ཆུ་གླང་རྩ་ཚིག་ལས་འཕྲོས་པའི་གཏམ།

ཆབ་མདོ་ངག་ཕུན།

དེ་ཡང་རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཆུ་གླང་རྩ་ཚིག་བསྒྲགས་ཏེ་མི་ལོ་ ༡༠༩ འཁོར་བའི་ཉིན་མོར་ས་ཕྱོགས་གང་ས་ནས་སྲུང་བརྩི་གནང་བཞིན་མཆིས། དེ་དག་ནི་དགའ་འོས་པ་ཞིག་རེད་ལ། འོས་ཤིང་མཚམས་པ་ཞིག་ཀྱང་རེད་སྙམ། བདག་གིས་ཀྱང་བོད་མི་རིགས་ལ་བཀའ་དྲིན་བླ་མེད་དུ་ཆེ་བའི་རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གི་བོད་ཀྱི་བསྟན་སྲིད་བདེན་དོན་ཆེད་དུ་ཉིན་མཚན་དྲུག་ལ་སྐུ་ངལ་ཚད་མེད་སྐྱོན་གནང་མཛད་པ་དེ་དག་ལ་བཀའ་དྲིན་རྗེས་དྲན་མཚོན་སླད་དུ་དེ་རིང་རུབ་ཙམ་གླེང་བར་འདོད་ཅིང་། དེ་ཡང་ཇི་སྐད་ལས། “ཁྱེད་ནི་འགྲོ་བའི་དོན་གྱི་སླད། །ཅུང་ཟད་ཙམ་ཡང་མི་ངལ་ཞིང་། །འགྲོ་བ་རྣམས་ཀྱང་ཁྱོད་ཀྱི་ནི། །ཡོན་ཏན་བརྗོད་པ་ངལ་མ་གྱུར། །”ཞེས་གསུང་པ་ལྟར་རྒྱལ་བའི་མཛད་པ་ནི་བློ་དམན་བདག་འདྲའི་ཆ་ཤས་ཕྲ་མོ་ཙམ་ཡང་བརྗོད་ག་ལ་ནུས། འོན་ཀྱང་ང་རང་གི་སེམས་ནང་དུ་གང་ཤར་བ་རྣམས་གླེང་བར་བྱ། དེ་ཡང་རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཆུ་གླང་རྩ་ཚིག་བསྒྲགས་ནས་མི་ལོ་བརྒྱ་དང་དགུ་འཁོར་བའི་དུས་སྐབས་རྩ་ཆེན་ཞིག་ཡིན་པ་ངོས་འཛིན་བྱེད་བཞིན་ཡོད་ཅིང་། དུས་འདིར་ཁོང་ལ་བཀའ་དྲིན་རྗེས་དྲན་ཡང་ཞུ་བཞིན་ཡོད། མགོན་པོ་མཆོག་གིས་བོད་ཀྱི་ས་ཐོག་ནས་བོད་ནི་ལོ་རྒྱུས་ཡུན་རིང་ལྡན་པའི་རང་དབང་ཅན་གྱི་རྒྱལ་ཁབ་གཅིག་ཡིན་པ་ལས་སུ་ཞིག་གི་ཆ་ཤས་ཙམ་ཡང་མིན་པའི་གསལ་སྟོན་ཡང་ཡང་མཛད་གནང་བ་ནི་ལོ་རྒྱུས་ཀྱི་གནད་དོན་གལ་ཆེ་ཞིག་རེད་སྙམ།

དེ་ཡང་ཆུ་གླང་རྩ་ཚིག་བསྒྲགས་ཏེ་ལོ་ངོ་ ༡༠༩ འཁོར་བའི་ཉིན་མོ་སྲུང་བརྩིའི་སྐབས་སུ་རྒན་ན་ག་སངས་རྒྱས་བསྟན་དར་ལགས་ཀྱིས་གསུང་བཤད་ལས། “ཕྱིས་སུ་ང་ཚོས་དེར་ཉམས་ཞིབ་བྱེད་པའི་སྐབས། མདོར་བསྡུས་ན་རང་བཙན་གཙང་མ་ཡིན་པའི་སླར་ཡང་གསལ་བསྒྲགས་བྱས་པ་ཞིག་ལ་ངོས་འཛིན་བྱེད་ཀྱི་ཡོད་པ་རེད། ངོས་འཛིན་བྱས་པ་ནང་བཞིན་ང་ཚོས་ཆུ་གླང་རྩ་ཚིག་ལ་ཞིབ་མོར་སློབ་སྦྱོང་བྱས་ན་ནང་དོན་ཡང་དེ་ལྟར་ཆགས་ཀྱི་ཡོད་པ་རེད།” ཅེས་དང་། ཡང་གསུང་དོན་ལས། “མི་མང་པོ་ཞིག་གིས་དེ་རིང་གི་ཉིན་མོ་དེ་ཆབ་སྲིད་ཀྱི་ལས་འགུལ་ཞིག་ལ་དགོངས་སྲིད་ཀྱི་རེད་ཀྱང་། དོན་དངོས་ཐོག་འདི་ནི་ལོ་རྒྱུས་ཀྱི་དྲན་གསོ་ཆེན་པོ་ཞིག་ཆགས་བསྡད་ཡོད་པ་རེད།” ཅེས་གསུང་དོན་ལྟར་ང་ཚོའི་ལོ་རྒྱུས་རྩ་ཆེན་དེ་དག་དྲན་གསོ་གནང་རྒྱུ་ནི་འོས་འགན་ཞིག་རེད། བྱ་འོས་པ་ཞིག་ཀྱང་རེད་སྙམ།

ལྷག་པར་དབྱིན་ཇི་བོད་ལ་བཙན་འཛུལ་སྐབས་༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་སྐུ་ངལ་འཛེམས་མེད་ཀྱིས་རྒྱ་སོག་ཏུ་ཕེབས་དགོས་བྱུང་ཡོད། དེ་དག་ཀྱང་མ་འོངས་པར་བོད་མི་རིགས་ཀྱི་བདེན་དོན་ཆེད་དུ་ཕུགས་རྒྱང་རིན་པོའི་དགོངས་པ་རླབས་ཆེན་བཞེས་ནས་ཕེབས་པ་ཞིག་ཡིན་པ། དེ་ཡང་ཆུ་སྤྲེལ་ཞལ་གདམས་ལས། “རང་ལོ་བཅོ་བརྒྱད་ལ་བབས་མཚམས་སྔར་སྲོལ་ལ་བསྙད་པའི་༸རྒྱལ་སྲིད་ཆོས་སྲིད་ཀྱི་འགན་འཁུར་ཐོག་ཏུ་བབས་པ་ན་རང་ལ་ཆོས་སྲིད་གང་ཐད་ནས་མྱོང་གོམས་ཤེས་ཡོན་དམན་ཡང་ལྷ་སྡེ་མི་སྡེས་སྤྱི་ཞུས་དང་། གནམ་བསྐོས་༸གོང་མ་ཆེན་པོའི་བཀའ་ལུང་སྤྱི་བོར་ནོད་པས་འཁུར་དུ་བླངས་ཏེ་རང་ཉིད་དལ་ལྷོད་སྐྱིད་སྡོད་ཀྱི་དབང་མེད་བསྟན་སྲིད་ཀྱི་བདེ་དོན་ལ་ཉིན་མཚན་སེམས་འཁུར་ལྕི་བས་ནོན་བཞིན་དུ་བསྟན་པ་རྒྱས་ཐབས། ཆབ་སྲིད་ཕྲ་ཚུགས་ཐབས། ཆབ་འབངས་བདེ་བར་ངལ་འཚོ་ཐབས་ལྷག་བསམ་དྲང་པོས་གཞུང་བསྲང་སྒོ་གསུམ་ཡོད་རྒུ་རྩལ་སྤྲུགས་བགྱིས་རུང་། ཤིང་འབྲུག་ལོར་དབྱིན་ཅི་དཔུང་དམག་ལྷགས་འབྱོར་སྐབས་ཀྱང་རང་ཉིད་སྐྱིད་ཐབས་ངོ་སྲུང་མཐུན་ལམ་བྱས་ཚེ་ཆབ་སྲིད་ལ་ཕུགས་སྐྱོན་ཆགས་ན་རྐང་རྗེས་ལག་བསུབ་གང་མིན་ཡོང་རྒྱུར་བསམ་སྔར་༸གོང་ས་ལྔ་པ་ཆེན་པོ་ནས་མཉྫུ་རྒྱལ་པོ་དང་མཆོད་ཡོན་བཀུར་རེས་འབྲེལ་ནས་བཟུངས་ད་བར་ཕན་ཚུན་སྐྱོང་འོས་ལ་བརྟེན་འཕྲལ་ཕུགས་བདེ་སྡུག་ལྷོངས་ངེས་ཞུ་སར་ངལ་བ་ཁྱད་བསད་ཀྱིས་བྱང་འགྲེམ་རྒྱ་སོག་ཡུལ་གྲུ་བརྒྱུད་པི་ཅིན་གསེར་གྱི་༸རྒྱལ་ཁབ་ཆེན་པོར་༸གོང་མ་ཡུམ་སྲས་མཇལ་འཕྲད་བཀུར་བཟོས་བདག་རྐྱེན་ཚད་མེད་པ་གནང་ཡང་། རིང་པོར་མ་ལོན་པར་༸གོང་མ་ཡུམ་སྲས་རིམ་གཤེགས་རྗེས་༸གོང་མ་ཤོན་ཐོང་ཁྲིར་འཁོད་ཡབ་སྲས་ལ་རྒྱུ་རྐྱེན་ལྷོངས་གསོལ་ཐོག་བོད་ལྗོངས་སྙིང་ལ་བཅགས་ཏེ་ཕྱིར་འཁོད་སྐབས་བོད་སྡོད་ཨམ་བན་ནས་གཡོ་ཞུས་རྗེས་འབྲངས་ལུའུ་ཅུན་དཔོན་དམག་ལྷགས་འབྱོར་བོད་ལྗོངས་ཆབ་སྲིད་ཀྱི་དབང་བྱུས་འཕྲོག་ཉེར།” ཞེས་གསུང་དོན་ལྟར་བོད་ཀྱི་ཆབ་སྲིད་དགུང་ལོ་བཅོ་བརྒྱད་ཐོག་བོད་ལྗོངས་ཀྱི་བསྟན་སྲིད་ཀྱི་ཐུགས་འགན་བཞེས་ནས་ངལ་བ་ལྷོད་མེད་ཀྱིས་བསྟན་སྲིད་ཆེད་དུ་སྐུ་ལས་བསྐྱོན་གནང་མཛད་པར་གོང་གི་བཀའ་སློབ་ལས་རུབ་ཙམ་རྟོགས་ཐུབ་པ་ཞིག་རེད་ལ།

མཐར་རྒྱ་དམག་བོད་ལ་བཙན་འཛུལ་བྱས་པ་དང་། རྒྱལ་མཆོག་སྐུ་ཕྲེང་བཅུ་གསུམ་པ་མཆོག་གིས་ཐབས་ཤེས་རིམ་པ་གནང་ཡང་དོན་འབྲས་མ་གསོན་ནས་སྟོན་འཁོར་རྣམས་རྒྱ་གར་ལ་ཕེབས་དགོས་བྱུང་ཡོད། དེ་ཡང་སྲིད་དོན་རྒྱལ་རབས་ལས། “༸སྐྱབས་མགོན་ཏྭ་ལའི་བླ་མ་རིན་པོ་ཆེ་སྟོན་འཁོར་རྣམས་གྲོ་མོ་སྣ་གདོང་ཙམ་ལ་བཞུགས་ནས། པི་ཅིང་ལ་བཀའ་མོལ་གནང་རྒྱུའི་དགོངས་གཞི་དེ་ལྟར་ཡིན་ཀྱང་། ཕེབས་རྗེས་སུ་ཡོང་མིའི་རྒྱ་དམག་རྣམས་ཕག་རིར་འབྱོར་སོང་ཞེས་པའི་གནས་ཚུལ་གསན་པ་དང་། ཉིན་མ་གཅིག་གིས་ལམ་ཐག་ལ་བརྟེན་གྲོ་མོར་བཞུགས་བློས་མ་བཟོད་པར་སྟོན་འཁོར་རྣམས་རྒྱ་གར་ས་ཐོག་ཏུ་ཆིབས་བསྒྱུར་གནང་རྒྱུའི་ཐུགས་ཐག་གཅོད་གནང་མཛད་འདུག་”ཅེས་དང་། ཡང་བཀའ་ཡིག་ལས། “ཉེ་དུས་རྒྱ་མིའི་རྟ་དམག་ཁྱོན་ཆེ་ལྷ་སར་འབྱོར་ཏེ་བོད་ཀྱི་མི་དམངས་ལ་བཙན་དབང་ཞེ་དྲག་བྱས་བྱུང་། ཁོ་ཚོས་ལྷ་སའི་ཁྲིམས་སྲུང་པུ་ལི་སི་དང་། གྲོང་མི་མང་པོ་མེ་མདའ་རྒྱབ་སྟེ་བསད་རྨས་བྱས་པར་བརྟེན། ངོས་ལྷ་སར་སྡོད་བློས་མ་བཟོད་པར་ང་དང་། ངའི་བློན་ཆེན་དྲུག་མཉམ་དུ་གནས་སྐབས་བྲོས་བྱོལ་ལ་ཡོང་དགོས་བྱུང་།” ཞེས་པ་ལྟར་བོད་ཆོས་ལྡན་གྱི་ཞིང་ཁམས་འདི་ཉིད་དུ་རྒྱ་དམག་བཙན་འཛུལ་ག་འདྲ་བྱས་ཡོད་པ་དང་། བོད་མི་ཉམས་ཆུང་ཐོག་ཏུ་བསད་རྨས་གང་འདྲ་བྱས་ཡོད་པ་ཤེས་ཐུབ་པ་ཞིག་རེད། གནས་སྟངས་དེ་འདྲ་ཞིག་གི་འོག་ནས་རྒྱལ་བ་སྐུ་ཕྲེང་བཅུ་གསུམ་པ་ཆེན་པོ་མཆོག་རྒྱ་གར་ཕེབས་དགོས་བྱུང་བ་ཞིག་རེད། རྒྱ་གར་དུ་ཕེབས་གྲུབ་རྗེས་དཔོན་རིགས་ཁག་མཇལ་འཕྲད་དང་འབྲེལ་བོད་དོན་བདེན་མཐའ་སེལ་ཐབས་ཐོག་ཏུ་སྐུ་ངལ་ཚད་མེད་བསྐྱོན་གནང་མཛད་ཡོད།

ལྷག་པར་གོང་ས་མཆོག་རྒྱ་སོག་ནས་བོད་ལྡན་གྱི་ཞིང་དུ་ཕེབས་ནས་ཡུན་རིང་མ་སོང་བར་ཛ་དྲག་གིས་ཕེབས་དགོས་བྱུང་ཡོད་པས། དེས་བོད་འབངས་རྣམས་སེམས་ཕམ་དང་སྡུག་བསྔལ་ཚད་མེད་བྱུང་ཡོད། དེ་ཡང་སྲིད་དོན་རྒྱལ་རབས་ལས། “བོད་ཡུལ་སེར་སྐྱ་ཚང་མས་༸གོང་ས་མཆོག་རྒྱ་སོག་ཡུལ་གྲུར་ལོ་མང་བཞུགས་ཏེ་རང་གི་སྐྱོང་ཡུལ་བོད་ལྗོངས་ཆོས་ཀྱི་ཞིང་སར་ཞབས་སོར་འཁོད་དེ་ཟླ་བ་གཉིས་ལས་མ་སོང་བར་སླར་ཡང་བསྟན་དོན་དུ་རྒྱ་གར་ཕྱོགས་གློ་བུར་ཆིབས་བསྒྱུར་གནང་དགོས་བྱུང་བར་ཁོག་པའི་སྙིང་བཏོན་པའམ། ལོང་བ་ལོང་འཁྲིད་བྲལ་བ་ལྟ་བུར་ཅི་བྱ་གཏོལ་མེད་ཀྱིས་ནམ་ཞིག་གསེར་ཞལ་མཇལ་ཡོང་སྙམ་པའི་རེ་བ་དང་།” ཞེས་གསལ་དོན་ལྟར་རེད། བོད་འབངས་རྣམས་ལ་སེམས་སྡུག་ཚད་མེད་བྱུང་ཡོད་པ་རེད། ཡིན་ནའང་སྡུག་གཅིག་རྒྱབ་ཏུ་སྐྱིད་གཅིག་ཡོད་ཅེས་པ་ལྟར་མཐར་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཐུགས་རྗེའི་བཀའ་དྲིན་བླ་མེད་ཉག་གཅིག་དང་། བོད་ལྗོངས་ལྷ་མི་ཡོངས་ནས་སེམས་ཤུགས་ཞུམ་མེད་ཀྱིས་ཐབས་ཤེས་ཡོད་རྒུ་རྩལ་སྤྲུགས་རིམ་བསྟུན་གྱིས་དཀའ་ངལ་ཁག་ལ་གདོང་ལེན་ལྷག་བསམ་ལྷོད་མེད་ཀྱིས་འཐབ་རྩོད་རྒྱུན་འཁྱོང་་ཡང་དག་པ་བྱས་པའི་འབྲས་བུ་བཅས་ཀྱིས་རྒྱ་དམག་བོད་ནས་མཐའ་སྐྲོད་གནང་ཐུབ་པ་བྱུང་ཡོད། དེ་དག་ནི་ཆེས་གཟི་བརྗིད་ལྡན་པའི་ལོ་རྒྱུས་ཀྱི་གནད་དོན་གལ་ཆེ་ཞིག་རེད་སྙམ།

དེ་ནས་བོད་ཆོས་ལྡན་གྱི་ཞིང་ཁམས་སུ་བདེ་སྐྱིད་རྫོགས་ལྡན་གྱི་རང་དབང་གི་ཉི་མ་ཤར་བ་རེད། དེ་འདྲའི་གནས་སྟངས་དུས་བཟང་དེར་བོད་ཆོས་ལྡན་གྱི་རྒྱལ་ཁབ་འདི་ཉིད་སུ་ཞིག་གི་མངའ་ཁོངས་མ་ཡིན་པ་རང་དབང་ཅན་གྱི་རྒྱལ་ཁབ་གཅིག་ཡིན་པ་ཆུ་གླང་རྩ་ཚིག་ཆེན་མོ་འདི་ཉིད་ཕྱི་ལོ་ ༡༩༡༣ བསྒྲགས་པ་རེད། དེ་ཡང་ཆུ་གླང་རྩ་ཚིག་ལས། “འཕགས་པའི་ཡུལ་ནས་བདག་ཅག་གི་སྟོན་པ་ཐུགས་རྗེ་ཅན་འདིས་ཇི་ལྟར་ལུང་དུ་བསྟན་པ་ལྟར་བསིལ་ལྡན་ས་ལའི་སྨན་ལྗོངས་འདི་བཞིན་འཕགས་མཆོག་འཇིག་རྟེན་དབང་ཕུག་གི་སྒྱུ་འཕྲུལ་ཆོས་༸རྒྱལ་མེས་དབོན་རྣམ་གསུམ་ནས་བཟུངས་ད་ལྟའི་བར་སྐྱེ་ཕྲེང་ཟམ་མི་ཆད་པ་བྱོན་ནས་ལྗོངས་འདི་ཕྱག་མཚན་དུ་བདག་གིར་བཞེས་ཏེ་འགྲོ་བ་རྣམས་གང་ལ་གང་འདུལ་གྱི་ཐབས་དང་། ཐུགས་རྗེ་ཆེན་པོས་རྟག་ཏུ་སྐྱོང་ཞིང་། སྔར་ཇིང་གི་སི་ཁཱང་དང་། ཨལ་ཐན་རྒྱལ་པོ་སོགས་སོག་དུས་དང་། མིང་སོགས་རྒྱ་རྒྱལ་རིན་བྱོན། ༸རྒྱལ་མཆོག་ལྔ་པ་ཆེང་པོའི་སྐུ་དུས་ནས་མན་ཇུ་༸གོང་མ་དང་མཆོན་ཡོན་དུ་འབྲེལ་ཏེ་ཕན་ཚུན་སྐྱོང་རེས་ཀྱི་གནས་བཅས་དེ་ལྟར་ཡང་། བར་ལམ་ཟིན་ཁྲོན་དང་། ཡུ་ནན་གྱི་རྒྱ་རིགས་ལས་བྱེད་འགའ་ཤས་ནས་བོད་ས་ཟ་སེམས་ཀྱིས་དབང་ཤུགས་བརྡབས་མནར་ཚོད་མེད་བྱས་པས་མ་ཚད། ཆིངས་གསལ་ཚོང་རྭ་ཁག་གི་ཁྲིམས་སྲུང་ཡིན་ཚུལ་རྒྱ་དམག་ཁྱོན་ཆེ་རྒྱལ་ས་ལྷ་ལྡན་དུ་ལྷགས་འབྱོར་བྱུང་བ་བཅས་ལ་བརྟེན་རྒྱ་བོད་མཆོད་ཡོན་གྱི་འབྲེལ་བ་ཙམ་ལས། གཅིག་འོག་ཏུ་གཅིག་མེད་པའི་གནས་ལུགས་ཡོང་རྐྱེན་གསལ་བཤད་བྱེད་པར་ངོས་རྒྱལ་བློན་རྣམས་ས་མཚམས་སུ་བསྐྱོད་དེ་པི་ཅིང་རང་ལ་ལྕགས་སྐུད་ཐོག་ནས་བཀའ་མོལ་ཞུས་རྩིས་དེ་ལྟར་ཡང་། ངོས་ཐོན་པའི་རྗེས་སུ་གསོད་བཟུང་གང་ཐུབ་བྱེད་པར་གོ་མཚོན་ལྡན་པའི་རྒྱ་དམག་གཅིག་རྒྱབ་གཉིས་སྣོན་དུ་བཏང་རྐྱེན་རེ་ཞིག་རང་ས་བརྒལ་ཏེ་མི་འགྲོ་མཐུ་མེད་བྱུང་བ་དང་།” ཞེས་གསུངས་དོན་ལྟར་བོད་རྒྱ་མཆོད་ཡོན་གྱི་འབྲེལ་བ་ཙམ་ལས་གཅིག་འོག་ཏུ་གཅིག་མེད་ཚུལ་གལ་གནད་ཆེན་པོའི་ཐོག་ནས་གསུངས་གནང་མཛད་ཡོད་པ་རེད།  དེང་སྐབས་རྒྱ་གཞུང་གིས་བོད་ནི་མིང་དང་ཆིངས་རྒྱལ་རབས་སྐབས་ནས་བཟུང་བོད་འདི་ཉིད་སྔར་མོ་ནས་རྒྱ་ནག་གི་ཆ་ཤས་ཡིན་ཚུལ་རྫུན་སྒྲོག་གིས་འཛམ་གླིང་མི་མང་རྣམས་མགོ་སྐོར་གཏོང་ཐབས་ཀྱི་ངན་ཇུས་ཐབས་སྡུག་སྤེལ་བཞིན་ཡོད། དེ་ཡང་དུས་བབ་ནང་རྒན་ན་ག་སངས་རྒྱས་བསྟན་དར་ལགས་ཀྱིས་ལུང་དྲངས་དོན་ལས། “རྒྱའི་ལོ་རྒྱུས་མཁས་དབང་ལིག་ཧན་ཁྲིན་གྱིས་རྒྱའི་ཡིག་ཆ་རྙིང་པ་ལ་གཞི་བཟུང་སྟེ་རྒྱ་ནག་གི་མིང་དང་ཆིང་རྒྱལ་རབས་སྐབས་ཀྱི་བོད་རྒྱའི་འབྲེལ་བའི་སྐོར་གྱི་དཔེ་དེབ་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་མིན་ཞེས་པ་ངོ་སྤྲོད་གནས་སྐབས། རྩོམ་པ་པོས་ལོ་རྒྱུས་ཀྱི་བསྡོམས་ནང་། མིང་རྒྱལ་རབས་གཞུང་དམངས་གཉིས་ཀྱིས་བོད་ནི་མིང་རྒྱལ་རབས་ཀྱི་ཆ་ཤས་ཡིན་པའི་ཡིག་ཚང་གཅིག་གི་ནང་ཡང་བྲིས་མེད་པ་མ་ཟད། བོད་ནི་མིང་རྒྱལ་རབས་ཀྱི་ཆ་ཤས་ཡིན་པ་བསམ་བློ་ནང་དྲན་མྱངས་མེད། བོད་ནི་རྒྱ་ནག་གི་མིང་རྒྱལ་རབས་སྐབས་སུ་རང་བཙན་རྒྱལ་ཁབ་ཅིག་ཡིན། བོད་ནི་མིང་རྒྱལ་རབས་དུས་སྐབས་ནས་རྒྱ་ནག་གི་ཆ་ཤས་རེད་ཟེར་བ་ནི་རྒྱ་ནག་དམར་པོ་གཞུང་གིས་ལོག་འགྲེལ་བྱས་པ་ཁོ་ན་ཡིན། ལྷག་པར་དུ་རྒྱའི་ཡིག་ཚང་ནང་གི་རྟེན་འབུལ། ཆོ་ལོ་སྩལ་བ་སོགས་ལ་ཞིབ་འཇུག་མཐར་ཕྱིན་པ་བྱས་ཏེ། དེང་སྐབས་རྒྱ་ནག་གི་བོད་ཀྱི་ལོ་རྒྱུས་ལ་ལོག་འགྲེལ་ལོག་སྨྲ་ཚར་བཅད་ཡོད།” ཅེས་གསུང་དོན་ལྟར་རྒྱ་ནག་དམར་གཞུང་གིས་བོད་རྒྱ་ནག་ཆ་ཤས་ཡིན་ཟེར་བ་ནི་ཧམ་བཤད་ལས་དོན་དངོས་ཐོག་བོད་རྒྱ་ནག་ཆ་ཤས་ཕྲ་མོ་ཙམ་ཡང་མིན་པ་རྒྱ་རིགས་ལོ་རྒྱུས་སྨྲ་བས་དམར་གཞུང་གི་རྫུན་བསྒྲགས་ཚང་མ་རྐུབ་བརྡོལ་བ་རེད། ས་བོད་འདི་ཉིད་རྒྱ་གནང་ཆ་ཤས་ཙམ་ཡང་མིན་པ་ངོས་ལེན་གནང་གི་ཡོད་པ་རེད།

ཆུ་གླང་རྩ་ཚིག་དོན་ཚན་བཞི་པ་ལས། “བོད་འདི་རྒྱལ་ཁབ་གཞན་དག་ལྟ་བུའི་སྟོབས་འབྱོར་འཕྲུལ་ཆས་དང་མི་ལྡན་རུང་། ཆོས་མཐུན་ཞི་བདེར་གནས་པའི་རྒྱལ་ཁབ་རང་དབང་དང་ལྡན་པ་ཞིག་ཡིན་སྟབས། དེང་དུས་ཞི་དྲག་གི་ལས་དོན་གང་ཅིར་དོ་དམ་ཆེ་བསྐྱེད་ཀྱིས་རང་ས་བརྟན་སྲུང་ཐུབ་པའི་དྲག་པོའི་འདུ་གོད་རྒྱ་ཆེ་གནང་མུས་ཡིན་ན། འཕྲལ་སྒང་དམག་འཁྲི་དང་། ཁམས་ཕྱོགས་ལམ་འཁེལ་ཁག་ལ་དཀའ་ཆེགས་ཕྲན་བུ་ཡོང་བ་གཞིར་གཤིས། རྒྱ་ནག་ནས་མ་བདག་བདག་བཟུང་སྔ་ཕྱིར་བྱུང་བའི་རྒྱུ་མཚན་སྔོན་བྱུང་ལ་བསམ་ཞིབ་ཀྱིས་ཚང་མས་མ་བསྐུལ་དྭང་བླངས་ཐོག་ནས་རང་ས་རང་སྐྱོང་དང་། རང་སྡེ་རང་སྲུང་བྱ་རྒྱུའི་ཐབས་ཚུལ་ལ་ལྷག་བསམ་འཁུར་ལེན་ཆེ་བསྐྱེད་དགོས་རྒྱུ་མ་ཟད། སྟོད་སྨད་ལྷོ་བྱང་གི་ས་མཚམས་ཁག་ལ་སོ་སྲུང་ལྷོད་མེད་ཀྱིས་ཕྱི་མིའི་ལོ་ཉུལ་ནང་ལྷགས་མི་འབྱུང་བའི་དམ་པོས་དམ་བཅིངས་དང་། གལ་ཏེ་དོགས་གླེང་ཕྲ་མོ་ཙམ་བྱུང་རུང་འཕྲལ་འཕྲལ་རྫོང་གཞིས་རྟ་ཤད་བརྒྱུད་ནམ་ཉིན་ཤད་རྩོལ་གྱིས་རྒྱལ་ཁབ་ཏུ་༸སྙན་གསན་དགོས་རྒྱུ་ལས། རང་བཞིན་ལྷོད་ཡངས་དང་། ཡང་དོན་མེད་རྒྱུ་ཆུང་རྐྱེན་ཆེའི་དཀྲོག་རྐྱེན་ཆེད་བཟོའི་རིགས་ནམ་ཡང་མི་ཆོག” །ཅེས་རང་ས་རང་སྲུང་དང་ཕྱི་མི་ནང་འཛུལ་མི་ཡོང་བའི་ས་མཚམས་ཁག་བརྟན་སྲུང་དགོས་པའི་བཀའ་ཁྱབ་སྩལ་ཡོད་པ་རེད། འདི་དག་ནི་ལོ་རྒྱུས་རང་བཞིན་ཅན་གྱི་གལ་ཆེ་ཞིག་རེད་སྙམ་བཞིན་ཡོད།

དེ་བཞིན་བོད་འབངས་ལ་བདེ་སྐྱིད་ཀྱི་ཉི་མ་ཤར་བྱུང་བསམ་ནས་ལྷོད་གཡེང་གཏན་ནས་བྱ་མི་རུང་བའི་བཀའ་སློབ་ལམ་སྟོན་ཡང་ཡང་གནང་ཡོད་རུང་། ལས་ཀྱི་སྣེ་བ་ཚོས་རྒྱལ་བའི་བཀའ་དགོངས་ཇི་བཞིན་མ་བསྒྲུབ་དང་། བསྒྲུབ་མ་ཐུབ་རེད། དེ་ཡང་ཆུ་སྤྲེ་ཞལ་གདམས་ལས། “ཚུལ་མིན་རྣམས་ལ་བྱ་བ་ལམ་འགྲོ་ཞན་པས་བཀའ་ཆད་ཕོག་ངེས་པ་མ་ཟད་གནས་སྐབས་རང་དོན་སྒྲུབས་ཕྱོགས་ཕྱོགས་ལྷུང་ངོ་སྲུང་ལས་ཆབ་སྲིད་ཀྱི་བདེ་དོན་ད་མུས་བཞིན་ཡལ་ཡོལ་འབབ་ཞིག་གིས་འཁུར་དུ་མ་བླངས་ན་ཕུགས་དོན་མི་འགྲུབ་པ་མཐོང་གསལ་ལྟར་སླར་ཅི་དྲག་གིས་འགྱོད་ཀྱང་ཕན་ཆ་མི་སྲིད་པས་ངོས་ནམ་འཚོའི་རིང་བོད་ལྗོངས་བདེ་ཐབས་ད་མུས་ཀྱི་འཁྱོལ་བར་མཐོང་།” ཞེས་དང་། ཡང་། “ངོས་རང་གིས་ཉམས་མྱོང་རྒྱུ་མཚན་གསལ་པོའི་སྟེང་ནས་གཞན་ལ་འདོམས་པ་འདི་ལྷག་བསླབ་བྱ་ལྷུག་པོར་སྟོན་རྒྱུ་མེད་པས་ཕྱིའི་རིམ་གྲོ་སྒྲུབ་དང་། སྒྲུབ་བཞིན་པ་ཡིན་ཅིང་། གཙོ་ཆེ་བ་ནང་གི་ཞབས་བརྟན་རིམ་འགྲོ་འདི་ཉིད་སྙིང་ལ་ལྕག་བསྐུལ་ཚང་མས་སྔར་འགྱོད་ཕྱིས་སྡོམ་གྱི་སྲི་ཞུ་ཚགས་ཚུད་སྒྲུབ་ནུས་ན་རང་ངོས་ནས་ཀྱང་གང་འཁྱོལ་གྱི་བར་བསྟན་པ་ཆབ་སྲིད་འཕྲལ་ཡུན་རྒྱས་ཐབས།” ཞེས་སོགས་བཀའ་སློབ་ལམ་སྟོན་རིན་ཐང་བྲལ་བ་གནང་ཡོད། འོན་ཀྱང་ང་ཚོའི་ངོས་ནས་ཉམས་ལེན་ཚུལ་བཞིན་མ་གནང་བ་བརྟེན་ནས་ད་ལྟ་ང་ཚོ་མི་འདོད་བཞིན་མི་ཡུལ་ལུང་པར་བཙན་བྱོལ་དུ་ཡོང་དགོས་བྱུང་བ་དེ་རེད། གལ་སྲིད་སྐབས་དེ་དུས་ལས་ཀྱི་སྣེ་མོས་རྒྱལ་བའི་དགོངས་པ་ཇི་བཞིན་བོད་ཀྱི་ཆབ་སྲིད་ཐོག་ཏུ་ལས་དོན་གནང་ཡོད་ཚེ། ད་ལྟ་ང་ཚོ་གཞིས་བྱེས་གཉིས་སུ་ཁ་བྲལ་ནས་སྡུག་གི་མིག་ཆུའི་འཚོ་བ་རོལ་དགོས་ཐུག་ཡོད་ཀྱི་མ་རེད་སྙམ། ད་ནི་ཚང་མས་འདས་ཟིན་པའི་ལོ་རྒྱུས་དེ་དག་ཉམས་མྱོང་གཞི་རྩར་བཞག་པའི་ཐོག་ནས་སྔར་བྱས་ལ་འགྱོད་བཤགས་དང་། ཕྱིན་ཆད་དེ་རིགས་མི་འབྱུང་བའི་ཆེད་དུ་རང་གཞན་ཚང་མའི་རྣམ་རིག་སྒྲིམ་ནས་ལས་དོན་གནང་དགོས་པའི་དུས་སྐབས་རེད་སྙམ། ད་དུང་ང་ཚོ་རྨོངས་གཉིད་ལས་མ་བསད་ནས་ང་དང་ཁྱོད་ཅེས་ནང་ཁུལ་ཕན་ཐོགས་མེད་པར་འཐེན་འཁྱེར་གྱིས་རྩོད་གླེང་གནང་བསྡད་ན། ང་ཚོར་ནམ་ཡང་བདེ་སྐྱིད་ཀྱི་རང་དབང་གི་ཉི་མ་ཞིག་ཤར་མི་ཐུབ་པ་དེ་རེད། གོང་ས་མཆོག་གིས་ཕྱིའི་རིམ་གྲོ་ལས་ལྷག་ནང་གི་མགོན་པོ་མཆོག་གི་བཀའ་སློབ་ལམ་སྟོན་ཁག་ལ་བློ་རྩ་གཅིག་ཏུ་བསྒྲིམ་ནས་ཉམས་ལེན་ཚུལ་མཐུན་གནང་ནས་ལས་དོན་གནང་དགོས་པ་ཞིག་རེད་སྙམ།

བཀའ་དྲིན་ཅན་གྱི་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་སྙིང་སྟོབས་ཞུམ་མེད་ཀྱིས་བོད་མི་རིགས་ཀྱི་བདེན་དོན་ཆེད་དུ་གཞན་འོག་ཏུ་མགོ་བོ་སྒུར་གནང་མ་མཛད་ནས་བོད་མི་རིགས་འདི་ཉིད་རང་བཙན་རྒྱལ་ཁབ་གཅིག་ཏུ་འཛིན་སྐྱོང་གནང་ཐུབ་པ་བྱུང་ཡོད། འོན་ཀྱང་སྐབས་དེ་དུས་༸གོང་ས་མཆོག་གིས་བོད་ཀྱི་ལས་ཀྱི་སྣེ་བ་ཚོར་རྣམ་རིག་བསྒྲིམ་ནས་བོད་ཀྱི་ལས་དོན་གནང་དགོས་པ་བཀའ་སློབ་རིམ་པ་གནང་ཡོད་རུང་། ལས་ཀྱི་སྣེ་མོས་རྒྱལ་བའི་དགོངས་པ་ཇི་བཞིན་ཕྱག་ལས་གནང་ཐུབ་མེད་པས། མཐར་ང་ཚོ་ལུང་པ་གཞན་གྱིས་བཙན་བཟུང་བྱས་པ་རེད། ད་ནི་༸བོད་མི་རིགས་ལ་བཀའ་དྲིན་བླ་མེད་དུ་༸རྒྱལ་བ་བསྟན་འཛིན་རྒྱ་མཚོ་མཆོག་གི་བཀའ་སློབ་ལམ་སྟོན་ཟབ་མོ་ཕེབས་པ་དེ་དག་རྡོ་ལ་རི་མོ་བྲིས་པ་ནང་བཞིན་བོད་དོན་ཐོག་ཏུ་རང་གཞན་ཚང་མའི་ཕྱག་ལས་གནང་དགོས་པའི་དུས་ལ་སླེབས་འདུག་སྙམ། དེ་ཞུ་རྒྱུ་དེ་ཙམ་ཡིན། ནོར་འཁྲུལ་མཆིས་ཆེ་བཟོད་གསོལ་ཞུ་རྒྱུ་ལས་མ་འདས་སོ། །

 མཐའ་དོན་བོད་མི་རིགས་ལ་བཀའ་དྲིན་བླ་མེད་དུ་ཆེ་བའི་༸རྒྱལ་བ་རིན་པོ་ཆེ་མཆོག་སྐུ་ཚེ་ཡུན་རིང་བརྟན་ཞིང་། ཐུགས་ཀྱི་བཞེད་དོན་མཐའ་དག་གེགས་མེད་ལྷུན་གྱིས་འགྲུབ་པདང་། གཞིས་བྱེས་མཉམ་འཛོམ་གྱི་དགའ་སྐྱིད་ཀྱི་ཉི་མ་མྱུར་དུ་ཤར་བའི་་སྨོན་འདུན་ཤུགས་དང་བཅས། བོད་རྒྱལ་ལོ་ ༢༡༤༩ རབ་གནས་ཆུ་སྟག་གནམ་ལོ་གསར་ཚེས་ལ་གཞིས་བྱེས་བོད་འབངས་ལ་ཡོངས་ལ་འཚམས་འདྲི་དང་བཀྲ་ཤིས་བདེ་ལེགས་གྲང་མེད་ཞུ་དང་བཅས། ཕྱི་ལོ་ ༢༠༢༢ ཟླ་ ༢ ཚེས་ ༢༨ ཉིན་མོར་ཕུལ།

དཔྱད་གཞི་ཡིག་ཆ།

༡) ཆུ་སྤྲེ་ཞལ་གདམས།

༢)༸གོང་ས་སྐྱབས་མགོན་༸རྒྱལ་དབང་སྐུ་འཕྲེང་བཅུ་གསུམ་པ་ཆེན་པོའི་མཛད་རྣམ་སྙིང་བསྡུས།

༣)བོད་ཀྱི་སྲིད་དོན་རྒྱལ་རབས། སྨད་ཆ།