རྒྱ་ནག་གཞུང་གིས་རྫ་ཆུ་ཁ་བ་རོང་དགོན་ནས་ཡིན་པའི་གྲྭ་བསྟན་འཛིན་དར་རྒྱས་ལགས་དང་། ཁོང་གི་རོགས་པ་དགེ་འདུན་པ་ཞིག་སེར་ཤུལ་རྫོང་དུ་འཛིན་བཟུང་བཀག་ཉར་བྱས་ཏེ་ལོ་གཅིག་དང་ཟླ་གསུམ་ཡས་མས་འགྲོ་བཞིན་ཡོད་འདུག
འདས་ལོའི་ཕྱི་ཟླ་ ༩ ནང་རྒྱ་ནག་གཞུང་གི་ཉེན་རྟོག་པས་སི་ཁྲོན་ཞིང་ཆེན་དཀར་མཛེས་ཁུལ་རྫ་ཆུ་ཁ་བ་རོང་དགོན་ནས་ཡིན་པའི་དགེ་འདུན་པ་བསྟན་འཛིན་དར་རྒྱས་ལགས་ཀྱི་ཁ་པར་སྔོག་གཤེར་བྱས་ཏེ། ༧གོང་ས་མཆོག་གི་སྐུ་པར་ཉར་ཚགས་བྱས་ཡོད་པ་དང་། ཕྱི་རྒྱལ་དུ་ཡོད་པའི་བོད་མི་ལ་འབྲེལ་འདྲིས་དང་ཕྱི་ཕྱོགས་ཀྱི་གནས་ཚུལ་ཉར་ཚགས་བྱས་ཡོད་པའི་ཉེས་མིང་འོག་འཛིན་བཟུང་བྱས་ཡོད་པ་དང་། སྐབས་དེར་ཁོང་གི་རོགས་པ་དགེ་འདུན་པ་གཞན་ཞིག་ཀྱང་འཛིན་བཟུང་བྱས་ནས་ཁོང་གཉིས་སེར་ཤུལ་རྫོང་གི་བཀག་ཉར་ཁང་དུ་བཅུག་ཡོད་འདུག
འདི་གའི་གསར་འགོད་པར་རྒྱ་གར་ནང་གནས་སྡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་གྲྭ་བསྟན་འཛིན་དར་རྒྱས་ལགས་དང་ལྷན་དུ་དགེ་འདུན་པ་གཞན་ཞིག་འཛིན་བཟུང་བྱས་ཡོད་ཀྱང་། དགེ་འདུན་པ་དེའི་མིང་སོགས་གསལ་ཁ་གང་ཡང་མེད་པ་དང་། ཁོང་གཉིས་ད་ལྟ་སེར་ཤུལ་རྫོང་དུ་བཀག་ཉར་བྱེད་མུས་ཡིན་ཡང་། ད་ལོར་རྒྱ་ནག་གཞུང་གིས་བོད་ཁུལ་དུ་དམ་དྲག་ཤུགས་ཆེན་བྱེད་བཞིན་ཡོད་པ་དང་། ལྷག་པར་དུ་རྫ་དབོན་པོ་སོགས་སུ་ཁ་པར་སྔོག་བཤེར་དང་ཕྱི་ཕྱོགས་ཀྱི་བོད་མི་རྣམས་ལ་འབྲེལ་འདྲིས་བྱེད་པར་དམ་དྲག་ཧ་ཅང་ཆེན་པོ་བྱས་ཏེ། བོད་ནང་གི་བོད་མི་རྣམས་ཀྱི་འགྲོ་འདུག་སྤྱོད་གསུམ་ལ་ལྟ་རྟོག་ནན་མོ་བྱེད་མུས་ཡིན་སྟབས། ཁོང་གཉིས་ཀྱི་གནས་སྟངས་དང་ཀློད་གྲོལ་གཏོང་བའི་རེ་བ་ཡོད་མེད་སོགས་གསལ་ཁ་གང་ཡང་མེད་སྐོར་བརྗོད་བྱུང་།
འདི་ལོའི་ཕྱི་ཟླ་ ༨ ཚེས་ ༢༢ ནས་ཕྱི་ཟླ་ ༩ ཚེས་ ༣ ཙམ་གྱི་བར་གྱི་བདུན་ཕྲག་གཉིས་ཙམ་གྱི་ནང་རྒྱ་ནག་གཞུང་གིས་སྔ་གཞུག་ཏུ་རྫ་དབོན་པོ་དགོན་དང་སྡེ་བའི་ཁྱིམ་ཚང་རེ་རེ་དང་མི་སྒེར་གྱི་ཁ་པར་བཅས་ཀྱི་ནང་སྔོག་བཤེར་ནན་པོ་བྱས་པ་བརྒྱུད། ༧གོང་ས་རྒྱལ་བ་རིན་པོ་ཆེའི་སྐུ་པར་ཉར་ཚགས་བྱས་པ་དང་། ཕྱི་ལོག་གི་བོད་མི་རྣམས་ལ་འབྲེལ་འདྲིས་བྱས་པའི་ཉེས་མིང་འོག་ཉུང་མཐར་ཁྱོན་བོད་མི་སེར་སྐྱ་ ༡༢༠ ཡས་མས་འཛིན་བཟུང་བྱས་ཏེ་སེར་ཤུལ་རྫོང་ཐོག་ཏུ་བཙན་འཁྲིད་བྱས་ཡོད་པ་དང་། ཕྱིས་སུ་སྔ་གཞུག་བྱས་ཏེ་ཚང་མ་ཀློད་གྲོལ་བཏང་ཡོད་པའི་གནས་ཚུལ་ཐོན་ཡོད་ཀྱང་། བོད་མི་དེ་དག་ལ་བཀག་ཉར་ཁང་དུ་འདྲི་རྩད་བཙན་གནོན་བྱས་ཡོད་པ་དང་། ད་ལྟའང་མུ་མཐུད་དུ་ལྟ་རྟོག་བྱེད་མུས་ཡིན་ལ། ཁུལ་དེའི་བོད་མི་ཚོས་སྐད་འཕྲིན་སོགས་སུ་ཚོགས་པ་འཛུགས་མི་ཆོག་པ་དང་། ཕྱི་ཕྱོགས་ཀྱི་བོད་མིར་འབྲེལ་འདྲིས་བྱས་ན་ཁྲིམས་ཆད་ཕོག་རྒྱུ་ཡིན་པའི་བཀའ་རྒྱ་ནན་པོ་བཏང་ཡོད་འདུག
ད་ལྟ་དགུང་ལོ་སུམ་ཅུ་སོ་གྲངས་ཡིན་པའི་གྲྭ་བསྟན་འཛིན་དར་རྒྱས་ལགས་ནི། རྫ་ཆུ་ཁ་སེར་ཤུལ་རྫོང་གི་ཀ་བཞི་བ་རོང་གྲོང་ཚོའི་བ་རོང་དགོན་ནས་ཡིན་ཞིང་། འདས་ལོར་རྒྱ་ནག་གཞུང་གིས་ཉེན་རྟོག་པས་འཛིན་བཟུང་བྱས་རྗེས། ད་ལྟ་ཁོང་ཉིད་སེར་ཤུལ་རྫོང་དུ་ཡོད་པ་ཙམ་ཤེས་རྟོགས་བྱུང་བ་ལས། དེ་མིན་ཁོང་གི་སྐུ་གཟུགས་ཀྱི་གནས་སྟངས་སོགས་གང་ཡང་ཤེས་རྟོགས་ས་བྱུང་མེད་པ་རེད་འདུག
གསར་འགོད་པ། དཔལ་ལྡན།
