དེ་རིང་ཕྱི་ཚེས་ ༤ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་ཐའེ་ཝན་ནས་ཕེབས་པའི་རྒྱ་རིགས་ཚན་རིག་པ་དང་མཁས་པ་ཁག་ཅིག་ལ་མཇལ་འཕྲད་བཀའ་མོལ་དང་དེ་དག་གི་དྲི་བ་ཁག་ལ་བཀའ་ལན་བསྩལ།
སྐབས་དེར་༧གོང་ས་རྒྱལ་རིན་པོ་ཆེ་མཆོག་གིས། དེ་རིང་ཁྱེད་རང་ཚོ་རྒྱ་རིགས་ཆོས་གྲོགས་ཚོར་ཐུག་ནས་དགའ་པོ་ཞེ་དྲགས་བྱུང་། འཛམ་གླིང་གི་ཤར་ཕྱོགས་དང་ནུབ་ཕྱོགས། བྱང་ཕྱོགས། ལྷོ་ཕྱོགས་བཅས་ཕྱོགས་བཞི་ས་ཆ་ལས། དབུས་ཀྱི་བྱང་ཕྱོགས་སུ་ང་ཚོ་རྒྱ་ཧོར་བོད་གསུམ་ནང་མཁན་ཆེན་ཞི་བ་འཚོ་ཕེབས་ནས་དཔལ་ནཱ་ལནྡཱའི་གཞུང་གི་སྲོལ་ཡག་པོ་ཞེ་དྲགས་བཏོད་འདུག ངོས་རང་ཆུང་ཆུང་སྐབས་ནས་ཚན་རིག་ལ་དགའ་པོ་ཡོད། ཆུང་དུས་མའོ་ཙེ་ཏུང་དང་ཐུག་སྐབས་ཚན་རིག་ལ་དགའ་པོ་ཡོད་ལབ་པ་ཡིན། མའོ་ཙེ་ཏུང་དགའ་པོ་ཞེ་དྲགས་བྱུང་སོང་། ཆོས་ཟེར་བ་དེ་རྨོངས་དད་རེད་ཟེར། དེ་ནས་ངོས་བཙན་བྱོལ་དུ་སླེབས་པ་ནས་ཚན་རིག་པ་མང་པོར་ཐུག་གི་ཡོད། བར་སྐབས་ཚན་རིག་པའི་ནང་ནས་སེམས་ཁམས་རིག་པའི་སྐོར་དང་སེམས་ཞི་བདེ་ཡོང་ཐབས་སུ་དོ་སྣང་བྱེད་མཁན་ཚན་རིག་པ་མང་པོས་ངོས་ལ་ཐུག་གི་ཡོད། སེམས་ཁམས་རིག་པའི་སྐོར་དེ་ཚོའི་གྲས་ཚན་རིག་གི་སྡེ་ཚན་ནང་ཞེ་དྲགས་གསལ་བོ་མེད་དུས། ངོས་དང་ཐུག་སྟེ་གོ་བསྡུར་བྱེད་པར་དགའ་བོ་ཞེ་དྲགས་བྱེད་ཀྱིན་འདུག
གང་ལྟར་ལུས་དང་སེམས་གཉིས་བཤད་པའི་ནང་གི་སེམས་ཀྱི་རྣམ་རྟོག་འདྲ་མིན་དེ་དག་གིས་སེམས་སྐྱིད་མི་སྐྱིད་པ་བཟོ་ཡི་ཡོད། སེམས་ནང་ཞི་བདེ་ཡོང་བར་བསམ་བློའི་འགྲོ་སྟངས་དེ་ཚོ་ཡག་པོ་ཤེས་པར་བྱས་ཏེ། ཉོན་མོང་གི་རིགས་དེ་ཚོ་རང་གཅེས་འཛིན་དང་བདེན་འཛིན་གྱིས་འཁྲུལ་ཏེ་རྣམ་རྟོག་འདྲ་མིན་ཆགས་ཀྱི་ཡོད། ངོས་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསམ་བློ་གཏོང་གི་ཡོད། དེས་སེམས་ལ་ཞི་བདེ་ཞེ་དྲགས་ཡོང་གི་འདུག
བྱང་ཆུབ་ཀྱི་སེམས་བསམ་བློ་གཏོང་སྐབས། རྒྱ་མི་གུང་ཁྲན་གྱིས་ངོས་ལ་སྐྱོན་བརྗོད་དང་བོད་ནང་གདུག་རྩུབ་བྱེད་བཞིན་པ་སོགས་མཐོང་དུས། ལྷག་པར་དུ་བརྩེ་བ་སྐྱེས་པ་མ་གཏོགས་ཁོ་ཁྲོང་ཁྱོན་ནས་ཡོང་གི་མི་འདུག དེར་བརྟེན། བྱང་ཆུབ་སེམས་ཀྱིས་བསམ་བློ་རྒྱ་ཆེན་པོ་དང་གུ་ཡངས་པོ་བཟོ་ཡི་འདུག ང་ཚོ་ཚང་མ་མི་གཅིག་གྱུར་གྱི་འདུ་ཤེས་ཐོག་ནས་འཆམ་པོ་དང་གཅིག་གིས་གཅིག་ལ་རོགས་བྱས་ནས་བསྡད་དགོས་པ་རེད་འདུག ང་དང་ཁྱོད་ཟེར་བའི་སྐད་ཆ་དེ་བཤད་རྒྱུ་མི་འདུག ཅེས་གསུངས།
གསར་འགོད་པ། སྐལ་བཟང་སྦྱིན་པ།
