འདས་ལོའི་ལོ་མཇུག་ཏུ་འཛིན་བཟུང་བྱས་པའི་གྲྭ་དཀོན་མཆོག་གྲགས་པ་ལགས་ཀློད་གྲོལ་བཏང་ཡོད་ཀྱང་ད་དུང་ལྟ་རྟོག་འོག་བཞག་ཡོད་འདུག
འདི་གའི་གསར་འགོད་པར་ད་ལྟ་བོད་ནས་གནས་ཚུལ་ཁུངས་ལྡན་འབྱོར་བ་ལྟར་ན། འདས་ལོའི་ཕྱི་ཟླ་ ༡༠ ནང་རྒྱ་ནག་གཞུང་གིས་འཛིན་བཟུང་བྱས་པའི་ཐེ་བོ་རྫོང་བཀྲ་ཤིས་དགོན་པའི་དགེ་འདུན་པ་དཀོན་མཆོག་གྲགས་པ་ལགས་ཟླ་གཉིས་ཀྱི་རྗེས་ནས་ཀློད་གྲོལ་བཏང་སྟེ་ད་ལྟ་བདེ་ཐང་ངང་རང་ཁྱིམ་དུ་འབྱོར་ཡོད་འདུག
གནས་ཚུལ་མཁོ་སྤྲོད་པས་བརྗོད་དོན་ལྟར་ན། རྒྱ་གཞུང་ཉེན་རྟོག་པས་གྲྭ་དཀོན་མཆོག་གྲགས་པ་ལགས་འཛིན་བཟུང་བཙན་འཁྲིད་བྱས་པ་ནས་ད་བར་ཁོང་ལ་གནས་ཚུལ་ཅི་བྱུང་གི་སྐོར་ཤེས་རྟོགས་ཐུབ་ཀྱི་མེད་པ་དང་། ད་ལྟ་ཁོང་ཀློད་གྲོལ་བཏང་སྟེ་སྐུ་གཟུགས་བདེ་ཐང་ངང་རང་ཁྱིམ་དུ་སྡོད་ཀྱི་ཡོད་ཀྱང་། ལྟ་རྟོག་འོག་བཞག་སྟེ་ཕྱིའི་མིར་སྐད་ཆ་བཤད་པའི་རང་དབང་མེད་པ་མ་ཟད། ཐེ་བོ་དང་མཛོད་དགེ་རྫོང་ཕྱོགས་སུ་རྒྱ་གཞུང་གིས་དམ་དྲག་ཤུགས་ཆེན་བྱེད་བཞིན་ཡོད་སྟབས། གྲྭ་དཀོན་མཆོག་གྲགས་པ་ལགས་གཙོས་འཛིན་བཟུང་བཀག་ཉར་བྱས་པའི་བོད་མིའི་སྐོར་གྱི་གནས་ཚུལ་རིགས་བོད་ཀྱི་ཕྱི་ཕྱོགས་སུ་བཤད་པར་ཧ་ཅང་ཉེན་ཁ་ཆེན་པོ་ཡོད་འདུག
ཡང་གནས་ཚུལ་མཁོ་སྤྲོད་པས། སྦྱིར་ན་ཐེ་བོ་རྫོང་དང་མཛོད་དགེ་རྫོང་གི་ས་གནས་སུ་དམ་དྲག་ཧ་ཅང་ཆེན་པོ་ཡོད་པའི་དབང་གིས་གནས་ཚུལ་འདིས་རིགས་བོད་ཕྱི་ལོག་གི་མི་ལ་བཤད་རྒྱུར་ཧ་ཅང་ཉེན་ཁ་ཆེན་པོ་རེད་འདུག ཐ་ན་རང་གི་ས་གནས་ཀྱི་མི་ཕན་ཚུན་བར་ཁ་བརྡ་བྱེད་རྒྱུར་ཡང་སྟབས་བདེ་མ་རེད། ལྷག་པར་དུ་ད་ལྟའི་ཆར་ཐེ་བོ་རྫོང་གི་ས་གནས་སུ་རྒྱ་ནག་གི་ཁྲིམས་ཧ་ཅང་བཙན་པོ་འདུག རྒྱ་གར་དུ་ཡོད་པའི་མི་དང་ཁ་བརྡ་འདྲ་བྱས་པ་ཡིན་ན་ཉེན་རྟོག་པའི་འཛིན་བཟུང་བྱས་ནས་ཁྲིད་འགྲོ་གི་འདུག སྐྱ་སེར་མང་ཚོགས་སུ་འདྲ་ཞིག་གིས་ཀྱང་རྒྱ་གར་དུ་ཡོད་པའི་མི་དང་ཁ་བརྡ་སོགས་བྱས་མི་ཆོག་པའི་ཁྲིམས་བཞག་འདུག ཅེས་བརྗོད་སོང་།
འདས་ལོའི་ཕྱི་ཟླ་ ༡༡ ཟླ་མགོར་འདི་གའི་གསར་ཁང་ལ་གྲྭ་དཀོན་མཆོག་གྲགས་པ་ལགས་འཛིན་བཟུང་བྱས་པའི་གནས་ཚུལ་ཐོག་མར་འབྱོར་བ་དང་། སྐབས་དེར་ཁོང་འཛིན་བཟུང་བྱས་ནས་ཉིན་གྲངས་ ༡༠ ལྷག་ཕྱིན་འདུག་ལ། ཁོང་འཛིན་བཟུང་བྱེད་དོན་དང་གང་དུ་བཀག་ཉར་བྱས་པ་སོགས་གསལ་ཁ་མེད་ཁར། ནང་མིས་གྲྭ་དཀོན་མཆོག་གྲགས་པ་ལགས་གང་དུ་ཡོད་མེད་དང་ཐུག་འཕྲད་བྱ་ཆོག་པའི་རེ་འདུན་བཏོན་ཡོད་ཀྱང་ཐུག་འཕྲད་བྱེད་དུ་བཅུག་མེད་པ་བོད་ནང་གི་བོད་མི་ཞིག་གིས་བརྗོད་ཡོད།
ད་དུང་བོད་མི་ཁོང་གིས། གྲྭ་དཀོན་མཆོག་གྲགས་པ་ལགས་ནི་རྒྱུན་དུ་ནས་མཚམས་ལ་བཞུགས་པ་སོགས་ཆོས་ཕྱོགས་ཀྱི་བྱ་བ་གནང་མཁན་ཞིག་ཡིན་པ་ལས། རྒྱལ་ཁབ་ཀྱི་ཁྲིམས་སྒྲིག་དང་འགལ་བའི་ལས་ཀ་བྱེད་མཁན་ཞིག་གཏན་ནས་མིན་ཡང་། འདས་པའི་ལོ་ཤས་གོང་བལ་ཡུལ་བརྒྱུད་ནས་མཆོད་རྫས་དང་ཅ་ལག་ཁ་ཤས་མངག་ཉོ་བྱས་མྱོང་ཡོད་ཀྱང་། དེ་ཕལ་ཆེར་རྒྱལ་ཁབ་ཀྱིས་ཁྲིམས་འགལ་དང་ནག་ཉེས་སུ་རྩི་ཐབས་མེད་སྐོར་དང་། དེ་མིན་ཁོང་ནི་རྒྱ་ནག་གི་ཁྲིམས་སྒྲིག་དང་མི་མཐུན་པའི་ལས་ཀ་བྱེད་མཁན་ཞིག་གཏན་ནས་མིན། དེའང་མང་ཚོགས་ཚང་མས་ཤེས་ཀྱི་ཡོད་སྐོར་སོགས་འགྲེལ་བརྗོད་གནང་།
གྲྭ་དཀོན་མཆོག་གྲགས་པ་ལགས་ནི་བོད་ཐེ་བོ་རྫོང་གཡིས་པ་ཡུལ་ཚོའི་བཀྲ་ཤིས་དགོན་པའི་དགེ་འདུན་པ་ཞིག་ཡིན་ཞིང་། རྒྱུན་དུ་ནས་ཆོས་ཕྱོགས་ཀྱི་ཉམས་ལེན་པ་ཞིག་ཡིན་འདུག
གསར་འགོད་པ། སྐལ་བཟང་སྦྱིན་པ།
