བལ་ཡུལ་ནང་གི་བོད་མི་ཚོར་སྔར་ལས་དཀའ་ངལ་འཕྲད་ཉེན་འདུག

བལ་ཡུལ་གྱི་སྲིད་བློན་པུ་ཤི་པ་རྒྱ་ནག་ཏུ་ཕྱིན་ཏེ་བལ་ཡུལ་ནང་རྒྱ་ནག་དམར་ཤོག་གཞུང་ལ་ངོ་རྒོལ་བྱེད་མཁན་རྣམས་ཡོང་འཇུག་རྒྱུ་མིན་པའི་ཁས་ལེན་བྱས་ཡོད་འདུག

ཟླ་འདིའི་ཕྱི་ཚེས་ ༢༣ ནས་ ༣༠  བར་བལ་པོའི་སྲིད་བློན་པུ་ཤི་པ་(Pushpa Kamal Dahal) རྒྱ་ནག་ཏུ་གཞུང་འབྲེལ་ཕྱོགས་སྐྱོད་དུ་འགྲོ་བཞིན་ཡོད་པ་ལྟར། ཉིན་དང་པོར་ཧང་ཀྲུའུ་རུ་རྒྱ་ནག་དམར་གཞུང་གི་མགོ་འཁྲིད་ཞི་ཅིན་ཕིན་དང་ཐུག་འཕྲད་བྱས་ཡོད། ཟླ་འདིའི་ཕྱི་ཚེས་ ༢༦ ཉིན་རྒྱ་ནག་གི་རྒྱལ་ས་པེ་ཅིན་ནས་རྒྱ་བལ་གཉིས་ཀྱིས་མཉམ་འབྲེལ་བསྒྲགས་གཏམ་ཞིག་སྤེལ་བའི་ནང་། བལ་ཡུལ་གཞུང་གིས་བོད་ཀྱི་གནད་དོན་དེ་རྒྱ་ནག་གི་ནང་སྲིད་ཀྱི་གནད་དོན་ཞིག་ཏུ་རྩིས་ནས། རྒྱ་ནག་དམར་ཤོག་གཞུང་ལ་ངོ་རྒོལ་བྱེད་མཁན་རྣམས་བལ་ཡུལ་དུ་ཡོང་འཇུག་རྒྱུ་མིན་པའི་ཁས་ལེན་བྱས་ཡོད་འདུག

བསྒྲགས་གཏམ་དོན་མཚན་བཅུ་གསུམ་ཡོད་པའི་ཁྲོད། བལ་ཡུལ་གཞུང་གིས་རྒྱ་ནག་གཅིག་གི་ལངས་ཕྱོགས་ལ་རྒྱབ་སྐྱོར་ཆེན་པོ་བྱེད་ཀྱི་ཡོད་པ་དང་། ཐའེ་ཝན་དེ་རྒྱ་ནག་དང་ཁ་བྲལ་ཐབས་མེད་པའི་རྒྱ་ནག་དམར་ཤོག་གཞུང་གི་རང་སྐྱོང་ས་ཁུལ་ཞིག་ཡིན་པའི་ཁར། བལ་ཡུལ་གཞུང་གིས་ཐའེ་ཝན་རང་བཙན་འདོད་མཁན་ཚོའི་ཁ་གཏད་དུ་ལང་རྒྱུ་དང་། བལ་ཡུལ་གཞུང་གིས་ནན་ཏན་གྱིས་བོད་ཀྱི་གནད་དོན་ནི་རྒྱ་ནག་གཞུང་གི་ནང་སྲིད་ཀྱི་གནད་དོན་ཞིག་ཏུ་བརྩི་ཡི་ཡོད་ཀྱང་། རྒྱ་ནག་གཞུང་ལ་ཁ་བྲལ་གྱི་ལས་འགུལ་སྤེལ་ཚེ། བལ་ཡུལ་གྱི་ས་ཐོག་ཏུ་ཡོང་འཇུག་རྒྱུ་མིན། ཞེས་འཁོད་འདུག དེ་བཞིན་རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བ་དང་བལ་བོད་མཐའ་མཚམས་ཀྱི་རོང་འབྲོག་སོགས་ལ་གློག་གི་མཐུན་རྐྱེན་སྦྱོར་སྤྲོད་བྱ་རྒྱུའི་ཁས་ལེན་བྱས་ཡོད་འདུག

ཡང་བསྒྲགས་གཏམ་ནང་། ཕྱོགས་གཉིས་ཀྱིས་བོད་ཀྱི་ལེགས་རྩེ་ཚོང་ལམ་སྒོ་འབྱེད་བྱས་ཡོད་ཅིང་། གང་མགྱོགས་བསྐྱར་དུ་འགྲམ་གྱི་ཚོང་ལམ་སྒོ་ཕྱེ་ནས་རྒྱ་བལ་གཉིས་ཀྱི་ཚོང་འབྲེལ་ཇེ་ལེགས་དང་། ཚོང་པ་ཡར་མར་མངག་གཏོང་བྱས་ཏེ་ཕྱོགས་གཉིས་ཀྱི་ཚོང་འབྲེལ་ཡར་རྒྱས་གཏང་རྒྱུ་ཡིན་པ་མ་ཟད། ཕྱོགས་གཉིས་ཀྱི་བལ་བོད་མཐའ་མཚམས་སུ་མཉམ་འདུས་ཀྱི་ཐོག་ནས་དམ་དྲག་དང་ལྟ་སྲུང་ནན་མོ་བྱ་རྒྱུ་ཡིན་པའི་གྲོས་མཐུན་བྱུང་ཡོད་པ་མ་ཟད། མི་འགྱངས་བར་ཕྱོགས་གཉིས་ཀྱིས་མཐའ་མཚམས་བརྟན་སྲུང་སྒྲིག་སྲོལ་(Boundary Management System) གྲོས་ཆོད་གཞག་རྒྱུའི་མོས་མཐུན་ཡང་བྱུང་ཡོད། ཅེས་གསལ་འདུག

ད་ལན་བལ་ཡུལ་གྱི་སྲིད་བློན་གྱིས་རྒྱ་ནག་གི་ཕྱོགས་སྐྱོད་དང་བསྟུན། ཞི་ཅིན་ཕིན་གཙོས་སྲིད་བློན་ལི་ཆིང་(Li Qiang) དང་རྒྱ་ནག་དམར་ཤོག་ཚོགས་པའི་མི་མང་འཐུས་མི་ཚོགས་པའི་དབུས་རྒྱུན་གྱི་ཚོགས་གཙོ་ཀྲོ་ལི་ཅི་(Zhao Leji) སོགས་དང་ཐུག་འཕྲད་བྱས་ཏེ། རྒྱ་བལ་གཉིས་ཀྱི་ཚོང་གི་འབྲེལ་ལམ་གཙོས། རྒྱ་བལ་གྱི་མཉམ་རུབ་ཀྱི་ནུས་པ་གོང་མཐོར་གཏང་རྒྱུ་ཡིན་པ་སོགས་ཀྱི་ཐད་ལ་གྲོས་བསྡུར་བྱེད་ཡོད་ལུགས་དང་། གནད་དོན་དེ་དང་འབྲེལ་ནས་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་ཀྱང་། རྒྱ་བལ་གཉིས་ཀྱིས་བོད་ཀྱི་མཐའ་མཚམས་མཉམ་སྤྱོད་བྱས་པ་དེས། ཧི་མ་ལ་ཡའི་རི་རྒྱུད་ཁུལ་གྱི་ས་གནས་དག་ལ་ཐབས་ལམ་སྣ་མང་གི་ཐོག་ནས་འབྲེལ་ལམ་ཚུགས་ཐུབ་ཡོད་ཅིང་། རྒྱུད་གཅིག་ལམ་གཅིག་གི་ལས་གཞིའང་འདིའི་ཁོངས་སུ་ཚུད་ཡོད་སྐོར་སོགས་བཤད་འདུག

གཞན་ཡང་། ཟླ་འདིའི་ཕྱི་ཚེས་ ༢༧ ཉིན་སྲིད་བློན་པུ་ཤི་པ་ཟི་ཁྲོན་ནས་ལྷ་ས་གོང་དཀར་གནམ་ཐང་དུ་འབྱོར་ནས། བོད་རང་སྐྱོང་ལྗོངས་ཟེར་བའི་རྒྱ་ནག་དམར་ཤོག་ཚོགས་པའི་མགོ་ཁྲིད་ཝང་ཅུན་ཀྲང་ (Wang Junzheng) ཟེར་བ་དང་ཐུག་འཕྲད་བྱས་ཏེ། རྒྱ་བལ་གཉིས་ཀྱིས་བལ་བོད་མཐའ་མཚམས་སྐྱིད་གྲོང་གི་འཛུགས་སྐྲུན་ལས་གཞི་དེར་ལྟ་ཞིབ་བྱས་ཡོད་པ་མ་ཟད། བལ་བོད་མཐའ་མཚམས་སུ་ཆགས་པའི་གངས་རིན་པོ་ཆེ་སོགས་ལ་མཇལ་སྐོར་དུའང་འགྲོ་འཆར་ཡོད་འདུག

སྤྱིར་རྒྱ་ནག་གཞུང་གིས་བལ་བོད་མཐའ་མཚམས་དང་བོད་མི་རྣམས་ལ་དམ་དྲག་ཆེན་པོ་བྱེད་ཀྱིན་ཡོད་པ་ལྟར། ཕྱི་ལོ་ ༢༠༠༨ ནས་བཟུང་བོད་ནས་རྒྱ་གར་དུ་ཡོང་མཁན་ཇེ་ཉུང་དུ་ཕྱིན་ཡོད་པའི་ཁར། ཕྱི་ལོ་ ༢༠༡༩ ལོར་བོད་མི་གྲངས་ ༡༩ དང་ ༢༠༢༠ ལ་བོད་མི་གྲངས་ ༥། ༢༠༢༡ ལ་ ༡༠ །༢༠༢༢ ལ་བོད་མི་གྲངས་ ༥ བཅས་ཁྱོན་འདས་པའི་མི་ལོ་ལྔ་ཙམ་གྱི་ནང་བཙན་བྱོལ་དུ་བོད་མི་གྲངས་ ༣༩ ལས་ཡོང་ཐུབ་མེད་པ་རེད།

ཕྱི་ལོ་ ༡༩༥༥ ལོར་བལ་ཡུལ་གྱིས་རྒྱ་ནག་སྤྱི་མཐུན་རྒྱལ་ཁབ་དང་ཕྱི་འབྲེལ་བཙུགས་ཤིང་། འདས་པའི་ལོ་ངོ་བཅུ་ཕྲག་འགའ་ཤས་ནང་རྒྱ་ནག་གིས་རང་གི་ཤུགས་རྐྱེན་སྐྱེད་ཐབས་སུ་བལ་ཡུལ་ལ་འཛུགས་སྐྲུན་སོགས་ཀྱི་ཐད་ལ་རོགས་སྐྱོར་ཤུགས་ཆེན་བྱས་ཡོད་པ་མ་ཟད། ཕྱི་ལོ་ ༢༠༡༣ ལོར་སྤེལ་བའི་རྒྱུད་གཅིག་ལམ་གཅིག་གི་ལས་གཞི་དང་དུ་བླངས་ཏེ། རྒྱ་ནག་གི་དཔལ་འབྱོར་ཁེ་ཕན་དང་ཆབ་སྲིད་ཀྱི་གནོན་ཤུགས་འོག བལ་གཞུང་གིས་བལ་ཡུལ་གྱི་ས་ཐོག་ལ་རྒྱ་ནག་ལ་རྒོལ་བའི་བྱ་འགུལ་སྤེལ་དུ་མི་འཇུག་རྒྱུའི་ཁས་ལེན་བྱས་ཡོད་པ་ལྟར། རྒྱ་རྒོལ་གྱི་སྐད་འབོད་ལས་འགུལ་དང་། ཐ་ན་སྐུའི་འཁྲུངས་སྐར་སྲུང་གཙི་ཞུ་རྒྱུ་ལའང་བཀག་སྡོམ་དང་ཚོད་འཛིན་བྱེད་བཞིན་ཡོད་པ་རེད།

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།