བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་སྒྲུབ་ལགས་ཀྱིས་ཁེ་ན་ཌའི་གྲོས་ཚོགས་འཐུས་མི་རྣམས་ལ་ཐུག་འཕྲད་གནང་སྟེ་བོད་དོན་གླེང་སློང་གནང་།
ཟླ་འདིའི་ཕྱི་ཚེས་ ༡༤ ནས་ ༡༦ བར་ཉིན་གྲངས་གསུམ་རིང་བྱང་ཨ་མི་རི་ཁའི་སྐུ་ཚབ་དོན་གཅོད་རྣམ་རྒྱལ་མཆོག་སྒྲུབ་ལགས་ཀྱིས་ཁེ་ན་ཌའི་ཆབ་སྲིད་ཚོགས་པའི་དབུ་ཁྲིད་ཕ་རན་ཀི་ཧི་སི་བྷེ་ལེན་ཅིཊ་(Yves-Francois Blanchett) ལགས་དང་གྲོས་ཚོགས་འཐུས་མི་ཨེ་ལེག་སི་སི་བུ་རུ་ནེ་ལི་དྲུ་སེ་པི་ (Alexis Brunelle-Duceppe) ལགས། ཇུ་ལི་ཝིག་ནོ་ལ་ ( Julie Vignola) སོགས་དང་ཐུག་འཕྲད་གནང་སྟེ། བོད་རྒྱའི་དཀའ་རྙོག་ཞི་འགྲིག་དང་། བོད་ནང་གི་འགྲོ་བ་མིའི་ཐོབ་ཐང་གི་གནད་དོན་སོགས་ཀྱི་སླད་ལ་གླེང་སློང་གནང་ཡོད་འདུག
སྐབས་དེར་སྐུ་ཚབ་དོན་གཅོད་མཆོག་གིས། རྒྱ་ནག་གཞུང་གིས་བོད་ནང་གི་བཙན་གནོན་དང་དྲག་གནོན་བྱེད་མུས་ཡིན་པའི་སྐོར་གཙོས། བོད་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་སོགས་ཛ་དྲག་གི་གནད་དོན་མང་དག་ཅིག་གི་སྐོར་དང་། བོད་མིའི་སྒྲིག་འཛུགས་ཀྱི་དམིགས་ཡུལ་དང་། སྲིད་ཇུས་སོགས་ཀྱི་སྐོར་ལ་གླེང་སློང་གནང་ཡོད་འདུག་ལ། དེ་བཞིན་ཁེ་ན་ཌའི་གྲོས་ཚོགས་འཐུས་མི་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་ཆུང་གི་ཚོགས་གཞོན་ཨེ་ལེག་སི་སི་བུ་རུ་ནེ་ལི་དྲུ་སེ་པི་ (Brunelle-Duceppe) ལགས་ཀྱིས། མགྱོགས་པོ་གདོན་འཆར་ཡོད་པའི་བོད་ནང་གི་འགྲོ་བ་མིའི་ཐོབ་ཐང་སྐོར་གྱི་སྙན་ཐོའི་ནང་བོད་ནང་གི་འགྲོ་བ་མིའི་ཐོབ་ཐང་དང་། རྒྱ་ནག་གཞུང་གིས་བོད་ཕྲུག་མང་དག་ཅིག་རྒྱ་གཞུང་གིས་གཉེར་བའི་བཅའ་སྡོད་སློབ་གྲྭ་ཁག་ཏུ་མངག་གཏོང་བྱེད་ཀྱིན་ཡོད་པའི་སྐོར་སོགས་གསལ་ཡོད་སྐོར་བརྗོད་འདུག
དེ་བཞིན་ཁོང་གིས་ཁེ་ན་ཌའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཨ་རི་ཕི་ཝི་ར་ནི་ (Arif Virani) ལགས། ཚོགས་གཞོན་གྷར་ནེཊ་གྷི་ནི་སི་ (Garnett Genuis) ལགས་དང་ཇེམ་སི་མ་ལོ་ནི་ (James Maloney) ལགས་སོགས་དང་མཇལ་འཕྲད་གནང་སྟེ། བོད་རྒྱ་འབྲེལ་མོལ་སྐོར་གྱི་གནད་དོན་མཇུག་སྐྱོང་དང་། ཁེ་ན་ཌའི་གཞུང་གིས་མུ་མཐུད་བོད་མིའི་སྒྲིག་འཛུགས་དང་བཙན་བྱོལ་བོད་མིར་རྒྱབ་སྐྱོར་གནང་དགོས་པའི་རེ་སྐུལ་ཡང་ཞུས་འདུག་ལ། དེ་བཞིན་ཁོང་གིས་ཁེ་ན་ཌའི་རོགས་ཚོགས་ (Global Affairs Canada) ཀྱི་གནད་ཡོད་མི་སྣ་ཁག་དང་མཇལ་འཕྲད་གནང་སྟེ། བོད་མིའི་སྒྲིག་འཛུགས་ཀྱི་འཆར་གཞི་དང་། ཐབས་ཇུས། ལྷག་པར་བཀའ་ཤག་སྐབས་བཅུ་བདུན་པའི་བོད་མིའི་སྒྲིག་འཛུགས་ཀྱི་ཕུགས་དམིགས་ཡིག་ཆ་སོགས་ཀྱི་སྐོར་ལའང་གླེང་སློང་གནང་ཡོད་འདུག
གསར་འགོད་པ་དཔལ་ལྡན་གྱིས་བོད་མིའི་སྒྲིག་འཛུགས་ཀྱི་དྲ་རྒྱ་ནས་བཏུས།
