ཚེ་དབང་ནོར་བུ་ལགས་མེས་ཚིག་དྲགས་རྐྱེན་འོག་འདས་གྲོངས་སུ་ཕྱིན།

བོད་ཀྱི་གཞས་པ་ཚེ་དབང་ནོར་བུ་ལགས་ནས་རྒྱལ་ས་ལྷ་སའི་ཕོ་བྲང་པོ་ཏཱ་ལའི་མདུན་ཐང་དུ་རང་ལུས་མེར་སྲེག་གནང་རྗེས། མི་དམངས་སྨན་ཁང་དུ་སྨན་བཅོས་བྱེད་ཐབས་གནང་ཡང་སྐུ་ལུས་མེས་ཚིག་དྲགས་རྐྱེན་འོག་འདས་གྲོངས་སུ་གྱུར་ཡོད་པ་རེད།

ཕྱི་ཟླ་ ༢ ཚེས་ ༢༥ ཉིན་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏཱ་ལའི་མདུན་ཐང་དུ་བོད་ཀྱི་གཞས་པ་གྲགས་ཅན་ན་གཞོན་ཚེ་དབང་ནོར་བུ་ལགས་ཀྱིས་རྒྱ་ནག་གཞུང་གི་བཙན་འཛུལ་ལ་ངོ་རྒོལ་གྱིས་རང་ལུས་མེར་སྲེག་བཏང་བའི་གནས་ཚུལ་ཐོན་པ་དང་། འདི་ག་གསར་ཁང་ངོས་ནས་བོད་ཕྱི་ནང་གཉིས་ཀྱི་བོད་མི་གང་མང་ལ་འབྲེལ་བ་ཞུས་ནས། གནས་ཚུལ་ཁུངས་ལྡན་ཞིག་རག་ཐབས་གནང་ཡང་། ཟླ་འདིའི་མགོ་སྟོད་དུ་ཚེ་དབང་ནོར་བུ་ལགས་རྒྱལ་ས་ལྷ་སའི་བོད་ལྗོངས་མི་དམངས་སྨན་ཁང་དུ་སྨན་བཅོས་བྱེད་བཞིན་ཡོད་པའི་གནས་ཚུལ་ཁུངས་ལྡན་ཞིག་འབྱོར་བ་ལས་གནས་ཚུལ་གཞན་གང་ཡང་ལག་སོན་མ་བྱུང་ཡང་། དེ་རིང་ཕྱི་ཚེས་ ༡༧ ཉིན་འདི་གར་གསར་འགོད་པར་ཕྱི་ཕྱོགས་ཀྱི་བོད་མི་ཞིག་བརྒྱུད། རྒྱ་ནག་ནང་དང་བོད་ཀྱི་རྒྱལ་ས་ལྷ་སར་གནས་སྡོད་བྱེད་མཁན་གྱི་མི་གཉིས་ལ་བཀའ་འདྲི་ཞུས་ནས་ཤེས་རྟོགས་བྱུང་བའི་གནས་ཚུལ་ལྟར་ན། ཚེ་དབང་ནོར་བུ་ལགས་འདས་གྲོངས་སུ་གྱུར་བའི་གནས་ཚུལ་དེ་དངོས་བདེན་ཡིན་པ་དང་སྨན་ཁང་དུ་སྐུ་གྲོངས་ཡོད་སྐོར་འགྲེལ་བརྗོད་གནང་བྱུང་།

ཚེ་དབང་ནོར་བུ་ལགས་འདས་གྲོངས་སུ་ཕྱིན་པ་དང་འབྲེལ། ཟླ་འདིའི་ཕྱི་ཚེས་ ༡༤ ཉིན་སྐབས་བཅུ་དྲུག་པའི་བཀའ་ཤག་གིས། བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དབུས་པའི་ལྷན་ཁང་ཁག་གི་དྲུང་ཆེ་རྣམ་པ་དང་སྲི་ཞུའི་ལས་བྱེད་བཅས་ཚང་འཛོམས་ཐོག་གཞུང་འབྲེལ་མཆོད་འབུལ་སྨོན་ལམ་ཞིག་ཚོགས་ཡོད་པ་དང་། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། ཚེ་འདས་རྒྱལ་གཅེས་པ་ཚེ་དབང་ནོར་བུ་ལགས་ཀྱི་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་དང་སྦྲགས། འདས་པོ་གང་གི་ལོ་རྒྱུས་སྙིང་བསྡུས་ཤིག་སྒྲོག་སྦྱང་གནང་བ་དང་འབྲེལ། མཐར་རྒྱལ་གཅེས་པ་ཁོང་སླར་ཡང་འཕགས་པ་སྤྱན་རས་གཟིགས་ཀྱི་གདུལ་ཞིང་དུ་སྐྱེ་བའི་ཐུགས་སྨོན་བཅས་གནང་ཡོད་པ་རེད།

ཟླ་འདིའི་ཕྱི་ཚེས་ ༡༠ ཉིན་གསུམ་བཅུ་དུས་དྲན་ཐེངས་ ༦༣ པའི་གཞུང་འབྲེལ་མཛད་སྒོའི་སྟེང་། བོད་མི་མང་སྤྱི་འཐུས་ལྷན་ཚོགས་དང་བཀའ་ཤག་གཉིས་ཀྱི་བསྒྲགས་གཏམ་ནང་ཚེ་དབང་ནོར་བུ་ལགས་ཀྱི་གཙོས་བོད་བསྟན་སྲིད་མི་རིགས་ཀྱི་སླད་དུ་རང་ལུས་མེར་སྲེག་གནང་མཁན་ཡོངས་ལ་གདུང་སེམས་མཉམ་སྐྱེད་གནང་ཡོད་པ་དང་། ཕྱི་ཚེས་ ༨ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་གསར་འགོད་བསྒྲགས་གཏམ་ཞིག་སྤེལ་བའི་ནང་དགོས་འདུན་དོན་ཚན་གསུམ་བཏོན་ནས།  ད་བར་མི་ལོ་བཅུ་ཕྲག་གཅིག་ལྷག་ཙམ་རིང་རྒྱུན་མ་ཆད་པར་རང་ལུས་མེར་བསྲེགས་གཏོང་གནང་མཁན་བརྒྱ་ཕྲག་གཅིག་དང་ཕྱེད་ལྷག་བྱུང་བ་འདི་ནི་འཛམ་གླིང་གི་ལོ་རྒྱུས་ནང་རང་ལུས་མེར་བསྲེགས་གཏོང་སྟེ་ཞི་རྒོལ་གྱི་ལས་འགུལ་ཡུན་རིང་ཤོས་དང་། གྲངས་ཚད་མང་ཤོས་ཤིག་ཆགས་ཡོད་པས་རྒྱ་གཞུང་ནས་གོ་མེད་ཚོར་མེད་དུ་མ་བསྡད་པར་རང་ལུས་མེར་བསྲེགས་གཏོང་གནང་མཁན་རྣམས་ཀྱི་མངོན་འདོད་ལ་བདག་སྤྲོད་ཀྱིས་བོད་ཐོག་འཛིན་པའི་དྲག་གནོན་དང་སྡུག་རྩུབ་ཅན་གྱི་སྲིད་བྱུས་ངེས་པར་མཚམས་འཇོག་དགོས། རང་ལུས་མེར་བསྲེགས་གཏོང་མཁན་རྣམས་ཀྱི་ལས་འགུལ་འདི་ནི་ཞི་རྒོལ་ཚད་མཐོ་ཤོས་ཤིག་ཆགས་ཡོད་པར་བརྟེན། ཞི་བདེ་དང་རང་དབང་ལ་དགའ་བའི་རྒྱལ་སྤྱིའི་གཞུང་དང་། གྲོས་ཚོགས། སྡེ་ཚན་ཁག་སོགས་ནས་ཐུགས་སྣང་ཆེར་བསྐྱེད་ཀྱིས་ཁོང་རྣམས་ཀྱི་རེ་འདུན་ལ་རྒྱབ་སྐྱོར་གྱིས་བོད་དོན་བདེན་མཐའ་གསལ་ཐབས་ལ་བདེན་རྒྱབ་དཔུང་རོགས་སྔར་ལྷག་གནང་སྐྱོང་ཡོང་བའི་རེ་ཞུ་དང་།  མི་ལོ་ ༦༠ ལྷག་རིང་བོད་ནང་བོད་མི་རྣམས་ཀྱིས་རང་ལུས་མེར་བསྲེགས་གཙོས་རྒྱ་ནག་གཞུང་ལ་ཞི་རྒོལ་རྒྱུན་མ་ཆད་པར་གནང་བཞིན་པ་རྣམས་ལ་རྒྱ་ནག་དབུས་སའི་དཔོན་རིགས་ཁག་གིས་དཔྱད་ཞིབ་མཐིལ་ཕྱིན་པ་ཞིག་བྱས་ཏེ། དོན་ཕན་ལྡན་པའི་བོད་རྒྱ་གཉིས་སྨན་ཡོང་ཕྱིར་ཞི་མོལ་གྱི་ལས་དོན་འཕྲལ་དུ་འགོ་འཛུགས་དགོས་པ་བཅས་རེད་འདུག

དེ་བཞིན་ཟླ་འདིའི་ཕྱི་ཚེས་ ༨ ཉིན་བཞུགས་སྒར་ཁུལ་གྱི་གཞུང་འབྲེལ་མིན་པའི་ཚོགས་སྡེ་ཁག་ལྔ་ཡི་གོ་སྒྲིག་འོག མེག་གྷན་ཁྲོམ་གཞུང་དུ་འདས་པོ་དམ་པ་ཚེ་དབང་ནོར་བུ་ལགས་ཀྱི་ཆེད་དུ་གདུང་སེམས་མཉམ་སྐྱེད་ཀྱི་མར་མེ་ཁྲོམ་སྐོར་གནང་ཡོད་པ་དང་། སྐབས་དེར་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམ་ཚེ་རིང་ལགས་ཀྱིས་བོད་ནང་མདུན་ལམ་བཟང་པོ་དང་མཚན་སྙན་ཡོད་པའི་གཞས་པ་ཁོང་ལྟ་བུས་སྐུ་ལུས་ཞུགས་འབུལ་གནང་དགོས་བྱུང་བ་དེས་བོད་ནང་གནས་སྟངས་ཛ་དྲག་པོ་ཇི་ཙམ་ཡོད་པ་གསལ་པོ་མཚོན་ཐུབ་ཀྱི་ཡོད་སྐོར་བརྗོད་ཡོད་པ་རེད།

བོད་ཀྱི་ན་གཞོན་གཞས་པ་ཚེ་དབང་ནོར་བུ་ལགས་བོད་ལྗོངས་སློབ་གྲྭ་ཆེན་མོ་ནས་སློབ་མཐར་ཕྱིན་ཞིང་། ཕྱི་ལོ་ ༢༠༡༤ ལོར་རྒྱ་ནག་གི་གྲོང་ཁྱེར་ཀོང་ཏུང་སྲུང་སྐར་བརྙན་འཕྲིན་ (Guangdong Satellite TV) ལས་རིམ་ནང་རྒྱ་ནག་ནང་གི་བུ་ཡག་པོ་ (Good Boys in China) ཟེར་བའི་གཞས་ཀྱི་འགྲན་བསྡུར་དུ་ཞུགས། ཁོང་རྒྱ་ནག་རྒྱལ་ཡོངས་ཀྱི་གླུ་གཞས་སྒྱུ་རྩལ་གྱི་སྡིངས་ཆ་མང་པོའི་སྟེང་མཉམ་ཞུགས་བྱས་ཡོད་ཀྱང་། ཁོང་གིས་སྐབས་མང་པོའི་རིང་རང་ཉིད་ཀྱི་མིང་བོད་ཡིག་ནང་འབྲི་དགོས་པ་དང་བོད་གཞས་བཏང་བ་སོགས་ལ་རྒྱ་རིགས་དཔྱད་འདེམས་པ་དང་རྒྱ་ནག་གཞུང་གིས་མི་འདོད་པའི་རྣམ་བསྒྱུར་བསྟན་ཡོད་པ་རེད་ལ། དམ་པ་ཁོང་ནི་ནུབ་བརྒྱུད་སྡེ་ཚན་ནང་གི་རྩེ་ཕུད་སྒྱུ་རྩལ་བ་ ༡༢ ཀྱི་ཁོངས་སུ་ཚུད་པ་དང་། རྒྱ་ནག་རྒྱལ་ཡོངས་སུ་རྩེ་ཕུད་ ༤༨ ཁོངས་སུ་འདེམས་སྒྲུག་བྱུང་འདུག ཕྱི་ལོ་ ༢༠༡༧ ལོར་རོལ་དབྱངས་ཀྱི་རྒྱལ་ཡོངས་རྣམ་དཔྱོད་འགྲན་བསྡུར་སང་ཉིན་གྱི་བུ་ (The Son of Tomorrow) ཞེས་པའི་རྒྱ་ནག་རྒྱལ་ཡོངས་ཀྱི་འགྲན་སྡུར་ནང་ལ་མཉམ་ཞུགས་སྐབས་རྩེ་ཕུད་ ༩ པའི་ཁོངས་སུ་ཚུད། ཁོང་གིས་དེང་དུས་ཀྱི་གླུ་གཞས་མང་པོ་བཏང་བའི་ནང་། <<རྩམ་པ།>> དང་། <<གཟབ་མཆོར།>> <<བྱང་ཐང་ལ་བལྟ་བའི་མིག>> <<རང་མ་གཏོགས།>> <<ཁྱིམ་དུ་ལོག>> ཅེས་པ་སོགས་མང་པོ་བཏང་ཡོད་པས་བོད་ཙམ་མ་ཟད། རྒྱ་ནག་སྐམ་སའི་ནང་དུའང་སྐད་གྲགས་ཆེན་པོ་ཡོད་འདུག

གཞས་པ་དམ་པ་ཚེ་དབང་ནོར་བུ་ལགས་ནི་ཕྱི་ལོ་ ༡༩༩༦ ལོར་བོད་ཀྱི་ནག་ཆུ་གྲོང་ཁྱེར་དུ་སྐྱེས་པ་དང་ད་ལྟ་རང་ལོ་ ༢༦ ཡིན་པ་རེད། ཁོང་གི་པ་ལགས་དཔལ་མགོན་རྫོང་ནས་ཡིན་པ་དང་མིང་ལ་ཆོས་རྒན་ཞུ་ཡི་ཡོད་ཅིང་ནག་ཆུ་གྲོང་ཁྱེར་ཟློས་གར་ཚོགས་པའི་དགེ་རྒན་ཡིན་འདུག ཁོང་རྒྱ་ནག་རྒྱལ་ཡོངས་ཀྱི་རིམ་པ་དང་པོའི་གཞས་གདངས་རྩོམ་པ་པོ་དང་རོལ་དབྱངས་མཁས་པ་ཞིག་ཡིན་པ་མ་ཟད། ཨ་མ་ལགས་བོད་ཀྱི་གཞས་མ་གྲགས་ཅན་སོག་ཤོད་བསོད་ནམས་དབང་མོ་ཡིན་པ་དང་། ཆབ་སྲིད་བཙོན་པ་སོག་མཁར་བློ་གྲོས་རྒྱ་མཚོ་ནི་སྐུ་གཤེགས་པ་རྒྱལ་གཅེས་དཔའ་བོ་ཚེ་དབང་ནོར་བུ་ལགས་ཀྱི་ཨ་ཞང་ཡིན་འདུག

གསར་འགོད་པ། སྐལ་བཟང་སྦྱིན་པ།