དམར་ཤོག་གཞུང་གིས་རྒྱ་ནག་རྒྱལ་ཡོངས་སུ་གསང་མིག་བརྙན་ཆས་ས་ཡ་ཉིས་བརྒྱ་ལྷག་བཙུགས་ཡོད་པ་དང་དེ་དག་གིས་བོད་དང་ཡུ་གུར་བ་རྣམས་མི་རིགས་གཞན་གྱི་ཁྲོད་ནས་ལོགས་སུ་ངོས་འཛིན་བྱེད་ཐུབ་ཀྱི་ཡོད་འདུག
ད་ལྟ་ཞི་ཅིན་ཕིན་གྱི་སྲིད་དབང་འོག བོད་དང་ཡུ་གུར་སོགས་གྲངས་ཉུང་མི་རིགས་ཀྱི་ས་ཁུལ་ཁག་གཙོ་བྱས་པའི་ཧོང་ཀོང་དང་ཨོ་མན། དེ་བཞིན་རྒྱ་ནག་རྒྱལ་ཡོངས་སུ་གསང་ལྟ་པར་ཆས་བཙུགས་ཏེ། མི་མང་གི་ཉིན་རེའི་འགྲོ་འདུག་སྤྱོད་གསུམ་གྱི་བྱ་སྤྱོད་ལ་ལྟ་རྟོག་ནན་མོ་བྱེད་བཞིན་ཡོད་ཀྱང་། ད་སྔ་བར་དམིགས་བསལ་རྒྱ་ནག་གཞུང་གིས་བོད་དང་ཡུ་གུར་སོགས་གྲངས་ཉུང་མི་རིགས་ལོགས་སུ་བཀར་ནས་ལྟ་རྟོག་དང་དྲག་གནོན་བྱེད་བཞིན་ཡོད་པ་ངོས་ལེན་བྱེད་ཀྱི་མེད། འོན་ཀྱང་། ཉེ་ལམ་ཨ་རིའི་དྲ་རྒྱའི་བརྙན་རིགས་འཕྲུལ་ཆས་ཞིབ་འཇུག་ཁང་ (IPVM) གིས་ད་ལྟ་རྒྱ་ནག་གཞུང་གིས་དཱ་ཧྥ་ (Dahua)འཕྲུལ་རིགས་བཟོ་བསྐྲུན་ཁང་གིས་བཟོས་པའི་གསང་མིག་བརྙན་ཆས་མི་འདྲ་བ་བཞི་བརྒྱུད། བོད་མི་དང་ཡུ་གུར་བའི་ངོ་གདོང་དང་མདོག ལོ་དང་ཕོ་མོ དེ་བཞིན་རིགས་སོགས་ངོས་འཛིན་ཐུབ་པའི་གནས་ཚུལ་ཤེས་རྟོགས་བྱུང་ཡོད་འདུག
དེ་འབྲེལ་ཨེ་ཕོག་དུས་བབ་གསར་ཁང་གིས་སྤེལ་བའི་གནས་ཚུལ་ལྟར་ན། རྒྱ་ནག་གི་གསང་མིག་བརྙན་ཆས་དེ་དག་གིས་མི་མང་འདུ་འཛོམས་དང་སྲང་ལམ། ཁྲོམ་ལམ་སོགས་ཀྱི་དཀྱིལ་ནས་ཐད་ཀར་ཡུ་གུར་བ་ངོས་བཟུང་སྟེ་འཛིན་བཟུང་བྱེད་ཐུབ་ཀྱི་ཡོད་སྟབས། ཨ་རིའི་དྲ་རྒྱའི་བརྙན་རིགས་འཕྲུལ་ཆས་ཞིབ་འཇུག་ཁང་དེས། རྒྱ་ནག་གི་མི་རིགས་དབྱེ་འབྱེད་ཀྱི་བྱ་སྤྱོད་དེ་ནི་ཧ་ཅང་ཐལ་དྲགས་པ་དང་གདུག་རྩུབ་ཅན་ཡིན་པས་འཕྲལ་དུ་མཚམས་འཇོག་དགོས་པའི་འབོད་སྐུལ་ཡང་ཞུས་འདུག་ལ། ཕྱི་ལོ་ ༢༠༢༠ ལོར་ཨ་རིའི་གྲོས་ཚོགས་འཐུས་མི་ ༡༧ ལྷག་དང་རྒྱལ་སྤྱིའི་གཞུང་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག་སོགས་ནས་རྒྱ་ནག་གཞུང་གིས་གསང་མིག་བརྙན་ཆས་བཀོལ་སྤྱོད་བགྱིས་ཏེ་ཡུ་གུར་མི་རིགས་ལ་དབྱེ་འབྱེད་དང་དྲག་གནོན་བྱེད་བཞིན་ཡོད་པའི་སྐོར་ལ་སྐྱོན་བརྗོད་རབ་དང་རིམ་པ་སྤེལ་ཡོད་ཀྱང་། རྒྱ་ནག་གཞུང་གིས་ད་སྔ་བར་གསང་མིག་བརྙན་ཆས་བེད་སྤྱོད་བྱས་པ་བརྒྱུད་མི་རིགས་དབྱེ་འབྱེད་བྱས་མེད་ཚུལ་བརྗོད་ནས་ངོས་ལེན་བྱེད་ཀྱི་མེད་པ་རེད།
ད་རེས་ཨ་རིའི་དྲ་རྒྱའི་བརྙན་རིགས་འཕྲུལ་ཆས་ཞིབ་འཇུག་ཁང་གི་ཞིབ་འཇུག་སྙན་ཐོའི་ནང་། རྒྱ་ནག་གིས་ཡུ་གུར་བ་རྣམས་མི་ཚོགས་ཁྲོད་ནས་ཐད་ཀར་ངོས་འཛིན་ཐུབ་སྐོར་བརྗོད་འདུག་ནའང་། ངོ་གདོང་དང་མདོག ལོ་དང་ཕོ་མོ དེ་བཞིན་རིགས་སོགས་ངོས་འཛིན་ཐུབ་པ་ལས་བོད་མི་རྣམས་ལའང་གཅིག་མཚུངས་ལྟ་རྟོག་དང་དྲག་གནོན་བྱེད་བཞིན་ཡོད་པར་བསྟན་པ་མ་ཟད། ཕྱི་ལོ་ ༢༠༡༧ ལོར་རྒྱ་ནག་གཞུང་གིས་བོད་ནང་ཡུན་རིང་དྲག་གནོན་སྲིད་ཇུས་ལག་བསྟར་བྱེད་མཁན་ཁྲན་ཆོན་ཀའོ་ཤིན་ཅང་རང་སྐྱོང་ཁུལ་ཟེར་བའི་དམར་ཤོག་དྲུང་ཆེར་བསྐོས་རྗེས། ཕྱི་ལོ་ ༢༠༡༨ རྒྱལ་སྤྱིའི་སྤྱི་ཚོགས་ཀྱིས་ཡུ་གུར་མི་མང་ས་ཡ་ ༢ ཙམ་བཀག་ཉར་ཁང་དུ་བཅུག་ཡོད་པའི་གནས་ཚུལ་ཤེས་རྟོགས་བྱུང་ཡོད་ཅིང་། ད་དུང་ཁྲན་ཆོན་ཀའོ་ཡིས་ཤིན་ཅང་ཁུལ་ཁྱོན་ཡོངས་ནས་རིགས་རྫས་བསྡུ་རུབ་དང་གསང་མིག་བརྙན་ཆས་སོགས་བཙུགས་ཏེ། སྐབས་དེར་ཁོས་ཡུ་གུར་མི་རིགས་ཀྱི་ཐོག་གདུག་རྩུབ་ཆེ་བའི་དྲག་པོའི་སྲིད་ཇུས་རྐྱང་ལག་བསྟར་བྱས་ཡོད་པ་དང་། ཁྲན་ཆོན་ཀའོ་ཡིས་ཡུ་གུར་མི་རིགས་རྩ་གཏོར་གྱི་སྲིད་ཇུས་སྐབས་ལྷན་དུ་ད་ལྟའི་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཝང་ཅེན་ཀྲན་ཟེར་བ་ཁོ་ཡང་ཡོད་པ་དང་། ཉེ་ལམ་ཕྱི་ཟླ་ ༩ ནང་རྒྱ་ནག་གཞུང་གིས་བོད་མིའི་རིགས་རྫས་བསྡུ་རུབ་བྱེད་བཞིན་པའི་རྒྱབ་ཀྱི་ཇུས་འདོད་པ་གཙོ་བོ་ནི་ཁྲན་ཆོན་ཀའོ་དང་ལྷན་དུ་ཡུ་གུར་མི་རིགས་ཀྱི་རིགས་རྫས་བསྡུ་རུབ་བྱེད་མཁན་དང་ད་ལྟའི་བོད་ནང་གི་དམར་ཤོག་དཔོན་རིགས་མཐོ་ཤོས་ཝང་ཅེན་ཀྲན་ཡིན་པ་གསལ་འདོན་དང་ཕྱོགས་ཡོངས་ནས་བོད་དང་ཡུ་གུར་གཉིས་ལ་རྒྱ་ནག་གཞུང་གིས་མི་རིགས་རྩ་གཏོར་གྱི་སྲིད་ཇུས་ལག་བསྟར་བྱས་དང་བྱེད་མུས་ཡིན་པ་མངོན་གསལ་ཆགས་ཡོད།
སྤྱིར་ཕྱི་ལོ་ ༢༠༡༨ ལོར་རྒྱ་ནག་གིས་གཞུང་འབྲེལ་ཐོག་ནས་སྐར་ཆ་གཅིག་གི་ནང་རྒྱ་ནག་མི་མང་ཐེར་འབུམ་ ༡།༤ ཡི་ངོ་གདོང་བཤེར་འབེབས་ཐུབ་ཀྱི་ཡོད་སྐོར་བསྒྲགས་ཡོད། ཕྱི་ལོ་ ༢༠༡༩ ལོར་རྒྱ་ནག་གི་དྲ་རྒྱའི་གསང་མིག་བརྙན་ཆས་དང་འབྲེལ་བའི་གནས་ཚུལ་རིགས་ཕྱིར་ཤོར་བ་དང་། རྒྱ་ནག་དམར་ཤོག་ཚོགས་པའི་དབང་སྒྱུར་གནས་པའི་མི་ཞིག་ཡིན་ཕྱིན། མི་རེ་རེ་ཡི་ངོ་གདོང་དང་མཛུབ་རྟགས་བཤེར་བ་ནི་ཉིན་རེའི་འཚོ་བའི་ཆ་ཤས་ཤིག་ཏུ་གྱུར་ཡོད་པ་མ་ཟད། རྒྱ་ནག་གཞུང་གིས་རྒྱ་ནག་རྒྱལ་ཡོངས་སུ་ཁྱོན་གསང་མིག་བརྙན་ཆས་ས་ཡ་ ༢༠༠ ལྷག་བཙུགས་ཏེ། མགོ་བཟོ་གྲ་ལྡན་པའི་ཕྱུག་བདག་ཁག་གཙོས་པའི་རྐུན་མ་དང་དྲག་པོའམ་ངོ་རྒོལ་ལས་འགུལ་རིགས། དེ་བཞིན་དམར་ཤོག་གཞུང་དང་འགལ་ཟླ་ཅན་གྱི་མི་སྣ་སོགས་ཀྱི་བར་ལྟ་རྟོག་བྱས་དང་བྱེད་མུས་ཡིན་འདུག་ལ། དཱ་ཧྥ་འཕྲིལ་རིགས་བཟོ་བསྐྲུན་ཁང་ནི་རྒྱ་ནག་གཞུང་འབྲེལ་གྱི་འཕྲིལ་རིགས་ཚན་རྩལ་བཟོ་བསྐྲུན་ཁང་རྩེ་ཕུད་བཅུའི་གྲས་ཡིན་པ་དང་། ཨ་རིའི་དྲ་རྒྱའི་བརྙན་རིགས་འཕྲུལ་ཆས་ཞིབ་འཇུག་ཁང་གིས། དཱ་ཧྥ་འཕྲུལ་རིགས་གསང་མིག་བརྙན་ཆས་ཀྱི་རིགས་དག་བོད་དང་ཡུ་གུར་ཙམ་དུ་མ་ཟད། ཧོང་ཀོང་ནང་ལའང་དེ་སྔ་ནས་གསང་མིག་བརྙན་ཆས་བཙུགས་ཏེ་དྲག་གནོན་བྱེད་མུས་ཡིན་སྐོར་སོགས་བརྗོད་འདུག
གསར་འགོད་པ། སྐལ་བཟང་སྦྱིན་པ།
