དེ་རིང་༧གོང་ས་མཆོག་གིས་ཧྥི་ལི་པིན་གྱི་སྲིད་འཛིན་གསར་པ་སྐུ་ཞབས་མར་ཁོ་སི་(Ferdinand Marcos Jr) ལགས་སུ་འཚམས་འདྲིའི་གསུང་འཕྲིན་ཞིག་སྩལ་བའི་ནང་ཚང་མར་བདེ་ཐང་ཡོང་སླད་དུ་མི་སུ་ཞིག་ཡིན་རུང་འཚེ་མེད་ཞི་བ་དང་སྙིང་རྗེ་ལག་བསྟར་བྱེད་འོས་པ་ཞིག་ཡིན་པར་ཡིད་ཆེས་གནང་གི་ཡོད་སྐོར་གསུངས་འདུག
༧གོང་ས་མཆོག་ནས་ཐོག་མར་སྲིད་འཛིན་གསར་པར་འཚམས་འདྲི་མཛད་པ་དང་སྦྲགས། ངོས་ནས་ཁྱེད་ཀྱིས་ཧྥི་ལི་པིན་མི་རིགས་དང་དམིགས་བསལ་གྱིས་གྲངས་ཉུང་མི་རིགས་ཀྱི་རེ་བ་དང་མངོན་འདོད་སྒྲུབ་པའི་སྐབས་སུ་དཀའ་ངལ་ཅི་ཞིག་འཕྲད་རུང་ཚང་མ་སྒྲུབ་ཐུབ་པའི་སྨོན་ལམ་བརྒྱག་གི་ཡིན། ཁྱེད་ཀྱིས་མཁྱེན་གསལ་ལྟར། ངོས་རང་ཧྥི་ལི་པིན་གྱི་མི་རིགས་ལ་དམིགས་བསལ་གྱིས་དགའ་པོ་ཡོད། ཕྱི་ལོ་ ༡༩༥༩ ལོར་བོད་ནས་བཙན་བྱོལ་དུ་འབྱོར་སྐབས་ངོས་ལ་ཧྥི་ལི་པིན་གྱི་རཱ་མོན་མཱག་སི་སི་གཟེངས་རྟགས་ (Ramon Magsaysay Award) ཐོབ་སྐབས། ཁོང་ཚོའི་རྒྱབ་སྐྱོར་དང་ཆིག་སྒྲིལ་གྱི་རང་བཞིན་གྱིས་དགའ་ཚོར་ཆེན་པོ་བྱུང་། ཁྱེད་ཚོའི་སྙན་གྲགས་ཅན་གྱི་མགོ་ཁྲིད་ཀྱིས་གཟེངས་རྟགས་ལ་མིང་བཏགས་ཡོད་པ་ལྟར། དུས་དེ་ནས་བཟུང་ངོས་ཀྱིས་གཞན་ཕན་གྱི་ལས་ལ་འབད་བརྩོན་བྱས་ཡིན། ཞེས་གསུངས་འདུག
མུ་མཐུད་༧གོང་ས་མཆོག་གིས། ངོས་ནས་འཚེ་མེད་ཞི་བ་དང་སྙིང་རྗེ་ལག་ལེན་བསྟར་དགོས་པའི་སྐུལ་མ་གཏོང་གི་ཡོད། དོན་དམ་དུ་ང་ཚོ་འགྲོ་བ་མི་གཅིག་གྱུར་ཡིན་པས། ང་ཚོའི་མཆེད་གྲོགས་ཕོ་མོ་རྣམས་ལ་བདེ་ཐང་ཡོང་སླད་དུ་མི་སུ་ཞིག་ཡིན་རུང་འཚེ་མེད་ཞི་བ་དང་སྙིང་རྗེ་ལག་བསྟར་བྱེད་འོས་པ་ཞིག་ཡིན་པ་ངོས་ཀྱིས་ཡིད་ཆེས་བྱེད་ཀྱི་ཡོད། ཅེས་གསུངས་འདུག
འདི་ལོའི་ཕྱི་ཟླ་ ༥ ཚེས་ ༩ ཉིན་ཕྱི་ལོ་ ༢༠༢༢ ལོའི་ཧྥི་ལི་པིན་གྱི་སྲིད་འཛིན་འོས་བསྡུའི་ཁྲོད། མར་ཁོ་སི་ལ་འོས་གྲངས་ས་ཡ་ ༣༡ ལྷག་དང་སྲིད་འཛིན་གཞོན་པ་ལེ་ནི་ (Leni Robredo) ལ་འོས་གྲངས་ས་ཡ་ ༡༤ ལྷག་ཐོབ་སྟེ་མར་ཁོ་སི་ལ་རྒྱལ་ཁ་ཐོབ་ཡོད་པ་དང་། ཁ་སང་སྲིད་འཛིན་གྱི་ལས་འཁུར་དམ་བཅའ་ཕུལ་ཡོད་འདུག
སྐུ་ཞབས་མར་ཁོ་སི་ (Ferdinand Marcos Jr) ལགས་ནི། ཧྥི་ལི་པིན་གྱི་སྲིད་འཛིན་སྐབས་ ༡༠ པ་སྟེ་ལོ་ངོ་ ༢༡ ལྷག་རིང་སྲིད་དབང་བཟུང་མྱོང་བའི་སྲིད་ཟུར་ཨེ་ཌིར་ལིན་མར་ཁོ་སི་(་Ferdinand Emmanuel Edralin Marcos Sr) ཡི་བུ་གཅིག་པུ་དེ་ཡིན་འདུག་ལ། དེ་སྔོན་ཕྱི་ལོ་ ༢༠༡༠ ནས་ ༢༠༡༦ བར་དུ་གྲོས་ཚོགས་གོང་མའི་འཐུས་མི་གནང་ཡོད་འདུག
གསར་འགོད་པ། བསྟན་འཛིན་ཕུར་བུ།
