༧གོང་ས་མཆོག་གིས་ཆོས་དཔོན་ཊུ་ཊུ་ཡི་འཁྲུངས་སྐར་ལ་འཚམས་འདྲི་མཛད།

༧གོང་ས་མཆོག་བརྙན་ལམ་ནས་ཡེ་ཤུའི་ཆོས་དཔོན་ཌེ་སི་ཊུ་ཊུ་མཆོག་གི་དགུང་གྲངས་དགུ་བཅུའི་འཁྲུངས་སྐར་ལ་འཚམས་འདྲི་དང་ཐུགས་སྨོན་མཛད་གནང་།ཁ་སང་༧གོང་ས་རྒྱལ་བ་རིན་པོ་ཆེ་མཆོག་གིས་ལྷོ་ཨ་ཧྥེ་རི་ཁའི་ཆོས་དཔོན་ཆེན་མོ་ཌེ་སི་ཊུ་ཊུ་མཆོག་དགུང་གྲངས་ ༩༠ ཕེབས་པའི་འཁྲུངས་སྐར་ལ་བརྙན་ལམ་ནས་འཚམས་འདྲི་ཞུས་ཏེ། འཛམ་གླིང་ཞི་བདེ་དང་སྤྱི་ཚོགས་ཀྱི་ཕན་བདེའི་སླད། མུ་མཐུད་དུ་སྐུ་ཚེ་ཡུན་རིང་བརྟན་པའི་སྨོན་འདུན་སྩལ་གནང་མཛད་ཡོད་པ་རེད།

འཚམས་འདྲིའི་བརྙན་ལམ་དུ་༧གོང་ས་མཆོག་གིས། ངོས་ཀྱི་སྙིང་ནས་བརྩེ་ཞིང་བཀུར་འོས་པའི་ཆོས་ཕྱོགས་ཀྱི་གཅེན་པོ་ཆོས་དཔོན་ཌེ་སི་མོན་ཊུ་ཊུ་མཆོག  ངོས་ནས་སྐུ་ཉིད་ལ་གུས་བཀུར་དང་ཡི་རངས་བྱེད་ཀྱི་ཡོད།  དེར་བརྟེན། དེ་རིང་ཁྱེད་ཉིད་དགུང་ལོ་ ༩༠ ཕེབས་པའི་འཁྲུངས་སྐར་ལ་འཚམས་འདྲི་ཞུ་འདོད་བྱུང་། ད་ལྟ་ང་ཚོ་ཆོས་ཕྱོགས་མི་དག་ཆོས་དཔོན་ཊུ་ཊུ་མཆོག་ལྟ་བུའི་ཞི་བདེ་དང་བག་ཕེབས་ཀྱི་ངང་བཞུགས་མཁན་གྱི་རྗེས་སུ་འབྲང་དགོས་པ་རེད། མཚམས་རེར་ངེད་གཉིས་ནས་ཕན་ཚུན་ལ་ཆོབ་ལངས་ཏེ། ཆོས་དཔོན་ཊུ་ཊུ་མཆོག་གིས་འཇིག་རྟེན་བཀོད་པ་པོར་ཡིད་ཆེས་བྱེད་ཀྱི་ཡོད་པ་དང་། ངོས་ནས་འཇིག་རྟེན་བཀོད་པ་པོ་མི་འདོད་པར་ལས་རྒྱུ་འབྲས་ལ་ཡིད་ཆེས་བྱེད་ཀྱིན་ཡོད་པས། མཚམས་རེར་ཁོང་གིས་རང་ཉིད་ལྷ་ཡུལ་ལ་ཕེབས་རྒྱུའི་གྲ་སྒྲིག་ཡོད་པ་དང་། ངོས་རང་འཇིག་རྟེན་གཞན་ཞིག་ཏུ་འགྲོ་སྲིད། ཅེས་སྐུ་མཚར་དང་སྦྲགས་ནས་སྐུ་རྩེད་ཞུས་མྱོང་། ངེད་གཉིས་ཀྱིས་ནུས་པ་གང་ཡོད་ཀྱིས་ནང་སེམས་ཀྱི་ཞི་བདེ་སྐྲུན་ཐབས་བགྱིས་ཏེ། འཛམ་གླིང་ཞི་བདེ་ཡོང་ཐབས་ལ་འབད་མུས་ཡིན། དེར་བརྟེན་དེ་རིང་གི་དམིགས་བསལ་གྱི་ཉིན་འདིར་ངོས་ནས་ཁྱེད་ཀྱི་འཁྲུངས་སྐར་ལ་འཚམས་འདྲི་དང་སྨོན་འདུན་ཡང་ཞུ།  ཞེས་གསུངས།

ཡང་མགོན་པོ་གང་ཉིད་མཆོག་གིས། བཀུར་འོས་ངོས་ཀྱི་ཆོས་གྲོགས་རྒན་པ་ལགས། ཁྱེད་ཀྱིས་འཛམ་གླིང་ནང་ཕྱག་སྟོན་ལེགས་པོ་ཞིག་གནང་དགོས་སྟབས། མུ་མཐུད་དུ་སྐུ་ཚེ་ཡུན་རིང་བཞུགས་རོགས་གྱིས། བྱམས་དང་སྙིད་རྗེ་ཡི་ཐོག་ནས་བཤད་ན། ང་ཚོ་ཨ་མའི་མངལ་དུ་ཡོད་དུས་དང་། མ་ཡི་མངལ་ནས་བཙས་ཟིན་རྗེས་ཀྱང་། མ་ཡི་བྱམས་སེམས་དང་བརྩེ་འདང་ནི་ང་ཚོ་འཚོ་ཐུབ་པ་དང་མི་ཚེ་བདེ་སྐྱིད་དང་ལྡན་པ་ཞིག་སྐྱེལ་ཐུབ་པའི་ཆ་རྐྱེན་གཙོ་བོ་དེ་ཡིན། ང་ཚོའི་མི་ཚེ་ནི་མ་ཡི་བརྩེ་འདང་གི་ཐུ་འོག་དེ་ནས་མགོ་བརྕམས་པ་ཞིག་ཡིན་སྟབས། ང་ཚོས་མི་ཚེ་གང་བོར་སྙིང་རྗེའི་བསམ་བློ་དང་སེམས་པ་བཟང་པོ་བྱ་དགོས། དེང་གི་ཆར་ཚན་རིག་པ་ཚོས་ཀྱང་བྱམས་དང་སྙིང་རྗེ་ལྡན་པའི་མིའི་རིགས་ཀྱི་འཕྲོད་བསྟེན་ལེགས་པ་ཡོད་སྐོར་བརྗོད་ཀྱི་ཡོད་པ་རེད། གལ་ཏེ་བྱམས་དང་བརྩེ་བས་ཕྱུག་པ་ཞིག་ཡིན་ཚེ། ངོ་རུ་འཛུམ་གྱིས་ཁེངས་ཡོང་བ་ནི་ཆོས་ཉིད་ཅིག་ཡིན། དེ་ལས་ལྡོག་ནས་སེམས་སུ་ཁེངས་དྲེགས་དང་སྡང་སེམས་ཀྱི་ཁེངས་ཚེ། ངོ་ཡི་འཛུམ་དེ་བཅོས་མ་ཞིག་ཏུ་གྱུར་འགྲོ་བ་རེད། བྱམས་དང་སྙིང་རྗེའི་ཉམས་ལེན་གྱིས་ང་ཚོའི་སྐྱེ་བ་ཕྱི་མ་དང་ལྷའི་གོ་འཕང་སོགས་ཐོབ་ཀྱི་རེད་ཟེར་གྱི་མེད། འོན་ཀྱང་། ང་ཚོའི་རྒྱུན་ལྡན་གྱི་འཚོ་བའི་ཁྲོད་དུ་བྱམས་དང་སྙིང་རྗེའི་བསམ་བློ་ཞིག་དགོས་གལ་ཆེན་ཞིང་ཕན་ཐོགས་ཆེན་པོ་ཡོད། ཅེས་གསུངས།

གཞན་ཡང་སྲིད་སྐྱོང་སྤེན་པོ་ཚེ་རིང་མཆོག་གི་སྐུ་སྒེར་གྱི་ཊུ་ཝེ་ཊར་ཏུ། ༧གོང་ས་སྐྱབས་མགོན་པོ་ཆེན་པོ་མཆོག་དང་ཆོས་དཔོན་ཊུ་ཊུ་གཉིས་བར་གྲོགས་པོའི་འབྲེལ་ལམ་བཟང་པོ་ཡོད་པ་དངོས་སུ་མཐོང་ཐུབ་པས། དེ་ནི་ཆེས་དགའ་འོས་པ་ཞིག་དང་འགྲོ་བ་མི་བཟང་པོ་བྱེད་བར་བློ་སྐྱེད་གནང་གི་ཡོད་པ་རེད། སྐུ་ཉིད་ཡུན་རིང་བརྟན་པ་དང་། འགྲོ་བ་མིའི་རིགས་ཀྱིས་སྐུ་ཉིད་ཀྱི་ཐུགས་དགོངས་རྟོགས་པའི་སྨོན་འདུན་ཞུ་ཞེས་བྲིས་ཏེ། ཁོང་གི་འཁྲུངས་སྐར་ལ་འཚམས་འདྲི་ཞུ་ཡོད་པ་རེད།

དཔལ་ལྡན།