རྒྱ་ནག་ཉེན་རྟོག་པས་ཏོག་དབྱིབས་བཀག་སྡོམ་སྐབས་ས་གནས་བོད་མི་ཚོར་ཤ་དང་མར་སོགས་ཀྱིས་རོགས་རམ་བྱེད་མཁན་བོད་མི་སངས་ཚེ་ཞེས་པ་ཞིག་འཛིན་བཟུང་བྱས་ཏེ་གོ་ཐོས་མེད་པར་གྱུར་ཡོད་འདུག
ཕྱི་ལོ་ ༢༠༢༢ ཟླ་ ༡༢ ཚེས་ ༢༦ ཉིན་གྱི་ཞོགས་པར་ཆུ་དམར་ལེབ་རྫོང་ཉེན་རྟོག་པས་བོད་མི་སངས་ཚེ་ཞེས་པ་གློ་བུར་དུ་འཛིན་བཟུང་གིས་བཙན་འཁྲིད་བྱས་ཡོད་པ་དང་། ཁྱིམ་མི་རྣམས་ས་གནས་ཉེན་རྟོག་ཁང་དུ་ཕྱིན་ཏེ་ཁོང་འཛིན་བཟུང་བྱེད་དོན་ཅི་ཡིན་སོགས་སྐད་ཆ་དྲིས་ཡོད་ཀྱང་ལན་གང་ཡང་མ་སྤྲད་པར་ཕྱིར་ལོག་དགོས་བྱུང་ཡོད་འདུག
འདི་གའི་གནས་ཚུལ་མཁོ་སྤྲོད་པས། སངས་ཚེ་འཛིན་བཟུང་བྱས་འདུག་ཟེར་དུས་ཡིད་ཆེས་མེད་པ་དང་། ཁོང་ནི་ནམ་རྒྱུན་ནས་མི་ཡག་པོ་དང་། གཞན་ལ་རོགས་རམ་བྱེད་མཁན་ཞིག་ཡིན་ལ། རིམས་ནད་ཁྱབ་ནས་ས་གནས་བོད་མི་རྣམས་ལ་དཀའ་ངལ་འཕྲད་སྐབས། ཁོང་གིས་ལུག་དང་གཡག་བཤས་ནས་སྡེ་བའི་མི་ཚང་སྐྱོ་བོ་རྣམས་ལ་སྤྲད་ཡོད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པ་གཞན་ཞིག་གིས། ཏོག་དབྱིབས་བཀག་སྡོམ་སྐབས་སུ་ཆུ་དམར་ལེབ་ཀྱི་ས་གནས་ཁ་ཤས་སུ་བཟའ་བཅའ་འདང་ངེས་མ་རག་པར་དཀའ་ངལ་ཆེན་པོ་འཕྲད་ཡོད་པ་མ་ཟད། མི་རེ་ཟུང་ཞིག་གི་ཚེ་སྲོག་ཡང་ཤོར་བའི་གནས་ཚུལ་བྱུང་ཡོད་སྐོར་དང་། སྐབས་དེར་སངས་ཚེ་ལགས་ཀྱིས་གང་ཐུབ་ཀྱིས་རོགས་རམ་བྱས་ཡོད་སྐོར་བརྗོད་བྱུང་། གནས་ཚུལ་མཁོ་སྤྲོད་པས་ས་གནས་སུ་ཏོག་དབྱིབས་བཀག་སྡོམ་སྐབས་ཚེ་སྲོག་ཤོར་མཁན་གྱི་མིང་སོགས་ཤེས་རྟོགས་ཐུབ་མི་འདུག
ད་ལྟ་རང་ལོ་ ༤༥ ཡིན་པའི་བོད་མི་སངས་ཚེ་ལགས་ནི་ཆུ་དམར་ལེབ་རྫོང་ནས་ཡིན་ཞིང་། དུས་རྒྱུན་ཕྱུགས་ཟོག་འཚོ་སྐྱོང་བྱས་ཏེ་འབྲོག་པའི་འཚོ་བ་སྐྱེལ་མཁན་ཞིག་ཡིན་འདུག ཁོང་དང་བཟའ་ཟླ་བཀྲ་མཚོ་གཉིས་ལ་རང་ལོ་ ༡༦ ཅན་གྱི་བུ་མོ་ཞིག་དང་ལོ་ན་ ༢༡ ཅན་གྱི་བུ་ཞིག་ཡོད་འདུག
སངས་བཏང་ཟིན་པ་འདྲ།