རྒྱ་ནག་གི་མགོ་ཁྲིད་ཞི་ཅིན་ཕིང་གིས་ཡུ་ཀེ་རེན་གྱི་སྲིད་འཛིན་ཛེ་ལེན་སི་ཀི་ལགས་ལ་ཨུ་རུ་སུ་དང་ཡུ་ཀེ་རེན་བར་གྱི་དམག་འཁྲུག་མཚམས་འཇོག་ཡོང་བར་གྲོས་མོལ་བྱེད་དགོས་སྐོར་དང་རྒྱ་ནག་ནང་ཡུ་ཀེ་རེན་གྱི་གཞུང་ཚབ་འཛུགས་པའི་སྐོར་སོགས་ལ་ཁ་བརྡ་བྱས་ཡོད་འདུག
Ukrainian President Volodymyr Zelensky (right) hoped the call with Chinese leader Xi Jinping would give impetus to relations with Beijing.
རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཨུ་རུ་སུས་ཡུ་ཀེ་རེན་ནང་བཙན་འཛུལ་བྱས་ཏེ་ལོ་གཅིག་དང་ཟླ་གཉིས་ཕྱིན་རྗེས། ཁ་སང་ཕྱི་ཚེས་ ༢༦ ཉིན་རྒྱ་ནག་གི་མགོ་ཁྲིད་ཞི་ཅིན་ཕིང་དང་ཡུ་ཀེ་རེན་གྱི་སྲིད་འཛིན་ཝོ་ལོ་ཌི་མིར་ཛེ་ལེན་སི་ཀི་ (Volodymyr Zelensky) གཉིས་ཀྱིས་ཁ་པར་བརྒྱུད་དུས་ཡུན་ཆུ་ཚོད་ ༡ རིང་ཁ་བརྡ་ཐེངས་དང་པོ་བྱས་ཡོད་འདུག་ལ། ཉེ་སྔོན་ཕྱི་ཟླ་ ༣ ནང་རྒྱ་ནག་གི་མགོ་ཁྲིད་ཞི་ཅིན་ཕིང་ཨུ་རུ་སུར་ཕྱིན་ཏེ་ཨུ་རུ་སུའི་སྲིད་འཛིན་པུ་ཊིན་དང་ཐུག་འཕྲད་བྱུང་ཡོད་པ་རེད། ཁ་སང་ཁོང་གཉིས་ཀྱིས་རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་གཏོང་ཕྱོགས་དང་། ཡུ་ཀེ་རེན་གྱི་གཞུང་ཚབ་རྒྱ་ནག་གཞུང་ནང་འཛུགས་རྒྱུ་སོགས་ཀྱི་ཐོག་ལ་གྲོས་མོལ་བྱས་ཡོད་པ་མ་ཟད། ཡུ་ཀེ་རེན་དང་ཨུ་རུ་སུའི་དམག་འཁྲུག་ནང་འགྲིག་བྱེད་དགོས་སྐོར་ཡང་བརྗོད་ཡོད་འདུག
དེ་འབྲེལ་ཡུ་ཀེ་རེན་གྱི་སྲིད་འཛིན་ཝོ་ལོ་ཌི་མིར་ཛེ་ལེན་སི་ཀི་ལགས་ཀྱིས་སྒེར་གྱི་ཊུ་ཝི་ཊར་སྟེང་། དེ་རིང་ང་དང་ཞི་ཅིན་ཕིང་གཉིས་ཀྱི་བར་ལ་དོན་སྙིང་ལྡན་པ་དང་དུས་ཡུན་རིང་པོར་ཁ་བརྡ་བྱས་པ་ཡིན། ཁ་བརྡ་དེ་བརྒྱུད་ནས་ཡུ་ཀེ་རེན་གྱི་རྒྱ་ནག་ནང་གི་གཞུང་ཚབ་ཆེན་མོ་བསྐོ་བཞག་བྱ་རྒྱུ་ཡིན་པ་སོགས་ཀྱིས་ཕྱོགས་གཉིས་ཀྱི་འབྲེལ་ལམ་ཡར་རྒྱས་ཡོང་རྒྱུའི་ཐད་ཕན་ཐོགས་ཡོད་པའི་ཡིད་ཆེས་ཡོད། ཅེས་བརྗོད་ཡོད་འདུག
རྒྱ་ནག་གི་ཕྱི་སྲིད་ལས་ཁུངས་ཀྱིས་དེའི་ཐད། འཛམ་གླིང་མཉམ་འབྲེལ་བདེ་འཇགས་ལྷན་ཁང་གི་གཏན་འཇགས་ཚོགས་མི་དང་རྒྱལ་ཁབ་ཆེ་གྲས་ཤིག་ཡིན་པའི་ཆ་ནས། རྒྱལ་སྤྱིའི་གནས་སྟངས་ལ་འགྱུར་བ་ཇི་ལྟར་ཕྱིན་ཡང་། རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་དང་གོང་འཕེལ་ཡོང་ཆེད་རྒྱ་ནག་གིས་ཡུ་ཀེ་རེན་ལ་འབྲེལ་ལམ་འཇོག་གི་ཡིན་སྐོར་དང་། རྒྱ་ནག་གིས་ཨུ་རུ་སུ་དང་ཡུ་ཀེ་རེན་བར་གྱི་དམག་འཁྲུག་མཚམས་འཇོག་དང་། ཞི་བའི་ལམ་ནས་གྲོས་མོལ་བྱེད་པར་རྒྱབ་སྐྱོར་ཡོད་སྐོར་དང་། རྒྱ་ནག་གཞུང་ཕྱོགས་ནས་ཡུ་ཀེ་རེན་དང་རྒྱལ་ཁབ་གཞན་སོགས་ལ་དམིགས་བསལ་སྐུ་ཚབ་མངག་གཏོང་བྱས་ཏེ། ཡུ་ཀེ་རེན་གྱི་གནད་དོན་ཐད་ལ་གླེང་སློང་བྱ་རྒྱུ་ཡིན་སྐོར་སོགས་བརྗོད་འདུག
ཨ་རིའི་རྒྱལ་སྲིད་ལྷན་ཁང་གི་མགྲིན་ཚབ་པ་ཇོན་ཀིར་བྷི་ (John Kirby) ལགས་ཀྱིས། རྒྱ་ནག་གི་མགོ་ཁྲིད་དང་ཡུ་ཀེ་རེན་གྱི་སྲིད་འཛིན་གཉིས་ཀྱི་བར་ལ་ཁ་བརྡ་བྱུང་བ་དེ་གནད་དོན་ཡག་པོ་ཞིག་ཡིན་ཡང་། ད་ལྟའི་ཆར་དམག་འཁྲུག་མཚམས་འཇོག་བྱུང་སྟེ་ཞི་བདེ་ཡོང་གི་ཡོད་མེད་ཤེས་ཀྱི་མེད་སྐོར་བརྗོད་འདུག
དེ་འབྲེལ་ཡུ་རོབ་མཐུན་ཚོགས་ཀྱིས། རྒྱ་ནག་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཁང་གི་ཚོགས་མི་ཡིན་པའི་ཆ་ནས་ཡུ་ཀེ་རེན་གྱི་སྲིད་འཛིན་དང་མཉམ་དུ་གླེང་སློང་བྱེད་མགོ་འཛུགས་པར་དགའ་བསུ་ཡོད་པ་དང་། རྒྱ་ནག་གིས་སྣེ་ཁྲིད་པའི་ཐོག་ནས་ཨུ་རུ་སུས་ཡུ་ཀེ་རེན་ནང་དམག་འཁྲུག་བྱེད་པར་མཚམས་འཇོག་སླད་ཤུགས་རྐྱེན་སྤྲོད་དགོས་པ་དང་། ཡུ་ཀེ་རེན་ནང་ཞི་བདེ་སླར་གསོ་དགོས་སྐོར་བརྗོད་འདུག་ལ། གནད་དོན་དབྱེ་ཞིབ་པ་ཁག་ཅིག་གིས། རྒྱ་ནག་གཞུང་གིས་ཨུ་རུ་སུ་དང་ཡུ་ཀེ་རེན་གཉིས་ལ་འབྲེལ་བ་བྱས་ཏེ། ཡུ་ཀེ་རེན་དང་ཨུ་རུ་སུ་བར་གྱི་རྩོད་རྙོག་ཞི་འཇམ་ཡོང་བར་འབད་བརྩོན་བྱེད་ཀྱི་ཡོད་ཚུལ་སྟོན་གྱི་ཡོད་སྐོར་བརྗོད་འདུག
གསར་འགོད་པ། བསྟན་འཛིན་ཕུར་བུ།
