བཙོན་ཁང་ནང་དུ་མཁན་པོ་མུན་སེལ་རིན་པོ་ཆེར་མཇལ་བ། གསུམ་པ།

ཀླུ་སྨྱོན་ཧེ་རུ་ཀའམ་སྤྲུལ་སྐུ་ཆོས་དབྱིངས་ཡེ་ཤེས་ཀྱིས་དབྱིན་ཡིག་ནས་བསྒྱུར།

མཁན་པོ་མུན་སེལ་གྱིས་ང་ལ་ཁོང་གིས་བཙོན་ཁང་བཟོ་གྲྭ་ཆེན་པོ་འདི་སངས་རྒྱས་ཀྱི་དག་ཞིང་ཞིག་ཏུ་བསྒོམས་པ་ཡིན་ཞེས་ཀྱང་གསུངས་སོང་།

དེ་ནས་མཁན་པོ་མུན་སེལ་གྱིས་ཁོང་གི་བཞུགས་ཤག་དེ་སྒོམ་སྒྲུབ་ཁང་ཞིག་ཏུ་བསྒོམས་པ་དང་། རྒྱ་མིའི་ཉིན་རེའི་གསར་ཤོག་དེ་ཚོ་ཁོང་གི་ཞལ་འདོན་ཕྱག་དཔེ། ཁོང་གིས་ལག་བཟོའི་ཅ་ལག་དེ་ཚོ་ཁོང་གི་མཆོད་ཆས་སུ་བསྒོམས་འདུག

“ཁྱོད་ཀྱིས་ལས་ཀ་ནན་ཏན་གྱིས་བྱེད་དགོས།” ངའི་བླ་མས་ང་ལ། “སེམས་ལ་འཁོན་འཛིན་མེད་པའི་སྒོ་ནས་ཁྱོད་ཀྱི་ལས་ཀ་དེ་ཡག་པོར་སྒྲུབས། དེ་ནས་ཁྱོད་ཀྱི་ལས་ངན་དེ་ཚོ་འདག་གི་རེད།”

དེའི་རྗེས་སུ། ང་སྤྱོད་ལམ་ཡག་པོའི་སྒོ་ནས་ལས་ཀར་ཕྱིན་པ་ཡིན། རིམ་བཞིན་ང་རང་ངའི་ལས་ཀ་དང་བཙོན་ཁང་གི་སྒྲིག་ལམ་གྱི་ཕྱོགས་སུ་རྣམ་དཔྱོད་དང་ལྡན་པ་ཞིག་ཏུ་གྱུར། ག་ལེར། རྒྱུན་རིང་བའི་ཟླ་བ་མང་པོ་དང་ཐ་ན་ལོ་ཤས་ཀྱི་རྗེས་སུ། ངའི་ངལ་རྩོལ་གྱིས་ང་ལ་དེ་ཙམ་མནར་གཅོད་གཏོང་གི་མི་འདུག ངས་རང་གི་དབོར་རྒྱུའི་ས་རྡོ་དེ་ཚོ་གཡང་ཊི་དང་སྤོས་ཤེལ། གཡུ་དང་ཕ་ལམ་གྱི་མཆོད་རྫས་སུ་དམིགས་པའི་རྐྱེན་གྱིས། དེ་ཙམ་མ་འགོར་བར་ང་ལ་ས་རྡོ་དབོར་རྒྱུར་དཀའ་ངལ་དེ་ཙམ་འཕྲད་མ་སོང་། ངས་རང་གིས་གསེར་བཙོ་མ་ཆེན་པོ་ཞིག་སྒལ་བར་ཁུར་ནས་སྐོར་བར་འགྲོ་བཞིན་པར་དམིགས་པ་དང་། དེ་ནས་ཉིན་ཞིག ངས་དེ་ནི་གང་ལྟར་རང་གིས་བྱེད་དགོས་པ་ཞིག་རེད་འདོད་པས། ང་དེ་ལྟར་བྱེད་པར་ཕལ་ཆེར་སྤྲོ་བ་ཡོད་པར་གྱུར། རེད། རྗེས་སུ་ང་རང་གི་བཀའ་དྲིན་ཅན་གྱི་རྩ་བའི་བླ་མར་བཙོན་ཁང་དུ་མཇལ་བ་དང་། ལོ་ནས་ཟླ་བ་བརྒྱུད་དེ་འབད་པ་ཆེན་པོས་ཁོང་གི་ལམ་སྟོན་གྱི་རྗེས་སུ་འབྲངས་པ་དང་། ང་ལ་ངལ་རྩོལ་གྱི་ཕྱོགས་སུ་དཀའ་ངལ་གང་ཡང་འཕྲད་མ་བྱུང་། ས་རྡོ་དབོར་རྒྱུ་དེ་ངའི་ཆོས་ཀྱི་ཉམས་ལེན་དུ་གྱུར་སོང་། དེ་བཞིན་དུ། རྗེ་ཕག་མོ་གྲུབ་པས། གལ་སྲིད་ཁྱེད་ཀྱིས་ཉམས་ལེན་བར་མེད་དུ་བྱས་པ་ཡིན་ན། གང་སྣང་ཁྱེད་ཀྱི་སློབ་དཔོན་དུ་འཆར་གྱི་རེད། ཅེས་གསུངས་པ་བཞིན་དུ། གང་སྣང་ཐམས་ཅད་ངའི་སློབ་དཔོན་དུ་ཤར་བྱུང་། གང་ཡིན་ཞེ་ན། ངས་གི་སྐད་ཅིག་མ་ཐམས་ཅད་སྒོམ་སྒྲུབ་དང་ཟླ་སྒྲིལ་གཏོང་གཏོང་ཤེས་ཀྱི་ཡོད། སྒོམ་དང་སྡུག་བསྔལ་གྱི་ཚོར་བ་དེ་གཉིས་ས་གནས་མི་འདྲ་བ་གཉིས་སུ་གནས་མི་དགོས་པ་ཞིག་ཏུ་གྱུར་སོང་། དེ་ཚོ་གཅིག་ཏུ་གྱུར་པ་དང་གལ་སྲིད་ངའི་བསམ་བློས་འགན་ཁུར་བ་ཡིན་ན་དེ་ཚོས་ཕན་ཚུན་གཅིག་གྲོགས་གཅིག་བྱེད་བཞིན་འདུག

ཉིན་རེའི་ཡུན་རིང་གི་ངལ་རྩོལ་རྗེས་ཀྱི་དགོང་དྲོར། ང་རང་བཙོན་མ་གཞན་དག་དང་ལྷན་དུ་སློབ་སྦྱོང་གི་འཛིན་གྲྭར་ཞུགས་དགོས་ཀྱི་ཡོད།

མའོ་ཡི་གསུང་བཏུས་དམར་པོའི་ལོགས་སུ། ང་ཚོས་དམིགས་པ་གཏད་སའི་འཛིན་གྲྭའི་སློབ་གཞི་གཙོ་བོ་ནི་ཉིན་རེའི་ཚགས་པར་གཉིས་ལས་གྲུབ་པ་ཞིག་ཡིན། དེ་གཉིས་ནི་<<མི་དམངས་ཉིན་རེའི་ཚགས་པར>>་དང་<<མཚོ་སྔོན་བོད་ཡིག་གསར་འགྱུར>>*་གཉིས་ཡིན།

(*དབྱིན་ཡིག་གི་མ་རྩོམ་ནང་<<མཚོ་སྔོན་ཉིན་རེའི་གསར་འགྱུར>>ཞེས་བྲིས་འདུག་ཀྱང་། <<མཚོ་སྔོན་བོད་ཡིག་གསར་འགྱུར>>དེ་ཉིན་རེའི་གསར་འགྱུར་ཞིག་མ་ཡིན་པར་ཉིན་ཟུང་གསར་འགྱུར་ཞིག་ཡིན། )

ང་ཚོས་བོད་ཡིག་གི་གསར་ཤོག་བཀླགས་པ་དང་དེ་ནས་ཚགས་པར་དེ་གཉིས་ཀྱིས་བསྟན་པའི་དམར་ཕྱོགས་ཚོགས་པའི་སྲིད་ཇུས་དང་དམིགས་ཡུལ་གང་ཡིན་སྐོར་རང་གིས་ཐོ་རྒྱག་དགོས། ཚགས་པར་དེ་གཉིས་ལས་ཁྱེད་ཀྱིས་མཐོང་རྒྱུ་དེ་ནི་ཆབ་སྲིད་རྩོམ་ཡིག་དེ་ཚོ་ཡིན་ཞིང་། དེ་བཞིན་སྲིད་གཞུང་གི་གཏམ་བཤད་དང་སྙན་ཞུ། སྲིད་གཞུང་གི་མགོ་ཁྲིད་ཀྱི་སྐོར་འབའ་ཞིག་ཡིན།

དེར་བརྟེན། དམར་ཕྱོགས་གཞུང་ལ་བསྟོད་བསྔགས་བྱེད་རྒྱུ་དེ་ནི་བློ་གྲོས་ལྡན་པའི་བྱེད་ཐབས་འབའ་ཞིག་དང་ལས་བྱེད་པ་ཚོས་དང་ལེན་བྱེད་པ་དེ་ཡིན། ཕྱོགས་གཞན་ཞིག་ནས། སྙན་ཞུ་འབྲི་སྐབས་རྣམ་པ་གང་རུང་གི་སྒོ་ནས་ལྷག་བསམ་དང་སྐྱོན་བརྗོད་ནི་གསར་བརྗེར་ངོ་རྒོལ་དུ་བརྩི་གི་ཡོད། བློ་ཁོག་ཆེན་པོས་སྐྱོན་བརྗོད་དེ་རིགས་བྱེད་མཁན་ལ་འཕྲལ་མར་འདྲི་རྩད་བྱེད་པ་མ་ཟད། དུས་རྒྱུན་དུ་ཡང་འདྲི་རྩད་བྱེད་པ་རེད།

དགོང་དྲོ་རྟག་པར་ཆུ་ཚོད་བདུན་དང་ཕྱེད་ཀར་ཅོང་བརྡ་ཞིག་རྒྱག་པ་དང་། དེའི་གོ་དོན་ནི་ང་ཚོའི་ཀློག་འདོན་སློབ་ཚན་མགོ་བརྩམས་པ་ཡིན། དེ་དུས་ང་ཚོ་ཚང་མས་ལམ་སེང་མགོ་བོ་མར་བསྒུར་ཏེ་རང་རང་གི་མདུན་དུ་ཡོད་པའི་དཔར་སྐྲུན་བྱས་ཡོད་པ་དེར་བལྟས་ནས་ཀློག་དགོས། མུ་ནས་མུ་རུ་ཀློག་དགོས། རྒྱ་མིའི་ལས་བྱེད་པ་ཚོས་དེ་ནི་ “རང་སྦྱོང་” བྱེད་སྟངས་ཡག་ཤོས་དེ་རེད་ཟེར། ཚགས་པར་དེ་ཚོ་ཕལ་མོ་ཆེས་ཇི་ལྟར་དམར་ཕྱོགས་སྲིད་གཞུང་གིས་ཡར་རྒྱས་འཛུག་སྐྲུན་གསར་བ་བོད་ལ་ཁྱེར་ཡོང་བའི་སྐོར་དང་། ཁོ་ཚོས་ཇི་འདྲ་བྱས་ནས་མི་ངན་རྩ་མེད་བཟོས་པའི་སྐོར། མི་ངན་དེ་ཚོས་ཇི་ལྟར་སྔར་བྱས་རྒྱབ་བསྐྱུར་དང་རང་སྐྱོན་ངོས་ལེན་གྱིས་བཅོས་སྒྱུར་བྱས་པའི་སྐོར། འདས་པ་དེ་ཚོ་ཇི་འདྲའི་གདུག་རྩུབ་ཆེན་པོ་ཞིག་ཡིན་པའི་སྐོར། ཇི་ལྟར་ལེགས་པའི་ཕྱོགས་སུ་འགྱུར་བའི་སྐོར་སོགས་བརྗོད་ཡོད། ཁོ་ཚོས་མི་ཡག་པོར་ངོས་འཛིན་བྱས་པ་དེ་ཚོར་བསྟོད་བསྔགས་དང་། མི་ངན་དུ་ངོས་བཟུང་བ་ཚོར་སྐྱོན་རྗོད་བྱེད་ཀྱི་ཡོད།

གང་ལྟར། མི་ཚང་མས་ལངས་ཕྱོགས་འདི་ལ་བརྩི་བཀུར་དང་མགོ་སྒུར་བྱེད་པ་ཞིག་མ་བྱུང་བ་སྟེ། ཐེངས་གཅིག་ངའི་ཤག་རོགས་བྱེད་མྱོང་བའི་དགེ་བཤེས་ཤིག་ཡོད་པ་དང་། ཁོས་ཅོང་བརྡ་དེ་ཐོས་ཐེངས་རེ་རེར། ཁོས་བསམ་བཞིན་དུ་བྱེད་སྟངས་ཉེས་པོའི་ངང་མགོ་བོ་ཚགས་པར་དེའི་རྒྱབ་ཏུ་བསྒུར་ནས་གཉིད་ཁུག་གི་ཡོད་པ་དང་། རྒྱ་མིས་ལས་བྱེད་ཚོས་དེ་མཐོང་ཐེངས་རེ་རེར་ཁོང་ལ་གཤེ་གཤེ་གཏོང་གི་རེད།

“ཁྱོད་ཀྱིས་ག་རེ་བྱས་ནས་ཀློག་གི་མེད། ཁྱོད་ཀྱིས་ག་རེ་བྱེད་ཀི་ཡོད། ཁྱོད་ཀྱིས་མི་ཀློག་དོན་ཅི་ཡིན།”

ངའི་ཤག་རོགས་དགེ་བཤེས་ལགས་ཀྱིས་ག་ལེར་ཁོང་གི་མིག་གཉིས་ཕྱེས་ནས་དེ་ཚོ་སྣང་མེད་ངང་དེ་ཚོར་ཡ་མེད་བྱེད་ཀྱི་རེད།

“ང་ལ་འདི་ཚོ་ཀློག་འདོད་མི་འདུག ཚགས་པར་དེ་ཚོ་གནས་ཚུལ་རྫུན་མས་ཁེངས་འདུག དེ་རུ་བདེན་པ་གང་ཡང་མི་འདུག འདི་ནི་དམར་ཕྱོགས་པའི་གསར་འགྱུར་ཡིན་གྱི་རེད། ཡིན་ན་ཡང་། དམར་ཕྱོགས་པ་དང་དམར་ཕྱོགས་སྲིད་གཞུང་གི་སྙན་ཞུ་གང་ཞིག་ཡིན་ན་ཡང་། དེ་རུ་བདེན་པ་ཞིག་མི་འདུག དེ་ཚོ་ཚང་མ་གཡོ་རྫུན་འབའ་ཞིག་རེད།”

དེ་ལྟར་བརྗོད་པའི་རྐྱེན་གྱིས་རྒྱ་མིའི་ལས་བྱེད་དེ་ཚོ་ཁོང་ཁྲོ་ཆེན་པོ་ལངས་ཏེ་ཁོང་ལ་འཐབ་འཛིང་བྱེད་ཀི་རེད། ཁོ་ཚོས་ཁོང་ལ་སྐད་ཤུགས་ཆེན་པོས།

“ཁྱོད་ཀྱིས་རང་གི་གསར་བརྗེ་ངོ་ལོག་གི་ཀུན་སློང་དང་སྤྱོད་པར་འགྱོད་བཤགས་བྱོས། ང་ཚོས་ཁྱོད་ལ་གོ་སྐབས་ཐེངས་གཅིག་སྤྲོད་ཀྱི་ཡིན། ཁྱོད་རང་ལ་དམར་ཕྱོགས་རིང་ལུགས་ལ་དགའ་ས་གང་ཞིག་ཡོད་ན་ཁྱོད་ཀྱིས་ད་ལྟ་ཤོད་དང་ང་ཚོས་ཁྱོད་ལ་རྡུང་རྡེག་མི་བྱེད།”

དེ་ཐོས་རྗེས། ངའི་ཤག་རོགས་དགེ་བཤེས་དེས་སྐད་གསེང་མཐོན་པོའི་སྒོ་ནས་ལན་འདེབ་བྱེད་རྒྱུར།

“ཡོད། དོན་ཚན་གཉིས་ཀྱི་སྟེང་ནས་ང་རང་དམར་ཕྱོགས་རིང་ལུགས་ལ་དགའ་བོ་ཡོད། དང་པོ་དེ་ནི་ཀློག་འདོན་མཚམས་འཇོག་གི་ཅོང་བརྡ་དེ་ཡིན་ལ། གཉིས་པ་དེ་ནི་ཟ་མ་བཟའ་བའི་ཅོང་བརྡ་དེ་ཡིན། དེ་གཉིས་ནི་ང་རང་དགའ་མོས་ཡོད་ས་དེ་ཡིན། དེ་མ་གཏོགས་གཞན་གང་ཡང་མེད།”

མཁན་པོ་མུན་སེལ་གྱིས་ང་ཚོར་སྐད་ཆ་དེ་འདྲ་བཤད་པར་བཟོད་སྒོམ་བྱེད་དགོས་པའི་སློབ་སྟོན་གནང་གི་རེད། ཁོང་གིས་འཁྲུག་རྐྱེན་སློང་མཁན་བྱས་ན་དགེ་མཚན་ཅང་མི་འདུག་དགོངས། རྒྱུ་མཚན་དང་པོ་ནི་དེ་ཡིས་འགྱུར་ལྡོག་ཅི་ཡང་གཏོང་མི་ཐུབ། གཉིས་པ་ནི། དེ་ཡིས་ང་ཚོ་ནང་ཆོས་ཉམས་ལེན་དངོས་གནས་དེ་བྱེད་པ་སྟེ། དུས་རྟག་ཏུ་རང་གི་སེམས་ལ་བལྟ་བ་དང་། རང་གི་མི་དགེ་བའི་བའི་བསམ་བློར་སྟངས་འཛིན་བྱེད་པ་ལས་ཐག་རིང་དུ་འཁྲིད་པ་རེད།

“གལ་སྲིད་མི་ཞིག་གིས་ཕྱག་རྒྱ་ཆེན་པོ་དང་རྫོགས་པ་ཆེན་པོའི་ཉམས་ལེན་ཚད་མཐོན་པོ་ཞིག་གོང་འཕེལ་གཏོང་འདོད་ཡོད་ན། མི་དེས་དམིགས་རྣམ་ག་འདྲ་ཞིག་སྐྱོང་དགོས་པ་རེད་ཅེ་ན།” མཁན་པོ་མུན་སེལ་གྱིས་དེ་ལ་ལན་འདི་ལྟར་གསུངས་སོང་།

“མི་དེ་ཉོན་མོངས་པའི་རྣམ་རྟོག་གི་ཚོར་བ་ལས་རྦད་དེ་ཐར་བ་ཞིག་དགོས་ཀྱི་ཡོད་པ་རེད། དེ་ནི་མི་དེའི་སྒོམ་ལ་གོང་འཕེལ་ངོ་མ་ཞིག་བྱུང་བའི་རྟགས་མཚན་ངོ་མ་དེ་རེད།

ངས་རང་ཉིད་ཉོན་མོངས་པའི་རྣམ་རྟོག་དེ་ཚོ་ལས་ཐེངས་མ་གཅིག་རང་གིས་ཐར་ཐུབ་པ་ཞིག་མི་ཡོང་བ་དེ་ཤེས་ཡོད། ངས་འབད་བརྩོན་ལྷུར་ལེན་གྱིས་དེ་ཚོ་ཐེངས་མ་རེ་རེ་བྱས་ནས་ཐག་གཅོད་བྱེད་དགོས། ང་ཚོས་ཉོན་མོངས་ཅན་གྱི་རྣམ་རྟོག་དེ་ཚོ་འབྱུང་བའི་སྐབས་སུ་གོ་སྐབས་རེ་རེ་བཟུང་ནས་ཐག་གཅོད་བྱེད་དགོས། ང་ཚོས་ཉོན་མོངས་ཅན་གྱི་རྣམ་རྟོག་འདི་ཚོ་ང་ཚོའི་སྙིང་དབུས་སུ་སྦས་པ་ཡིན་ན། གལ་སྲིད་ང་ཚོ་བཙོན་ཁང་དུ་རྒྱུན་རིང་བོ་ཞིག་སྡོད་མ་དགོས་པ་ཡིན་ན་ཡང་དེ་ཚོ་འགྲོ་གི་མ་རེད། དེའི་ཕྱིར། ཉི་མ་གཅིག ང་ཚོ་སྟབས་མ་ལེགས་པར་དོན་རྐྱེན་གསར་པ་ཞིག་ལ་འཕྲད་པ་ཡིན་ན། ང་ཚོས་སྦས་ཡོད་པའི་ཉོན་མོངས་ཅན་གྱི་རྣམ་རྟོག་དེ་ཚོ་ཚང་མ་ཡང་སྐྱར་ལྡང་ཡོང་གི་རེད། དེ་བས་གལ་སྲིད་ང་ཚོ་བཙན་འཛུལ་དང་འཁོན་འཛིན་ཅན་གྱི་གནས་སྟངས་ཤིག་གི་ནང་དུ་ལྷུང་བ་ཡིན་ན། ང་ཚོས་ངེས་པར་དུ་མྱུར་དུ་ཚོར་བ་འདི་རིགས་ཐག་གཅོད་བྱེད་དགོས། གལ་སྲིད་དེ་ནི་བཙན་འཛུལ་ཆུང་བའི་རིགས་ཡིན་ན། ང་ཚོས་དེ་ལ་ཐབས་ལམ་ཆུང་ངུའི་རིགས་བསྟེན་དགོས་པ་དང་། གལ་སྲིད་དེ་ནི་བཙན་འཛུལ་ཆེན་པོ་ཞིག་ཡིན་ན། ང་ཚོས་དེ་ལ་གདོང་ལེན་མཐར་ཕྱིན་པ་ཞིག་བྱས་ཏེ་ང་ཚོ་དེ་ལས་ཐར་པ་ཞིག་བྱེད་དགོས།

རྗེ་སྒམ་པོ་པས། དུས་དང་རྣམ་པ་ཀུན་ཏུ་དུས་ཐོག་ཏུ་བསླེབས་པ། ཞེས་གསུངས་པ་བཞིན། ང་ཚོས་དབྱེ་འབྱེད་མེད་པར་བཤད་མི་རུང་། འཁོན་འཛིན་མེད་པ་བཟོ་ཤོག ཡིན་ན་ཡང་ང་ཚོས་ང་ཚོའི་མི་ཚེ་དང་ང་ཚོའི་འཛམ་གླིང་འདིའི་སྦྲེལ་ཐག་ཅིག་ཏུ་གྲུབ་ཡོང་བའི་རྣམ་རྟོག་རེ་རེ་དང་འགོག་རྐྱེན་སྐད་ཅིག་མ་རེ་རེ། ང་ཚོའི་བཙན་འཛུལ་རེ་རེ་བཞིན་ཐག་གཅོད་བྱེད་དགོས།

དེའི་ཕྱིར། ངས་མཁན་པོ་མུན་སེལ་མཇལ་ནས་ཆོས་ཁྲིད་ཏོག་ཙམ་ཉུང་ངུ་རེ་ཐོབ་པའི་རྗེས་སུ། ངས་ཉམས་ལེན་ཕྲན་བུ་ཕྲན་བུ་རེ་བྱེད་མགོ་བརྩམས་པ་ཡིན།

ང་རང་བཙན་འཛུལ་དེར་ཐོགས་ནས་ཡོད་པའི་སྐབས་སུ་དང་། ཡང་ན་འཁོན་འཛིན་གྱི་ཚོར་བ་དྲག་པོ་དེ་ཚོར་ཐོགས་ཡོད་པའི་སྐབས་སུ། ངས་མཐའ་མཇུག་ཏུ་རྒྱ་མིའི་དམག་མི་དང་ཉེན་རྟོག་པས་ང་ལ་རང་ཉིད་ཀྱི་བསམ་ཚུལ་སྟོན་དུ་འཇུག་གི་རེད་བསམས། བཙན་འཛུལ་དང་འཁོན་འཛིན་ངའི་ནང་རོལ་ཏུ་ཡིབ་ནས་སྡོད་པས་ངས་དེ་ལ་ཐག་གཅོད་ཅིག་མ་རྙེད། ད་ལྟ། རྒྱ་མིས་ལས་བྱེད་ཚོས་ང་ལ་ཁོང་ཁྲོ་ཆེན་པོ་སློང་། དོན་དངོས་སུ། ཁོ་ཚོའི་བྱེད་སྤྱོད་དང་སྐད་ཆ་བརྒྱུད་ནས། ཁོ་ཚོས་ངའི་སེམས་སུ་ཅི་ཞིག་སྦས་ཡོད་པ་དེ་སྟོན་ཐབས་བྱེད། ཏག་ཏག་ཁོ་ཚོས་ང་ལ་ངའི་སེམས་ནང་གི་སྒྱིད་ལུག་དེ་རིགས་ཐད་ཀར་ཐག་གཅོད་བྱེད་དུ་བཅུག་བྱུང་ལ། ང་རང་དེ་ཚོ་ལས་ཐར་དུ་བཅུག་བྱུང་།

“གནད་འགག་ནི་ཁྱོད་རང་གི་སེམས་དེ་རེད།” མཁན་པོ་མུན་སེལ་གྱིས་འདི་ལྟར་ཡང་ནས་ཡང་དུ་གསུངས་བྱུང་། “བཙོན་ཁང་ནང་དུ། འཁོར་བའི་ནང་དུ། ཁྱོད་ཀྱིས་ཚིག་སྙན་པོ་དང་མི་སྙན་པ་མང་པོ་ཞིག་ཐོས་ཀྱི་རེད། རྒྱ་མི་དེ་ཚོ་སྙོན་འཛུག་བྱེད་རྒྱུར་དགའ་བོ་ཡོད་པ་རེད། བཙོན་ཁང་འདི་ཡག་པོ་འདུག་དང་སྡུག་ཅག་འདུག་ཇི་ལྟར་བརྗོད་ན་ཡང་དེ་ཚོ་ནི་ཚིག་ཙམ་ཞིག་རེད། ལས་བྱེད་དེ་ཚོས་ཁྱོད་ལ་གཤེ་ཞིང་སྨོད་པ་འམ་ཚིག་རྩུབ་དང་བཅས་རྡུང་འཚོག་བྱེད་ཀྱང་རུང་། ཁོ་ཚོས་ཁྱོད་ལ་ཡག་པོ་དང་སྡུག་པོ་ཇི་འདྲ་ཞིག་སྨྲས་ཀྱང་རུང་། དེ་ཚོར་དོ་སྣང་དེ་ཙམ་མ་བྱེད། ཁྱོད་ཀྱིས་གང་ཞིག་ཐོས་ཀྱང་བཏང་སྙོམས་སུ་ཞོགས། སེམས་ཡོངས་སུ་ལྷོད་ལ་བབས་ནས་ཁྱོད་རང་གི་ལས་ཀར་དམིགས་པ་རྩེ་གཅིག་ཏུ་གཏོད། ཉོན་མོངས་པ་དེ་ཚོ་ལྡང་ཡོང་བ་ལ་དམིགས་པ་གཏོད། ཁྱོད་རང་གི་སེམས་ནང་དེ་ཚོ་ལྡང་ཡོང་བའི་སྐད་ཅིག་མ་དེ་ཚོར་དམིགས་པ་གཏོད།”

ངས་ག་ལེར་ངའི་གྲངས་མེད་པའི་བསམ་ཚུལ་དང་ཉོན་མོངས་པའི་རྣམ་རྟོག དེ་བཞིན་རྣམ་རྟོག་གི་མྱོང་བ་བཅས་སྐད་ཅིག་མ་ཞིག་ཡིན་པའི་ངེས་ཤེས་རྙེད་བྱུང་། དེ་ཚོ་ནི་བསམ་ཚུལ་ཙམ་ཞིག་ལས་གང་ཡང་མ་རེད། བསམ་ཚུལ་དེ་ཚོ་ནི་བར་ཆད་ཅིག་ལས་གཞན་གང་ཡང་མ་རེད། བོད་སྐད་ཀྱི་ནང་དུ་བར་ཆད་ནི་ཉམས་ལེན་ལ་བར་དུ་གཅོད་བྱེད་ཅིག་གོ དེར་བརྟེན། དཔེ་བཞག་ན། ང་ཚོས་བྱམས་པ་དང་སྙིང་རྗེ་གོང་འཕེལ་དུ་གཏོང་སྐབས། ཁོང་ཁྲོ་ནི་རང་བཞིན་གྱིས་བར་ཆད་ཅིག་རེད། སྙིང་རྗེ་རྒྱུན་མཐུད་རྒྱུར་བར་དུ་གཅོད་པ་རེད།

དེ་ནི་ངའི་བཀའ་དྲིན་ཅན་གྱི་བརྩེ་བའི་བླ་མ་མཁན་པོ་མུན་སེལ་གྱི་ཤེས་རབ་ཀྱི་ལམ་སྟོན་བརྒྱུད་ནས། ངས་ག་ལེར་ཆེས་མཐའ་མཇུག་ཏུ་རྒྱ་མིའི་ལས་བྱེད་པ་དེ་ཚོས་ང་ལ་བཟོད་སྒོམ་དང་བཏང་སྙོམས་ཀྱི་ཉམས་ལེན་བྱེད་པར་ཕན་ཐོགས་ཧ་ཅང་ཆེན་པོ་ཞིག་བྱུང་འདུག་པ་དེ་རྟོགས་བྱུང་།

དེ་བཞིན་ངའི་དགྲ་བོ་དེ་ཚོ་ནི་ངས་རང་གི་སེམས་ཉིད་རྟོགས་པར་རོགས་རམ་བྱེད་མཁན་དེ་ཡང་རེད་འདུག

འདས་པའི་དུས་སུ། ངས་རྒྱ་མི་དམར་པོ་དེ་ཚོ་ཇི་ལྟར་བོད་ལ་ཡོང་ནས་ཉེས་མེད་མི་མང་དེ་ཚོ་དམར་གསོད་བྱས་པའི་སྐོར་ལ་བསམ་བློ་གཏོང་དུས་ང་ལ་ཁོང་ཁྲོ་ཆེན་པོ་ཞིག་སྐྱེས་མྱོང་། ངས་ང་ལ་རྒོལ་རྡུང་གཏོང་མཁན་རྒྱ་མིའི་དམག་མི་དེའི་མགོ་རུ་མེ་མདའ་བཙུགས་ནས་གཞུ་དུས་དེ་ནི་འཇིགས་སུ་རུང་བ་ཞིག་ཏུ་གྱུར། ཡིད་ཆེས་མིན་གང་ལྟར་ཡང་ངའི་ཚོར་སྣང་ནི་དེ་ལྟར་རེད། ང་རང་མཁན་པོ་མུན་སེལ་རིན་པོ་ཆེ་ལ་དད་གུས་ཤུགས་དྲག་ཅིག་སྐྱེས་པ་དེ་བཞིན་དུ། ངས་རང་གི་ཁོང་ཁྲོའི་སྟེང་དུ་སྒོམ་སྒྲུབ་བྱས་ནས་བསམ་བློ་གཏོར་བརླག་མཁན་དེ་ཚོ་ཇི་ལྟར་སྐྱེ་ལུགས་ལ་བལྟས་པ་ཡིན། ངས་དེ་ལྟར་བྱས་དུས། དེའི་ངར་ཤུགས་མེད་པར་འགྱུར་གྱི་འདུག ངས་ཁོང་ཁྲོའི་བསམ་བློ་དེ་ནི་འཆར་སྒོ་ཙམ་ཞིག་ཡིན་པར་ངོས་འཛིན་བྱས་ཏེ་ཐ་ན་དེའི་རྗེས་ཤུལ་ཙམ་ཡང་བསྐྱུར་མེད། དེ་ནི་སློབ་དཔོན་ཚོས་གསུངས་པའི་རྐུན་མ་ཞིག་ཁང་པ་སྟོང་པའི་ནང་དུ་འཛུལ་བའི་དཔེ་དེ་དང་གཅིག་པ་རེད་འདུག

ཁང་པ་དེའི་ནང་དུ་བརླག་རྒྱུའི་དངོས་པོ་ཅི་ཡང་མེད་པ་དང་། རྐུན་པོ་དེར་འཐོབ་རྒྱུ་ཅི་ཡང་མེད། ཉོན་མོངས་པ་དེ་ཚོ་སྐྱེ་དུས། ང་ཚོས་དེ་ཚོ་ངོས་ཟིན་པ་དང་འབྲེལ་ཁོ་ཚོའི་བཀོད་འདོམ་ལ་ཉན་མི་དགོས། དེ་ཚོས་ང་ཚོའི་ས་ནས་ཅི་ཡང་འཁྱེར་མི་ཐུབ་ལ་ང་ཚོར་གནོད་ཅི་ཡང་སྐྱེལ་མི་ཐུབ།

ངའི་སྒོམ་བྱུང་གི་ཤེས་རབ་དེ་ནི་ངས་རང་གི་བླ་མར་དད་གུས་ཆེན་པོ་བྱས་པ་ལས་བྱུང་བ་ཞིག་རེད། དེ་ནི་དོན་དངོས་སུ་མཁན་པོ་མུན་སེལ་གྱིས་ང་ལ་དམིགས་བསལ་འགྲེལ་བརྗོད་གནང་བ་ལས་བྱུང་བ་ཞིག་རེད། ངས་མཁན་པོ་མུན་སེལ་གྱི་བྱམས་བརྩེ་དང་སྐུ་ཡོན་དེ་ཚོར་བསམ་བློ་གཏོང་དུས། ནུས་སྟོབས་ཆེ་བའི་ཚོར་བ་ཞིག་རང་བྱུང་གིས་ངའི་སྙིང་དབུས་སུ་སྐྱེ་གི་འདུག་ལ། ཚོར་བ་དེ་ནི་ངའི་སྙིང་དབུས་སུ་འཕྱུར་ཡོང་གིན་འདུག དེར་བརྟེན། དེར་བརྟེན་ངས་སྒོམ་སྒྲུབ་ལ་བརྟེན་ནས་གནད་དོན་དཀའ་ངལ་ཅན་མང་པོར་དག་སེལ་བྱས་ཏེ་རང་ཉིད་དོགས་གནད་བསལ་བ་ཡིན། དེ་བཞིན་ངས་རང་ཉིད་ཀྱི་རྩ་བའི་བླ་མ་གཞན་པ་དཔེར་ན་མགར་འཆི་མེད་རྡོ་རྗེས་གསུངས་པ་དེ་ཚོ་ཡང་ཡང་དྲན་གསོ་བྱས་པ་ཡིན།

རྒྱལ་སྲས་ལག་ལེན་སོ་བདུན་མའི་ནང་གི་ཤོ་ལོ་ཀ་སོ་དྲུག་པའི་ནང་དུ་ཤོ་ལོ་ཀ་གཞན་པ་ཚང་མ་འདུས་ཡོད་པ་སྟེ། ཤོ་ལོ་ཀ་དེའི་ནང་དུ།

མདོར་ན་གང་དུ་སྤྱོད་ལམ་ཅི་བྱེད་ཀྱང། །

རང་གི་སེམས་ཀྱི་གནས་སྐབས་ཅི་འདྲ་ཞེས། །

རྒྱུན་དུ་དྲན་དང་ཤེས་བཞིན་ལྡན་པ་ཡིས། །

གཞན་དོན་སྒྲུབ་པ་རྒྱལ་སྲས་ལག་ལེན་ཡིན། །

ཁྱོད་ཀྱིས་ངེས་པར་དུ་དྲན་ཤེས་དང་རིག་པར་བསྟེན་ནས་བྱམས་པ་དང་བརྩེ་བའི་ཉམས་ལེན་བརྗེད་མི་ཉན་པ་དང་། དྲན་ཤེས་ནི་ཉི་མ་ལྟ་བུ་དང་བྱམས་བརྩེ་ནི་ཟླ་བ་ལྟ་བུ་ཞིག་ཡིན། ཉི་མས་སྟོང་པ་ཉིད་མཚོན་པ་དང་ཟླ་བས་བྱམས་བརྩེ་མཚོན། གལ་སྲིད་ཁྱོད་ཀྱིས་དྲན་ཤེས་བསྟེན་པ་ཡིན་ན། དེ་ནས་ཁྱོད་རང་ལ་བསམ་བློ་ག་འདྲ་ཞིག་སྐྱེས་པ་ཡིན་ཡང་དེ་ངོས་འཛིན་ཐུབ་པ་དང་། ཁྱོད་རང་སྦྱོང་བརྡར་འདི་ལ་བརྩོན་འགྲུས་རྩོམ་དགོས། གལ་སྲིད་ཁྱོད་ཀྱིས་དེ་ཚོ་སྐྱེས་པའི་སྐད་ཅིག་མ་དེ་ངོས་འཛིན་ཐུབ་པ་ཡིན་ན། དེ་ནས་འཁྲུལ་སྣང་དེ་ཚོ་ཤེས་རབ་ཀྱི་ཀློང་དུ་འཐིམ་ངེས་རེད། དཔེར་ན་ཤིང་དེ་ཚོ་མེ་རུ་གྱུར་པ་བཞིན།

ཉི་མ་དང་ཉི་མ་སྦྲེལ་ཏེ་ངའི་ཁོང་ཁྲོ་དང་ཇེ་ཆུང་ནས་ཇེ་ཆུང་དུ་གྱུར།

མཁན་པོ་མུན་སེལ་གྱིས་ནམ་རྒྱུན་ང་ལ། “ཁྱོད་ཀྱིས་རྒྱུན་དུ་གཏོང་ལེན་ཉམས་ལེན་བྱེད་དགོས།” ཞེས་གསུངས། ངས་སྔོན་ཆད་བདག་གཞན་བརྗེ་བའི་གཏོང་ལེན་གྱི་ཉམས་ལེན་སྐོར་སྦྱངས་མྱོང་། དབུགས་ནང་དུ་རྔུབ་དུས་གཞན་གྱི་སྡུག་བསྔལ་རང་སྟེང་དུ་ལེན་པ་དང་། དབུགས་ཕྱིར་འབྱིན་དུས་རང་གི་ཞི་བ་དང་བདེ་སྐྱིད་གཞན་ལ་གཏོང་བའི་དམིགས་པ་བྱེད་དགོས།”

“གང་ལྟར།” ངས་རང་གིས་རང་ལ། “ངས་རང་ཉིད་ཆེས་དཀའ་ཁག་ཅན་གྱི་བཙོན་ཁང་དུ་ཚུད་པའི་སྐབས་འདིར་ཞི་བ་དང་བདེ་སྐྱིད་ཅི་ཞིག་སེམས་ཅན་གཞན་ལ་གཏོང་དགོས་སམ།” ཞེས་དྲིས་པ་ཡིན།

དེ་ནི་མཁན་པོ་མུན་སེལ་གྱི་རྩ་ཆེ་བའི་ལམ་སྟོན་གྱིས་ངས་གཏོང་ལེན་གྱི་གོ་དོན་ངོ་མ་དེ་རྟོགས་པ་ཞིག་ཀྱང་ཡིན། མཁན་པོ་མུན་སེལ་གྱི་དམིགས་བསལ་བློ་སྦྱོང་ལམ་སྟོན་དེ་ཡིས་ང་ལ་ཕན་ཐོགས་གཏིང་ཟབ་ཅིག་བྱུང་། དེ་ཚོ་ནི་ཕྱག་དཔེའི་ཁྲོད་དུ་བྲིས་ཡོད་པ་ཞིག་མ་རེད་ལ། དེ་ནི་ངས་ཐོས་པའི་གཏོང་ལེན་གྱི་ལམ་སྟོན་གཞན་དག་དང་མི་འདྲ་བ་ཞིག་རེད།

སྒོམ་སྒྲུབ་ལས་གཞན་པའི་ལུས་ཕུང་དང་སྐད་ཆ་ལ་བརྟེན་ནས་སྦྱིན་པ་གཏོང་བ་ཞིག་སྟེ། དཔེར་ན་མི་སྡུག་བསྔལ་ཅན་ལ་རོགས་རམ་བྱེད་པ་ལྟ་བུ། མཁན་པོ་མུན་སེལ་གྱིས་ང་ལ་ནང་གི་གཏོང་ལེན་ཏེ། ཉོན་མོངས་པ་ལམ་དུ་འཁྱེར་ཚུལ་ཀྱང་བསླབས་གནང་བྱུང་།

ཁོང་གིས་ང་ལ་ལྟ་བ་འདི་དང་ཉམས་ལེན་འདི་ནི་རྫོགས་ཆེན་གྱི་ཉམས་ལེན་དང་འབྲེལ་བ་ཡོད་པ་ཞིག་རེད་ཅེས་གསུངས། ངས་རང་གི་ཚད་མེད་པའི་སྙིང་རྗེ་དེ་ང་ལ་དགའ་བ་དང་མི་དགའ་བའི་འགྲོ་བ་ཀུན་ལ་བཀྲམ་དགོས་པ་ཞིག་ཡིན་པ་རྟོགས་བྱུང་། དེ་ནི་དེ་ཚོའི་སྡུག་བསྔལ་དེ་ཚོ་རང་ཉིད་ཀྱི་སྡུག་བསྔལ་ཅི་བཞིན་ཉམས་སུ་མྱོང་དགོས་པ་དང་། སྙིང་རྗེ་ལ་བརྟེན་ནས་དེ་ཚོའི་སྡུག་བསྔལ་དེ་དག་ལེན་པ་ཞིག་ཡིན། དེ་ནས་དེ་ཚོའི་སྡུག་བསྔལ་དེ་དག་རང་བཞིན་གྱིས་ངའི་སྟེང་དུ་ཡོང་བ་དང་། དེ་ནི་ངས་རང་གི་བྱམས་བརྩེ་དེ་འགྲོ་བ་ཀུན་ལ་མཁོ་སྤྲོད་བྱེད་པ་ཞིག་རེད། ཕྱི་ཡི་གཏོང་ལེན་དེ་ནི་ནང་གི་གཏོང་ལེན་ལེགས་འགྲུབ་འབྱུང་མིན་ལ་རག་ལས་ཡོད།

“གལ་སྲིད་ཁྱོད་ཀྱིས་དེ་ཡང་དག་པ་ཞིག་རྟོགས་པ་ཡིན་ན། གཏོང་ལེན་གྱི་གོ་དོན་ངོ་མ་དེ་ནི་རང་དང་གཞན་ཞེས་གཉིས་སུ་དབྱེ་རྒྱུ་མེད་པ་ཞིག་ལ་ཟེར་བ་ཡིན། དོན་དམ་པར་རང་དང་གཞན་ཞེས་པ་ཞིག་ཁ་ཁར་མེད། ཁྱོད་ལ་བརྩེ་བ་ཡོད་དུས་དེ་རང་བཞིན་གྱིས་འགྲོ་བ་ཀུན་ལ་ཁྱབ་འགྲོ་གི་ཡོད། ནམ་ཞིག་ཁྱོད་ཀྱིས་རང་གི་ཉོན་མོངས་པ་དེ་ཚོ་ངོས་ཟིན་པ་དང་སྤོང་ཐུབ་དུས། ཁྱོད་ཀྱིས་སེམས་ཅན་གཞན་དག་གི་ཉོན་མོངས་དེ་ཚོ་སྤོང་བར་ཡང་རོགས་རམ་བྱེད་ཐུབ། ནམ་ཞིག་སྡུག་བསྔལ་དེ་ཚོ་མངོན་དུ་གྱུར་དུས། ཁྱོད་ཀྱིས་སེམས་ཅན་ཐམས་ཅད་ཀྱི་སྡུག་བསྔལ་དེ་ཚོ་ལེན་པའི་དམིགས་པ་སྐྱོངས། ཁྱོད་རང་དེ་ཚོའི་ཚབ་མཚོན་དུ་གྱུར་པ་དང་འབྲེལ་དེའི་སྟེང་དུ་དམིགས་རྣམ་སྐྱོངས། ཉིན་ཞིག ཁྱོད་ཀྱིས་རང་ཉིད་དང་གཞན་པའི་བར་དུ་ཁྱད་པར་མེད་པ་དང་། སྡུག་བསྔལ་དང་བདེ་སྐྱིད་གཉིས་ཀྱི་བར་དུ་ཡང་ཁྱད་པར་མེད་པའི་ངེས་ཤེས་ཤིག་རྙེད་ཐུབ་ཀྱི་རེད། དེ་ཡང་གསལ་བོར་བཤད་ན་གསང་བའི་གཏོང་ལེན་རེད།”

བཙོན་ཁང་ནང་མཁན་པོ་མུན་སེལ་རིན་པོ་ཆེར་མཇལ་བ། དང་པོ།

བཙོན་ཁང་དུ་མཁན་པོ་མུན་སེལ་རིན་པོ་ཆེར་མཇལ་བ། གཉིས་པ།