སྐྱེ་རྒུ་མདོ་ཉེན་རྟོག་པས་བོད་ཀྱི་ཆབ་སྲིད་བཙོན་ཟུར་བཀྲིས་དབང་ཕྱུག་ལགས་ཉིན་གསུམ་རིང་བཀག་ཉར་བྱས་ཏེ་འདྲི་རྩད་གཅར་རྡུང་བཏང་བ་མ་ཟད་ཁོང་གི་སྒེར་གཉེར་རླངས་འཁོར་འཁྲུད་ས་དེའང་སྒོ་ཕྱེ་རུ་བཅུག་མེད་འདུག
བོད་ཀྱི་ཆབ་སྲིད་བཙོན་ཟུར་བཀྲ་ཤིས་དབང་ཕྱུག་ལགས་ལ་གཅར་རྡུང་བཏང་བ། པར་བོད་ནས་འདི་གར་མཁོ་སྤྲོད་བྱས། ༢༠༢༣།༡༠
སྤྱིར་རྒྱ་ནག་གཞུང་གིས་བོད་ནང་གི་གནད་ཡོད་མི་སྣ་དང་ལྷག་པར་དུ་བོད་ཀྱི་ཆབ་སྲིད་བཙོན་ཟུར་རྣམས་ལ་དངོས་ཤུགས་བརྒྱུད་གསུམ་ནས་བཙན་གནོན་དང་དབྱེ་འབྱེད་ཀྱི་སྲིད་ཇུས་ལག་བསྟར་བྱས་དང་བྱེད་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༡༧ ཉིན་བོད་ཀྱི་སྐད་ཡིག་ཐོབ་ཐང་འཐབ་རྩོད་པ་དང་ཆབ་སྲིད་བཙོན་ཟུར་བཀྲ་ཤིས་དབང་ཕྱུག་ལགས་ཀྱིས། ཁོང་རང་གི་ས་ཆའི་ཐོག་རླངས་འཁོར་འཁྲུ་ས་ཞིག་སྒོ་ཕྱེ་ཡོད་ཀྱང་། ས་གནས་སྲིད་གཞུང་གིས་ཁྲིམས་འགལ་ཡིན་ཚུལ་བརྗོད་དེ་དེབ་སྐྱེལ་བྱས་མེད་པ་མ་ཟད། དྲ་ལམ་དུ་དེ་འབྲེལ་གནས་ཚུལ་བཀྲམ་པར་བརྗོད་དེ། བཀྲ་ཤིས་དབང་ཕྱུག་ལགས་ཉིན་གསུམ་རིང་བཀག་ཉར་བྱས་ཏེ་གཅར་རྡུང་བཏང་ཡོད་འདུག
དེའི་ཐད་བོད་ནང་གི་འབྲེལ་ཡོད་ཅིག་གིས་འདི་གའི་གསར་འགོད་པར། ཉེ་ལམ་བཀྲིས་དབང་ཕྱུག་ལགས་ཀྱིས་སྐྱེ་རྒྱུ་ཁུལ་དུ་རླངས་འཁོར་འཁྲུད་ཁང་ཞིག་སྒོ་ཕྱེ་སྐབས། རྒྱ་ནག་ཉེན་རྟོག་པས་རླངས་འཁོར་འཁྲུད་ཁང་གི་དེབ་སྐྱེལ་ཁྲིམས་སྒྲིག་ལྟར་ཕྱིན་མེད་སྐོར་བརྗོད་དེ་འབོད་འགུགས་བྱས་ཡོད་པ་དང་། བཀྲ་ཤིས་དབང་ཕྱུག་ལགས་ལས་ཁུངས་སུ་བཅར་སྐབས་ཡར་མར་མང་པོ་བཏང་རྗེས་ཐོ་འགོད་བྱེད་རོགས་མ་བྱས་པའི་རྐྱེན་གྱིས། ཁོང་གིས་ལས་བྱེད་དེ་དག་པར་དུ་བླངས་ནས་དྲ་ལམ་དུ་སྤེལ་ཡོད་འདུག དེ་ནས་སྐྱེ་རྒུའི་ཉེན་རྟོག་པས་ཁོང་ཉིན་གྲངས་ ༣ རིང་བཀག་ཉར་བྱས་ཏེ་གཅར་རྡུང་བཏང་ཡོད་པ་མ་ཟད། ཁོང་གི་རླངས་འཁོར་འཁྲུད་ཁང་དེའང་སྒོ་འབྱེད་དུ་བཅུག་མེད་སྐོར་འགྲེལ་བརྗོད་གནང་བྱུང་།
བཀྲ་ཤིས་དབང་ཕྱུག་ལགས་ལས་ཁུངས་སུ་བཅར་སྐབས། ཁོང་རང་གི་ར་སྐོར་ནང་དུ་ཁང་པ་ཡོད་ཀྱང་། གནམ་གཤིས་གྲང་མོ་ཡིན་པས་ཉི་འོད་དྲོད་གློག་ཅིག་བཙུགས་དགོས་ཀྱི་འདུག་སྟབས། ཆོག་མཆན་ཞིག་གནང་རོགས་ཞེས་བརྗོད་སྐབས། སྲིད་གཞུང་གི་ལས་བྱེད་དེས་མགོ་འཁྲིད་བསྡད་མེད་ལ། དེ་ནས་ཡིག་ཆ་དེ་འདྲ་སྤྲོད་སྐོར་བརྗོད་འདུག
སྤྱིར་ཕྱི་ལོ་ ༢༠༢༠ ཟླ་ ༡ ཚེས་ ༡༤ ཉིན་བཙོན་གྲོལ་ཐོབ་པའི་བོད་ཀྱི་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་ཀྱིས། ཕྱི་ལོ་ ༢༠༡༥ ཙམ་ནས་པེ་ཅིན་དུ་གནས་སྡོད་ནེའུ་ཡོག་དུས་བབ་ཡན་ལག་གི་གསར་འགོད་པར་རྒྱ་ནག་གཞུང་གི་སྲིད་ཇུས་འོག་བོད་ཁུལ་གྱི་སློབ་གྲྭ་ཁག་ཏུ་བོད་སྐད་ཡིག་སློབ་གསོ་རྩ་མེད་བཟོ་ཡི་ཡོད་པ་དང་། བོད་ཕྲུག་བྱིས་པའི་བོད་སྐད་ཡིག་གི་གནས་ཚད་ཉེན་ཚབས་ཅན་དུ་གྱུར་ཡོད་སྟབས། ངེས་པར་དུ་རྒྱ་ནག་གཞུང་གི་མི་རིགས་རང་སྐྱོང་ཁུལ་གྱི་བཅའ་ཁྲིམས་ནང་གསལ་ལྟར་བོད་སྐད་ཡིག་སྲུང་སྐྱོབ་དགོས་པའི་འབོད་སྐུལ་བྱས་ཡོད་པ་མ་ཟད། གསར་ཁང་དང་ཁྲིམས་རྩོད་པ་སོགས་ལ་འབྲེལ་བ་བྱས་ཏེ་བོད་ཁུལ་གྱི་སློབ་གསོའི་དཀའ་ངལ་དྲིལ་བསྒྲགས་བྱེད་ཐབས་གནང་ཡོད་པར་བརྟེན། ཕྱི་ལོ་ ༢༠༡༦ ཟླ་ ༡ ཚེས་ ༢༧ ཉིན་སྐྱེ་རྒུ་མདོ་ཉེན་རྟོག་པས་གསང་བའི་ཐོག་ནས་ཁོང་འཛིན་བཟུང་བྱས་ཏེ། ལོ་དེའི་ཕྱི་ཟླ་ ༣ ཚེས་ ༢༤ བར་ནང་མིར་ཤེས་རྟོགས་བྱུང་བཅུག་མེད་པ་མ་ཟད། ནང་མི་སྤུན་མཆེད་སོགས་ལ་ཐུག་ཏུ་མ་བཅུག་པར་བཀག་ཉར་བྱས་ཏེ་ལོ་ ༢ ལྷག་བཞག་ཡོད་པ་རེད། ཕྱི་ལོ་ ༢༠༡༨ ཟླ་ ༥ ཚེས་ ༢༢ ཉིན་སྐྱེ་རྒུ་འབྲིང་རིམ་མི་དམངས་ཁྲིམས་ཁང་ཟེར་བ་དེས། རྒྱལ་ཁབ་ཁ་བྲལ་གཏོང་ཐབས་ཀྱི་བྱ་སྤྱོད་སྤེལ་བའི་ཉེས་མིང་འོག བཀྲ་ཤིས་དབང་ཕྱུག་ལགས་སུ་ལོ་ ༥ བཙོན་འཇུག་ཁྲིམས་བཅད་དེ། ཕྱི་ལོ་ ༢༠༢༡ ཟླ་ ༡ ཚེས་ ༢༨ ཉིན་ཀློད་གྲོལ་བཏང་ཡོད་ཀྱང་། རྒྱ་ནག་གཞུང་གིས་མུ་མཐུད་ཁོང་གི་འགྲོ་འདུག་སྤྱོད་གསུམ་ལ་ལྟ་ཞིབ་དང་སྟངས་འཛིན་བྱས་ཏེ་ཐ་ན་ཁོང་ས་གནས་གཞན་དུ་ཕྱིན་ཏེ་མགྲོན་ཁང་མི་གཡར་བ་སོགས་ཀྱི་དཀའ་ངལ་འཕྲད་བཞིན་ཡོད་པ་རེད།
