༧གོང་ས་རྒྱལ་བ་རིན་པོ་ཆེ་མཆོག་དང་སི་ཌི་ཤིའི་ཁོར་ཡུག་ལས་འགུལ་བ་རྣམ་གཉིས་ཀྱི་ཐུགས་དགོངས་ལས་འཁྲུངས་པའི་དཔེ་དེབ་ཅིག་ཚོང་སྒྱུར་བྱེད་བཞིན་འདུག
དེ་རིང་རྒྱལ་སྤྱིའི་དཔེ་དེབ་པར་བསྐྲུན་ཁང་ཁག་ཅིག་གིས་གནས་ཚུལ་སྤེལ་བ་ལྟར་ན། ཨ་རིའི་མངའ་སྡེ་ (Virginia) ཝིར་ཇི་ན་ཡའི་གྲོང་ཁྱེར་(Charlottesville) ནང་རྟེན་གཞི་བྱས་པའི་ཚན་རིག་པ་དང་དགེ་རྒན། སེམས་དང་སྲོག་ལྟེ་གནས་ཁང་གི་གཙོ་འཛིན་སོའུ་ཟན་ (SUSAN BAUER-WU) ལགས་ཀྱིས་བརྩམས་ཤིང་། ༧གོང་ས་རྒྱལ་བ་རིན་པོ་ཆེ་མཆོག་དང་གོ་ལའི་གནམ་གཤིས་ཚ་དྲོད་སྲུང་སྐྱོབ་དང་ཁོར་ཡུག་ལས་འགུལ་བ་གྲགས་ཆེན་གཞོན་ནུ་མ་གྷེ་རེ་ཊ་ཐན་བྷག་(Greta Thunberg) རྣམ་གཉིས་ཀྱི་ཐུགས་དགོངས་ནས་བསྐྱེད་པའི་༼ ང་ཚོས་གཅེས་པར་འོས་པའི་མ་འོངས་པ་ཞིག༽་་ (A Future We Can Love) ཅེས་པའི་དཔེ་དེབ་ཅིག་ཚོང་སྒྱུར་བྱེད་མགོ་བརྩམས་འདུག
དཔེ་དེབ་དེ་ཚོང་སྒྱུར་ཡོངས་བསྒྲགས་བྱས་པ་དང་བསྟུན། ༧གོང་ས་རྒྱལ་བ་རིན་པོ་ཆེ་མཆོག་གིས་ངོ་དེབ་སྟེང་། ངོས་ནས་ཆེས་ཛ་དྲག་ཆེ་བའི་དཀའ་ངལ་དག་གུ་ཡངས་དང་དྲང་བདེན། ཕན་ཚུན་གུས་ཞབས་ལྡན་པའི་ངང་ནས་གྲོས་མོལ་བྱས་ཏེ་སེལ་ཐུབ་པའི་ཡིད་ཆེས་བྱེད་ཀྱི་ཡོད། ངོས་དང་ཁོར་ཡུག་ལས་འགུལ་བ་གྷེ་རེ་ཊ་ཐན་བྷག་ངེད་གཉིས་བར་བྱུང་བའི་སྐད་ཆ་དག་གིས་ཚན་རིག་པ་དང་སེམས་གཙོ་སྨྲ་བའི་བསམ་བློ་བ་ཚོ་ཁ་ཕྱོགས་གཅིག་ཏུ་འཁྲིད་ཐུབ་ཡོད་པ་མ་ཟད། ཚན་རིག་པ་དང་སེམས་གཙོ་སྨྲ་བའི་བསམ་བློ་བ་གཉིས་ཀྱིས་ང་ཚོ་ཚང་མ་གཅིག་ལ་གཅིག་བརྟེན་ཡིན་པ་དང་ད་ལྟ་ང་ཚོར་འཕྲད་བཞིན་པའི་ཁོར་ཡུག་གི་དཀའ་ངལ་ལ་ལྟ་སྟངས་གསར་པ་ཞིག་འཛིན་དགོས་པའི་མཁྱེན་རྟོགས་བྱུང་ཡོད། ད་དུང་ངེད་གཉིས་བར་བྱུང་བའི་དམིགས་བསལ་གྱི་གླེང་མོལ་དེ་དག་ལས་ ང་ཚོས་གཅེས་པར་འོས་པའི་མ་འོངས་པ་ ཞེས་པའི་དཔེ་དེབ་འདི་བྱུང་བ་རེད། ངོས་ནས་གྷེ་རེ་ཊ་ལ་རྒྱབ་སྐྱོར་དང་ཁོར་ཡུག་སྲུང་སྐྱོབ་ལ་རྒྱབ་སྐྱོར་བྱ་རྒྱུ་ཡིན་པ་མ་ཟད། ཆེས་གནད་འགག་ཆེ་བ་ནི་འཛམ་གླིང་ནང་སེམས་ཁྲལ་གྱིས་ཁེངས་པའི་མི་རྒན་གཞོན་དབྱེར་མེད་ཡོངས་ལ་རེ་བ་ཞིག་སྤྲོད་དགོས། ང་ཚོས་ལྷན་དུ་ཐུན་མོང་གི་གཞི་རྩ་བཙལ་ཏེ་འོད་སྟོང་འཕྲོས་པའི་མ་འོངས་པ་ཞིག་གསར་དུ་བསྐྲུན། ཞེས་གསུངས་འདུག
དཔེ་དེབ་ཚོང་སྒྱུར་གྱི་དྲ་སྟེང་ནས་དེབ་ཀྱི་ནང་དུ་ཞིབ་ཚེ། དཔེ་དེབ་དེ་ལ་ཤོག་ངོས་ཁྱོན་ ༢༦༥ ལྡན་ཞིང་ནང་གསེས་སྡེ་ཚན་བདུན་བཅས་ཀྱིས་བཅད་འདུག དེ་དག་གི་ཁྲོད་ཚན་རིག་དང་བསམ་བློ སའི་གོ་ལའི་ཤོང་ཚད། འགྲོ་བ་མིའི་ཁོག་རྒྱ། གས་ཆགས་ཤོར་བའི་སེམས། ༼ མུན་པ་དང་འོད ༽ ངོ་མཚར། རེ་བ་གསར་པའི་དུས་རབས་ཤིག་གི་མགོ་བཅས་འདུག་ལ། ད་ལྟ་དཔེ་དེབ་དེར་རིན་གོང་ཨ་སྒོར་ ༢༤།༩༥ བྱས་ནས་སྔོན་མངག་བྱེད་ཐུབ་ཀྱི་འདུག
དཔེ་དེབ་དེ་ནི་སེམས་དང་སྲོག་ལྟེ་གནས་ཁང་གི་གཙོ་འཛིན་སོའུ་ཟན་ (SUSAN BAUER-WU) ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་དང་གོ་ལའི་གནམ་གཤིས་ཚ་དྲོད་སྲུང་སྐྱོབ་དང་ཁོར་ཡུག་ལས་འགུལ་བ་གྷེ་རེ་ཊ་ཐན་བྷག་(Greta Thunberg) གཉིས་ཀྱི་བཀའ་མོལ་ཁྲོད་ནས་བསྐྱེད་པའི་དེབ་ཅིག་ཡིན་པ་གསལ་བོར་བརྗོད་འདུག་ལ། ༧གོང་ས་མཆོག་དང་གྷེ་རེ་ཊ་གཉིས་ཕྱི་ལོ་ ༢༠༢༡ ཟླ་ ༡ ཚེས་ ༡༠ ཉིན་དྲ་ལམ་བརྒྱུད་གོ་ལའི་གནམ་གཤིས་ཚ་དྲོད་སྲུང་སྐྱོབ་དང་འབྲེལ་བའི་ཚོགས་ཆེན་ཞིག་གི་སྟེང་ཐོག་མར་མཇལ་འཕྲད་བྱུང་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
