ཨོ་གླིང་ནང་རྒྱ་གཞུང་ལ་ཁ་གཏད་གཅོག་མཁན་གྱི་ཆབ་སྲིད་ཚོགས་པ་ཞིག་གསར་འཛུགས་གནང་།

ཨོ་གླིང་ནང་རྒྱ་གཞུང་ལ་ཁ་གཏད་གཅོག་ཐབས་ཀྱི་ཆབ་སྲིད་ཚོགས་པ་ཞིག་གསར་འཛུགས་གནང་བ་དང་བསྟུན། སྤྱི་ཟུར་གདོང་འདུས་སྐྱིད་འཛོམས་ལགས་ཀྱི་གཙོས་ཡུ་གུར་དང་ཧོང་ཀོང་བ་སོགས་རྒྱ་གཞུང་ལ་ཁ་གཏད་གཅོག་མཁན་གྱི་མི་རབས་གསར་བ་ཁག་ཅིག་ཨོ་གླིང་གྲོས་ཚོགས་འཐུས་མིར་ལངས་ཀྱི་ཡོད་འདུག

དེ་རིང་སྔ་དྲོ་ས་གནས་ཀྱི་ཆུ་ཚོད་ ༡༠།༣༠ སྟེང་། ཨོ་གླིང་གྲོང་ཁྱེར་སུ་ནེའི་ནང་བོད་མི་དང་ཧོང་ཀོང། ཡུ་གུར་དང་ཨོ་གླིང་བ་བཅས་ལས་གྲུབ་པའི་མང་གཙོའི་མཐུན་གྲོགས་ཚོགས་པ་ཞེས་རྒྱ་ནག་གཞུང་ལ་ཁ་གཏད་གཅོག་མཁན་གྱི་སྲིད་དོན་ཚོགས་པ་གསར་བ་ཞིག་དབུ་འཛུགས་གནང་བ་དང་སྦྲགས། རང་རེའི་སྐབས་བཅུ་དྲུག་པའི་བོད་མི་མང་སྤྱི་ཟུར་གདོང་འདུས་སྐྱིད་འཛོམས་ལགས་ཨོ་གླིང་གི་ (New South Wales) མངའ་སྡེ་ནས་གྲོས་ཚོགས་འོག་མའི་འོས་མིར་ལངས་ཀྱི་ཡོད་པ་ཡོངས་བསྒྲགས་གནང་འདུག

དེ་རིང་ཨོ་གླིང་ནང་རྒྱ་ནག་གཞུང་ལ་ཁ་གཏད་གཅོག་ཐབས་ཀྱི་མང་གཙོ་མཐུན་གྲོགས་ཆབ་སྲིད་ཚོགས་པ་ཞིག་གསར་འཛུགས་གནང་བ་དང་འབྲེལ། སྤྱི་ཟུར་གདོང་འདུས་སྐྱིད་འཛོམས་ལགས་དང་ལྷན་དུ། ཨོ་གླིང་གི་གྲོས་ཚོགས་འཐུས་མིར་ལངས་མཁན་གསུམ་ཡོད་པ་དག་ནི། ཚོགས་པ་དེ་གསར་འཛུགས་གནང་མཁན་དང་རྒྱ་ནག་གཞུང་གི་གནོན་ཤུགས་འོག་ (university of queensland) གཙུག་ལག་སློབ་གྲྭ་ཆེན་མོ་ནས་ཕྱིར་ཕུད་བཏང་བའི་ཨོ་གླིང་གི་མི་སེར་ཡིན་པའི་གཞོན་སྐྱེས་ཌརོ་པཱ་ལའོ་(Drew Pavlou) ལགས་དང་། ཨོ་གླིང་ནང་ཡུ་གུར་མང་ཚོགས་ཀྱི་ཚབ་མཚོན་ལྟ་བུའི་ལས་འགུལ་བ་གྲགས་ཅན་ཨ་ཌི་ལཱ་ (Adila Yarmuhammad)ལགས་དང་ཡུ་གུར་བ་ཨིན་ཊི་(Inty)ལགས།  དེ་བཞིན། ཧོང་ཀོང་གི་ལས་འགུལ་བ་མེག་སི་(Max Mok)ལགས་བཅས་ཡིན་པ་རེད།

མང་གཙོའི་མཐུན་གྲོགས་ཚོགས་པ་དབུ་འཛུགས་གནང་སྐབས་སྤྱི་ཟུར་གདོང་འདུས་སྐྱིད་འཛོམས་ལགས་ཀྱིས། རང་ཉིད་ཨོ་གླིང་གི་གྲོས་ཚོགས་འཐུས་མིར་ལངས་དགོས་པའི་རྒྱབ་ལྗོངས་སྐོར་ངོ་སྤྲོད་གནང་དོན། ལོ་ངོ་བཅུ་དྲུག་གི་ཡར་སྔོན་དུ་གུས་པ་ཨོ་གླིང་དུ་རྒྱལ་ཁབ་ཤོར་བའི་མི་ཞིག་བྱས་ནས་ཡོང་བ་ཡིན། རྒྱུ་མཚན་ནི་རྒྱ་ནག་གིས་ངའི་ཕ་ཡུལ་བོད་ལ་བཙན་འཛུལ་བྱས་པས་རེད། ཉེ་བའི་ལོ་ངོ་བཅུ་ལྷག་གི་རིང་འགྲོ་བ་མིའི་ཐོབ་ཐང་བརྩོན་ལེན་པ་ཞིག་གི་ལས་ཀ་བྱེད་སྐབས། ངས་ཨོ་གླིང་གཞུང་དང་གྲོས་ཚོགས་གཉིས་ལ་འགྲོ་བ་མིའི་ཐོབ་ཐང་ནི་ཚོང་འབྲེལ་ལས་གལ་ཆེ་བར་ངོས་འཛིན་བྱེད་དགོས་པའི་ཞུ་གཏུགས་བྱས་ཡོད། འདས་པའི་གཞུང་འཛིན་པ་མང་བོས་ང་ཚོའི་སྤྱི་ཚོགས་འདི་དཀའ་རྙོག་ཁྲོད་གཡུགས་ཡོད། འདས་པའི་ལོ་ངོ་ ༢༠ རིང་ཨོ་གླིང་དང་རྒྱ་ནག་གཉིས་ལྷན་དུ། ཇེ་ཕྱུག་ཏུ་སོང་བ་དང་། བཙན་འཛུལ་འོག་གནས་པའི་བོད་དང་ཡུ་གུར་གཉིས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་ཕྱིན་ཡོད་ལ། དེ་མཚུངས་བཞིན་ཚང་མས་མཁྱེན་གསལ་ལྟར་ཧོང་ཀོང་གི་གནས་སྟངས་རེད། ངས་རྒྱ་ནག་གིས་ང་ཚོའི་མང་གཙོ་དང་ས་ཁོངས་བདག་དབང་བཙན་འཕྲོག་བྱེད་བཞིན་པ་མཐོང་བྱུང་བས། ང་གྲོས་ཚོགས་འཐུས་མིར་ལངས་དགོས་དོན་ནི། ཨོ་གླིང་གི་མི་སེར་དཀྱུས་མའི་དག་གི་འབོད་སྒྲ་དང་གཞོན་སྐྱེས་ཚོའི་རེ་འདུན་འགྲུབ་ཐུབ་ཐབས་སུ་ལངས་པ་ཡིན་ལ། ང་གྲོས་ཚོགས་འཐུས་མིར་ལངས་དོན་ནི་ཨོ་གླིང་གི་ཕྱི་ནང་གཉིས་ཀྱི་ཆེ་མཐོང་དང་བརྩི་བཀུར་སྲུང་སྐྱོད་སླད་ཡིན། ཞེས་བརྗོད་ཡོད།

སྤྱི་ཟུར་གདོང་འདུས་སྐྱིད་འཛོམས་ལགས་ནི་ཕྱི་ལོ་ ༡༩༧༨ ལོར་སྐྱེས་ཤིང་། རྒྱ་གར་ནང་སློབ་ཆུང་དང་སློབ་འབྲིང་གི་སློབ་སྦྱོང་བྱས། ཕྱི་ལོ་ ༡༩༩༧ ལོར་དྷ་སྟེང་བོད་ཁྱིམ་ནས་འཛིན་རིམ་བཅུ་གཉིས་པའི་རྩེ་ཕུད་སློབ་མའི་བྱ་དགའ་ཐོབ། ཕྱི་ལོ་ ༢༠༠༡ ལོར་ལྡི་ལི་གཙུག་ལག་སློབ་གྲྭར་དབྱིན་ཇིའི་རྩོམ་རིག་གི་གཙུག་ལག་རབ་འབྱམས་པ་དང་ཕྱི་ལོ་ ༢༠༠༢ ལོར་རྒྱ་གར་རྒྱལ་ཡོངས་གསར་འགོད་རིག་པའི་སློབ་གཉེར་ཁང་ནས་གསར་འགོད་ཆེད་ལས་པའི་སློབ་སྦྱོང་ཞུས། ཕྱི་ལོ་ ༢༠༠༢ ནས་རྒྱ་གར་དུས་བབ་གསར་ཁང་གི་གསར་འགོད་པ་བྱས། ཕྱི་ལོ་ ༢༠༠༥ ལོར་ཨོ་གླིང་ནང་གནས་སྤོ་བྱས་ཏེ་སིཌ་ཎི་བོད་རིགས་མཐུན་ཚོགས་ཀྱི་དབྱིན་ཡིག་དུས་དེབ་འབོད་སྒྲའི་རྩོམ་སྒྲིག་ཚོགས་མི་དང་རྩོམ་སྒྲིག་པ་གནང་། ཕྱི་ལོ་ ༢༠༡༠ ནས་ ༢༠༢༠ བར་བོད་དོན་ལྷན་ཁང་ (Australia Tibet Council) གི་ལས་འགུལ་འགན་འཛིན་བྱས། ཕྱི་ལོ་ ༢༠༢༠ ནས་རྒྱལ་སྤྱིའི་ཉེས་ཡངས་ཚོགས་པའི་ནང་ཞུགས་ཏེ། ད་ལྟའང་བོད་དོན་གཙོས་འགྲོ་བ་མིའི་ཐོབ་ཐང་དང་འབྲེལ་བའི་ལས་དོན་གཉེར་མུས་ཡིན་པ་རེད།

གསར་འགོད་པ། སྐལ་བཟང་སྦྱིན་པ།