ཉེ་བའི་ཟླ་གཅིག་ཙམ་རིང་རྒྱ་ནག་གཞུང་གིས་བྲག་མགོ་ཕྱོགས་ཀྱི་སེར་སྐྱ་མི་མང་བཅུ་ལྷག་འཛིན་བཟུང་གིས་འདྲི་རྩད་དང་རྡུང་རྡེག་གཏོང་བ་སོགས་བྱས་ཏེ་བཀག་ཉར་འོག་བཞག་ཡོད་འདུག
དེ་རིང་འདི་གའི་གསར་འགོད་པར་གནས་ཚུལ་ཁུངས་ལྡན་འབྱོར་བ་ལྟར་ན། ཟླ་འདིའི་ཟླ་མགོ་ཙམ་ལ་ཆབ་མདོ་བྲག་གཡབ་རྫོང་ཁོངས་ཀྱི་བོད་མི་ཨ་བཟང་ལགས་དང་ནོར་མཚོ། རྡོ་ཁྲ་བཅས་གསེར་རྟ་བླ་རུང་སྒར་དུ་ཆོས་མཇལ་ལ་སོང་ནས་ལོག་ཡོང་སྐབས། བྲག་མགོ་རྫོང་ཉེན་རྟོག་པས་བོད་མི་དེ་དག་གིས་ཁ་པར་ནང་དུ་ཆབ་སྲིད་དང་འབྲེལ་བའི་པར་རིས་ཉར་ཚགས་བྱས་ཡོད་ལུགས་བརྗོད་ནས་འཛིན་བཟུང་བྱས་ཏེ། ཆབ་མདོའི་བཙོན་ཁང་ཞིག་ཏུ་བཙོན་འཇུག་བྱས་ཡོད་འདུག
གནས་ཚུལ་མཁོ་སྤྲོད་པས། འཛིན་བཟུང་བྱས་པའི་བོད་མི་དེ་དག་གི་ཁ་པར་ནང་དུ། འདས་ལོའི་ལོ་མཇུག་ཏུ་གཏོར་བཤིག་བཏང་བའི་སྟོན་པ་དང་རྗེ་བཙུན་བྱམས་པ་མགོན་པོའི་སྐུ་བརྙན་གྱི་པར་རིས་སོགས་རང་རང་གི་སྐད་འཕྲིན་གྱི་རྒྱབ་ལྗོངས་སུ་བཀོད་ཚུལ་བརྗོད་ནས་འཛིན་བཟུང་བྱས་བ་ཞིག་ཡིན་སྐོར་བརྗོད་བྱུང་།
ཡང་འདས་ལོའི་ཕྱི་ཟླ་ ༡༡ ནང་བློ་བཟང་མཚོ་མོ་གཙོ་བྱས་པའི་བྲག་མགོ་ཕྱོགས་ཀྱི་བཙུན་མ་ཉུང་མཐར་ ༡༠ ཙམ་འཛིན་བཟུང་བྱས་ཡོད་ཀྱང་། ད་ལྟའི་ཆར་བཙུན་མ་དེ་དག་གི་གནས་སྟངས་ཅི་ཆགས་ཁ་གསལ་ཐུབ་ཀྱི་མེད་པ་དང་། བཙུན་མ་བློ་བཟང་མཚོ་མོ་ལགས་ཀྱིས་ཕྱི་ཕྱོགས་སུ་ཡོད་པའི་རང་ཉིད་ཀྱི་སྤུན་མཆེད་ལ་འབྲེལ་འདྲིས་བྱས་པའི་ཉེས་འཛུགས་བྱས་ཏེ། ཆབ་མདོ་གྲོང་ཁྱེར་བྲག་གཡབ་གྲོང་ཚོའི་ཉེན་རྟོག་ཁང་དུ་བཀག་ཉར་གྱིས། ཉེ་བའི་ཟླ་གསུམ་ཙམ་རིང་འདྲི་རྩད་དང་རྡུང་རྡེག་བཏང་ཡོད་འདུག་ལ། ད་ལྟ་ཁོང་ཀློད་གྲོལ་བཏང་ཟིན་ནའང་། རྒྱ་ནག་གི་ཉེན་རྟོག་པས་བཙུན་མ་ཁོང་བྲག་གཡབ་གྲོང་ཚོ་ནས་ཕྱིར་བསྐྱོད་མི་ཆོག་པ་དང་ཉིན་རེའི་འགྲོ་འདུག་སྤྱོད་གསུམ་ལ་ལྟ་རྟོག་སོགས་ཀྱི་དམ་དྲག་འོག་བཞག་ཡོད་པ་རེད།
གནས་ཚུལ་མཁོ་སྤྲོད་པས། བློ་བཟང་མཚོ་མོ་ལགས་གཙོ་བྱས་པའི་བཙུན་མ་དེ་དག་འཛིན་བཟུང་བྱེད་དོན་ནི། ཁ་པར་ལ་སྔོག་བཤེར་བྱས་ཏེ་ཆབ་སྲིད་དང་འབྲེལ་བ་ཡོད་པའི་ཉེས་འཛུགས་བྱས་རྗེས། བྲག་གཡབ་རྫོང་གི་ཉེན་རྟོག་ཁང་དུ་བཙན་འཁྲིད་ཀྱིས། འདྲི་རྩད་བྱས་པ་དང་ཆབ་སྲིད་སློབ་གསོ་ཟེར་བ་སྤེལ་ཡོད་སྐོར་བརྗོད་བྱུང་།
ཡང་ཕྱི་ཟླ་ ༡ ཚེས་ ༡ ཡས་མས་སུ་བྲག་མགོ་དགའ་ལྡན་རབ་བརྟན་རྣམ་རྒྱལ་གླིང་དགོན་པའི་གྲྭ་བཀྲ་ཤིས་རྡོ་རྗེ་ལགས་སུ། བྲག་མགོ་དང་འབྲེལ་བའི་གནས་ཚུལ་ཕྱིར་བསྒྲགས་བྱས་པའི་ཉེས་མིང་འོག་འཛིན་བཟུང་བྱས་ཏེ། ད་ལྟ་ད་དུང་བྲག་གཡབ་ཁུལ་གྱི་ཉེན་རྟོག་ལས་ཁུངས་ཀྱི་མངག་གཏོང་ཁང་ཟེར་བའི་ནང་བཅུག་ཡོད་འདུག
གཞན་ཡང་བྲག་མགོ་རུ་འཛིན་བཟུང་བཀག་ཉར་དང་འབྲེལ་བའི་གནས་ཚུལ་མང་དག་ཅིག་བྱུང་གི་ཡོད་ཀྱང་། གནས་ཚུལ་ཁ་གསལ་རག་རྒྱུ་ཁག་པོ་ཡིན་པ་དང་། འབྲེལ་ཡོད་བོད་མི་ཞིག་གིས་དེང་སྐབས་བྲག་མགོར་དམ་དྲག་ཧ་ཅང་ཆེ་བ་དང་། དམིགས་བསལ་བྲག་མགོ་ནས་བྱུང་བའི་གནས་ཚུལ་རིགས་ཕྱིར་ཤོར་ཚེ། འབྲེལ་ཡོད་ནང་མི་དང་བཅས་པར་གནོན་ཤུགས་སྤྲད་ནས་མི་མང་གི་རང་དབང་འཕྲོག་གི་ཡོད་སྐོར་དང་། བྲག་མགོར་གནས་རིག་གསར་བརྗེ་བསྐྱར་སྤེལ་ལྟ་བུའི་གནས་སྟངས་བྱུང་དོན་གཙོ་བོ་ནི་རྫོང་དཔོན་གསར་པ་ཞིག་བསྐོས་ཡོད་པ་ཁོས་བསྒྲུབས་པ་ཡིན་སྐོར་ཡང་འགྲེལ་བརྗོད་གནང་བྱུང་།
གསར་འགོད་པ། སྐལ་བཟང་སྦྱིན་པ།
