མཚོ་སྔོན་ནས་ཡིན་པའི་བོད་ཀྱི་བུ་མོ་གཡང་མོ་མཚོས་ཨེ་ཤ་ཡའི་རི་ཁུལ་རྐང་འཁོར་འགྲན་སྡུར་ཁྲོད་ཨང་གསུམ་པ་བླངས་འདུག
ཕྱི་ལོ་ ༢༠༢༤ ལོའི་ཨ་ཤེ་ཡའི་རི་ཁུལ་རྐང་འཁོར་ལེགས་སྐྱེས་འགྲན་སྡུར་ཁྲོད་བོད་མཚོ་སྔོན་ཞིང་ཆེན་མདོ་ལ་རྫོང་ཁོངས་ནས་ཡིན་པའི་མཚོ་སྔོན་གྱི་རི་ཁུལ་རྐང་འཁོར་ལུས་རྩལ་པ་གཡང་མོ་མཚོ་མཉམ་ཞུགས་བྱས་ཏེ་ཨང་གསུམ་པའི་ཕུལ་བྱུང་གྲུབ་འབྲས་བླངས་ཡོད་འདུག
དེ་ཡང་ཟླ་འདིའི་ཕྱི་ཚེས་ ༨ ནས་ ༡༢ བར་ཕྱི་ལོ་ ༢༠༢༤ ལོའི་ཨེ་ཤ་ཡའི་རི་ཁུལ་རྐང་འཁོར་ལེགས་སྐྱེས་འགྲན་སྡུར་དང་ཨེ་ཤ་ཡའི་རི་ཁུལ་རྐང་འཁོར་གྱི་གཞོན་ནུའི་ལེགས་སྐྱེས་འགྲན་སྡུར་གྱི་ (U23)ཚོགས་ཆུང་དང་གཞོན་ནུའི་ཚོགས་ཆུང་གི་ཨོ་རྩལ་བྱེས་བགྲོད་འགྲན་སྡུར་དེ་མ་ལི་ཞི་ཡ་རུ་འཚོགས་ཡོད་ཅིང་། བུད་མེད་དར་མའི་བྱེས་བགྲོད་འགྲན་སྡུར་ནང་མཚོ་སྔོན་ཞིང་ཆེན་གྱི་རི་ཁུལ་རྐང་འཁོར་ལུས་རྩལ་པ་གཡང་མོ་མཚོས་ཨང་གསུམ་པའི་ཕུལ་བྱུང་གྲུབ་འབྲས་བླངས་ཡོད་འདུག
འདས་ལོར་གཡང་མོ་མཚོས་ཨེ་ཤ་ཡའི་བུད་མེད་དར་མའི་རྒྱལ་ཕམ་འགྲན་སྡུར་ནང་དངུལ་གྱི་རྟགས་མ་དང་བུད་མེད་དར་མའི་བྱེས་བགྲོད་འགྲན་སྡུར་ནང་ཨང་བཞི་པ་བླངས་མྱོང་ལ། ད་ལོར་བསྐྱར་དུ་བུད་མེད་ཀྱི་རྐང་འཁོར་འགྲན་སྡུར་ནང་རྒྱལ་ཁ་ཐོབ་པ་ཆགས་ཀྱི་ཡོད་འདུག
ཡང་ཕྱི་ལོ་ ༢༠༢༣ ལོའི་རྒྱ་ནག་གི་རི་ཁུལ་རྐང་འཁོར་མཉམ་འབྲེལ་འགྲན་སྡུར་གྱི་རྟིང་རྩོད་འགྲན་རིམ་ལས། འགྲན་ཁུལ་ས་ཚིགས་ཡོངས་ཀྱི་སྐར་གྲངས་ཕྱོགས་བསྡོམས་བྱས་རྗེས། མཚོ་སྔོན་གྱི་ལུས་རྩལ་རུ་ཆེན་གཉིས་པའི་ལུས་རྩལ་པ་གཡང་མོ་འཚོ་ལགས་ལ་མཐའ་མའི་སྐར་གྲངས་ ༣༧༥ ཐོབ་སྟེ་ལོ་འཁོར་རྐང་འཁོར་འགྲན་རིམ་ཡོངས་ཀྱི་ཨང་དང་པོ་ཐོབ་འདུག དེ་བཞིན་མཚོ་སྔོན་གྱི་ལུས་རྩལ་བ་ཀླུ་མགོན་རྒྱལ་ལགས་ལ་ཐེངས་འདིའི་རི་ཁུལ་རྒྱང་བགྲོད་རྐང་འཁོར་འགྲན་སྡུར་ཁྲོད་ཨང་དྲུག་པ་ཐོབ་ཡོད་འདུག
བོད་ཀྱི་ལུས་རྩལ་པ་གཡང་མོ་འཚོ་ལགས་ནི་ཕྱི་ལོ་ ༢༠༠༣ ལོར་བོད་མཚོ་སྔོན་ཞིང་ཆེན་མདོ་ལ་རྫོང་ནས་སྐྱེས་ཡོད་ཅིང་། ཕྱི་ལོ་ ༢༠༡༩ ལོར་རྒྱ་ནག་རྒྱལ་ཡོངས་རི་ལུང་ཐང་རྐང་འཁོར་མཉམ་འབྲེལ་འགྲན་སྡུར་ཁྲོད་ཁོང་མོའི་རུ་ཁག་ལ་ཨང་རིམ་བདུན་པ་ཐོབ་ཡོད་པ་དང་། ཕྱི་ལོ་ ༢༠༢༣ ལོའི་རྒྱ་ནག་རི་ལུང་ཐང་གསུམ་རྐང་འཁོར་མཉམ་འབྲེལ་འགྲན་སྡུར་ས་ཚིགས་དང་པོ་ལས། ཁོང་མོར་བུད་མེད་དར་མའི་རུ་ཁག་གཉིས་པའི་ནང་དུ་ཞུགས་ཆོག་པའི་གོ་སྐབས་ཐོབ་འདུག དེ་བཞིན་ལོ་དེའི་ཕྱི་ཟླ་ ༦ ཚེས་ ༡༧ ཉིན་རྒྱ་ནག་ཧྥུ་ཅིན་ཞིང་ཆེན་གྱི་མ་འོངས་བུམ་པ་རྟགས་མའི་རི་ལུང་ཐང་གསུམ་རྐང་འཁོར་མཉམ་འབྲེལ་འགྲན་སྡུར་ཁྲོད་ཨང་གསུམ་པ་ཐོབ་ཡོད་པ་མ་ཟད། ཕྱི་ཟླ་ ༧ པའི་ནང་རྒྱ་ནག་རྒྱལ་ཡོངས་ལུས་རྩལ་རུ་ཁག་ཏུ་བདམས་ཐོན་བྱུང་ཡོད་འདུག
གསར་འགོད་པ། སྐལ་བཟང་སྦྱིན་པ།
