དེ་རིང་ཕྱི་ཚེས་ ༢༢ ཉིན་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་གིས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་མི་རྣམས་ལ་མཇལ་ཁ་དང་བཀའ་སློབ་བསྩལ་འདུག
དེ་རིང་དགའ་ལྡན་ཕོ་བྲང་གིས་དྲ་རྒྱའི་སྤེལ་བའི་༧གོང་ས་མཆོག་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༧ ཉིན་ཧི་མ་ཅལ་མངའ་སྡེའི་བཀྲ་ཤིས་ལྗོངས་བོད་མིའི་གཞིས་ཆགས་སུ།༧གོང་ས་རྒྱལ་བ་རིན་པོ་ཆེ་མཆོག་གིས་བཤད་གྲྭ་ཁམས་སྒར་འབྲུག་མཐོ་སློབ་དྷརྨ་ཀཱ་ར་དབུ་འབྱེད་མཛད་སྒོ་ཆིབས་བསྒྱུར་བསྐྱང་རྒྱུ་ཡིན་པ་དང་། ཕྱི་ཟླ་ ༡༠ ཚེས་ ༢ ནས་ཉིན་གསུམ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་སོགས་ཀྱིས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་གིས་ལམ་རིམ་བསྡུས་དོན་དང་། བློ་སྦྱོང་དོན་བདུན་མ། སྤྱན་རས་གཟིགས་ཕྱག་བཞི་པའི་བཀའ་དབང་བཅས་ཀྱི་བཀའ་ཆོས་བསྩལ་རྒྱུ་ཡིན་འདུག
ཕྱི་ཟླ་ ༡༠ ཚེས་ ༡༡ ནས་ཉིན་གཉིས་རིང་རྒྱ་གར་བྱང་ཤར་འབྲས་ལྗོངས་མངའ་སྡེའི་དཔལ་འབྱོར་རྩེད་ཐང་དུ། འབྲས་ལྗོངས་མངའ་སྡེའི་གཞུང་གིས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་གིས་སློབ་དཔོན་ཐོགས་མེད་ཀྱི་རྒྱལ་སྲས་ལག་ལེན་སོ་བདུན་མ་དང་། སློབ་དཔོན་པདྨ་འབྱུང་གནས་ཀྱི་ཐུགས་སྒྲུབ་ཡང་སྙིང་ཀུན་འདུས་བཅས་ཀྱི་བཀའ་ཆོས་བསྩལ་རྒྱུ་དང་ཕྱི་ཚེས་ ༡༥ ཉིན་ལྷོ་བྷང་གྷལ་མངའ་སྡེའི་སཱ་ལུ་གྷ་རཱ་སད་རྒྱུད་མ་དགོན་གྲྭ་ཚང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་སེམས་བསྐྱེད་ཀྱི་བཀའ་ཆོས་བསྩལ་རྒྱུ་ཡིན་འདུག
དེ་བཞིན་ཕྱི་ཟླ་ ༡༡ ཚེས་ ༢༦ ཉིན་རྒྱ་གར་ལྷོ་ཕྱོགས་ཀཱར་ནཱ་ཊ་ཀཱ་མངའ་སྡེའི་སྦེལ་ཀོབ་བོད་མིའི་གཞིས་ཆགས་སུ། སེ་ར་སྨད་དགོན་པས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་གིས་རྗེ་ཙོང་ཁ་བའི་ལམ་གཙོ་རྣམ་གསུམ་གྱི་བཀའ་ཆོས་བསྩལ་རྒྱུ་དང་། ཕྱི་ཟླ་ ༡༢ ཚེས་ ༣ ཉིན་སེ་ར་བྱེས་དགོན་པས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་གིས་སྒྲོལ་མ་དཀར་མོའི་ཚེ་དབང་བསྩལ་གཏན་ཁེལ་འདུག ཕྱི་ཚེས་ ༩ ཉིན་བཀྲ་ཤིས་ལྷུན་པོ་དགོན་དུ། ༧གོང་ས་མཆོག་གིས་རྗེ་ཙོང་ཁ་བའི་ལམ་རིམ་བསྡུས་དོན་གྱི་བཀའ་ཆོས་བསྩལ་རྒྱུ་དང་། བཀྲ་ཤིས་ལྷུན་པོ་དགོན་པས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
ཕྱི་ཟླ་ ༡༢ ཚེས་ ༡༣ ཉིན་ཧོན་སུར་རྒྱུད་སྨད་གྲྭ་ཚང་གིས་ཇི་ལྟར་གསོལ་བ་བཏབ་པ་ལྟར། ༧གོང་ས་མཆོག་གིས་གསང་བ་འདུས་པའི་རིམ་ལྔའི་ཁྲིད་ཀྱི་བཀའ་དབང་བསྩལ་རྒྱུ། ཕྱི་ཟླ་ ༡༢ ཚེས་ ༢༩ ནས་ཉིན་གསུམ་རིང་རྒྱ་གར་རྡོ་རྗེ་གདན་དུས་འཁོར་གསུང་ཆོས་ར་བའི་ནང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་སློབ་དཔོན་ཀླུ་སྒྲུབ་ཀྱི་ཆོས་དབྱིངས་བསྟོད་པ་དང་། འཇམ་དཔལ་དབྱངས་རྗེས་གནང་གི་བཀའ་ཆོས་བསྩལ་རྒྱུ་ཡིན་འདུག ཕྱི་ལོ་ ༢༠༢༤ ཟླ་ ༡ ཚེས་ ༡ ཉིན་རྒྱ་གར་རྡོ་རྗེ་གདན་དུས་འཁོར་གསུང་ཆོས་ར་བའི་ནང་དུ། ༧གོང་ས་རྒྱལ་བ་རིན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་བཅས་ཡིན་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
