དེ་རིང་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་ཆིབས་ཐོན་གྱིས་བཞུགས་སྒར་དྷ་རམ་ས་ལར་དད་ལྡན་སེར་སྐྱ་མི་མང་གི་ཕེབས་བསུའི་ཁྲོད་ཞབས་སོར་བདེ་བར་འཁོད་གནང་སོང་།
སྔ་དྲོའི་ཆུ་ཚོད་ ༡༠ པ་མ་ཟིན་ཙམ་ལ་༧གོང་ས་རྒྱལ་བ་རིན་པོ་ཆེ་མཆོག་གྷ་གྷུལ་གནམ་ཐང་དུ་ཞབས་སོར་བདེ་བར་འཁོད་སོང་ལ། དེ་རིང་ཞོགས་པ་ཆུ་ཚོད་ ༧ པ་ཙམ་ནས་བཟུང་དྷ་ས་ཁུལ་གྱི་སེར་སྐྱ་མི་མང་སྟོང་ཕྲག་མང་པོས་གཞུང་ལམ་གཡས་གཡོན་ཀུན་དུ་ཕེབས་བསུའི་མཇལ་དར་བཟུང་སྟེ་བསྒུགས་འདུག་ལ། གནམ་ཐང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱིས་དབུས་པའི་འབྲེལ་ཡོད་ལས་བྱེད་དང་། གཞུང་ཁུངས་དང་གཞུང་ཁུངས་མ་ཡིན་ཚོགས་སྡེ་ཁག་གི་ཚོགས་གཙོ་དང་ཚོགས་མི་སོགས་དད་ལྡན་སེར་སྐྱ་མང་པོ་ཞིག་འཛོམས་འདུག
གནམ་ཐང་དུ་༧གོང་ས་རྒྱལ་བ་རིན་པོ་ཆེ་མཆོག་ནས་གསར་འགོད་པར། དེ་རིང་དྷ་རམ་ས་ལར་བདེ་པོ་བྱས་ནས་འབྱོར་སོང་། གཟུགས་པོ་བདེ་ཐག་ཆོད་ཡོད། ངོས་རང་གིས་བསྟན་པ་དང་འགྲོ་བའི་དོན་དུ་གང་ལ་གང་འཚམ་བྱེད་ཐུབ་པར་རྗེས་སུ་ཡི་རངས་ཡོད། མི་ལུས་ཐོབ་པར་དོན་དང་ལྡན་པ་ཞིག་ཡོང་བསྡད་པ་ཞིག་ཆགས་བསྡད་ཡོད། ཅེས་གསུངས་སོང་།
འདི་ལོའི་ཕྱི་ཟླ་ ༧ ཚེས་ ༡༡ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་ཆིབས་བསྒྱུར་བཀའ་དྲིན་བསྐྱངས་ཏེ། འདས་པའི་ཟླ་བ་གཅིག་ལྷག་གི་རིང་ལ་ཆོས་ཕྱོགས་ཀྱི་མཛད་པ་རྒྱ་ཆེར་བསྐྱངས་ཡོད་པ་རེད། དེ་ཡང་། ལ་དྭགས་གླེ་ཞི་བའི་ཚལ་དུ་དད་ལྡན་སེར་སྐྱ་མི་མང་ཁྲི་ཕྲག་འགར་ལག་ལེན་སོ་བདུན་མའི་གསུང་ཆོས་དང་བཀའ་དབང་བསྩལ་བ། ལ་དྭགས་ཀྱི་བོད་མི་ཡོངས་ལ་བླང་དོར་བཀའ་སློབ་དང་། ལམ་སྒྲོན་སློབ་གྲྭའི་ལྔ་བཅུའི་དུས་དྲན་དང་དབྱར་ཆོས་ཆེན་མོའི་ཚོགས་མགོན་དུ་ཕེབས་པ། ལ་དྭགས་ཨེ་མམ་བྷར་གྷ་ཁ་ཆེའི་ལྷ་ཁང་དུ་ཕེབས་པ་དང་། ལྷ་ས་ཁ་ཆེ་བ་དང་དམིགས་བསལ་རྒན་རྒོན་སོགས་དད་ལྡན་སེར་སྐྱ་མི་མང་ལ་མཇལ་ཁ། དེ་བཞིན་ལ་དྭགས་ཏོག་ཁུལ་དང་གཤམ་ལྗོངས་མཁར་རྩེ་རུ་ཆིབས་བསྒྱུར་གྱིས་ཆོས་འབྲེལ་བཀའ་དྲིན་བསྐྱངས་གནང་ཡོད་པ་རེད།
མཛད་འཆར་ལྟར་ན། ཕྱི་ཟླ་ ༩ ཚེས་ ༥ ནས་ ༦ བར་ཉིན་གྲངས་གཉིས་རིང་ཐེག་ཆེན་ཆོས་གླིང་གཙུག་ལག་ཁང་དུ་དབུ་མ་འཇུག་པའི་རང་འགྲེལ་གྱི་ཐོག་ནས་བཀའ་ཆོས་བཀའ་དྲིན་སྩལ་རྒྱུ་དང་། ཕྱི་ཟླ་ ༡༠ ཚེས་ ༢ ནས་ ༤ བར་ཉིན་གྲངས་གསུམ་གྱི་རིང་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་ལམ་རིམ་བསྡུས་དོན་དང་། བློ་སྦྱོང་དོན་བདུན་མ། སྤྱན་རས་གཟིགས་ཀྱི་བཀའ་དབང་བཅས་ཀྱི་ཆོས་འབྲེལ་བཀའ་དྲིན་སྩལ་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ།
