ཚེ་རིང་རྣམ་རྒྱལ་གྱིས་བསྒྱུར།
ཉེ་ལམ་ཞིབ་འཇུག་བྱས་པ་བརྒྱུད། ཨ་རི་ནང་གི་ཁྱིམ་ཚང་མང་ཆེ་བས་བྱིས་པ་སྐྱེས་འཚར་ལས་སེམས་ཅན་བདག་ཉར་མང་བ་བྱེད་ཀྱིན་ཡོད་པའི་གྲུབ་དོན་རྙེད་ཡོད། གནད་དོན་དེའི་ཐད་ཁྱེད་རང་ཧ་ལས་སམ། ཞིག་འཇུག་གི་གྲུབ་དོན་བརྒྱུད་དེང་གི་ཆར་རྒྱ་གར་ནང་དུའང་གཅེས་ཉར་སེམས་ཅན་གསོ་སྐྱོང་བྱེད་མཁན་གྱི་ཁྱིམ་ཚང་གི་གྲངས་འབོར་ཇེ་མཐོར་འགྲོ་མུས་ཡིན་འདུག སྤྱིར་ཁྱིམ་དུ་སེམས་ཅན་གཅེས་ཉར་བྱ་རྒྱུར་དགེ་མཚན་མང་དག་ཅིག་ཡོད་ལ། གལ་ཏེ་ཁྱེད་རང་ཁྱིམ་དུ་སེམས་ཅན་ཞིག་གཅེས་ཉར་བྱ་འདོད་མཁན་ཞིག་ཡིན་ཚེ། ང་ཚོས་ཁྱེད་ཀྱི་ཁྱིམ་དུ་གཅེས་ཉར་སེམས་ཅན་ཞིག་གསོ་སྐྱོང་བྱས་ནས་གཞིས་ཁྱིམ་གསར་པ་ཞིག་བསྐྲུན་རྒྱུར་སྐུལ་མ་གཏོང་གི་ཡོད།
༡) གཅེས་ཉར་སེམས་ཅན་གྱིས་ཁྱེད་ཀྱི་སེམས་ཁམས་ཡར་རྒྱས་གཏང་ཐུབ།
ཁྱེད་ཀྱི་ཡིད་ཆེས་ཀྱི་ཡོད་མེད་ལ་མ་ལྟོས་པར་གཅེས་ཉར་སེམས་ཅན་རྣམས་ནི་ཁྱེད་ཀྱི་སེམས་ཁམས་དང་གཤིས་སྤྱོད་ཡར་རྒྱས་གཏོང་མཁན་ཞིག་ཡིན་པ་རེད། ཉམས་ཞིབ་པ་ཚོས་གཅེས་ཉར་སེམས་ཅན་ཉར་མཁན་ཚོ་མི་གཞན་དང་བསྡུར་ན་ནད་རིགས་ཀྱིས་མནར་ནའང་ཡིད་ཞུམ་གྱི་ན་ཚ་ཉུང་བ་ཡོད་པའི་གྲུབ་དོན་རྙེད་འདུག
༢) ཁྲག་ཤེད་ཚོད་འཛིན་ལ་རོགས་པ་བྱེད་ཐུབ།
འཕྲོད་བསྟེན་ཆེད་མཁས་པ་ཚོས་ཁྱི་གཅེས་སྐྱོང་བྱེད་མཁན་རྣམས་ལ་ཁྲག་ཤེད་ཉུང་དྲགས་པའི་ན་ཚ་ཉུང་བའི་ཁར། སྙིང་གི་འཕར་ཚད་ཀྱང་ཉུང་བས། སེམས་ཅན་བདག་སྐྱོང་བྱས་པ་དེས་སྨན་བཟའ་མི་དགོས་པར་མཁྲིས་ཞག་དང་ཤ་རྒྱས་པ་སོགས་ཀྱི་ན་ཚ་ལས་སྐྱོབས་ནུས།
༣) ལུས་སྦྱོང་གི་ཆ་ཤས་ཤིག་ཡིན།
ཁྱེད་རང་ཕྱི་ལ་གོམ་བགྲོད་དུ་བསྐྱོད་པར་རོགས་པ་ཞིག་དགོས་སམ། ཁྱི་ནི་ཁྱེད་རང་གོམ་བགྲོད་དུ་བསྐྱོད་པའི་རོགས་པ་བཟང་པོ་ཞིག་དང་། ཁྱེད་རང་དུས་ཐོག་ལ་གོམ་བགྲོད་བསྐྱོད་དགོས་པའི་ཅོང་བརྡ་གཏོང་མཁན་ཞིག་ཡིན་པས། དེས་ཁྱེད་རང་བདེ་ཐང་དང་སྤྲོ་སྣང་ངང་བཞག་ཐུབ་ངེས་ལ། ཁྱེད་ཀྱིས་ཁྱིར་གཙང་བཀྲུ་དང་། རྩེད་རོགས། དེ་བཞིན་ཉེ་འཁོར་གྱི་ཁོར་ཡུག་གཙང་བཟོ་བྱ་རྒྱུ་བཅས་ནི་ལུས་རྩེད་ཅིག་ཏུ་ངོས་འཛིན་བྱ་ཆོག
༤) ཁེར་རྐྱང་གི་ཚོར་བ་ལས་བྲལ་བ།
ཁྱེད་རང་ཁེར་རྐྱང་དང་སེམས་ངལ་དུ་ཚུད་སྐབས། ཁྱེད་ཀྱི་གཅེས་ཉར་སེམས་ཅན་དེ་དག་ནི་ཁྱེད་དང་ལྷན་ཅིག་ཏུ་ཡོད་ངེས་རེད། ཁྱེད་ཀྱིས་དེ་དག་ལ་ཡུན་རིང་བརྣགས་པའི་སེམས་གཏམ་དང་། སྙིང་གཏམ་ཅི་ཙམ་བཤད་ནའང་དེ་དག་གིས་གཅེས་ཉར་བྱས་པ་མ་ཟད། ཁྱེད་རང་ལ་ལྷད་མེད་ཀྱི་བརྩེ་འདང་དང་། རྟག་བརྟན་འགྱུར་མེད་ཀྱི་ཡིད་ཆེས་བྱ་ངེས་ཡིན།
༥) སེམས་ངལ་ཉུང་དུ་གཏོང་བ།
ཁྱེད་རང་སེམས་ངལ་ལས་གྲོལ་ལམ། གཅེས་ཉར་སེམས་ཅན་དེ་དག་གིས་སེམས་ངལ་དང་ཞེད་སྣང་ལས་གྲོལ་བར་རོགས་འདེགས་བྱ་ཐུབ་སྟེ། མཁས་པ་མང་པོས་མི་རྣམས་ཀྱིས་གཅེས་ཉར་སེམས་ཅན་དེ་དག་དང་དུས་འདའ་བ་བྱས་ཚེ། སེམས་ངལ་དང་དཀའ་སྡུག་མང་དག་ཅིག་ལས་གྲོལ་ཐུབ་ཀྱི་ཡོད་སྐོར་བརྗོད་ཡོད།
༦) མི་ཚེ་རིང་པོ་སྐྱེལ་ཐུབ།
ཞིབ་འཇུག་སྙན་ཐོ་ཁ་ཤས་ནང་ཁྱིམ་དུ་སེམས་ཅན་གསོ་སྐྱོང་བྱེད་མཁན་གྱི་མི་རྣམས་ནི་ཁེར་འདུག་བྱེད་མཁན་རྣམས་ལས་ཚེ་ཐག་རིང་བ་སྡོད་ཀྱིན་ཡོད་པ་གསལ་བཏོན་བྱས་ཡོད།
༧) ལག་རྩལ་ཡར་རྒྱས་འགྲོ་བ།
ཁྱེད་རང་གིས་རང་གི་ལག་རྩལ་ཡར་རྒྱས་གཏོང་ན་འདོད་དམ། སེམས་ཅན་གཅེས་སྐྱོང་བྱེད་མཁན་གྱི་མི་རྣམས་ནི་སྤྱི་ཚོགས་ནང་གཞན་དང་འབྲེལ་ལམ་ཡག་པོ་ཡོད་པའི་བཤད་སྲོལ་ཞིག་ཡོད་པ་རེད། དེ་བཞིན་གཅེས་ཉར་སེམས་ཅན་གསོ་སྐྱོང་བྱེད་མཁན་གྱི་ཁྱིམ་ཚང་ཚོའི་བྱིས་པ་དག་གི་ནར་སོན་གྱི་གོ་རིམ་ཁྲོད་དུའང་སྐྱེས་དངོས་དང་སྲོག་ཆགས་རིགས་ལ་བརྩེ་འདང་ཡོད་མཁན་ཞིག་ཏུ་འགྱུར་ངེས།
༨) བརྟན་བརླིང་།
ཁྱི་ཡོད་མཁན་གྱི་ཁྱིམ་ཚང་ནི་བརྟན་བརླིང་གི་ཐོག་ནས་ཁྱིམ་ཚང་གཞན་ལས་ལྡབ་འགྱུར་གྱི་བརྟན་བརླིང་དང་བདེ་འཇགས་ཆེ་བ་ཡོད་ལ། ཆོམ་རྐུན་སོགས་སླེབ་སྐབས་ཁྱི་ནི་ཉེན་བརྡ་གཏོང་མཁན་ཆེས་ཡག་ཤོས་དེ་ཡིན།
རྩོམ་ཡིག་གི་དྲ་ཐག Reasons why you should keep a pet
