༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་བློན་མུ་དྷི་མཆོག་ལ་བསྐྱར་དུ་རྒྱལ་ཁ་ཐོབ་པར་འཚམས་འདྲི་དང་སྦྲགས་རྒྱ་གར་མི་མང་གི་མངོན་འདོད་བསྒྲུབ་པར་འཕྲད་པའི་དཀའ་ངལ་ཡོངས་རྫོགས་ལ་གདོང་ལེན་གནང་ཐུབ་པའི་ཐུགས་སྨོན་མཛད་འདུག
དེ་རིང་ཕྱི་ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་བློན་མུ་དྷི་མཆོག་དང་ཁོང་གི་སྲིད་དོན་ཚོགས་པར་བསྟུད་མར་ཐེངས་གསུམ་པའི་གཞུང་འཛིན་རྒྱལ་ཁ་ཐོབ་པར་འཚམས་འདྲི་མཛད་པའི་ནང་། ངོས་ནས་རྒྱ་གར་གྱིས་འཛམ་གླིང་གི་དམངས་གཙོའི་རྒྱལ་ཁབ་ཆེ་ཤོས་ཀྱི་འོས་འགན་འཁུར་བཞིན་ཡོད་པར་བསྟོད་བསྔགས་དང་སྤོབས་པ་སྐྱེ་ཡི་ཡོད། འོས་འདེམས་འདི་དག་གིས་རྒྱ་གར་མི་མང་གི་དམངས་གཙོའི་རིན་ཐང་ག་འདྲ་ཡིན་པ་མཚོན་གྱི་ཡོད། རྒྱ་གར་ནི་གནའ་བོའི་ཤེས་ཡོན་དར་བའི་རྒྱལ་ཁབ་ཅིག་ཡིན་ལ། འཛམ་གླིང་གི་ཚོགས་སྡེ་ཁག་ཏུ་འཚེ་བ་མེད་པ་དང་སྙིང་རྗེའི་རྩ་དོན་གོང་སྤེལ་གཏོང་མཁན་ཞིག་ཆགས་ཡོད། ཅེས་གསུངས་འདུག
ཡང་༧མགོན་པོ་མཆོག་གིས། གོ་སྐབས་འདི་བརྒྱུད་ནས་ངོས་ཀྱིས་རྒྱ་གར་གཞུང་དང་མི་མང་གིས་བོད་མི་རྣམས་ལ་མཐུན་རྐྱེན་གང་ལེགས་སྦྱར་བར་ཐུགས་རྗེ་ཆེ་ཞུ་རྒྱུ་ཡིན། རྒྱ་གར་གྱི་བྱམས་སྐྱོང་དང་གཏོང་ཕོད་ལ་བརྟེན་ནས་བཙན་བྱོལ་དུ་ང་ཚོས་ཞི་བདེ་དང་རང་དབང་ཐོག་རང་ཉིད་ཀྱི་གནའ་བོའི་རིག་གཞུང་སྲུང་སྐྱོབ་བྱེད་ཐུབ་ཡོད། རྒྱ་གར་གྱི་མི་རབས་གསར་པའི་གཅེན་གཅུང་ཁྲོད་དུ། ང་ཚོས་རྒྱ་གར་གྱི་གནའ་བོའི་རིག་གཞུང་གོ་རྟོགས་སྤེལ་བར་གྲུབ་འབྲས་ཆེན་པོ་ཐོབ་ཡོད། ཅེས་གསུངས་འདུག
མཇུག་ཏུ། ཁྱེད་ཀྱི་སྲིད་བློན་གྱི་ལས་ཡུན་གསར་པའི་ནང་དུ། སྐུ་ཉིད་ཀྱིས་འབྱུང་འགྱུར་རྒྱ་གར་མི་མང་གི་རེ་བ་དང་མངོན་འདོད་བསྒྲུབ་པར་འཕྲད་པའི་དཀའ་ངལ་ཡོངས་རྫོགས་ལ་གདོང་ལེན་གནང་ཐུབ་པའི་སྨོན་འདུན་ཡོད། ཅེས་ཐུགས་སྨོན་མཛད་འདུག
ད་ལོ་ནི་སྲིད་བློན་ནཱ་རན་ཌ་མུ་དྷི་མཆོག་ནས་རྒྱ་གར་གྱི་སྲིད་བློན་གྱི་རྒྱལ་ཁ་ཐོབ་པ་ཐེངས་གསུམ་པ་དེ་ཡིན་ལ། ཁོང་ནི་གྷོ་ཇི་རཱ་ཊིའི་མེ་འཁོར་ཐབ་ཚང་ནང་ལས་ཀ་བྱེད་མཁན་ཞིག་ནས་ལྡི་ལི་མཐོ་སློབ་ནས་སྲིད་དོན་ཚན་རིག་གི་རིག་གནས་རབ་འབྱམས་པའི་ལག་འཁྱེར་བླངས་བ་དང་། གྷོ་ཇི་རཱ་ཊིའི་གཙུག་ལག་སློབ་ཆེན་ནས་སྲིད་དོན་ཚན་རིག་གི་གཙུག་ལག་རབ་འབྱམས་པའི་ལག་འཁྱེར་བླངས་ཡོད་འདུག ཕྱི་ལོ་ ༡༩༩༥ ལོར་བྷི་ཇི་པི་སྲིད་དོན་ཚོགས་པའི་དྲུང་ཆེར་བདམས་ཐོན་བྱུང་སྟེ། ཧི་མ་ཅལ་དང་ཧར་ཡ་ན་མངའ་སྡེའི་ནང་སྲིད་དོན་གྱི་ཕྱག་ལས་གནང་། ཕྱི་ལོ་ ༡༩༩༨ ལོར་གྷོ་ཇི་རཱ་ཊིའི་གྲོས་ཚོགས་འཐུས་མིར་བདམས། ཕྱི་ལོ་ ༢༠༠༡ ལོ་ནས་བཟུང་གྷོ་ཇི་རཱ་ཊི་མངའ་སྡེའི་སྤྱི་ཁྱབ་བློན་ཆེན་གྱི་ཕྱག་ལས་གནང་ཞིང་། ཕྱི་ལོ་ ༢༠༡༠ ལོར་༧གོང་ས་རྒྱལ་བ་རིན་པོ་ཆེ་མཆོག་དང་མཇལ་མོལ་གནང་ཡོད་པ་རེད། ཕྱི་ལོ་ ༢༠༡༤ ལོ་ནས་ཁོང་རྒྱ་གར་གྱི་སྲིད་བློན་དུ་འདེམས་ཐོན་བྱུང་ཡོད་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
