ཀ་རིང་གི་དུད་ཁྱིམ་མང་པོ་བཙན་གྱིས་གནས་སྤོར་གཏོང་གིན་འདུག

རྒྱ་ནག་གཞུང་གིས་བོད་མདོ་སྨད་ཡ་རྫི་རྫོང་ཀ་རིང་ཡུལ་ཚོའི་ཡ་ཀ་དང་བིས་ཚང་སྡེ་བ་གཉིས་ཀྱི་ཕྱེད་ཀ་ས་གནས་གཞན་དུ་གནས་སྤོར་དགོས་བཙན་བཀའ་བཏང་འདུག

དེ་རིང་འདི་གའི་གསར་འགོར་པར་གནས་ཚུལ་འབྱོར་བ་ལྟར་ན། འདི་ལོའི་ཕྱི་ཟླ་ ༡༠ ཟླ་མཇུག་ཙམ་ནས་རྒྱ་ནག་གཞུང་གིས་མཚོ་སྔོན་ཞིང་ཆེན་མཚོ་ཤར་ས་ཁུལ་ཡ་རྫི་ (རྒྱ་སྐད་དུ་ཞིན་ཧྭ།) རྫོང་ཀ་རིང་བོད་རིགས་ཞང་ཁོངས་ཀྱི་གནས་རི་ཨ་མྱེས་ར་སྟོད་ཉིལ་སྲིད་རབས་བཤད་ནས། རི་འདབས་ཀྱི་ཡ་ཀ་སྡེ་བ་དང་བིས་ཚང་སྡེ་བ་གཉིས་ཀྱི་ཕྱེད་ཀ་ས་གནས་གཞན་དུ་སྤོར་དགོས་པའི་བཀོད་ཁྱབ་བཏང་ཡོད་པ་དང་། ཨ་མྱེས་ར་སྟོད་ནི་ཀ་རིང་ལུང་པའི་གནས་རི་གཙོ་བོ་ཡིན་པ་དང་། ཀ་རིང་ལུང་པར་ཁྱོན་ས་མ་འབྲོག་གི་སྡེ་བ་ཆེ་ཆུང་ ༢༢ ཡས་མས་ཤིག་དང་། ཡ་ཀ་སྡེ་བར་དུད་ཁྱིམ་  ༢༠༠ ཡས་མས་དང་། བིས་ཚང་སྡེ་བར་དུད་ཁྱིམ་ ༡༠༠ ལྷག་ཡོད་པའི་གྲས་ནས་བརྒྱ་ཆའི་སུམ་བཅུ་ལྷག་ཨ་མྱེས་ར་སྟོད་གནས་རིའི་རི་འདབས་དང་རི་སྟེང་དུ་འཁེལ་ཡོད་འདུག

གནས་ཚུལ་མཁོ་སྤྲོད་པས། གནས་སྤོར་དུད་ཁྱིམ་སོ་སོར་གནས་སྤོར་གྱི་འདེམ་ཀ་གཉིས་ལས་མེད་པ་དང་། དེ་ལས་གཅིག་ནི་རྒྱ་ནག་གཞུང་གིས་གནས་སྤོར་ཁྱིམ་ཚང་རེར་ཁ་གསབ་རོགས་དངུལ་རྒྱ་སྒོར་ཁྲི་ ༡༥ སྤྲོད་རྒྱུ་དང་། ཡང་ན་ཡ་རྫི་རྫོང་ཐོག་ཏུ་རྒྱལ་ཁབ་ཀྱིས་ལས་པའི་ཁང་ཆུང་ཁག་ཅིག་གི་ནང་སྤོར་དགོས་པ། འདེམ་ཀ་དེ་གཉིས་ལས་གཅིག་མ་མ་གཏོགས་འདེམ་མི་ཆོག་པ་སྟེ། སྒོར་མོ་ལེན་མཁན་ལ་སྡོད་ཁང་མེད་པ་དང་། སྡོད་ཁང་ལེན་མཁན་ལ་སྒོར་མོ་མེད་པར་མ་ཟད། རང་ཡུལ་གྱི་སྡོད་ཁང་དང་ས་ཞིང་ཚང་མ་འདོར་དགོས་པའི་གནས་སྟངས་བྱུང་འདུག ཅེས་བརྗོད་བྱུང་།

ས་གནས་ཡུལ་མི་ཚོས་བརྗོད་པའི་གནས་ཚུལ་ལྟར་ན། རྒྱ་ནག་གཞུང་གི་འབྲེལ་ཡོད་ཚན་ཁག་གིས། ལོ་གཅིག་གཉིས་ཀྱི་སྔོན་ནས་གནས་རི་དེར་ཚན་རིག་རྟོག་ཞིབ་དང་སྔོག་འདོན་ཚོད་ལྟ་བྱས་ཡོད་ནའང་། ད་བར་དུ་རྒྱབ་རི་དེ་གར་གཏེར་རྫས་ཅི་ཞིག་ཡོད་མེད་སྡེ་མི་སུས་ཀྱང་ཤེས་རྟོགས་ཐུབ་མེད་པ་རེད་ལ། བཤད་སྲོལ་ལ་རྒྱབ་རིའི་ཁོག་པར་མཆོད་རྟེན་བརྒྱད་ཡོད་པ་རེད་ཟེར་སྲོལ་ཡོད་ནའང་། མཆོད་རྟེན་དེ་དག་གི་རིན་ཐང་དང་ལོ་རྒྱུས་ཁ་གསལ་ཞིག་མེད་ཅིང་། ཡང་གནས་རི་དེའི་སྟེང་དུ་རྡེའུ་འབུམ་ཞིག་ཡོད་པ་དང་། དེ་གར་རིག་གནས་གསར་བརྗེའི་སྐབས་སུ་དཔེ་ཆ་དང་མཆོད་རྫས་རྩ་ཆེན་མང་པོ་གཏེར་དུ་སྦལ་བར་བཤད་སྲོལ་འདུག་ནའང་།  རྒྱ་ནག་གིས་རྒྱབ་རི་དེ་སྔོག་འདོན་བྱེད་དོན་ནི་བཤད་སྲོལ་དུ་མཆོད་རྟེན་དེ་དག་མ་ཡིན་པར་གཏེར་རྫས་རིགས་ཤིག་ཡིན་པར་ཡིད་ཆེས་བྱེད་ཀྱི་ཡོད་འདུག

ད་སྔར་ཡ་ཀ་སྡེ་བའི་དུད་ཁྱིམ་ཁ་ཤས་ཤིག་འུ་ཐུག་ནས་ཡ་རྫི་རྫོང་གི་རྒྱལ་ཁབ་ཀྱི་ཁང་པ་ཟེར་བའི་ཁང་ཆུང་དེ་དག་གི་ནང་སྤར་ཟིན་པ་དང་། ཁྱིམ་ཚང་ཁ་ཤས་གནས་སྐབས་སུ་རང་སར་བསྡད་ཡོད་ནའང་། སྡེ་བ་དེའི་རྒྱབ་རིའི་ངོས་ཕྱོགས་ཀྱི་དུད་ཁྱིམ་ཚང་མ་ངེས་པར་དུ་གནས་སྤོར་དགོས་ཀྱི་ཡོད་པས། རྒྱལ་ཁབ་ཀྱིས་སྟེར་ཟེར་བའི་རྒྱ་སྒོར་ཁྲི་༡༥ ཙམ་གྱིས་ས་གནས་གཞན་དུ་ཁང་ས་ཉོ་སྤྱད་དང་འཛུགས་སྐྲུན་གྱི་འགྲོ་གྲོན་ལ་མི་འདང་བའི་དཀའ་ངལ་དང་། ལྷག་པར་དུ་མང་ཚོགས་ཀྱི་འཚོ་རྟེན་གཙོ་བོ་ས་ཞིང་འདོར་དགོས་པའི་རྐྱེན་གྱིས། གནས་སྤོར་ཡང་མ་ཐུབ་པ་དང་སྡོད་དུའང་མ་བཅུག་པའི་དཀའ་ངལ་འཕྲད་འདུག

ཡ་རྫི་རྫོང་ཀ་རིང་ཞང་གི་ཡ་གི་དང་མ་གི་སྡེ་བ་གཉིས་གྱི་འཚོ་རྟེན་གཙོ་བོ་ཞིང་ལས་ཡིན་པ་དང་། འབྲུ་རིགས་ལ་གྲོ་ནས་སྲན་གསུམ་དང་། ཟར་མ་དང་ལོ་དཀར་སོགས་འདེབས་ལས་བྱེད་ཀྱི་ཡོད་པ་དང་། ཡུལ་མི་ཚོར་ས་ཞིང་གི་ཐོན་ཁུངས་ཕུན་སུམ་ཚོགས་པ་ཡོད་འདུག

གསར་འགོད་པ། སྐལ་བཟང་སྦྱིན་པ།