ཕུན་ཚོགས་ལགས། རྒྱ་གར་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས། རྒྱ་གར་ས་གནས་རྫོང་དཔོན། དེ་བཞིན་ལ་དྭགས་རི་ལྗོངས་ཡར་རྒྱས་ལྷན་ཚོགས་ (Ladakh Hill Council) ཀྱི་སྡེ་དཔོན། ཁྲིམས་རྩོད་པ་བཀྲ་ཤིས་རྒྱལ་མཚན་ལགས་སོགས་ས་གནས་ཀྱི་གནད་ཡོད་མི་སྣར་མཇལ་འཕྲད་གནང་སྟེ། ས་གནས་བོད་མིའི་གནས་སྟངས་དང་བདེ་སྡུག་སོགས་གླེང་སློང་གནང་བ་དང་འབྲེལ། ཆོས་དང་རིག་གཞུང་གི་འབྲེལ་བ་དམ་པོ་ཡོད་པའི་བོད་མི་ཚོར་རྒྱབ་སྐྱོར་དང་མཐུན་འགྱུར་གནང་དང་གནས་མུས་ཡིན་པར་ཐུགས་རྗེ་ཆེ་ཞུས་ཡོད་འདུག

ཕྱི་ཚེས་ ༢༢ ཉིན་སྲིད་སྐྱོང་མཆོག་ནས་ལ་དྭགས་བསོད་ནམས་གླིང་གཞིས་ཆགས་ཀྱི་གཞིས་གྲོང་ཁག་ཏུ་གཟིགས་སྐོར་གནང་སྐབས་ཐོག་མར་བོད་དམག་ཚེ་འདས་དཔའ་བོ་ཉི་མ་བསྟན་འཛིན་ལགས་ཀྱི་ཤུལ་ལུས་ནང་མི་ཚོར་ཆེད་དུ་ཐུག་འཕྲད་གནང་ཡོད་འདུག་ལ། དེ་བཞིན། ཟླ་འདིའི་ཚེས ༢༡ ཉིན་སྲིད་སྐྱོང་མཆོག་གིས་ཉེ་སྔོན་ར་ལུག་ལ་འཆི་སྐྱོན་ཆེན་པོ་བྱུང་སའི་ལ་དྭགས་འདུད་གཅིག་ཁུལ་གྱི་ཁྱིམ་ཚང་ ༨ ཀྱི་ནང་ཕེབས་ཏེ། སྒོ་ཕྱུགས་ལ་ནད་ཡམས་ཀྱི་དཀའ་ཁག་འཕྲད་སྐབས། ས་གནས་གཞུང་གིས་སྨན་བཅོས་མཐུན་རྐྱེན་སྦྱར་བ་དང་། འཆི་སྐྱོན་ཕྱིན་པའི་ར་ལུག་ལ་གུན་གསབ་གནང་འཆར་ཡོད་ལ། མ་འོངས་པར་སྒོ་ཕྱུགས་ལ་ནད་ཡམས་ཀྱིས་གནོད་སྐྱོན་མི་ཐེབས་པའི་ཆེད་དུ་གྲ་སྒྲིག་གང་ལེགས་དགོས་པའི་ལམ་སྟོན་གནང་བ་དང་འབྲེལ། མི་སྒེར་དང་ཚོགས་སྡེ་ཁག་ནས་ཞལ་འདེབས་ཕོན་ཆེན་གནང་བར་སྲིད་སྐྱོང་མཆོག་ནས་ཐུགས་རྗེ་ཆེ་ཞུས་ཡོད་འདུག

སྐབས་དེར་འབྲོག་པའི་ཡུལ་དངོས་སུ་སོང་ནས་བརྙན་བླངས་བ་དང་འབྲོག་མིའི་དཀའ་ངལ་བརྒྱུད་ལམ་དུ་སྤེལ་ཏེ། འཛམ་གླིང་གི་ཕྱོགས་མཐའ་གང་ས་ནས་ཁྱོན་ཧིན་སྒོར་འབུམ་ ༣༠ ལྷག་བསྡུ་སློང་གནང་མཁན་བོད་རིགས་བུ་མོ་སྒྲོལ་མ་ལྷ་མོ་ལགས་ལའང་སྲིད་སྐྱོང་མཆོག་ནས་ཐུག་འཕྲད་གནང་སྟེ། ཁོང་མོའི་སྤྱི་ཚོགས་ཞབས་ཕྱི་རླབས་ཆེན་གནང་བཞིན་པར་བསྔགས་བརྗོད་གནང་ཡོད་འདུག

ཟླ་འདིའི་ཕྱི་ཚེས་ ༢༠ ཉིན་སྲིད་སྐྱོང་མཆོག་གི་གཟིགས་སྐོར་ཉིན་དང་པོ་ནས་བཟུང་ས་གནས་བོད་ཀྱི་སྨན་རྩིས་ཁང་དང་བོད་ཁྱིམ། བོད་ཁྱིམ་རྒན་གསོ་ཁང་། ས་གནས་འཕྲོད་བསྟེན་སྨན་ཁང་། ས་གནས་ཁྲིམས་ཞིབ་ཁང་། དེ་བཞིན་ས་གནས་ཀྱི་དགོན་པ་ཁྲིག་རྩེ་དགོན་སོགས་སུ་གཟིགས་སྐོར་གནས་གཟིགས་སུ་ཕེབས་ཡོད་པ་དང་། གཞུང་འབྲེལ་མཛད་རིམ་ལྟར་ན། ཟླ་འདིའི་ཕྱི་ཚེས་ ༢༨ ཉིན་མི་མང་གི་འཐུས་མི་རྣམ་པ་དང་། སླེ་ཚོང་རིགས་ཚོགས་པ་དང་། རྟ་པ་ཚོགས་པ། གླང་འཁོར་ཚོགས་པ་བཅས་ལ་ཐུགས་འཕྲད་གནང་རྒྱུ་དང་། ཚེས་ ༢༩ ཉིན་གྱི་སྔ་དྲོར་ཕྱིར་དྷ་རམ་ས་ལར་ཕེབས་ཐོན་གནང་འཆར་ཡོད་འདུག

དཔལ་ལྡན།