བསམ་བློ་དང་སེམས་ཁམས་བདེ་ཐང་གི་སྐོར་ལ་བགྲོ་གླེང་ཚོགས་འདུ་ཞིག་འཚོག་བཞིན་འདུག

འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་བོད་མི་ཚོ་སྤྱི་ཚོགས་འཁྲུག་ཆ་དོད་པོའི་ནང་དུ་སྡོད་ཀྱི་ཡོད་པར་བརྟེན་མི་ཡིན་པའི་ཆ་ནས་སེམས་ཀྱི་ནང་དུ་དཀའ་ངལ་ཡོང་གི་ཡོད་པར་བརྟེན་དེ་དག་ལ་གདོང་ལེན་བྱ་རྒྱུའི་ཆེད་དུ་ཐབས་ལམ་འཚོལ་དགོས་ཀྱི་ཡོད་སྐོར་གསུངས་སོང་།

དེ་རིང་ཕྱི་ཚེས་ ༨ ནས་ ༡༠ བར་དྷ་ས་བོད་ཀྱི་གསོལ་མགྲོན་ཁང་དུ། བོད་ཀྱི་སེམས་ཁམས་རིག་པའི་ཚོགས་པ་དང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་གཉིས་ཟུང་འབྲེལ་ཐོག་བསམ་བློ་དང་སེམས་ཁམས་བདེ་ཐང་གི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་འཚོག་བཞིན་འདུག་ལ། བོད་ཀྱི་སེམས་ཁམས་རིག་པའི་ཚོགས་པ་ཡི་ཚོགས་མི་བསྟན་འཛིན་གྲགས་པ་ལགས་ཀྱིས། དེ་རིང་ང་ཚོས་བསམ་བློ་དང་སེམས་ཁམས་བདེ་ཐང་གི་ཚོགས་འདུ་འཚོག་དགོས་པའི་རྒྱུ་མཚན་ནི། ང་ཚོའི་སྤྱི་ཚོགས་ནང་ལ་སེམས་ཀྱི་དཀའ་ངལ་དང་སེམས་ཀྱི་སྡུག་བསྔལ་ཅན་ཡོད་རེད། འོན་ཀྱང་ང་ཚོ་བོད་པའི་སྤྱི་ཚོགས་ནང་སེམས་ཁམས་རིག་པ་ཐོན་ནས་དེ་ལ་ཉམས་ཞིབ་དང་དཔྱད་ཞིབ་བྱེད་མཁན་དམིགས་བསལ་གྱིས་བྱུང་མེད་པ་ལྟ་བུ་རེད། ང་ཚོའི་སྤྱི་ཚོགས་ནང་སེམས་ཀྱི་དཀའ་ངལ་བཤད་ཐུབ་ཀྱི་མེད་པའི་དཀའ་ངལ་འཕྲད་ཀྱི་ཡོད་པ་རེད། དེར་བརྟེན་དཀའ་ངལ་དེ་དག་མེད་པ་བཟོ་སླད། ཚོགས་འདུ་དང་བགྲོ་གླེང་སོགས་བརྒྱུད་སོ་སོའི་སེམས་ཀྱི་དཀའ་ངལ་དེ་དག་བཤད་ཆོག་གི་ཡོད་པའི་གནས་སྟངས་འགྲེལ་བརྗོད་དང་། ད་ལྟའི་ཆར་བོད་ཕྲུག་མང་པོ་ཞིག་གིས་མཐོ་སློབ་ཁག་ཏུ་སེམས་ཁམས་རིག་པའི་སྐོར་སྦྱོང་གི་ཡོད་པ་དང་། ཉམས་ཞིབ་བྱེད་མཁན་ཡང་ཡོད་སྟབས། ཁོ་ཚོས་ཉམས་ཞིབ་དང་དཔྱད་ཞིབ་གང་བྱས་པའི་བརྗོད་གཞིའི་ཐོག་གླེང་སློང་བྱེད་སའི་ཁོར་ཡུག་བསྐྲུན་ཏེ། བོད་པའི་སྤྱི་ཚོགས་ནང་དུ་ཕྱིན་ནས་ཕ་མས་ཕྲུ་གུར་གསོ་སྐྱོང་བྱེད་སྟངས་དང་། སེམས་ཀྱི་དཀའ་ངལ་གྱི་ཐོག་ལ་སྐད་ཆ་བཤད་པ་གཅིག་པུ་མིན་པར་ཁ་ཡོད་ལག་ཡོད་ཀྱིས་འགྱུར་བ་གང་ནས་གཏོང་དགོས་པ་དང་ཕན་ཐོགས་ག་རེ་ཡོང་གི་ཡོད་མེད་སོགས་བོད་པའི་སྤྱི་ཚོགས་ལ་ཕན་ཐོགས་པའི་ཆེད་དུ་ཁོར་ཡུག་བསྐྲུན་པ་ཡིན་སྐོར་བརྗོད་སོང་།

དེ་ནས་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས། དབྱངས་སྒྲོན་ལགས་དང་ལས་རོགས་ཚོས་རྒྱ་གར་རྒྱལ་ཡོངས་སུ་ཡོད་པའི་བོད་པ་རྣམས་ལ་སེམས་ཁམས་རིག་པའི་དཔྱད་ཞིབ་ཀྱི་ཐོག་ནས་སྤྱི་ཚོགས་ཀྱི་ནང་ལོགས་ལ་སེམས་ཁམས་ཀྱི་དཀའ་ངལ་ག་ཚོད་ཡོད་སྐོར་ཐད་ཞིབ་འཇུག་ཅིག་བྱས་ཟིན་པ་རེད་ལ། མུ་མཐུད་དུ་བྱེད་ཀྱི་ཡོད་པ་རེད། ལྷོ་ཕྱོགས་ལ་སེམས་ཁམས་ཀྱི་འབྲེལ་མཐུད་པ་གཅིག་བསྐོ་བཞག་བྱས་ཏེ། ལྷོ་ཕྱོགས་གཞིས་ཆགས་ལྔའི་ནང་སེམས་ཁམས་དཀའ་ངལ་ཡོད་མཁན་དེ་དག་སྨན་ཁང་ལ་བསྟེན་གཏུག་བྱ་རྒྱུ་དང་བསླབ་བྱ་བརྒྱག་རྒྱུའི་ཆེད་དུ་སེམས་ཁམས་རིག་པ་ཐོན་པ་ཞིག་བསྐོ་བཞག་བྱས་ཡོད་པ་རེད། དེ་སྔ་ང་ཚོས་སེམས་ཁམས་ཀྱི་དཀའ་ངལ་དེ་ཆུང་ཆུང་ཞིག་ལ་བརྩི་བའི་ལུགས་སྲོལ་འདུག ང་ཚོའི་སེམས་ཀྱི་དཀའ་ངལ་དེ་དག་རྒྱུ་དང་རྐྱེན་མང་པོ་ཞིག་གིས་ཡོང་གི་ཡོད་པར་བརྟེན། རྒྱུ་དང་རྐྱེན་དེ་དག་དོ་བདག་སོ་སོས་ཁ་ནས་ལབ་ཏེ་ངོས་འཛིན་ཐུབ་པ་དང་དེ་དག་བཅོས་ཐབས་བྱ་དགོས་ཀྱི་ཡོད་པ་རེད། ཕྱི་ལོ་ ༢༠༡༩ ལོ་ནས་འཕྲོད་བསྟེན་ལས་ཁུངས་ཀྱི་ངོས་ནས་ལུས་ཀྱི་འཕྲོད་བསྟེན་གལ་ཆེན་པོ་ཡིན་པ་ནང་བཞིན་སེམས་ཀྱི་འཕྲོད་བསྟེན་གལ་ཆེན་པོ་ཡིན་པ་ངོས་འཛིན་བྱེད་ཀྱི་ཡོད་པ་རེད། ཏོག་དབྱིབས་གཉན་རིམས་ཀྱི་རྐྱེན་གྱིས་བོད་པའི་སྤྱི་ཚོགས་ནང་སེམས་ཁམས་ཀྱི་དཀའ་ངལ་འཕྲད་པ་མང་པོ་བྱུང་ཡོད་པ་རེད། ད་ལྟའི་སྤྱི་ཚོགས་ནང་ཆབ་སྲིད་ཀྱི་འཁྲུག་ཆ་དོད་པོ་དང་འཕྲུལ་ཆས་ཀྱི་འཁྲུག་ཆ་དོད་པོ། དེ་བཞིན་ཤེས་བྱ་ཡོན་ཏན་གྱི་འགྲན་སྡུར་དང་དཔལ་འབྱོར་གྱི་འཁྲུག་ཆ་དོད་པོའི་ནང་སེམས་མི་སྐྱིད་པ་ཆགས་པ་མང་པོ་ཡོད་པ་རེད། སྤྱི་ཚོགས་འཁྲུག་ཆ་དོད་པོའི་ནང་དུ་སྡོད་ཀྱི་ཡོད་པར་བརྟེན། མི་ཡིན་པའི་ཆ་ནས་སེམས་ཀྱི་ནང་དུ་དཀའ་ངལ་ཡོང་གི་ཡོད་པ་རེད། དེར་བརྟེན་དེ་དག་ལ་གདོང་ལེན་བྱ་རྒྱུའི་ཆེད་དུ་ཐབས་ལམ་འཚོལ་དགོས་ཀྱི་ཡོད་པ་རེད། ཅེེས་གསུངས་སོང་།

དེ་རིང་ཉིན་རྒྱབ་ཏུ་སེམས་ཁམས་རིག་པའི་འབུམ་རམས་པ་བོད་རིགས་བུད་མེད་ཀུན་དགའ་ནོར་འཛོམས་ལགས་དང་། རྒྱ་གར་གྱི་སེམས་ཁམས་རིག་པའི་སྨན་པ་ (Prathima Murthy)ལགས་གཉིས་ཀྱིས་སེམས་ཁམས་ཀྱི་དཀའ་ངལ་རྟོགས་ཐབས་ཀྱི་ཐོག་གཏམ་བཤད་གནང་རྒྱུ་དང་། སེམས་ཁམས་རིག་པར་སློབ་ཆེད་བྱེད་མཁན་སློབ་ཕྲུག་གསུམ་གྱིས་དེ་འབྲེལ་གཏམ་བཤད་གནང་གི་ཡོད་འདུག སང་ཉིན་ཡོངས་དགེ་མི་འགྱུར་རིན་པོ་ཆེ་མཆོག་དང་རྒྱ་གར་གྱི་སེམས་ཁམས་རིག་པའི་སྨན་པ་ (Abhijit Nadkarni) ལགས་རྣམ་གཉིས་ཀྱིས། སེམས་ཁམས་ཀྱི་དཀའ་ངལ་འཕྲད་པའི་སྐབས་གདོང་ལེན་ཇི་ལྟར་བྱ་དགོས་མིན་ཐད་གསུང་བཤད་གནང་རྒྱུ་དང་། དགེ་བཤེས་རྡོ་རྗེ་དགྲ་འདུལ་ལགས་ཀྱིས་སེམས་ཁམས་རིག་པའི་སྐོར་གསུང་བཤད་གནང་རྒྱུ་ཡིན་འདུག ཉིན་རྒྱབ་ཏུ་སློབ་ཕྲུག་ཁག་ཅིག་ནས་དེ་འབྲེལ་གཏམ་བཤད་གནང་འཆར་ཡོད་འདུག ཉིན་གསུམ་པར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སེམས་ཁམས་རིག་པའི་ཚན་པ་དང་སྨན་རྩིས་ཁང་གི་སེམས་ཁམས་རིག་པའི་ཚན་པ་གཉིས་ཀྱི་ལས་བྱེད་ནས་ཚན་པ་ངོ་སྤྲོད་སོགས་གནང་རྒྱུ་དང་། ཉིན་རྒྱབ་ཏུ་བོད་པའི་སྤྱི་ཚོགས་ནང་སེམས་ཁམས་རིག་པའི་སྐོར་གོ་རྟོགས་སྤེལ་ཐབས་སྐོར་བགྲོ་གླེང་གནང་རྒྱུ་བཅས་ཡིན་འདུག 

གསར་འགོད་པ། བསྟན་འཛིན་ཕུར་བུ།