བོད་ནང་གི་ཚེ་འདས་རྣམས་ཀྱི་ཆེད་དུ་ཞག་ཞེ་དགུའི་རིང་ལྷག་དཀར་སྐོར་བྲོ་མཚམས་འཇོག་ཡོང་བའི་འབོད་སྐུལ་ཞུས།

བོད་དིང་རི་ཁུལ་དུ་ས་ཡོམ་བརྒྱབ་ནས་མི་རྒྱུ་གཉིས་ལ་གནོད་འཚེ་ཚབས་ཆེན་ཐེབས་པར་བརྟེན་བཙན་བྱོལ་དུ་ཡོད་པའི་བོད་མི་རྣམས་ཀྱིས་ཞག་ཞེ་དགུའི་རིང་ལྷག་དཀར་སྐོར་བྲོ་མཚམས་འཇོག་ཡོང་བའི་འབོད་སྐུལ་ཞུས་འདུག

ཁ་སང་ཕྱི་ཚེས་ ༢༩ ཉིན་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱིས་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། ཟླ་འདིའི་ཕྱི་ཚེས་ ༧ ཉིན་གྱི་ཞོགས་པ་བོད་ཀྱི་སྟོད་དིང་རི་ས་ཁུལ་གྱིས་གཙོས་ས་གནས་ཁག་འགའ་ཤས་ལ་ས་ཡོམ་ཤུགས་ཚད་རིམ་པ་ ༧།༡ བརྒྱབ་སྟེ་མི་རྒྱུ་ཕྱུགས་གསུམ་ལ་གོད་ཆགས་ཧ་ཅང་ཆེན་པོ་བྱུང་ཡོད་པར། ས་ཡོམ་གྱི་འཇིགས་པའི་ཁྲོད་གསོན་པོར་གནས་པ་རྣམས་ལ་གདུང་སེམས་མཉམ་སྐྱེད་དང་། ཚེ་སྲོག་ཤོར་བ་རྣམས་ལ་མྱ་ངན་གུས་འདུད་མཚོན་སླད། བཙན་བྱོལ་ནང་གནས་འཁོད་བོད་མི་རྣམས་ནས་བདུན་རེའི་ལྷག་དཀར་སྐོར་བྲོ་འཁྲབ་མཚམས་བཞག་ཡོད་པ་ལྟར། མུ་མཐུད་ཞག་ཞེ་དགུ་མ་འཁོར་བར་ལྷག་དཀར་སྐོར་བྲོ་མཚམས་འཇོག་ཡོང་བའི་འབོད་སྐུལ་ཞུ་ཡི་ཡོད། ཅེས་འཁོད་འདུག

ཟླ་འདིའི་ཕྱི་ཚེས་ ༧ ཉིན་བོད་དིང་རི་རྫོང་དང་། ངམ་རིང་རྫོང་། ལྷ་རྩེ་རྫོང་། ངམ་རིང་རྫོང་ཁོངས་སོགས་སུ་ས་འགུལ་ཚད་རིམ་ ༧།༡ ཅན་ཞིག་བརྒྱབ་སྟེ། དིང་རི་རྫོང་ཁོངས་སུ་ཁང་པ་དང་གཞུང་ལམ་སོགས་ལ་རྡིབ་སྐྱོན་བྱུང་ནས་མི་རྒྱུ་གཉིས་ལ་གནོད་འཚེ་ཚབས་ཆེན་བཟོས་ཡོད་ཅིང་། ས་ཡོམ་གྱི་ཤུགས་རྐྱེན་རྒྱ་གར་དང་། བྷང་ལ་ཌེ་ཤི། བལ་ཡུལ་སོགས་ཀྱི་ས་འབྲེལ་ཁུལ་དུའང་བསླེབས་ཡོད་འདུག་ལ། ད་བར་ཉུང་མཐར་མི་གྲངས་ ༡༢༦ རྐྱེན་འདས་དང་། མི་གྲངས་ ༣༣༨ ལ་རྨས་སྐྱོན་ཐེབས་ཡོད་པ་དང་། ཁང་པ་ ༣༦༠༩ ལྷག་ལ་རྡིབ་སྐྱོན་བྱུང་ཡོད་འདུག ད་ལྟའི་ཆར་རྒྱ་ནག་གཞུང་གིས་དིང་རིའི་ཕྱོགས་སུ་དམ་དྲག་ཤུགས་ཆེན་བྱས་དང་བྱེད་མུས་ཡིན་པར་བརྟེན། ས་ཡོམ་ཁྲོད་གནོད་འཚེ་ཐེབས་པའི་ཛ་དྲག་གི་གནས་ཚུལ་གཅིག་ཀྱང་སྤེལ་བཅུག་མེད་ལ། རྐྱེན་འདས་དང་རྨས་སྐྱོན་ཕོག་པའི་མིའི་གྲངས་འབོར་སོགས་དང་འབྲེལ་བའི་གནས་ཚུལ་རིགས་ལ་བཀག་སྡོམ་ཤུགས་ཆེན་བྱས་ཡོད།

གཞན་ཡང་། ཟླ་འདིའི་ཕྱི་ཚེས་ ༨ ཉིན་རྒྱབ་ཙམ་ལ་བོད་མགོ་ལོག་རྨ་སྟོད་ཕྱོགས་སུ་ཚད་རིམ་ ༥།༨ ཅན་གྱི་ས་ཡོམ་ཞིག་བརྒྱབ་སྟེ་མི་ཁག་ཅིག་ལ་གནོད་འཚེ་བཏང་ཡོད་པའི་གནས་ཚུལ་འདུག་ཀྱང་། རྒྱ་ནག་གཞུང་གིས་ས་ཡོམ་རྒྱག་ས་དེ་ནི་རི་ཁུལ་ཡིན་པས་མི་རྒྱུ་གཉིས་ལ་གནོད་འཚེ་གང་ཡང་ཐེབས་མེད་སྐོར་བསྒྲགས་འདུག འཛམ་གླིང་གི་རིག་མཛོད་ཆེན་མོ་ཝེ་ཁེ་ཕེ་ཌི་ཡ་ (Wikipedia) ལྟར་ན། བོད་དིང་རི་ཁུལ་དུ་ས་ཡོམ་བརྒྱབ་སྟེ་མི་རྒྱུ་གཉིས་ལ་གནོད་འཚེ་ཚབས་ཆེན་བཟོས་ཡོད་ཅིང་། བོད་དང་ས་འབྲེལ་ཡིན་པའི་བལ་ཡུལ་ནང་གི་མི་གྲངས་ ༡༣ ལ་རྨས་སྐྱོན་ཕོག་ཡོད་སྐོར་སོགས་གསལ་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།