ཡུ་རོབ་ཀྱི་རྒྱལ་ཁབ་གཉིས་རྒྱ་ནག་གི་ཚོང་འབྲེལ་ལྷན་ཚོགས་ཁོངས་ནས་ཕྱིར་ཐོན།

རྒྱ་ནག་གཞུང་གི་ཡུ་རོབ་དཀྱིལ་ཤར་ཁུལ་གྱི་ཚོང་འབྲེལ་རྒྱ་སྐྱེད་ཀྱི་ཚོགས་ཁོངས་སུ་ཡོད་པའི་ཨེ་སི་ཁྲོ་ནི་ཡ་དང་ལ་ཏི་ཝ་ཡ་གཉིས་ནས་ཡུ་རོབ་ཀྱི་དམངས་གཙོའི་ལམ་ལུགས་དང་རང་དབང་གི་ཁྲིམས་སྒྲིག་ལ་བརྩི་སྲུང་བྱས་ཏེ་རྒྱ་ནག་གི་ཚོང་འབྲེལ་ཁོངས་ནས་ཕྱིར་ཐོན།

Estonia and Latvia leave China’s 16+1 trade group for China CEEC

ཁ་སང་ཕྱི་ཚེས་ ༡༡ ཉིན་ཡུ་རོབ་རྒྱལ་ཁབ་ཨེ་སི་ཁྲོ་ནི་ཡ་(Estonia)དང་ལ་ཏི་ཝ་ཡ་(Latvia)གཉིས་ཀྱིས་རྒྱ་ནག་གི་ཡུ་རོབ་དཀྱིལ་ཤར་ཚོང་འབྲེལ་ལྷན་ཚོགས(China-CEEC)ཟེར་བའི་ཚོགས་ཁོངས་ནས་ཕྱིར་འཐོན་རྒྱུ་ཡིན་སྐོར་བསྒྲགས་འདུག་པ་མ་ཟད། དྲ་ལམ་བརྒྱུད་རྒྱལ་ཁབ་གཉིས་ཀྱི་ཕྱི་འབྲེལ་བློན་ཆེན་ནས་ཕྱིར་ཐོན་པའི་ཐད་གསལ་འདེབས་བྱས་པའི་ནང་། རྒྱ་ནག་གིས་ཡོ་རོབ་རྒྱལ་ཁབ་ཁག་དང་མཉམ་འབྲེལ་བྱས་པ་ཡིན་ན། ཕྱོགས་གཉིས་ཀྱི་ཁེ་ཕན་དང་། རྒྱལ་སྤྱིའི་ཁྲིམས་ལུགས། འགྲོ་བ་མིའི་ཐོབ་ཐང་། རྒྱལ་སྤྱིའི་བཀོད་ཁྱབ་སྒྲིག་གཞི་ལ་བརྩི་བཀུར་བྱེད་ཐུབ་པ་ཞིག་ཡིན་དགོས། ཞེས་བརྗོད་འདུག

ཡུ་རོབ་རྒྱལ་ཁབ་ཁག་གིས་རྒྱ་ནག་ལ་ཚོང་འབྲེལ་བྱས་ནས་ལོ་ ༡༠ ཕྱིན་པའི་དུས་ཡུན་ནང་དུ། རྒྱ་ནག་གི་ཚོང་འབྲེལ་མ་རྐང་འཛུགས་བསྐྲུན་བྱས་པར་འཕེལ་རྒྱས་ཆེན་པོ་ཕྱིན་ཡོད་ན་ཡང་། ལོ་སྔོན་མ་ནས་བཟུང་རྒྱ་ནག་གི་ཚོང་ལས་མཉམ་འབྲེལ་གྱིས་ཡུ་རོབ་རྒྱལ་ཁབ་ཁག་གི་དམངས་གཙོའི་ཁོར་ཡུག་ལ་དོ་ཕོག་འགྲོ་བཞིན་ཡོད་པའི་གནས་ཚུལ་འབྱུང་མུས་ཡིན་པ་དང་། ན་ནིང་ལི་ཐུའུ་ནི་ཡ་རྒྱལ་ཁབ་ཏུ་ཐའེ་ཝན་གྱི་དོན་གཅོད་ཁང་གསར་འཛུགས་བྱས་པའི་རྐྱེན་གྱིས། རྒྱ་ནག་གིས་གནོན་ཤུགས་སྤྲད་དེ་སུན་གཙེར་མང་པོ་བཟོས་མཐར། ལི་ཐུའུ་ནི་ཡས་རྒྱ་ནག་དང་ཚོང་འབྲེལ་མཚམས་འཇོག་དགོས་ཁེལ་ཡོད་པ་རེད།

རྒྱལ་སྤྱིའི་ཉམས་ཞིབ་པ་ཚོས། ཐེངས་འདིར་རྒྱལ་ཁབ་གཉིས་ཀྱིས་རྒྱ་ནག་ལ་ཚོང་འབྲེལ་མཚམས་འཇོག་བྱས་པའི་རྒྱུ་མཚན་ནི། རྒྱ་ནག་གིས་ཨུ་རུ་སུར་རྒྱབ་སྐྱོར་བྱས་ཏེ་ཡུག་ཁི་རེན་ནང་འབྱུང་བཞིན་པའི་དམག་འཁྲུག་གི་དཀའ་ངལ་དང་། ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་ཕི་ལོ་སི་མཆོག་གི་ཐའེ་ཝན་ནང་གི་གཟིགས་སྐོར་གྲུབ་རྗེས། རྒྱ་ནག་གིས་ཐའེ་ཝན་གླིང་ཕྲན་ལ་འཇིགས་སྐུལ་བྱེད་བཞིན་ཡོད་པའི་གནས་སྟངས། དེ་བཞིན་རྒྱ་ནག་གིས་ཡུ་རོབ་ཀྱི་དམངས་གཙོའི་ལམ་ལུགས་དང་རང་དབང་གི་ཁྲིམས་སྒྲིག་ལ་གཏོར་བརླག་གཏོང་གི་ཡོད་པའི་བྱ་སྤྱོད་་ལ་ཁ་གཏད་གཅོག་ཆེད་དུ་ཡིན་སྐོར་རྗོད་ཀྱི་འདུག

ཁ་སང་རྒྱ་ནག་ཕྱི་སྲིད་ལས་ཁུངས་ཀྱི་གསར་འགོད་གསལ་བསྒྲགས་ཤིག་གི་ཐོག་ཕྱི་འབྲེལ་མགྲིན་ཚབ་པ་ཝང་བན་པིན་གྱིས། ལི་ཐུའུ་ནི་ཡས་རྒྱ་ནག་གི་ནང་སྲིད་ལ་ཐེ་གཏོགས་བྱས་པར་ངོ་རྒོལ་མཐའ་གཅིག་ཏུ་བྱེད་ཀྱི་ཡོད། རྒྱ་ནག་གཅིག་གི་སྲིད་ཇུས་ནི་འཛམ་གླིང་གི་རྒྱལ་ཁབ་ཚང་མར་ཆབ་སྲིད་དང་འབྲེལ་ལམ་འཛུགས་པའི་རྨང་གཞི་ཡིན། ཐའེ་ཝན་གྱི་གནད་དོན་ནི་རྒྱ་ནག་ནང་ཁུལ་གྱི་གནད་དོན་ཞིག་ཡིན་པས། ལི་ཐུའུ་ནི་ཡའི་གཞུང་གིས་ཐའེ་ཝན་མཉམ་དུ་འབྲེལ་འདྲེས་ཀྱིས་རྒྱ་ནག་གཅིག་གི་སྲིད་ཇུས་གཏོར་བཤིག་དང་། ཐའེ་ཝན་རང་བཙན་གྱི་རྩ་དོན་སྒྲུབ་ཀྱི་ཡོད་པ་མཚམས་འཇོག་བྱེད་དགོས་པའི་ཐ་ཚིག་བསྒྲགས་ཡོད་སྐོར་བཤད་འདུག

Chinese Premier Wen Jiabao (L) attends a welcoming ceremony held for him by Polish Prime Minister Donald Tusk in Warsaw, Poland, April 25, 2012. (Xinhua/Pang Xinglei)

རྒྱ་ནག་གཞུང་གིས་ཚོང་ལས་རྒྱ་སྐྱེད་དང་མ་རྐང་འཕེལ་རྒྱས་གཏོང་ཆེད་ཕྱི་ལོ་ ༢༠༡༢ ལོར་ཡུ་རོབ་དཀྱིལ་ཤར་ཚོང་འབྲེལ་ལྷན་ཚོགས་(Cooperation between China and Central and Eastern European Countries)ཞེས་པའི་ཚོང་འབྲེལ་ལྷན་ཚོགས་དེ་ཧང་གྷ་རེའི་རྒྱལ་ས་བྷུ་ཌ་ཕི་སི་ཊི་(Budapest)ཟེར་བར་ཆེད་འཛུགས་བྱས་ཏེ། སྔ་རྗེས་སུ་ཚོགས་ཆེན་ཐེངས་ ༨ ཙམ་བསྡུས་་ཡོད་འདུག ད་ལྟའི་ཆར་ཚོགས་ཁོངས་སུ་ཅེག་སྤྱི་མཐུན་རྒྱལ་ཁབ་དང་གྷི་རི་སི། ཧང་གྷ་རི། ཕོ་ལན་ཌི། སིར་བྷི་ཡ། སི་ལོ་ཝ་ཁེ་ཡ་སོགས་རྒྱལ་ཁབ་ ༡༥ ཡོད་འདུག འདས་ལོར་ལི་ཐུའུ་ནི་ཡ་(Lithuania)རྒྱལ་ཁབ་ཚོགས་ཁོངས་ནས་ཕྱིར་ཐོན་དགོས་བྱུང་ཡོད་འདུག

བྱམས་པ་ཚེ་རིང་།