དབྱིན་ཇིའི་རྒྱལ་ཡོངས་གྲོས་ཚོགས་འཐུས་མིའི་རྒྱལ་སྤྱིའི་ཆོས་དད་རང་ལྷན་ཚོགས་ཀྱི་སྣེ་འཁྲིད་འོག་དབྱིན་ཇིའི་གྲོས་ཚོགས་ནང་བོད་བརྒྱུད་ནང་བསྟན་གྱི་ཆོས་ལུགས་དད་མོས་རང་དབང་སྲུང་སྐྱོབ་དགོས་པའི་བགྲོ་གླེང་འཚོགས།
ཁ་སང་དབྱིན་ཇིའི་གྲོས་ཚོགས་ཀྱི་ཚོགས་ཁང་དུ། དབྱིན་ཇིའི་གྲོས་ཚོགས་ཀྱི་རྒྱལ་ཡོངས་གྲོས་ཚོགས་འཐུས་མིའི་(APPG) རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་སྣེ་འཁྲིད་འོག རྒྱ་ནག་གཞུང་གིས་བོད་ཀྱི་ཆོས་དད་རང་དབང་ལ་རྡོག་རོལ་བཞིན་པའི་གནས་སྟངས་སོགས་ཀྱི་སྐོར་ལ་གླེང་སློང་གནང་བ་དང་བསྟུན། དབྱིན་ཇིའི་གྲོས་ཚོགས་ནས་བོད་དོན་དང་འབྲེལ་བའི་གནད་དོན་ཆེན་པོ་ལྔ་སྲུང་སྐྱོབ་དང་རྒྱ་ནག་ལ་བོད་དོན་གླེང་སློང་བྱ་དགོས་པ་སོགས་ཀྱི་སྐུལ་མ་བཏང་འདུག
སྐབས་དེར་དབྱིན་ཇིའི་རྒྱལ་ཡོངས་གྲོས་ཚོགས་འཐུས་མིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་གཙོ་དང་གྲོས་ཚོགས་འཐུས་མི་སྐུ་ཞབས་ཇིམ་ཤན་ནོན་ (Jim Shannon) ལགས་ཀྱིས། ང་ཚོའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་བལ་ཡུལ་དུ་བསྐྱོད་པ་བརྒྱུད་ཤེས་རྟོགས་བྱུང་བ་བཞིན། ད་ལྟ་བལ་ཡུལ་ནང་གི་བོད་མི་ཚོར་སྐྱབས་བཅོལ་བའི་ཡིག་ཆ་སྤྲོད་ཀྱི་མེད་པ་དང་། དམིགས་བསལ་ནང་པ་དང་གྲང་ཉུང་མི་རིགས་ཀྱི་ཆོས་ལུགས་སྡེ་ཁག་གི་གནས་སྟངས་ལ་ང་ཚོར་བློ་འཚབ་ཡོད། ཅེས་དང་། བལ་ཡུལ་ནང་གི་བོད་མི་ཚོར་དགོས་ངེས་ཀྱི་ཡིག་ཆ་ཁག་ངེས་པར་སྤྲོད་དགོས་པའི་འབོད་སྐུལ་ཡང་ཞུས་སོང་།
བོད་བརྒྱུད་ནང་བསྟན་གྱི་ཆོས་ལུགས་རང་དབང་སྲུང་སྐྱོབ་དགོས་པའི་བགྲོ་གླེང་དང་འབྲེལ། རྒྱ་ནག་གིས་བོད་ནང་གི་བོད་མིའི་སྐད་ཡིག་རིག་གཞུང་དང་བཙན་ཁྲིད་བཙོན་འཇུག འགྲོ་བ་མིའི་ཐོབ་ཐང་རྡོག་རོལ་གཏོང་གིན་ཡོད་ཅིང་། ཕྱི་ལོ་ ༢༠༢༡ ལོའི་ཨ་རིའི་རྒྱལ་སྤྱིའི་ཆོས་དད་རང་དབང་གི་སྙན་ཐོའི་ནང་། བོད་ནང་གི་དགེ་འདུན་པ་ཚོར་ཆབ་སྲིད་ཀྱི་སློབ་གསོ་སྤྲོད་བཞིན་ཡོད་པ་མ་ཟད། ཉིན་རེའི་ཆོས་ཕྱོགས་ཀྱི་བྱེད་སྒོ་མཐའ་དག་ལ་དམ་དྲག་བྱེད་བཞིན་ཡོད། རྒྱ་ནག་གཞུང་གིས་ཐབས་ལམ་འདྲ་མིན་གྱི་ཐོག་ནས་བོད་ཀྱི་ནང་ཆོས་ལ་དམ་དྲག་བྱེད་བཞིན་པ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་གྲོས་མཐུན་དོན་ཚན་ ༡༨ པར་འགལ་ཡོད།
རྒྱ་ནག་དམར་ཤོག་ཚོགས་པས་བོད་ནང་ཆབ་སྲིད་དང་འབྲེལ་བའི་བཙོན་པ་སྟོང་ཕྲག་མང་པོ་འཛིན་བཟུང་བྱས་ཡོད་ཅིང་། དེའི་ཁྲོད་ཀྱི་མང་ཤོས་ཤིག་ནི་ཆོས་དད་རང་དབང་དང་འབྲེལ་བའི་བཙོན་པ་ཆགས་ཀྱི་ཡོད། རྒྱ་ནག་གིས་འཛིན་བཟུང་འོག་ཡོད་པའི་བོད་མི་ཆབ་སྲིད་བཙོན་པ་རྣམས་ལ་རྡུང་རྡེག་བཏང་སྟེ། སྨན་བཅོས་དང་ཁྲིམས་གཏུག་ཀྱི་ཁོར་ཡུག་མཐུན་སྦྱོར་བྱེད་ཀྱི་མེད་པ་དང་། དེ་མཚུངས་བཞིན་ཡུ་གུར་མི་མང་ས་ཡ་མང་པོར་དྲག་གནོན་བྱེད་བཞིན་ཡོད་སྟབས། དབྱིན་ཇིའི་ངོས་ནས་རྒྱལ་སྤྱིའི་ཁྲིམས་སྒྲིག་དང་འགལ་བའི་བྱ་སྤྱོད་དེ་དག་ལ་འགྱུར་བ་བཏང་སྟེ། རྒྱ་ནག་ནང་འགྲོ་བ་མིའི་ཐོབ་ཐང་གོང་མཐོར་དང་གྲང་ཉུང་མི་རིགས་ཀྱི་ཆོས་དད་རང་དབང་སྲུང་སྐྱོབ་དང་ཁོང་ཚོའི་དཀའ་ངལ་སེལ་ཐབས་བྱ་དགོས་པའི་སྐུལ་མ་བཏང་འདུག
རྒྱ་གཞུང་གིས་དམ་དྲག་ཤུགས་ཆེན་བྱེད་བཞིན་པའི་གནས་སྟངས་འོག བོད་ནང་གི་གནས་ཚུལ་མང་པོ་ཞིག་ཤེས་རྟོགས་འབྱུང་རྒྱུ་ཁག་པོ་ཡིན་པ་དང་། དམིགས་བསལ་གྱིས་ཆོས་ལུགས་རང་དབང་དང་འབྲེལ་བའི་གནས་ཚུལ་ལ་དམ་དྲག་བྱེད་བཞིན་ཡོད་པ་མ་ཟད། རྒྱ་ནག་གིས་བོད་བརྒྱུད་ནང་བསྟན་ཆོས་ལུགས་རྒྱ་བསྒྱུར་བྱེད་པའི་སྲིད་ཇུས་ལག་བསྟར་བྱས་ཏེ། གནས་མཇལ་སོགས་ཚུད་པའི་ཆོས་ལུགས་ཀྱི་བྱེད་སྒོ་ཁག་རྒྱ་སྲོལ་ཅན་དུ་བསྒྱུར་བཞིན་ཡོད་པ་དང་། ༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ནང་སྐྱབས་བཅོལ་དུ་ཕེབས་དགོས་བྱུང་བ་དང་། ད་ལྟ་རྒྱ་ནག་གིས་བོད་ཀྱི་ཆོས་སྲིད་གཉིས་ལ་དབང་སྒྱུར་བྱེད་བཞིན་པའི་ཁྲོད། པཎ་ཆེན་སྐུ་ཕྲེང་བཅུ་གཅིག་པ་མཆོག་འཛིན་བཟུང་བཀག་ཉར་གྱིས་གར་སོང་ཆ་མེད་དུ་གྱུར་བ། བོད་བརྒྱུད་ནང་བསྟན་གྱི་དབུ་འཁྲིད་ལ་དབང་སྒྱུར་ཐབས་བྱེད་བཞིན་ཡོད་སྐོར་སོགས་བརྗོད་འདུག
ཡང་བགྲོ་གླེང་སྐབས་རྒྱལ་སྤྱིའི་བོད་དོན་ལས་འགུལ་ཁང་གི་གནས་ཚུལ་ལུང་འདྲེན་དང་འབྲེལ་ནས། ད་ལྟ་རྒྱ་ནག་གིས་བོད་མི་རྣམས་ལ་དབུ་འབྱེད་བྱས་ཏེ། འདྲ་མཉམ་མིན་པའི་ལས་ཀ་དང་གླ་ཆ། འགྲིམ་འགྲུལ་ལ་བཀག་སྡོམ། ཐོབ་ཐང་ལག་འཁྱེར་སོགས་རྒྱ་རིགས་ནང་ལྟར་སྤྲོད་ཀྱི་མེད་པ་མ་ཟད། བོད་མི་ཚོ་རང་ཡུལ་ན་མི་སེར་ཨང་གཉིས་པ་ཆགས་ཡོད། ཉེ་ལམ་ནས་རྒྱ་ནག་གིས་བོད་ཀྱི་སྐད་ཡིག་རྩ་མེད་གཏོང་ཐབས་སུ་བོད་ཀྱི་བྱིས་པ་ས་ཡ་གཅིག་ལྷག་ཕ་མ་དང་ཁ་བྲལ་དུ་བཏང་སྟེ། བཅའ་སྡོད་སློབ་གསོའི་ལམ་ལུགས་ནང་རྒྱ་ཡིག་ཁོ་ནས་སློབ་གསོ་སྤྲོད་ཀྱི་ཡོད། རྒྱ་ནག་གིས་བོད་ནང་གི་བོད་མི་ཚོར་བོད་ཀྱི་སྐད་ཡིག་སྦྱོང་མ་བཅུག་པ་དང་། བོད་ནང་མི་སེལ་སྤེལ་བའི་སྲིད་ཇུས་ལག་བསྟར་གྱིས། བོད་མི་རྣམས་ལ་ལས་ཀ་དང་སློབ་གསོ། འཕྲོད་བསྟེན། ཚོང་ལས་སོགས་ཀྱི་གོ་སྐབས་འདྲ་མཉམ་མེད་ཁར། ཞིང་ཆེན་རིམ་པ་དང་ས་གནས་རིམ་པའི་དམར་ཤོག་ཚོགས་པའི་དཔོན་རིགས་དང་དམག་མི། གཞུང་གི་ལས་བྱེད་པ་བཅས་ཀྱི་གྲས་སོགས་སུ་བོད་མིའི་གྲངས་འབོར་ཧ་ཅང་ཉུང་ཉུང་ཡིན་པ་དང་། རྒྱ་ནག་གིས་བོད་ཀྱི་གཏེར་ཁ་སྔོག་འདོན་བྱེད་བཞིན་པ་དང་འབྲེལ། ཞིང་འབྲོག་གི་བོད་མི་ས་ཡ་ ༢ ལྷག་བཙན་གྱིས་གནས་སྤོར་བྱེད་དུ་བཅུག་ཡོད་སྟབས། གནད་དོན་དེ་དག་གི་ཐོག་ནས་རྒྱ་ནག་གིས་ཁྱོན་ཡོངས་ནས་བོད་ནང་སྲིད་དབང་སྒེར་གཅོད་རིང་ལུགས་ཀྱི་སྲིད་ཇུས་ལག་བསྟར་ནན་མོ་བྱེད་བཞིན་པ་མཚོན་ཡོད
སྐུ་ཞབས་ཇིམ་ཤན་ནོན་ (Jim Shannon) ལགས་ཀྱིས། རྒྱ་ནག་གཞུང་གིས་ཐབས་ཤེས་ཡོད་རྒུ་བཏོན་ནས་བོད་མི་སྤྱིའི་འགྲོ་འདུག་སྤྱོད་གསུམ་ལ་བརྒྱུད་ལམ་འདྲ་མིན་གྱི་ཐོག་ནས་སྟངས་འཛིན་བྱེད་བཞིན་པ་མངོན་གསལ་ཡིན་པ་དང་། ལོ་རེའི་ཟླ་བཅུ་གཉིས་རིང་བོད་ནང་གི་བོད་མི་རྣམས་གང་བྱུང་འཛིན་བཟུང་བྱེད་བཞིན་པའི་གནས་ཚུལ་མང་དག་ཅིག་བྱུང་གི་ཡོད་སྐོར་གླེང་སློང་གནང་བ་དང་འབྲེལ། ཟླ་འདིའི་ཕྱི་ཚེས་ ༡༢ ཉིན་བོད་སྐྱེ་རྒུ་མདོ་ཁུལ་ནས་མ་ཎི་སྟོང་རྡོ་ ༢༥༠ ཁྲི་གསོལ་ཞུས་པར་བརྟེན། རྒྱ་ནག་གིས་མང་ཚོགས་ལ་འཇིགས་སྐུལ་དང་མགོ་སྐོར་བཏང་ཡོད་སྐོར་གྱི་ཉེས་མིང་གཡོགས་ནས། ལས་གཞི་བཀག་སྡོམ་བྱས་ཏེ་གཙོ་འགན་འཁུར་མཁན་བློ་དགའ་དང་ཉི་མ། ཚེ་དར། རིན་ཆེན་ཞེས་པའི་སྐྱེས་པ་བཞི་བཙན་འཁྲིད་བྱས་ཡོད་པའི་གནས་ཚུལ་ལུང་འདྲེན་གནང་སོང་བ་མ་ཟད། དབྱིན་ཇིའི་རྒྱལ་ཡོངས་གྲོས་ཚོགས་འཐུས་མིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས། གོང་བརྗོད་གནད་དོན་དེ་དག་དང་འབྲེལ་ནས་དབྱིན་ཇིའི་གྲོས་ཚོགས་ཀྱིས་བོད་ཀྱི་ཆོས་དད་རང་དབང་གི་ཐོབ་ཐང་སྲུང་སྐྱོབ་བྱ་དགོས་པ་དང་། རྒྱ་ནག་གཞུང་ལ་གནད་དོན་དེ་དག་གླེང་སློང་དགོས་པའི་འབོད་སྐུལ་ཡང་ཞུས་སོང་།
མཇུག་ཏུ། དབྱིན་ཇིའི་རྒྱལ་ཡོངས་གྲོས་ཚོགས་འཐུས་མིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས། བོད་ཀྱི་ཆོས་དད་རང་དབང་དང་འབྲེལ་ནས་དབྱིན་ཇིའི་གཞུང་ནས་འགན་ལེན་སྲུང་དང་བསྒྲུབ་དགོས་པའི་འབོད་སྐུལ་དོན་ཚན་ལྔ་ཐེར་འདོན་གནང་སོང་། དེ་དག་ནི། གཅིག་བོད་མི་རྣམས་ལ་རང་གི་ཆོས་ལུགས་ཀྱི་སྲོལ་རྒྱུན་ལྟར་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་འདེམས་པའི་ཐོབ་ཐང་སྲུང་སྐྱོབ་བྱ་དགོས། གཉིས་༧པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་ཀློད་གྲོལ་གཏོང་དགོས། གསུམ་བོད་ཀྱི་ཆབ་སྲིད་བཙོན་པ་ཡོངས་ཀློད་གྲོལ་གཏོང་དགོས། བཞི་བོད་མི་རྣམས་ལ་རྒྱ་ནག་དམར་ཤོག་ཚོགས་པའི་གནོན་ཤུགས་གང་ཡང་མེད་པའི་ཐོག་ནས་ཆོས་ལུགས་དད་མོས་ཀྱི་རང་དབང་སྤྲོད་དགོས། ལྔ་བོད་མི་རྣམས་ལ་བོད་ཀྱི་སྐད་ཡིག་སྦྱོང་བ་དང་ཉར་ཚགས་བྱེད་པའི་རང་དབང་དགོས་བཅས་པ་རེད་འདུག
གསར་འགོད་པ། སྐལ་བཟང་སྦྱིན་པ།
