རྒྱ་ནག་གཞུང་གིས་བོད་དབུས་ཁུལ་གྱི་ས་གནས་མང་ཆེ་བའི་བོད་ཕྲུག་རྣམས་གུང་སེང་སྐབས་རང་ཁྱིམ་དུ་འདུག་གི་མ་བཅུག་པར་དམག་སྦྱོང་ལ་ཞུགས་དགོས་པའི་བཙན་བཀའ་བཏང་ཡོད་འདུག
འདས་ལོའི་ལོ་མཇུག་ནས་རྒྱ་ནག་གཞུང་གིས་བོད་ཕྲུག་རྣམས་ཀྱི་གུང་སེང་སྐབས་སུ། རང་ཁྱིམ་སོགས་སུ་ལྷོད་དལ་ངང་དུས་ཡུན་རིང་པོར་སྡོད་མི་ཆོག་པའི་ཁར། བོད་སྐད་བོད་ཡིག་སྦྱོང་སའི་ཟབ་སྦྱོང་ཁག་ལ་ཞུགས་མི་ཆོག་པ་མ་ཟད། སློབ་མ་རྣམས་ཀྱི་དོན་སྙིང་ལྡན་པའི་གུང་སེང་ཟེར་བ་ཞིག་གི་འོག་ནས། དམག་དོན་ཟབ་སྦྱོང་སོགས་ལ་ཞུགས་དགོས་པའི་དྲིལ་བསྒྲགས་ཤུགས་ཆེན་བྱེད་མགོ་བཙུགས་ཡོད་པའི་གནས་ཚུལ་ཐོན་འདུག
འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། འདས་ལོའི་དགུན་ཁའི་གུང་སེང་སྐབས། རྒྱ་ནག་ཏུ་སློབ་གཉེར་བྱེད་མུས་ཡིན་པའི་བོད་ཕྲུག་མང་པོ་ཞིག་བོད་ནང་དུ་གུང་སེང་ལ་སྐྱོད་སྐབས། རྒྱ་ནག་གཞུང་གིས་སློབ་མ་རྣམས་ཀྱིས་དོན་སྙིང་ལྡན་པའི་གུང་སེང་དང་རྒྱལ་ཁབ་ལ་བློ་བརྟན་འགྱུར་མེད་བྱེད་དགོས་ལུགས་བཤད་ནས། བོད་དབུས་ཁུལ་གྱི་ལྷ་ས་དང་གཞིས་ཀ་རྩེ། རྩ་མདའ་སོགས་ས་གནས་མང་ཆེ་བའི་བོད་ཕྲུག་མང་པོ་ཞིག་བོད་ཀྱི་ས་མཐོ་ཁག་ཏུ་རྟེན་གཞི་བྱས་པའི་དམག་སྒར་ཁག་ཏུ་དམག་དོན་ཟབ་སྦྱོང་ཟེར་བའི་ཆེད་དུ་མངགས་ཡོད་ཅིང་། དེས་སློབ་མ་རྣམས་ཀྱིས་རྒྱལ་ཁབ་ལ་དགའ་ཞེན་ཡོད་པ་སོགས་མཚོན་གྱི་ཡོད་པས། རྗེས་སུ་ཡང་ཡང་བསྐྱར་དུ་དམག་དོན་ཟབ་སྦྱོང་ལ་ཞུགས་དགོས་པའི་སྐུལ་མ་དང་། ཕ་མ་ཚོས་ཀྱང་བྱིས་པ་རྣམས་དམག་སྦྱོང་དུ་ཞུགས་འཇུག་དགོས་སྐོར་སོགས་འགྲེལ་བརྗོད་གནང་བྱུང་།
ཡང་ཁོང་གིས། སྤྱིར་བོད་ཕྲུག་རྣམས་གུང་སེང་སོགས་ཀྱི་སྐབས་རང་གནས་སུ་ལོག་སྐབས། ཕ་མ་ཚོས་བོད་ཕྲུག་རྣམས་བོད་སྐད་ཡིག་གི་ཟབ་སྦྱོང་སོགས་ལ་ཞུགས་འཇུག་གི་ཡོད་ཀྱང་། འདས་པའི་ལོ་ཤས་གོང་ནས་རྒྱ་ནག་གིས་བོད་སྐད་ཡིག་གི་ཟབ་སྦྱོང་མང་པོ་ཞིག་སྒོ་བརྒྱབ་ཏུ་བཅུག་ཡོད་པ་མ་ཟད། གཞུང་གིས་ཕ་མ་ཚོས་བོད་ཕྲུག་རྣམས་བོད་སྐད་ཡིག་གི་ཟབ་སྦྱོང་སོགས་སུ་ཞུགས་པར་དམ་དྲག་ཆེན་པོ་བྱེད་ཀྱི་ཡོད་སྐོར་དང་། སློབ་མ་རྣམས་དམག་དོན་ཟབ་སྦྱོང་སོགས་ལ་ཞུགས་ན། རྒྱལ་ཁབ་ཀྱིས་སློབ་ཡོན་སོགས་ཀྱི་ཐད་ལ་རོགས་འདེགས་བྱ་རྒྱུ་ཡིན་ལུགས་དང་། འདི་ལོ་ནས་བོད་ཁུལ་གྱི་འཛིན་གྲྭ་བརྒྱད་པ་ཡན་གྱི་སློབ་མ་རྣམས་དམག་སྦྱོང་ལ་ངེས་པར་ཞུགས་བཅུག་རྒྱུ་ཡིན་པའི་དྲིལ་བསྒྲགས་ཀྱང་ཤུགས་ཆེན་བྱེད་ཀྱི་ཡོད་སྐོར་སོགས་འགྲེལ་བརྗོད་གནང་བྱུང་།
ཡང་འབྲེལ་ཡོད་ཅིག་གིས། བོད་མགོ་ལོག་ཁུལ་གྱི་ས་གནས་ཁ་ཤས་ལ་ཕྲུ་གུའི་གུང་སེང་སྐབས། བོད་ཡིག་སྦྱོང་བཅུག་པ་སོགས་ཀྱི་རྐྱེན་བྱས་ནས། གཞུང་གི་མི་སྣ་རོང་འབྲོག་ཁུལ་དུ་ཆེད་དུ་ཕྱིན་ནས། ཁྱིམ་ཚང་དེ་དག་གི་དབུལ་སྐྱོར་དང་། རོགས་རམ་ཟེར་བ་སོགས་སྤྲོད་མཚམས་འཇོག་རྒྱུ་ཡིན་པའི་ཉེན་བརྡའང་བཏང་ཡོད་སྐོར་དང་། འདས་པའི་ལོ་ཤས་གོང་ནས་ཤར་ཏུ་ཀི་སི་ཐན་ཁུལ་དུའང་རྒྱ་ནག་གིས་སློབ་མ་རྣམས་དམག་སྦྱོང་སོགས་ལ་ཞུགས་བཅུག་གི་ཡོད་པའི་གནས་ཚུལ་ཐོས་ཀྱིན་ཡོད་སྐོར་དང་། བོད་མདོ་སྨད་ཁུལ་གྱི་ས་གནས་ཁག་ཁ་ཤས་སུ་དེ་རིང་དྲུག་གཅིག་བྱིས་པའི་དུས་ཆེན་ལའང་། རྒྱ་ནག་གི་དམག་ལྭ་དང་སྐེ་བཏགས་དམར་པོ་སོགས་བཏགས་ནས་སྲུང་གཙི་བྱེད་དུ་འཇུག་གིན་ཡོད་སྐོར་སོགས་ཀྱང་འགྲེལ་བརྗོད་གནང་བྱུང་།
འདས་པའི་ལོ་ཤས་གོང་ནས་རྒྱ་ནག་གཞུང་གིས་བོད་ཕྲུག་རྣམས་གུང་སེང་སོགས་ཀྱི་སྐབས། སྐད་ཡིག་ཟབ་སྦྱོང་དང་ཆོས་ཕྱོགས་ཀྱི་བྱེད་སྒོར་ཞུགས་པར་དམ་དྲག་ཤུགས་ཆེན་བྱེད་ཀྱི་ཡོད་ལ། ཕྱི་ལོ་ ༢༠༢༠ ཡི་ལོ་མཇུག་ཙམ་ནས་རྒྱ་ནག་གཞུང་གིས་རྒྱ་དཀར་ནག་གི་མཐའ་མཚམས་ས་ཐིག་ (LAC) ཕྱོགས་སུ་ཁེལ་བའི་བོད་ཀྱི་གྲོང་ཚོ་ཁག་གི་བྱིས་པ་དང་རྒས་འཁོགས་ཕུད་པའི་གཞན་ཕོ་མོ་དབྱེར་མེད་ཀྱིས་གྲོང་མི་ཡོངས་ལ་དམག་སྦྱོང་སྤྲད་དེ། མཐའ་མཚམས་སྲུང་སྐྱོབ་སླད་དམག་འཁྲུག་རྒྱག་དགོས་ཟེར་བའི་དམག་དོན་ལས་འགུལ་སྤེལ་ཡོད་སྐོར་བརྗོད་པ་ལྟར། རྒྱ་ནག་གཞུང་གིས་བོད་ཀྱི་ས་མཚམས་ཁག་གི་ཁྱིམ་ཚང་རེའི་ཁྱིམ་མི་གཅིག་ངེས་པར་དུ་བཅིངས་གྲོལ་དམག་མིར་ཞུགས་བཅུག་སྟེ། རྒྱ་དཀར་ནག་བར་རྩོད་རྙོག་ཏུ་གྱུར་བའི་ས་མཚམས་སྲུང་སྐྱོབ་བྱེད་སླད་དམག་ཤུགས་རྒྱ་སྐྱེད་བཏང་ཡོད་སྐོར་བརྗོད་འདུག
གསར་འགོད་པ། དཔལ་ལྡན། རྩོམ་སྒྲིག་པ་སྐལ་བཟང་སྦྱིན་པ།
