ཇི་ནེ་ཝ་བོད་དོན་གླེང་སྟེགས་ཐོག་དབང་བསྒྱུར་འོག་གི་ཛ་དྲག་གནས་སྟངས་གླེང་སློང་གནང་བཞིན་འདུག

ཇི་ནེ་ཝ་བོད་དོན་གླེང་སྟེགས་ཐོག་རྒྱ་ནག་གཞུང་གི་དབང་སྒྱུར་འོག་ཡོད་པའི་ས་ཁུལ་ཁག་ཏུ་འགྲོ་བ་མིའི་ཐོབ་ཐང་ཉམས་རྒུད་དུ་འགྲོ་བཞིན་པའི་སྐོར་བརྗོད་གཞི་བཞི་རུ་བགོས་ཏེ་བགྲོ་གླེང་གནང་བཞིན་འདུག

ཁ་སང་ཕྱི་ཚེས་ ༢༦ ནས་ཉིན་གཉིས་རིང་སུད་སིའི་གྲོང་ཁྱེར་ཇི་ནེ་ཝ་རུ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་སུད་སི་བོད་ཀྱི་སྐུ་ཚབ་དོན་གཅོད་ཁང་ཟུང་འབྲེལ་གྱི་གོ་སྒྲིག་འོག ཇི་ནེ་ཝ་བོད་དོན་གླེང་སྟེགས་ཐེངས་ལྔ་པ་འཚོགས་ཡོད་ཅིང་། ཐེངས་འདིའི་དབུ་འབྱེད་མཛད་སྒོའི་ཐོག་ཏུ་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གི་དབུས། སུད་སི་གྲོས་ཚོགས་འཐུས་མི་ནི་ཁོ་ལ་སི་ཝལ་ཌར་ (Nicolas Walder) ལགས་དང་ལི་ཐུ་ནི་ཡ་གྲོས་ཚོགས་འཐུས་མི་ཨ་རུ་ནཱ་སི་ཝ་ལིན་སི་ཀཱ་སི་(Arunas Valinskas)་ལགས་རྣམ་གཉིས་བརྙན་ལམ་བརྒྱུད་མཉམ་ཞུགས་གནང་ཡོད་པ་དང་། དེ་བཞིན་ཡུ་རོབ་བོད་མི་མང་སྤྱི་འཐུས་ཐུབ་བསྟན་རྒྱ་མཚོ་ལགས་དང་། དབྱིན་ཡུལ་བོད་ཀྱི་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། སྦེལ་ཇམ་བོད་ཀྱི་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དྲུང་འཕར་བསྟན་འཛིན་ལེགས་བཤད་ལགས། དྲུང་འཕར་རྣམ་རྒྱལ་ཚེ་དབང་ལགས། བོད་དོན་རྒྱབ་སྐྱོར་བ། ས་གནས་བོད་རིགས་ཚོགས་པ། ཡུ་རོབ་ཁུལ་གྱི་གཞོན་སྐྱེས་གྲངས་ ༨༠ ཙམ་མཉམ་ཞུགས་གནང་ཡོད་འདུག

ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས། ཇི་ནེ་ཝ་བོད་དོན་གླེང་སྟེགས་ཀྱི་གལ་གནད་སྐོར་དང་འབྲེལ་ནས་གླེང་སྟེགས་འདི་བརྒྱུད་རྒྱ་ནག་གཞུང་གི་དབང་སྒྱུར་འོག་ཡོད་པའི་ས་ཁུལ་ཁག་གི་འགྲོ་བ་མིའི་ཐོབ་ཐང་གནས་སྟངས་གསལ་སྟོན་བྱ་རྒྱུ་གལ་འགངས་ཆེན་པོ་ཡིན་སྐོར་གསུངས་པ་མ་ཟད། ལྷག་པར་ཇི་ནི་ཝ་གླེང་སྟེགས་འདི་བཞིན་སུད་སིའི་གྲོང་ཁྱེར་ཇི་ནེ་ཝར་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ནས་རྒྱ་ནག་ལ་དུས་བཀག་བསྐྱར་ཞིབ་གནང་གི་ཡོད་པ་དང་བསྟུན་གླེང་སྟེགས་འདི་གོ་སྒྲིག་གནང་བཞིན་ཡོད་སྐོར་གསུངས་ཡོད་འདུག

བོད་མིའི་སྒྲིག་འཛུགས་ཀྱི་ཕྱི་འབྲེལ་དྲུང་འཕར་བསྟན་འཛིན་ལེགས་བཤད་ལགས་ཀྱིས། ཇི་ནེ་ཝ་བོད་དོན་གླེང་སྟེགས་ཀྱི་རྩ་བའི་དམིགས་ཡུལ་དང་བསྒྲུབ་བྱ་གཙོ་བོ་རྒྱ་ནག་ནང་དུ་ཁྱོན་ཡོངས་ནས་འགྲོ་བ་མིའི་ཐོབ་ཐང་ཉམས་རྒུད་དང་རྩིས་མེད་རྡོག་རོལ་གཏོང་བཞིན་ཡོད་པའི་གནས་སྟངས་ཤིག་ཆགས་ཡོད་པས། ཚོགས་འདུ་འདིའི་བརྒྱུད་རིམ་སྟེང་རྒྱ་ནག་ནང་དུ་དངོས་ཡོད་གནས་སྟངས་ར་འཕྲོད་པའི་ཐོག བོད་ཙམ་མ་ཡིན་པར་ཡུ་གུར་དང་། སོག་པོ། ཧོང་ཀོང་སོགས་ཀྱི་གནས་སྟངས་གསལ་བཤད་དང་རྒྱུས་ལོན་བྱེད་པའི་གནད་དོན་ཞིག་ཆགས་ཡོད། ཐེངས་འདིའི་ཚོགས་འདུར་མཉམ་ཞུགས་བྱེད་མཁན་མང་ཆེ་ཤོས་བོད་རིགས་གཞོན་སྐྱེས་རྣམས་དང་བོད་དོན་རྒྱབ་སྐྱོར་ཚོགས་པ་ཡིན་ལ། བོད་དོན་འཐབ་རྩོད་ནི་བོད་དོན་ཙམ་མིན་པར་རྒྱ་ནག་གི་ཕྱོགས་ཡོངས་ཀྱི་གནས་སྟངས་ཞིབ་ཕྲ་ཤེས་ཚེ་འཐབ་རྩོད་རྒྱུན་འཁྱོངས་ཡོང་ཐུབ་པ་ཞིག་དང་། ད་ལོ་རྒྱ་ནག་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་སུ་འགྲོ་བ་མིའི་ཐོབ་ཐང་གི་སྙན་ཞུ་ཕུལ་ཏེ། རྒྱ་ནག་ནང་གི་བཟང་ཕྱོགས་ཀྱི་གནས་ཚུལ་འདྲ་མིན་བཤད་ཀྱི་ཡོད་ཀྱང་། ཚོགས་འདུ་འདི་བརྒྱུད་ནས་རྒྱ་ནག་ནང་དུ་འགྲོ་བ་མིའི་ཐོབ་ཐང་རྩ་བ་ཉིད་ནས་མེད་པ་མ་ཟད། རྒྱ་ནག་གཞུང་གིས་ད་དུང་ས་ཁུལ་ཁག་ཏུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མུས་ཡིན་པ་གསལ་སྟོན་བྱེད་པའི་གོ་སྐབས་འཛིན་གྱི་ཡོད་ཅེས་བརྗོད་འདུག

ཇི་ནེ་ཝ་བོད་དོན་གླེང་སྟེགས་ནི་ཕྱི་ལོ་ ༢༠༡༨ ཟླ་ ༡༡ ཚེས་ ༢ ནས་མགོ་འཛུགས་གནང་ཡོད་ཅིང་། ཐེངས་འདིའི་བོད་དོན་གླེང་སྟེགས་ཐོག་རྒྱ་ནག་གཞུང་གི་དབང་སྒྱུར་འོག་ཏུ་ཡོད་པའི་ས་ཁུལ་ཁག་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་དང་། རྒྱ་ནག་གཞུང་གིས་མི་རིགས་རྩ་གཏོར་གྱི་སྲིད་ཇུས་དང་འགྲོ་བ་མིའི་ཐོབ་ཐང་སྲུང་སྐྱོབ་པར་དྲག་གནོན། བོད་གཙོས་པའི་རྒྱ་ནག་གཞུང་གི་དབང་སྒྱུར་འོག་ཡོད་པའི་ས་ཁུལ་ཁག་གི་ནང་འཛུགས་སྐྲུན་ཡར་རྒྱས་ཀྱི་མིང་ཐོག་ནས་མི་སེར་སྤེལ་ཡུལ་གྱི་སྲིད་ཇུས་སྤེལ་བཞིན་པ། རྒྱལ་མཚམས་ལས་བརྒལ་བའི་དྲག་གནོན་རྣམས་རྒྱལ་སྤྱིའི་སྤྱི་ཚོགས་ནང་འགོག་སྲུང་བྱ་དགོས་པའི་སྐོར་གླེང་སློང་བྱེད་ཀྱི་ཡོད་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།