རྒྱ་ནག་གཞུང་གིས་ཨ་རིའི་གོ་མཚོན་དང་འབྲེལ་བའི་བཟོ་གྲྭ་ལྔ་ཡིས་ཐའེ་ཝན་ལ་གོ་མཚོན་ཕྱིར་ཚོང་བྱས་ཏེ། རྒྱ་ནག་གི་ནང་སྲིད་ལ་ཐེ་གཏོགས་བྱེད་ཀྱི་ཡོད་པའི་ངོས་འཛིན་འོག་ཉེས་ཆད་བཏང་ཡོད་འདུག
ཨ་རིའི་རྒྱལ་སྲུང་གོ་མཚོན་དང་འབྲེལ་བའི་བཟོ་གྲྭ་ལྔ་ཡིས་ཐའེ་ཝན་ལ་མཚོན་ཆ་ཕྱིར་ཚོང་བྱས་ཏེ། རྒྱ་ནག་གཅིག་གི་སྲིད་ཇུས་དང་མངོན་འདོད་ལ་རྡོག་རོལ་བཏང་བ་མ་ཟད། ཐའེ་ཝན་མཚོ་འགག་གི་བརྟན་བརླིང་དང་ཞི་བདེ་ལ་གནོད་སྐྱོན་བཟོས་ཡོད་སྐོར་སོགས་བརྗོད་དེ། རྒྱ་ནག་གཞུང་གིས་རྒྱ་ནག་ཏུ་ཡོད་པའི་ཨ་རིའི་གོ་མཚོན་བཟོ་སྐྲུན་གྱི་བཟོ་གྲྭ་དེ་དག་གི་རྒྱུ་དངོས་གཞུང་བཞེས་དང་འབྱུང་འགྱུར་བཟོ་གྲྭ་དེ་དག་དང་འབྲེལ་ཡོད་མི་སྒེར་བཅས་ནས་རྒྱ་ནག་ནང་ཚོང་ལས་ཉར་མི་ཆོག་པ་སོགས་ཀྱི་ཉེས་ཆད་གཅོད་རྒྱུ་ཡིན་འདུག
དེ་འབྲེལ་རྒྱ་གར་ཧིན་རྡུ་གསར་ཁང་གི་གནས་ཚུལ་ནང་། རྒྱ་ནག་གིས་ཨ་རིའི་གོ་མཚོན་བཟོ་གྲྭ་ལྔ་ལ་ཉེས་ཆད་གཅོད་པའི་གསལ་བརྡ་དེ་ནི། ཐའེ་ཝན་སྲིད་འཛིན་གྱི་འོས་བསྡུ་བསླེབ་ལ་ཉེ་སྐབས་བསྒྲགས་པ་དང་། ཐའེ་ཝན་སྲིད་འཛིན་གྱི་འོས་བསྡུ་ནི་རྒྱ་ནག་དང་ཐའེ་ཝན་བར་འབྲེལ་ལམ་འཛིན་ཕྱོགས་ཀྱི་ཆེས་གལ་ཆེ་བའི་གནད་དོན་ཞིག་ཡིན་སྟབས། རྒྱ་ནག་གཞུང་གིས་ཐའེ་ཝན་སྲིད་འཛིན་གྱི་འོས་བསྡུར་ཐེ་གཏོགས་བྱེད་ཐབས་ཤིག་ཀྱང་ཡིན་སྐོར་བརྗོད་འདུག རྒྱ་ནག་ཕྱི་སྲིད་ལྷན་ཁང་གི་གསར་འགོད་བསྒྲགས་གཏམ་ནང་། རྒྱ་ནག་གིས་རང་གི་རྒྱལ་སྲིད་བདེ་འཇགས་དང་ས་ཁོངས་བདག་དབང་། རྒྱ་ནག་གི་བཟོ་གྲྭ་ཁག་དང་མི་དམངས་ཀྱི་མངོན་འདོད་དང་ཐོབ་ཐང་སོགས་སྲུང་སྐྱོབ་བྱ་རྒྱུ་ཡིན་སྐོར་སོགས་ནན་བརྗོད་བྱས་འདུག
ད་ལྟ་རྒྱ་ནག་གཞུང་གིས་ཨ་རི་དང་ཐའེ་ཝན་བར་གོ་མཚོན་ཉོ་ཚོང་གི་གྲོས་མཐུན་གང་ཡིན་གསལ་འདོན་བྱས་མེད་ཀྱང་། འདས་ལོའི་ཕྱི་ཟླ་ ༡༢ ནང་ཨ་རིས་ཐའེ་ཝན་ལ་ཨ་སྒོར་ས་ཡ་ ༣༠༠ ཡི་གོ་མཚོན་མ་ལག་དང་དམག་སྲིད་སོགས་ཀྱི་རྒྱབ་སྐྱོར་བྱེད་གཏན་ཁེལ་ཡོད་ཅིང་། ཨ་ཐའེ་གཉིས་ཀྱི་གོ་མཚོན་ཉོ་ཚོང་གི་གྲོས་མཐུན་དེའི་ནང་། ཨ་རིས་ཐའེ་ཝན་ལ་གོ་མཚོན་གཙོས་དམག་སྦྱོང་དང་ཐའེ་ཝན་གྱི་དམག་ཤུགས་རྒྱ་སྐྱེད་དང་དེང་རབས་ཅན་དུ་བསྒྱུར་ཏེ། ཐའེ་ཝན་ལ་དམག་འཁྲུག་སོགས་ཀྱི་ཉེན་ཁ་ཅི་ཞིག་འཕྲད་ཀྱང་གདོང་ལེན་གྱི་ནུས་པ་ལྡན་པ་ཞིག་ཏུ་བཟོ་རྒྱུ་ཡིན་སྐོར་སོགས་ཚུད་ཡོད་འདུག
ད་སྔ་བར་ཨ་རིས་གཞུང་འབྲེལ་གྱི་ཐོག་ནས་རྒྱ་ནག་ལ་ལན་འདེབས་གང་ཡང་བྱས་མེད་པ་དང་། ཐའེ་ཝན་ནི་ཨ་རྒྱ་གཉིས་བར་གདོང་ལེན་བྱེད་རེས་དགོས་པའི་གནད་དོན་གལ་ཆེན་ཞིག་ཡིན་པ་མ་ཟད། རྒྱ་ནག་གིས་ཨ་རིས་ཐའེ་ཝན་ལ་གོ་མཚོན་ཕྱིར་ཚོང་བྱས་ཏེ་རྒྱ་ནག་གི་ནང་སྲིད་ལ་ཐེ་གཏོགས་བྱེད་ཀྱིན་ཡོད་པའི་སྐྱོན་བརྗོད་བྱེད་མུས་ཡིན་སྟབས། དབྱེ་ཞིབ་པ་ཁག་ཅིག་གིས་ཐའེ་ཝན་གྱི་གནད་དོན་དང་འབྲེལ་ཨ་རྒྱ་གཉིས་བར་དམག་འཁྲུག་ཤོར་སྲིད་སྐོར་ཡང་བརྗོད་འདུག
འདས་ལོའི་ཕྱི་ཟླ་ ༡༢ ནང་ཨ་རིས་རྒྱ་ནག་ཚུད་པའི་འཛམ་གླིང་གི་མི་སྒེར་དང་ཚོགས་སྡེ་ ༢༥༠ ལྷག་ནས་ཨུ་རུ་སུའི་ཡོ་ཁུ་རེན་བཙན་འཛུལ་བྱེད་པར་མཐུན་སྦྱོར་བྱས་སྟབས་ཉེས་ཆད་བཅད་ཡོད་པ་དང་། ཕྱི་ཟླ་ ༡༡ ནང་རྒྱ་ནག་གི་བཟོ་ཚོང་ཁང་གསུམ་གྱིས་ཨུ་རུ་སུའི་དམག་ལ་གོ་མཚོན་སོགས་ཀྱི་མཐུན་སྦྱོར་བྱས་སྟབས་ཉེས་ཆད་བཏང་ཡོད་འདུག
