རྫ་སེར་ཤུལ་རྫོང་ཁོངས་ཀྱི་སྒེར་བཙུགས་སློབ་གྲྭ་ཁག་ཅིག་སྒོ་བརྒྱབ་ཟིན་འདུག

རྫ་སེར་ཤུལ་རྫོང་ཁོངས་ཀྱི་སྒེར་བཙུགས་སློབ་གྲྭ་ཁག་ཅིག་སྒོ་བརྒྱབ་ཟིན་པ་དང་སེལ་ཤུལ་ཁྲི་ཟུར་རིན་པོ་ཆེའི་སློབ་གྲྭ་ཞིག་དང་བླ་མ་དངོས་གྲུབ་རིན་པོ་ཆེའི་དྭ་ཕྲུག་སློབ་གྲྭ་ཡི་སློབ་ཕྲུག་རྣམས་ཀྱང་སྲིད་གཞུང་གི་སློབ་གྲྭར་གཏོང་དགོས་པའི་བཙན་བཀའ་འབྱོར་ཡོད་འདུག

འབྲེལ་ཡོད་གནས་ཚུལ་མཁོ་སྤྲོད་པ་ཞིག་གིས་འདི་གའི་གསར་འགོད་པར། སེར་ཤུལ་ཁྲི་ཟུར་རིན་པོ་ཆེའི་སློབ་གྲྭ་ཞིག་དང་བླ་མ་དངོས་གྲུབ་མཆོག་གི་དྭ་ཕྲུག་སློབ་གྲྭ་གཉིས་ཀྱི་སློབ་ཕྲུག་རྣམས་སྲིད་གཞུང་གི་སློབ་གྲྭར་གཏོང་དགོས་པའི་བཀའ་བཏང་ཡོད་པ་ལྟར། འདི་ལོའི་ཕྱི་ཟླ་ ༤ ཚེས་ ༢༠ ནང་ཚུད་དུ་སློབ་ཕྲུག་རྣམས་སྲིད་གཞུང་གི་སློབ་གྲྭ་ཁག་ཏུ་ཐོ་འགོད་ཟིན་པ་དགོས་སྐོར་བརྗོད་ཡོད་ཀྱང་། ད་ལྟའི་ཆར་སློབ་གྲྭ་སྒོ་བརྒྱབ་མེད་པ་དང་། ཉིན་ཤས་ནས་རྒྱ་ནག་དབུས་གཞུང་གི་གནད་ཡོད་མི་སྣ་ཞིག་ས་གནས་སུ་བསླེབ་ཀྱི་ཡོད་སྐོར་དང་། སེར་ཤུལ་ཁྲི་ཟུར་རིན་པོ་ཆེའི་ལས་རིགས་ལག་རྩལ་སློབ་གྲྭ་ཆེན་པོ་ཞིག་སེར་ཤུལ་དུ་ཡོད་པ་དེར་རང་ལོ་ ༡༨ ནས་ ༢༥ བར་གྱི་སློབ་གཉེར་བ་ཡོད་ལ། གོང་རིམ་ནས་སློབ་གྲྭ་དེ་ཆེད་འཛུགས་གནང་ཆོག་པའི་བཀའ་འཁྲོལ་ཆ་ཚང་སྤྲད་པའི་ཡིག་ཆ་ཡོད་སྐོར་བརྗོད་བྱུང་།

ཨོ་གླིང་དུ་གནས་བཞུགས་འབྲེལ་ཡོད་ཅིག་གིས་འདི་གའི་གསར་འགོད་པར། རྫ་ཆུ་ཁའི་རྫ་དྲེལ་དཀར་དགོན་པ་ལའང་དྭ་ཕྲུག་སློབ་གྲྭ་ཞིག་ཡོད་ཀྱང་། ལོ་སྔོན་མར་ས་གནས་སྲིད་གཞུང་གིས་སློབ་ཕྲུག་ཚང་མ་གཞུང་བཙུགས་སློབ་གྲྭར་བཙན་གྱིས་བཅུག་སྟེ། དྭ་ཕྲུག་སློབ་གྲྭ་དེ་ལག་རྩལ་སྦྱོང་ས་ཞིག་ཏུ་བསྒྱུར་ཡོད་པ་དང་། སྐབས་དེར་ས་གནས་མི་མང་གིས་དྭ་ཕྲུག་སློབ་གྲྭ་སོར་འཇོག་དགོས་པའི་རེ་སྐུལ་ཇི་ལྟར་བྱས་ཀྱང་གོང་རིམ་གྱི་བཀའ་ཡིན་ལུགས་བརྗོད་དེ་ཉན་འཇོག་བྱས་མེད་སྐོར་དང་། དེ་དང་དེ་འདྲ་བའི་སེར་ཤུལ་རྫོང་ཁོངས་ཀྱི་སྒེར་བཙུགས་སློབ་གྲྭ་ཁག་ཅིག་སྒོ་བརྒྱབ་ཟིན་ཡོད་སྐོར་བརྗོད་བྱུང་།

ཡང་བོད་ནང་གི་འབྲེལ་ཡོད་གནས་ཚུལ་མཁོ་སྤྲོད་པ་ཞིག་གིས། སྤྱིར་བཏང་ན་ནིང་ཞིག་ནས་བཟུང་སེར་ཤུལ་རྫོང་ཁོངས་ཀྱི་སྒེར་གཉེར་སློབ་གྲྭ་ཁག་སྒོ་བརྒྱབ་སྟེ་སློབ་ཕྲུག་རྣམས་སྲིད་གཞུང་གི་སློབ་གྲྭར་གཏོང་དགོས་པའི་བཀའ་རྒྱ་རིམ་པ་ཞིག་བསླེབས་ཡོད་པ་མ་ཟད། ཁྱིམ་བདག་ཚོར་སོ་སོའི་བྱིས་པ་རྣམས་སྲིད་གཞུང་གི་སློབ་གྲྭར་གཏོང་དགོས་པའི་སྐུལ་འདེད་ཚོགས་འདུ་སོགས་བསྡུས་ཡོད་པ་དང་། ས་གནས་ཀྱི་སློབ་གྲྭ་ཆུང་ཆུང་ཁག་ཅིག་སྔོན་མ་ནས་སྒོ་བརྒྱབ་ཚར་ཡོད་སྐོར་དང་། གོང་རིམ་གྱི་བཀའ་བཀོད་ལ་མ་མཉན་ན་མཇུག་འབྲས་ཡག་པོ་ཞིག་མེད་པའི་ཉེན་བརྡའང་བཏང་ཡོད་སྐོར་བརྗོད་བྱུང་།

ཡང་གནས་ཚུལ་མཁོ་སྤྲོད་པ་དེས། བླ་མ་དངོས་གྲུབ་མཆོག་ནས་ས་གནས་ཀྱི་ཉམ་ཐག་དྭ་ཕྲུག་ཚོར་དམིགས་ཏེ་དྭ་ཕྲུག་སློབ་གྲྭ་དེ་གསར་འཛུགས་གནང་ཡོད་པ་དང་། ད་ལྟའི་ཆར་དྭ་ཕྲུག་སློབ་གྲྭ་དེར་ཁྱོན་བྱིས་པ་ ༡༦ ཙམ་ཡོད་ཅིང་། བྱིས་པ་རྣམས་རོང་འབྲོག་ས་ཁུལ་ནས་ཡོང་བའི་ཕ་མ་གཉིས་ཀ་མེད་མཁན་དང་ཡང་ན་ཕ་མ་གཉིས་ལས་གཅིག་ཡོད་མཁན། ཡང་ཕ་མ་གཉིས་ཀས་བདག་པོ་མ་བརྒྱབ་པའི་བདག་མེད་བྱིས་པ་བཅས་ཡོད་སྐོར་བརྗོད་བྱུང་།

ཕྱི་ལོ་ ༢༠༡༨ ཟླ་ ༧ པའི་ནང་རྒྱ་ནག་གཞུང་གིས་རྫ་ཆུ་ཁའི་དགོན་པ་མང་པོ་ཞིག་གི་རང་ལོ་ ༡༥ མན་གྱི་གྲྭ་ཆུང་རྣམས་བཙན་ཐབས་ཀྱིས་རྒྱ་ནག་གཞུང་གཉེར་སློབ་གྲྭ་ཁག་ནང་འགྲོ་དགོས་པའི་བཀའ་རྒྱ་བཏང་སྟེ་དགོན་པ་ནས་ཕྱིར་འཕུད་བཏང་ཡོད་པ་དང་། གལ་ཏེ་གྲྭ་ཆུང་རྣམས་སློབ་གྲྭའི་ནང་མ་སོང་བ་ཡིན་ན་དགོན་པ་སྒོ་བརྒྱབ་སྟེ། དགོན་པའི་བླ་མ་དང་ལས་སྣེ། དགེ་རྒན་དང་ཕ་མ་སོགས་ཚང་མར་ཁྲིམས་ཆད་གཅོད་རྒྱུ་ཡིན་པའི་འཇིགས་སྐུལ་བྱས་ཏེ། གྲྭ་ཆུང་རྣམས་ས་གནས་སྲིད་གཞུང་གི་སློབ་གྲྭར་བཙན་གྱིས་བཅུག་པའི་གནས་ཚུལ་བྱུང་ཡོད་པ་རེད།

རྒྱ་ནག་གཞུང་གིས་ཕྱི་ལོ་ ༢༠༢༥ ལོར་རྒྱའི་སྤྱི་སྐད་ཁྱབ་ཚད་རྒྱལ་ཡོངས་ཀྱི་བརྒྱ་ཆ་ ༨༥ ཟིན་དགོས་སྐོར་བསྒྲགས་ཏེ། ཕྱི་ལོ་ ༢༠༡༤ ཙམ་ནས་རྒྱ་ནག་གཞུང་གིས་བོད་ཁུལ་གྱི་བྱིས་གཉོར་ཁང་ནས་བཟུང་རྒྱ་ཡིག་རྒྱ་སྐད་གཙོ་གཉེར་གྱི་སྲིད་ཇུས་ལག་བསྟར་བྱས་ཡོད་པ་མ་ཟད། རྒྱའི་སྐད་ཡིག་ནི་རྒྱལ་ཁབ་ཀྱི་སྤྱི་སྤྱོད་སྐད་ཡིག་དང་ཕ་སྐད་མ་ཡིག་ཡིན་ཚུལ་གྱི་དྲིལ་བསྒྲགས་བྱས་ནས། བོད་ཀྱི་སྐད་ཡིག་སློབ་གཉེར་བྱེད་སའི་སློབ་གྲྭ་མང་པོ་ཞིག་བཙན་གྱིས་སྒོ་བརྒྱབ་བཅུག་གི་ཡོད་པ་ལྟར། འདར་ལོར་གཅིག་པུར་རྒྱ་ནག་གཞུང་གིས་སེང་འབྲུག་སྟག་རྩེའི་བཅའ་སྡོད་སློབ་གཙོས་མགོ་ལོག་རྨ་ཆེན་རྫོང་ནས་སློབ་གྲྭ་གསུམ་དང་། དགའ་བདེ་ནས་སློབ་གྲྭ་གཅིག གཅིག་སྒྲིལ་གྱི་སློབ་གྲྭ་གཉིས་དང་། དགེ་ལྡན་ནང་བསྟན་སློབ་གྲྭ་བཅས་ཉུང་མཐར་བོད་མིའི་སྒེར་གཉེར་སློབ་གྲྭ་བཅུ་གྲངས་ཤིག་སྒོ་བརྒྱག་ཏུ་བཅུག་ཡོད་འདུག

འབྲེལ་ཡོད་གནས་ཚུལ། རྫ་ཆུ་ཁའི་གྲྭ་ཆུང་ཚོ་དགོན་པ་ནས་ཕྱིར་འཕུད་བཏང་།

གསར་འགོད་པ་དཔལ་ལྡན་དང་ས་གནས་གསར་འགོད་པ།